Pagsasanay ng Kasanayan 4

Magbigay ng mga Inspiradong Tanong

Ang mga missionary ay madalas na magbigay ng mga tanong sa kanilang mga tinuturuan. Ang pagbibigay ng magagandang tanong ay makatutulong sa mga missionary na “maunawaan ang mga interes, alalahanin, at tanong ng mga tao. Ang magagandang tanong ay mag-aanyaya sa Espiritu at makatutulong sa mga tao na matuto” (Mangaral ng Aking Ebanghelyo [2023], 218).

Lider ng talakayan: Sikaping gawing maikli ang mga bahaging “Ipaliwanag” at “Ipakita” upang magkaroon ng maraming oras ang mga mag-aaral para magsanay.

Ipaliwanag

Lider ng talakayan: Ibahagi ang sumusunod na mga tagubilin upang maipakilala ang paksa ng pagtatanong:

Basahin ang mga talata at table sa ilalim ng heading na “Magtanong” sa kabanata 10 ng Mangaral ng Aking Ebanghelyo (pahina 218–19). Alamin ang papel na ginagampanan ng mabubuting tanong sa pagbabahagi ng ebanghelyo.

Bakit mahalaga na ang mga missionary ay magbigay ng mga epektibong tanong habang sila ay nagtuturo?

Lider ng talakayan: Ipaliwanag na ang ilang uri ng tanong ay mas epektibo kaysa sa iba. Ibahagi ang sumusunod na mga tagubilin para matulungan ang mga miyembro ng klase na malaman ang mga tuntunin sa pagbibigay ng mga epektibong tanong:

Basahin ang unang pitong bullet point sa ilalim ng “Iwasan ang mga Hindi Epektibo o Labis na Pagtatanong” (Mangaral ng Aking Ebanghelyo, 220). Maghanap ng mga tuntunin na makatutulong sa iyo na mabigay ng mga epektibong tanong.

Ipakita

Lider ng talakayan: Ipakita sa mga mag-aaral ang ilang halimbawa kung paano baguhin ang mga tanong na hindi gaanong epektibo upang maging mas epektibo ang mga ito. Maaari mong gamitin ang mga halimbawa sa sumusunod na table. Para sa iba pang mga halimbawa, tingnan ang listahan ng mga di-gaanong epektibong tanong sa pahina 220 ng Mangaral ng Aking Ebanghelyo.

Di-gaanong epektibong tanong	Mas epektibong tanong
Sino ang unang propeta? (Maaaring hindi alam ng tao ang sagot.)	Kung alam mong may tinawag na propeta ang Diyos ngayon, paano ito makakaapekto sa iyong buhay? (Tinatanong ang nasasaisip at nadarama ng tao.)
Paano nakatutulong sa atin ang pagpapanatiling dalisay ng ating mga katawan para mapasaatin ang Espiritu at maipakita natin na handa tayong sumunod sa propeta ng Diyos? (Mayroong higit pa sa isang ideya.)	Sa iyong palagay, ano ang epekto ng pagpapanatiling dalisay ng ating katawan sa ating ugnayan sa Diyos? (Nakatuon sa iisang ideya.)

Magsanay

Lider ng talakayan: Ang mga mag-aaral ay maaaring makipagtulungan sa mga kapartner para makumpleto ang sumusunod na aktibidad.

Basahin ang ilang halimbawa ng mga di-gaanong epektibong tanong sa kabanata 10 ng Mangaral ng Aking Ebanghelyo (pahina 220). Pumili ng dalawa o tatlo sa mga tanong na ito at magtulungan upang makalikha ng mas epektibong mga tanong.

Lider ng talakayan: Kapag tapos na ang mga miyembro ng klase, anyayahan ang ilan sa kanila na ibahagi ang mga halimbawa ng mga mas epektibong tanong na ginawa nila.

Kung may oras pa, maaari mong anyayahan ang mga mag-aaral na ulitin ang aktibidad na ito sa pagsasanay gamit ang iba pang mga tanong mula sa listahan ng mga di-gaanong epektibong tanong sa Mangaral ng Aking Ebanghelyo.

Ipamuhay

Lider ng talakayan: Isiping idispley ang sumusunod para matulungan ang mga mag-aaral na makapag-isip kung paano nila magagamit ang kasanayang ito:

Isipin kung paano mo magagamit ang natutuhan mo tungkol sa mabisang pagtatanong sa susunod na isa o dalawang linggo. Halimbawa, maaari mong:

Hanapin ang ilang epektibong mga tanong sa ilang lesson sa Pumarito Ka, Sumunod Ka sa Akin.
Kung magtuturo ka ng isang lesson sa susunod na ilang araw o linggo, maghanda ng epektibong mga tanong na maaari mong itanong habang ikaw ay nagtuturo.