Faataunuu Lou Faamoemoega o se Faifeautalai

Vaai faalemafaufau o loo iai sau uo e le o se tagata o le Ekalesia. Pe a fesili lau uo po o a au fuafuaga i le asō, e te ta’ua o le a e auai atu i se vasega faasauniuni mo faifeautalai. Ona fesili lea o lau uo, “O le a le mea e fai e faifeautalai?”

Faitau le “O Lou Faamoemoega” (Tala’i La’u Talalelei, 1) ma le saunoaga lenei mai ia Elder D. Todd Christofferson.

Faamolemole aua nei faagaloina mataupu 1 o le Tala’i La’u Talalelei ma lana fesili “O le a lo’u faamoemoega i le avea ai ma se faifeautalai?” Ia talitonu oe lava ia i le faamoemoega o le aumaia o tagata ia Keriso e ala i aoaoga faavae ma sauniga o le talalelei toefuataiina, ma o le a e malamalama ai o le faasoaina atu o le talalelei e le o se polokalama; o se galuega—le galuega a le Tama, le Alo, ma le Agaga Paia. (D. Todd Christofferson, “Aisea Tatou te Faasoa atu ai le Talalelei,” Ensign, Aok. 2014, 36)

Talanoaina pe faapefea e lou malamalama lelei i lenei faamoemoega ona aafia ai mea nei:

• Auala e saunia ai mo se misiona

• O au gaoioiga o se faifeautalai

Faitau le “O Lou Tofiga e Aoao Atu le Talalelei Toefuataiina” (Tala’i La’u Talalelei, 1–2). A o e suesue, faailoga:

1. Mafuaaga tatou te valaaulia ai isi e o mai ia Iesu Keriso.

2. O mea e mafai ona tatou faia e fesoasoani ai i isi ia o mai ia Iesu Keriso.

• Na faapefea ona aumaia e le mulimuli i le Faaola le “fiafia sili atu, faamoemoe, filemu, ma le faamoemoega” (itulau 2) ia te oe po o tagata e te iloa?

Faatu se sini e fesootai i mea ua e suesueina. Faaaoga manatu e pei o manatu nei pe mafaufau foi i ou lava manatu.

• Faaauau pea ona faataitai lau taulotoina o le faamoemoega a faifeautalai. Faasoa atu mai lou manatuaga i se tagata o le aiga, po o se uo. Mafaufau i mea ua uma ona e faia pe mafai foi ona e amata faia o se vaega o le faamoemoega a faifeautalai.

• Asiasi i le itulau “Faasoaina Atu o le Talalelei” i le ChurchofJesusChrist.org. Vaavaai mo manatu e mafai ona fesoasoani ia te oe e faasoa atu ai le talalelei i isi.

• Mafaufau ma le agaga tatalo i se tasi e te manao e fesoasoani e latalata atili atu ia Iesu Keriso ma maua faamanuiaga o Lana talalelei. Fuafua po o le a se mea o le a e faia e fesoasoani ai ia i latou (mo se faataitaiga, “O le a ou tatalo mo lenei tagata ma valaaulia i latou i le lotu i le Aso Sa nei”).

O le mataupu faavae mamā a Keriso e mamana tele. E suia ai le olaga o tagata uma e malamalama i ai ma saili e faatino i lona olaga. (“Upumoni Mamā, Mataupu Faavae Mamā, ma Faaaliga Mamā,” Liahona, Nov. 2021, 6)

• Afai e fesili atu se tasi ia te oe po o le a le aoaoga faavae a Keriso, o le a lau tala e fai?

Saili le vaega i le mataupu 1 o le Tala’i La’u Talalelei ua faaulutalaina “O Le Talalelei a Keriso ma le Aoaoga Faavae a Keriso.” Faitau parakalafa muamua e tolu ma le faamatalaga mai ia Ailama Samita (itulau 6). Vaavaai mo tali i fesili nei e lua:

• O le a le mataupu faavae a Keriso?

• Aisea e tatau ai i se tasi o loo sauniuni mo se misiona ona saili ia malamalama ma ola i le aoaoga faavae a Keriso?

Aoao atili e uiga i le aoaoga faavae a Keriso e ala i le suesueina o vaega nei mai le mataupu 1 o le Tala’i La’u Talalelei (itulau 7–9):

• “Faatuatua ia Iesu Keriso”

• “Salamo”

• “Papatisoga”

• “Faamauga ma le Meaalofa o le Agaga Paia”

• “Tumau e oo i le Iuga” (Suesue foi i le 2 Nifae 31:19–20.)

A o e suesue, faailoga upu ma fasifuaitau taua. Mafaufau e faitau nisi o mau e fesootai ma le vaega. Ia saunia e faasoa atu mea na e aoaoina.

Otooto le vaega o le aoaoga faavae a Keriso lea na e suesueina. Mafaufau e faaaofia ai manatu nei i lau otootoga:

1. O se aotelega puupuu o mea na e suesueina

2. O le auala e fesoasoani ai lenei vaega o le aoaoga faavae i tagata e o mai ia Keriso ma maua Lona mana faaola

3. O le auala na faamanuiaina ai oe po o se tasi e te iloa e ala i le mulimuli i le vaega lenei o le aoaoga faavae a Keriso

Faatu se sini e fesootai i mea ua e suesueina. Faaaoga manatu e pei o manatu nei pe mafaufau foi i ou lava manatu.

• Suesue le 2 Nifae 31, ma vaavaai mo aoaoga a Nifae e uiga i le aoaoga faavae a Keriso.

• Faailoa mai se elemene o le aoaoga faavae a Keriso e te manao e faaaoga atoatoa i lou olaga. Mafaufau pe o le a faapefea ona e faia lena mea.

• E mafai faapefea e se tasi ona iloa pe o i latou o se faifeautalai faamanuiaina?

1. Faitau parakalafa muamua e iva o le “O Se Faifeautalai Faamanuiaina” i le mataupu 1 o le Tala’i La’u Talalelei (itulau 13). Valivali pe faailoga uiga o faifeautalai faamanuiaina. I se isi auala (e pei o se isi lanu po o se auala e vase ai), faailoga mea e le taua i le faamanuiaina.

2. Tagai i togi i le pito i luga o le itulau e 14. Filifili ni mau faasino se lua pe sili atu e faitau, ma vaavaai mo mea o loo latou aoao mai e uiga i le avea ma se faifeautalai faamanuiaina.

Vaai faalemafaufau ua e mauaina se savali mai se uo o loo auauna atu i se misiona. Latou te lagona e pei ua latou toilalo o se faifeautalai aua e leai se tasi na latou aoaoina ua papatiso ma e lei umia lava so latou tofiga faaletaitai. Ua amata ona latou lagonaina e pei ua latou faamaumauina o latou taimi.

• E faavae i mea na e aoaoina mai le “O Se Faifeautalai Faamanuiaina” i le mataupu 1 o le Tala’i La’u Talalelei (itulau 13–14), fesoasoani i lau uo ia ese lona mafaufau e uiga i le avea ma se faifeautalai faamanuiaina.

• Faasoa atu pe faapefea e le taulai atili atu ia Iesu Keriso ona suia lagona o lau uo e uiga i la latou auaunaga faafaifeautalai.

Faatu se sini e fesootai i mea ua e suesueina. Faaaoga manatu e pei o manatu nei pe mafaufau foi i ou lava manatu.

• Mafaufau i se tasi e te iloa o loo auauna atu i se misiona. Tusi atu ia i latou se imeli po o se tusi e aotele ai mea na e aoaoina i le aso e uiga i le avea ma se faifeautalai faamanuiaina. E mafai foi ona e fesili atu i le faifeautalai po o le a se mea ua latou maua ua faamanuiaina ai i latou.

• Mafaufau i mea e mafai ona e faia i le taimi nei e saunia ai e avea ma se faifeautalai faamanuiaina i le lumanai.