Tomai Faataitai 9

Faaaoga ma le Amiotonu Tekinolosi

O le faaaogaina o tekinolosi e mafai ona tuuina mai ai avanoa ma luitau. O le faaaogaina ma le amiotonu o tekinolosi, e mafai ai ona tatou faataunuuina lelei faamoemoega o le Alii mo i tatou o ni faifeautalai ma i o tatou olaga i aso uma.

Taitai o talanoaga: Taumafai ia faapuupuu i vaega o le “Faamatalatala” ma le “Faapupula” ina ia tele ai le taimi o tagata aoao e faataitai ai.

Faamatalatala

Taitai o talanoaga: Faailoa atu le autu mo lenei faataitaiga o tomai e ala i le faamatala atu o mea nei:

O masini faaeletonika e pei o telefoni ma komepiuta e mafai ona avea ma meafaigaluega mamana e faalautele ai le galuega a le Alii, faateleina ai lo tatou faamanuiaina, ma atiina ae ai sootaga lelei. E tele foi faaosoosoga e fesootai ma nei masini.

Faitau le “O Le A Se Mea e Tatau Ona E Faia Pe A E Lagona le Vaivai po o le Afaina Gofie?” i le mataupu 2 o le Tala’i La’u Talalelei ([2023], 21–22). Vaavaai mo mataupu faavae e tolu e mafai ona fesoasoani ia i tatou e faatoilalo ai faaosoosoga e faatatau i le faaaogaina o tekinolosi.

Taitai o Talanoaga: Mafaufau e tusi mataupu faavae nei i luga o le laupapa:

Mataupu Faavae 1: Ia nofouta i ou mafaufauga, lagona ma amioga.
Mataupu Faavae 2: Filifili e faatino.
Mataupu Faavae 3: A’oa’o, salamo, ma faaleleia atili.

Faapupula

Taitai o talanoaga: Faasoa atu se vaaiga faata’ita’i e pei o lenei. Talanoaina faatasi fesili e fesoasoani e faataitai ai le auala e mafai ai ona faaaoga ia mataupu faavae e tolu i se tulaga moni o le olaga.

E i ai se taaloga a James i lana telefoni e fiafia e taalo ai. E masani ona ia tosoina i fafo lana telefoni e taalo ai i lana taaloga i le taimi o le taumafataga o le afiafi, i le lotu, po o le taimi o le vasega i le aoga.

Mataupu Faavae 1: Ia nofouta i ou mafaufauga, lagona ma amioga.

O a nisi o mafaufauga po o lagona atonu na mafua ai ona faia e James lenei mea?
O le a se mea e ono taua mo ia e malamalama ai e uiga i lona faaaogaina o tekinolosi i nei tulaga?

2. Mataupu Faavae 2: Filifili e faatino.

O a ni faatinoga patino e mafai ona faia e James e fesoasoani ai ia te ia ia auai atili i nei tulaga faaagafesootai?

Mataupu Faavae 3: A’oa’o, salamo, ma faaleleia atili.

O le a se mea e ono aoaoina e James mai lona aafiaga a o ia faia taumafaiga e faaleleia atili?

Faataitai

Taitai o talanoaga: Tuu atu i tagata a’oa’o se taimi e faataitai ai le faaaogaina o mataupu faavae e tolu i isi vaaiga faata’ita’i. E mafai ona e faaali atu vaaiga faata’ita’i nei ma vaevae le vasega i ni vaega toalaiti. Fai atu i vaega taitasi e filifili ni vaaiga faata’ita’i se lua pe tolu ma talanoaina pe faapei foliga o le faaaogaina o mataupu faavae e tolu i vaaiga faata’ita’i na latou filifilia.

Na vaaia e Sofia se talanoaga i luga o ala o faasalalauga faaagafesootai lea na ita ai o ia, ma manao ai e tali atu.
Pe a le fiafia Kitiona, e masani ona ia matamata i lana telefoni. Talu ai nei lava, ua tosina atu ai o ia i le matamata i ata matagā taufeusua’iga.
E masani ona faatusatusa e Maria le aofai o tagata e fiafia ma mulimuli ia te ia i luga o ala o faasalalauga faaagafesootai i le aofai o tagata e fiafia ma mulimuli i i ana uo.
Pe a savali solo Lucas, e toetoe lava o taimi uma e faalogologo ai o ia i musika i ana meafaalogologo.
E masani ona ala umi i po Amari e taalo i taaloga vitio.

Taitai o talanoaga: Afai e lava le taimi, valaaulia ni nai tagata a’oa’o e faasoa mai se vaaiga faataitai na latou talanoaina i la latou vaega ma le auala na latou faaaogaina ai mataupu faavae e tolu i lena vaaiga.

Faaaoga

Taitai o talanoaga: Tuu atu i tagata auai se taimi e mafaufau ai pe faapefea ona latou faaaogaina nei mataupu faavae e tolu i o latou olaga. Valaaulia i latou e faatu se sini mo le faaaogaina ma le amiotonu o tekinolosi ma galulue e ausia.