Fet blong Ol Memba mo Ol Misinari i Openem Doa blong Jos i Gro i Kam Antap long Ol Aelan blong Solomon

Long namba 3 Novemba, 2024, Ulawa Branj blong Jos Ia blong Jisas Kraes blong Ol Lata-dei Sent i bin stat, we i makem wan impoten taem long saed blong Jos long ol aelan blong Solomon we i gro kam antap.

Jos lida ia, Corey Lindley, i prisaed long miting long taem we oli oganaesem niufala branj ia long Honiara Solomon Aelan Distrik.

Long taem we oli stap kam tru long ples ia, ol lokol yut oli givim wom welkam long ol Jos lida, oli jenis olsem ol man blong faet, we oli askem gud stamba tingting blong visit blong olgeta.

Peter Awao, wan memba blong Jos we i bin kasem baptaes long Honiara mo i kam stap long Ulawa long 2022, i toktok long bihaf blong grup long lokol lanwis, i stap eksplenem se, “Mifala i no kam long ples ia blong faet, be mifala i karem ol gudfala toktok i kam long Ulawa Aelan. Mifala i no kam wetem eni naef, akis o alawolo blong faet wetem yufala be mifala i kam mo askem kaen fasin mo sore blong yufala. Mifala i kam ia blong witnes se Jisas Kraes i Sevya blong wol tedei. Plis, openem rod long mifala blong kam insaed. Poro Kana Ute.”

Folem wom welkam ia, ol lida blong Jos oli tekempat long wan welkam seremoni long lokol miting haos, ples ia, ol memba oli bin stap kam tugeta finis long hem. Presiden Kwanafia, wan minista blong wosip we i rejista long ples ia, i mekem mared blong sikis kapol blong mekem sua se ol kastom mared blong olgeta i folem loa wetem tabu fasin folem loa blong ol Aelan blong Solomon.

Afta, plante long olgeta long grup oli travel 10km i go long Is saed blong aelan long vilej blong Aroaha, long ples ia, i gat baptaes blong naen niufala konvet we oli mekem long naesfala lagun blong Bigfala Solwota blong Pasifik.

Long Sandei moning, 81 memba oli kam tugeta eli blong oli mekem ofisol sastening blong niu branj presiden mo koling blong fas presidensi blong branj. Sakramen i stat ten minit eli from ol memba oli bin wet mo wantem tumas blong harem, oli singsing ol hym mo oli rere long saed blong spirit blong gohed. Oli sastenem fulwan evri presidensi blong Branj blong Ulawa.

Long taem blong miting, ol memba we oli jes kasem baptaes, oli luksave olgeta, mo ol fo fultaem misinari oli blesem mo pasem sakramen, olgeta we oli stap givim seves long branj ia.

Long ol manis we i stap kam, bae oli komplitim wan niu japel blong Ulawa branj we oli stap bildim we i save tekem 100 memba. Japel ia, oli bildim wetem ol lokol materiol mo oli yusum ol lokol man blong wok, oli tingting blong finis long en blong 2024. Taem Jos i gohed blong gro long Ulawa Aelan, fet mo strong paoa long tingting blong ol memba, oli wan testemoni abaot wok blong Lod long pat blong Pasifik ia.

Ulawa Aelan i pat blong Makira provins long ol Aelan blong Solomon, i wan hom blong 6,000 pipol we oli stap laef long ples ia. Hem i gat smol bisnis mo lektrisiti nomo, be aelan ia i joenem famli komuniti. Fet blong ol memba mo ol misinari long aelan ia blong stanemap wan kongregesen i wan testemoni i go long ol pipol, komuniti mo trutok abaot gospel blong Sevya.