Tuparin ang Iyong Layunin Bilang Misyonero

Kunwari ay may kaibigan ka na hindi miyembro ng Simbahan. Nang tanungin ka ng kaibigan mo kung ano ang mga plano mo ngayon, binanggit mo na dadalo ka sa missionary preparation class. Pagkatapos ay itinanong ng kaibigan mo, “Ano ang ginagawa ng mga missionary?”

Basahin ang “Ang Iyong Layunin” (Mangaral ng Aking Ebanghelyo, 1) at ang sumusunod na pahayag ni Elder D. Todd Christofferson.

Huwag sana ninyong balewalain ang kabanata 1 ng Mangaral ng Aking Ebanghelyo at ang tanong doon na “Ano ang layunin ko bilang misyonero?” Pag-isipan ang layuning magdala ng mga tao kay Cristo sa pamamagitan ng mga alituntunin at ordenansa ng ipinanumbalik na ebanghelyo, at mauunawaan ninyo na ang pagbabahagi ng ebanghelyo ay hindi isang programa; ito ay isang layunin—ang layunin ng Ama, ng Anak, at ng Banal na Espiritu. (D. Todd Christofferson, “Bakit Natin Ibinabahagi ang Ebanghelyo,” Liahona, Ago. 2014, 36)

Talakayin kung paano makakaapekto sa sumusunod ang gawing bahagi ng buhay ang layuning ito:

• Paano maghanda para sa misyon

• Ang mga ginagawa mo bilang missionary

Basahin ang “Ang Iyong Tungkulin na Ituro ang Ipinanumbalik na Ebanghelyo ni Jesucristo” (Mangaral ng Aking Ebanghelyo, 1–2). Habang nag-aaral ka, i-highlight ang:

1. Mga dahilan kung bakit inaanyayahan natin ang iba na lumapit kay Jesucristo.

2. Ano ang magagawa natin para matulungan ang iba na lumapit kay Jesucristo.

• Paano nagdulot ng “higit na kaligayahan, pag-asa, kapayapaan, at layunin” (pahina 2) sa inyo o sa mga taong kilala ninyo ang pagsunod sa Tagapagligtas?

Magtakda ng mithiin na nauugnay sa iyong napag-aralan. Gumamit ng mga ideya tulad ng mga sumusunod o mag-isip ng sarili mong ideya.

• Patuloy na isaulo ang layunin ng missionary. Ibahagi ito nang naisaulo na sa isang kapamilya o kaibigan. Isipin ang nagawa mo na o sisimulang gawin na bahagi ng layunin ng missionary.

• Bisitahin ang pahina na “Pagbabahagi ng Ebanghelyo” sa ChurchofJesusChrist.org. Maghanap ng mga ideya na makatutulong sa iyo na maibahagi ang ebanghelyo sa iba.

• Mapanalanging isipin ang isang taong gusto mong tulungan na mapalapit kay Jesucristo at maranasan ang mga pagpapala ng Kanyang ebanghelyo. Alamin kung ano ang gagawin mo para matulungan sila (halimbawa, “Ipagdarasal ko ang taong ito at iimbitahan ko siya sa simbahan ngayong Linggo”).

Makapangyarihan ang dalisay na doktrina ni Cristo. Binabago nito ang buhay ng lahat ng taong nakauunawa rito at hangad na ipamuhay ito. (“Dalisay na Katotohanan, Dalisay na Doktrina, at Dalisay na Paghahayag,” Liahona, Nob. 2021, 6)

• Kung may nagtanong sa inyo kung ano ang doktrina ni Cristo, ano ang sasabihin ninyo?

Hanapin ang bahagi sa kabanata 1 ng Mangaral ng Aking Ebanghelyo na may pamagat na “Ang Ebanghelyo ni Cristo at Doktrina ni Cristo.” Basahin ang unang tatlong talata at ang pahayag mula kay Hyrum Smith (pahina 6). Maghanap ng mga sagot sa dalawang tanong na ito:

• Ano ang doktrina ni Cristo?

• Bakit dapat hangaring maunawaan at ipamuhay ng isang taong naghahanda na magmisyon ang doktrina ni Cristo?

Matuto pa ng tungkol sa doktrina ni Cristo sa pag-aaral ng mga sumusunod na bahagi mula sa kabanata 1 ng Mangaral ng Aking Ebanghelyo (pahina 8–10):

• “Pananampalataya kay Jesucristo”

• “Pagsisisi”

• “Binyag”

• “Kumpirmasyon at Kaloob na Espiritu Santo”

• “Pagtitiis Hanggang sa Wakas” (Pag-aralan din ang 2 Nephi 31:19–20.)

Sa pag-aaral mo, i-highlight ang mahahalagang salita at parirala. Isiping basahin ang ilan sa mga banal na kasulatan na nauugnay sa bahagi. Maghandang ibahagi ang natutuhan mo.

Ibuod ang bahagi ng doktrina ni Cristo na napag-aralan mo. Maaari mong isama ang mga sumusunod na punto sa iyong paliwanag:

1. Isang maikling buod ng napag-aralan mo

2. Paano nakatutulong ang bahaging ito ng doktrina sa mga tao na lumapit kay Cristo at matanggap ang Kanyang nakapagliligtas na kapangyarihan

3. Paano ka napagpala o ang isang taong kilala mo dahil sa pagsunod sa bahaging ito ng doktrina ni Cristo

Magtakda ng mithiin na nauugnay sa iyong napag-aralan. Gumamit ng mga ideya tulad ng mga sumusunod o mag-isip ng sarili mong ideya.

• Pag-aralan ang 2 Nephi 31, na inaalam ang mga turo ni Nephi tungkol sa doktrina ni Cristo.

• Tukuyin ang isang elemento ng doktrina ni Cristo na nais mong isama nang mas lubos sa iyong buhay. Pag-isipan kung paano mo ito gagawin.

• Paano malalaman ng isang tao kung siya ay matagumpay na missionary?

1. Basahin ang unang siyam na talata ng “Ang Matagumpay na Misyonero” sa kabanata 1 ng Mangaral ng Aking Ebanghelyo (pahina 15). I-highlight o markahan ang mga katangian ng matatagumpay na missionary. Sa ibang paraan (tulad ng paggamit ng ibang kulay o paraan ng pagsalungguhit), markahan ang mga bagay na hindi mahalaga sa tagumpay.

2. Tingnan ang mga bullet sa itaas ng pahina 16. Pumili ng dalawa o mahigit pang scripture reference na babasahin, na inaalam ang itinuturo ng mga ito tungkol sa pagiging matagumpay na missionary.

Kunwari ay nakatanggap ka ng isang mensahe mula sa isang kaibigang naglilingkod sa full-time mission. Pakiramdam niya ay bigo siya bilang missionary dahil wala ni isa sa mga tinuruan nila ang nabinyagan at hindi siya kailanman nagkaroon ng katungkulan sa pamumuno. Nagsisimula na niyang maramdaman na parang sinasayang niya ang kanyang oras.

• Batay sa natutuhan mo mula sa “Ang Matagumpay na Misyonero” sa kabanata 1 ng Mangaral ng Aking Ebanghelyo (pahina 15–16), tulungan ang iyong kaibigan na ibahin ang pag-iisip sa ibig sabihin ng pagiging matagumpay na missionary.

• Ibahagi kung paano mababago ng mas pagtutuon kay Jesucristo ang nadarama ng iyong kaibigan tungkol sa kanyang paglilingkod bilang missionary.

Magtakda ng mithiin na nauugnay sa iyong napag-aralan. Gumamit ng mga ideya tulad ng mga sumusunod o mag-isip ng sarili mong ideya.

• Mag-isip ng isang taong kakilala mo na kasalukuyang nagmimisyon. Magpadala sa kanya sa email o sa liham ng buod ng natutuhan mo ngayon tungkol sa pagiging matagumpay na missionary. Maaari mo ring itanong sa missionary kung ano ang natuklasan niya kung paano sila naging matagumpay.

• Isipin kung ano ang magagawa mo ngayon para maghanda na maging matagumpay na missionary sa hinaharap.