Tomai Faataitai 5

Taumafai Malosi e Tauloto Mau

“E mafai ona oo mai le mana tele mai le taulotoina o tusitusiga paia” (Tala’i La’u Talalelei [2023], 27). O le taulotoina o fuaitau o mau e mafai ona faalolotoina ai lo tatou malamalama i le talalelei a le Faaola ma faaleleia ai lo tatou tomai e aoao atu ai i isi.

Taitai o talanoaga: Taumafai ia faapuupuu i vaega o le “Faamatalatala” ma le “Faapupula” ina ia tele ai le taimi o tagata a’oa’o e faataitai ai.

Faamatalatala

Taitai o talanoaga: Fesoasoani i tagata o le vasega e sue le pusa ua faaulutalaina “O Le Matafaioi o le Taulotoina” i le mataupu e 3 o le Tala’i La’u Talalelei (itulau 26–27). Ona faasoa atu lea o faatonuga nei:

Faitau le parakalafa lona tolu i le “O Le Matafaioi o le Taulotoina” (Tala’i La’u Talalelei, 27). Vaavaai mo auala e mafai ai e le taulotoina o fuaitau o mau ona faamanuiaina oe ma isi.

E mafai faapefea e le taulotoina ona fesoasoani ia te oe o se faifeautalai?
Na faapefea ona faamanuiaina oe mai le taulotoina o se fuaitau o mau?

Taitai o talanoaga: Faamalamalama atu e tele metotia e mafai ona tatou faaaogaina e fesoasoani ai ia i tatou e tauloto mau. E mafai ona e faasoa atu nisi o mea nei o ni faataitaiga. E mafai foi ona e valaaulia tagata aoga e faasoa mai nisi manatu faaopoopo.

Faitau faatele upu i le laina. Ona nana lea o upu ma toe fai e aunoa ma le tilotiloi ai.
Vaevae le fuaitau o mau i ni fuaitau pupu’u. Tauloto taitasi ia fuaitau, ma toe iloilo mea ua uma ona e taulotoina a o e faaauau.
Tusi upu e sili atu ma le faatasi a o faitauina le fuaiupu. Ona tusi lea i lalo o le fuaitau e aunoa ma le vaai i le fuaiupu.
Tusi i lalo mataitusi muamua o upu taitasi i le fuaiupu ona faaaoga lea o na mataitusi e taiala ai oe a o e faia le fuaiupu.
Fatu ni ata faigofie e fesoasoani ia te oe e tauloto ai le fuaitau.

Faapupula

Taitai o talanoaga: Faamalamalama atu o se fuaitau taua o mau mo faifeautalai e tauloto o le tala lea i le Uluai Faaaliga a Iosefa Samita o loo tusia i le Iosefa Samita—Talafaasolopito 1:16–17.

O loo i lalo se tasi o auala e mafai ona e faaaogaina ai le manatu lona lua mai le lisi i le vaega ua mavae e fesoasoani ai i tagata aoao e tauloto le tala a Iosefa Samita. Fesoasoani i tagata a’oa’o e tauloto taitasi ia fuaitau nei e ala i le toe faia leotele o se vasega.

“Na ou vaaia ai se malamalama faaniutu i luga a’e tonu lava o lo’u ulu, ua sili atu le pupula i le la, ua alu ifo malie lava se’ia oo mai i o’u luga.

“Ina ua oo mai le malamalama i oʼu luga, sa ou vaaia ni Tagata e toalua, o lo laua pupula ma le mamalu e lē mafaamatalaina, o tutu a’e i oʼu luga i le ea.

Sa fetalai mai le tasi o i la’ua ia te a’u, ma fofoga mai ia te a’u i lo’u igoa ma fetalai mai, a’o tusi ane i le isi—O Lo’u Atalii Pele lenei. Faalogo ia te Ia!” (Iosefa Samita—Talafaasolopito 1:16–17).

Faataitai

Taitai o talanoaga: Valaaulia tagata a’oa’o e faataitai le taulotoina o le vaega lenei o le tala o le Uluai Faaaliga a Iosefa Samita ma se paga. E mafai ona latou faaaogaina le metotia lava lea e tasi sa e faataitaia o se vasega pe mafai foi ona latou filifili se isi metotia.

Faaaoga

Taitai o talanoaga: Faasoa atu faatonuga nei e fesoasoani ai i tagata a’oa’o e faaaoga le tomai o le taulotoina o mau i o latou olaga:

Fuafua pe faapefea ona faaauau pea ona e faaaogaina le tomai o le taulotoina o mau. O nisi nei o manatu:

Faaauau lou taulotoina o le Uluai Faaaliga a Iosefa Samita. Faataitai le taulotoina i se tasi e pele ia te ia.
Filifili se mau se tasi pe sili atu e te manao e tauloto ma fai ni taumafaiga e tauloto ai.