Хэн ч ганцаар суухгүй

Би 50 жилийн туршид соёлыг, тэр дундаа сайн мэдээний соёлыг судалсан. Би судалгаагаа азын жигнэмгээр эхэлж байв.

Сан Францискогийн хятад хороололд Гонгийн гэр бүл оройн хоолоо азын жигнэмэг болон “Мянган бээрийн аялал ганц алхмаар эхэлдэг” гэх мэт мэргэн үгээр дуусгадаг байлаа.

Би залуудаа азын жигнэмэг хийдэг байсан. Цагаан даавуун бээлий өмсөн шарах шүүгээнээс дөнгөж гарсан дугуй халуун жигнэмгийг би хумьж нугалан хэлбэрт оруулдаг байв.

Азын жигнэмэг анх хятадын соёлын нэгэн хэсэг байгаагүй гэдгийг би мэдээд гайхсан. Ойн гал түймрийн голомтыг олон янзын байршил ашиглан тригонометрийн аргачлалаар олдгийн адил би хятад, америк, европын азын жигнэмгийн соёлын ялгааг олж мэдэхээр хэд хэдэн тивийн азын жигнэмгийг сонирхон судалж билээ. Сан Франциско, Лос Анжелес, Нью-Йоркийн хятад зоогийн газруудад азын жигнэмэг өгдөг бол Бээжин, Лондон, Сиднейд өгдөггүй байх жишээтэй. Зөвхөн америкчууд л Азын жигнэмгийн үндэсний баярын өдрийг тэмдэглэдэг. Зөвхөн Хятадын зар сурталчилгаанд л “Америкийн жинхэнэ азын жигнэмгийг” санал болгодог.

Азын жигнэмэг бол зугаатай, энгийн жишээ юм. Харин яг ижил зарчмаар зан үйлийг соёлын өөр өөр орчинд харьцуулах нь сайн мэдээний соёлын ялгааг олж харахад бидэнд тусалж болох юм. Эдүгээ Мормоны Номын зүйрлэлүүд, Шинэ Гэрээний сургаалт зүйрлэлийн бошиглолууд биеллээ олж буй энэ цаг үед Их Эзэн бидэнд сайн мэдээний соёлоос суралцах шинэ боломжуудыг олгож байна.

Хаа сайгүй хүмүүс нүүж байна. Нэгдсэн Үндэстний Байгууллагын тайланд мэдээлснээр олон улсын цагаачийн тоо 281 саяд хүрчээ. Энэ нь 1990 оныхоос 128 саяар, 1970 оны тооцооноос гурав дахин их хүн байгаа юм. Дэлхий даяар хэзээ хэзээнээс илүү олон хөрвөгч Есүс Христийн Хожмын Үеийн Гэгээнтнүүдийн Сүмийг хайж байна. Хүндэтгэлийн өдөр бүр төрөлх 195 улс, нутаг дэвсгэрийн гишүүд болон сонирхогчид Сүмийн 31,916 цуглааны байранд цуглардаг бөгөөд бид 125 хэлээр ярьдаг.

Саяхан би Албани, Хойд Македон, Косово, Швейцар, Германд шинэ гишүүд Мормоны Номын чидун модны зүйрлэлийг гүйцэлдүүлж байгааг харсан. Иаков 5-д усан үзмийн талбайн Эзэн мөн Түүний зарц нар чидун модны мөчрүүдийг өөр өөр газраас цуглуулж залгаснаар уг модны үндэс, мөчрийг бэхжүүлсэн байдаг. Өнөөдөр Бурханы хүүхдүүд Есүс Христэд нэгдэн цугларч, Их Эзэн бидэнд Өөрийн сэргээгдсэн сайн мэдээгээр бүрэн дүүрэн амьдрах гайхалтай бодит арга замуудыг өгч байна.

Есүс биднийг тэнгэрийн хаанчлалд бэлтгэхдээ тансаг оройн зоог, хуримын найрын тухай сургаалт зүйрлэлийг өгсөн байдаг. Эдгээр сургаалт зүйрлэлд өгүүлснээр уригдсан зочид шалтаг тоочин ирэхгүй гэв. Эзэн зарц нартаа “Даруй гарч, хотын чөлөө, гудамжаар” мөн “зам, хашаа хавиар” явж “ядуу, тахир дутуу, сохор болон хазгар доголон хүмүүсийг нааш авчир!” гэж зааварладаг. Сүнслэг байдлын хувьд авч үзэх юм бол энэ хүмүүс биднийг төлөөлж байгаа.

Сударт ийн тунхагласан:

“Их Эзэний өргөөний үдшийн зоог[т]” “бүх үндэстэн … уригдах … болой.”

“Ирэх тэр өдрүүдэд оршин суугчид нь бэлтгэлтэй байж, мөн хүлээн авч болохын тулд, дэлхий дээр түүний хаант улс урагшилж болохын төлөө … Их Эзэний замыг бэлтгэгтүн, та нар.”

Өнөөдөр Их Эзэний оройн зоогт газар газрын, янз бүрийн соёл иргэншилтэй хүмүүс уригдсан. Хөгшин залуу, баян ядуу, нутгийн болон гаднын гээд бид Сүмийн цуглааны хүмүүсийг өөрсдийн хамт олон болгодог.

Ахлах төлөөлөгчийн хувьд Петр тэнгэр нээгдэн “том бүтээлэг … дөрвөн өнцгөөрөө газардахыг … дотор нь бүх … амьтад байх[ыг]” үзэгдлээр харсан. Петрийн заасанчлан “Бурхан бол нүүр тал хардаггүй. … [Их Эзэнээс] эмээгч, зөвийг үйлдэгч алив үндэстний хүн Түүнд таалагддаг.”

Сайн самари хүний ​​тухай сургаалт зүйрлэлд Есүс биднийг бие биедээ болон Түүнд, Өөрийнх нь дэн буудал болох Сүмд ирэхийг урьсан. Тэрээр биднийг сайн хөршүүд байхад урьдаг. Сайн самари хүн эргэн ирж, дэн буудалд нь байгаа хүмүүсийг асарч халамжилсных нь төлбөрийг нөхөн төлөхөө амласан. Есүс Христийн сайн мэдээгээр амьдрах нь Түүний сэргээгдсэн Сүмд бүх хүнд өрөө гаргаж өгөх явдлыг багтаадаг.

“Дэн буудалд өрөө гаргаж өгөх” гэсэн ойлголтын хүрээнд “хэн ч ганцаар суухгүй” гэсэн санаа бас багтдаг. Та Сүмд ирэхдээ хэн нэгнийг ганцаараа сууж байгааг харвал “Сайн уу!” гэж мэндлээд түүнтэй хамт суух уу? Танайд ийм ёс заншил байдаггүй байж болох юм. Тэр хүн танаас өөр харагддаг, өөр ярьдаг байж магад. Мэдээж азын жигнэмгийн доторх цаасанд бичсэнчлэн “Сайн мэдээний нөхөрлөл, хайрын аян зам “Сайн уу!” гэж мэндэлснээр мөн хэнийг ч ганцаар суулгахгүй байснаар эхэлдэг.”

“Хэнийг ч ганцаар суулгахгүй” гэдэг нь мөн хэн ч сэтгэл санаа, сүнслэг байдлын хувьд ганцаардахгүй гэсэн үг юм. Гомдож туньсан аавтай хамт би хүүг нь эргэхээр очиж билээ. Олон жилийн өмнө хүү нь шинэ дикон болох гэж байгаадаа догдолж байв. Энэ тэмдэглэлт мөчид гэр бүлийнхэн нь түүнд анхны шинэ гутлыг нь авч өгсөн байна.

Гэвч сүм дээр диконууд түүнийг шоолж инээв. Түүний гутал шинэ байсан ч загварлаг биш байв. Ичиж, гомдсон залуу дикон сүмд дахин явахгүй гэдгээ хэлжээ. Одоо ч гэсэн түүнийг болон түүний гэр бүлийг бодох бүр миний зүрх сэтгэл эмтэрдэг.

Иерихо руу явах тоос шороотой зам дээр бидний хүн нэг бүр шоолуулж, ичиж, гомдож, магадгүй доромжлуулж, хүчирхийлэлд өртөж байсан байх. Мөн бидний хүн нэг бүр зориуд биш ч гэсэн ямар нэгэн хэмжээгээр бусдыг үл тоомсорлож, магадгүй санаатайгаар гомдоож байсан байх. Бид гомддог, бас бусдыг гомдоодог учраас Есүс Христ бид бүгдийг дэн буудалдаа авчирдаг билээ. Түүний Сүмд мөн Түүний ёслол, гэрээнүүдээр дамжуулан бид бие биедээ болон Есүс Христэд ирдэг. Бид хайрлаж, хайрлуулж, үйлчилж, үйлчлүүлж, уучилж мөн өршөөгддөг. “Тэнгэр эдгээхгүй тийм шаналал үгүй” мөн дэлхийн ачаа дарамт хөнгөрдөг—бидний Аврагчийн баяр баясгалан бодит гэдгийг санаарай.

1 Нифай 19-өөс бид “Бүр Израилын туйлын Бурханыг ч [тэд] хөл дороо дэвсэлдэг … үл ойшоо[дог ажээ]. … Иймийн тул тэд түүнийг ташуурдахад, мөн тэрээр үүнийг хүлцэнэ; мөн тэд түүнийг цохиход, мөн тэрээр үүнийг хүлцэнэ. Тийм ээ, тэд түүн дээр нулимахад, тэрээр үүнийг хүлцэх болно” хэмээн уншдаг.

Миний найз профессор Тэрри Ворнэрын хэлснээр бусдыг шүүх, ташуурдах, цохих, нулимах нь зөвхөн Христийн мөнх бус амьдралын үед болж өнгөрсөн үйл явдал биш юм. Бид бие биедээ, ялангуяа өлссөн, цангасан, ганцаар хаягдсан хүмүүст хэрхэн хандаж байгаагаараа Түүнд хэр ханддагаа харуулдаг.

Түүний сэргээгдсэн Сүмд хэн ч ганцаар суухгүй байх нь бидний хувьд сайн хэрэг. Бүгдээрээ зүгээр нэг зөрөөд өнгөрөхгүй чин сэтгэлээсээ угтан авч, хүлээн зөвшөөрч, тохинуулж мөн хайрлацгаая. Найз, ах эгч, дүү нар маань гаднын эсвэл харийн хүн биш харин өөрийн гэрт байгаа хүүхэд мэт байх болтугай.

Өнөөдөр олон хүн ганцаардаж, тусгаарлагдсан мэдрэмжтэй байж болох юм. Сошиал медиа болон хиймэл оюун ухаан нь биднийг хүн хоорондын дотно харилцаа, дэргэд байгаа хүнээ мэдрэх хүслээр ангахад хүргэдэг. Бид бие биеийнхээ дуу хоолойг сонсож, жинхэнээсээ нэгэн хэсэг байж, сайхан сэтгэлийг мэдрэхийг хүсдэг.

Өөрийгөө сүмд таарч тохирохгүй байна гэж бодох, өөрөөр хэлбэл ганцаар суух олон шалтгаан бидэнд бий. Бид өөрсдийн аялга, хувцас, гэр бүлийн нөхцөл байдлаасаа санаа зовж байж магад. Бид өөрсдийгөө хангалттай сайн байж чадахгүй байна, тамхи үнэртэж байна гэж бодож, ёс суртахууны хувьд цэвэр байхыг хүсэж мөн хэн нэгнээс салсан, гомдсон, ичиж зовсон, Сүмийн аль нэгэн бодлого журамд санаа зовж байж болох юм. Бид ганц бие, салсан, бэлэвсэрсэн байж болно. Сахилгагүй хүүхдүүдтэй эсвэл үр хүүхэдгүй ч байж магад. Бид номлолд үйлчлээгүй эсвэл цагаасаа эрт буусан байж болох юм. Жагсаалт үүгээр дуусахгүй.

Мозая 18:21 биднийг зүрх сэтгэлээ хайранд нэгтгэхэд урьдаг. Санаа зовохоо, шүүмжлэхээ мөн бусдыг шахаж шаардахаа багасгаж, шаардлагатай үед өөрсдөдөө арай зөөлөн хандахыг би уриалж байна. Бид Сионыг нэг өдрийн дотор бүтээдэггүй. Харин “Сайн уу!” гэж мэндэлж, халуун дотноор хандах бүрдээ бид Сионыг ойртуулдаг. Их Эзэнд илүү их найдаж, Түүний бүх зарлигийг дуулгавартай дагахыг баяртайгаар сонгоцгооё.

Сургаалын хувьд Есүс Христтэй гэрээ байгуулан харьяалагдах болсон учир гэгээнтнүүдийн итгэл хийгээд нөхөрлөлийн өргөөнд хэн ч ганцаар суудаггүй.

Бошиглогч Иосеф Смит: “Бурханы гэгээнтнүүд үндэстэн, ястан, хэлтэн бүрээс нэг болон хамтдаа цуглахад ‘… цагийн дүүрлийг’ хожмын үеийн алдар сууг тохиолгон авчрахыг үзэж, үүнд оролцон, урагш ахиулахад туслах хувь тавилан бидэнд оногдсон юм” хэмээн заасан.

Бурхан “энэ дэлхийн ашиг тусын төлөө бус аваас ямар ч зүйлийг эс хийдэг авай; … бүр тэрээр бүх хүнийг өөртөө ойртуулж болохын тулд …

… тэднийг бүгд өөрт нь ирж мөн өөрийнх нь сайн сайхныг хүртэхийг урьдаг; … мөн Бурханд бүгд адил … буюу.”

Есүс Христэд хөрвөгдөх нь биднээс эгэл хүнээ болон дэлхийн соёлоо орхихыг шаарддаг. Ерөнхийлөгч Даллин Х.Өүксийн заасны дагуу бид Бурханы зарлигуудад харшлах аливаа уламжлал, соёлын зан үйлээ орхиж, хожмын үеийн гэгээнтэн болох ёстой. Түүний тайлбарласнаар: “Есүс Христийн Хожмын Үеийн Гэгээнтнүүдийн Сүмийн гишүүдийн дунд эрхэмлэн дагавал зохих үнэт зүйлс, шаардлага, зан үйлүүд бүхий сайн мэдээний хосгүй соёл тогтсон байдаг.” Сайн мэдээний соёлд ариун явдал, долоо хоног бүр сүмд явах, архи, тамхи, цай, кофе хэрэглэхгүй байх зэрэг орно. Үүнд мөн үнэнч, шударга байх, Сүмийн албанд дээшээ өгсөж эсвэл доошоо урууддаг биш харин урагшлан явдаг гэдгийг ойлгох ойлголт багтдаг.

Би газар газрын, өөр өөр соёлтой үнэнч гишүүд, найз нөхдөөсөө суралцдаг. Судрыг олон хэлээр судалж, өөр өөр соёлын өнцгөөс харах нь сайн мэдээний ойлголтыг гүнзгийрүүлдэг. Христийнхтэй адил зан чанарын янз бүрийн илрэл нь Аврагчийг хайрлах хайр болон ойлголтыг маань гүнзгийрүүлдэг. Бид Бурханы хүүхэд, гэрээний хүүхэд, Есүс Христийн шавь гэдгээрээ соёлын онцлогоо тодорхойлсноор бүгд адислагддаг хэмээн ерөнхийлөгч Рассэлл М.Нэлсон заасан.

Есүс Христийн амар амгалан нь хувь хүний ​​маань хувьд бидэнд зориулагдсан. Саяхан нэгэн залуу “Ахлагч Гонг оо, би диваажинд очиж чадах болов уу?” гэж чин сэтгэлээсээ асууж билээ. Хэзээ нэгэн цагт өршөөгдөх болов уу гэж тэр боддог байж. Би түүний нэрийг асууж, анхааралтай сонсож, бишоптойгоо ярилцаарай гэж уриад түүнийг чанга тэвэрсэн юм. Тэр Есүс Христэд найдсаар явсан.

Би тэр залуугийн талаар өөр газар ярьж билээ. Дараа нь би хэнээс гэдгээ бичээгүй нэгэн захидлыг авсан бөгөөд уг захидал: “Ахлагч Гонг оо, эхнэр бид хоёр есөн хүүхэд өсгөсөн, … хоёр номлолд үйлчилсэн. Гэвч би ‘Залуудаа ноцтой нүгэл үйлдсэн … намайг ч селестиел хаант улсад оруулахгүй байх даа’ гэж боддог байсан” гээд

цааш нь: “Ахлагч Гонг оо, өршөөгдөх найдварыг олж авсан тэр залуугийн талаар таныг ярихад би баяр хөөрөөр дүүрч, би ч бас [өршөөгдөж болох юм] гэдгийг ухаарч эхэлсэн” гэжээ. Захидлынхаа төгсгөлд “Би одоо өөрөө өөртөө таалагддаг болсон!” гэж бичсэн байв.

Бид Их Эзэний дэн буудалд бие биедээ болон Түүнд ирж нэгдэх үед гэрээгээр улам нэгддэг. Хэн ч ганцаар суугаагүй үед Их Эзэн бид бүгдийг адисалдаг. Хэн мэдэх билээ? Бидний хажууд сууж байгаа хүн хамгийн гоё азын жигнэмэг найз маань болж ч магадгүй. Бүгдээрээ Хурганы оройн зоог дээр Түүнд болон бие биедээ суух газар олж өгөх болтугай гэж би даруухнаар залбирч байна. Есүс Христийн ариун нэрээр, амен.