“Rod blong Mi blong Gat Fasin blong Save Wet Longtaem Tru long Hadtaem,” Liahona, Maj 2025.
Ol Voes blong Ol Lata–dei Sent
Rod blong Mi blong Gat Fasin blong save wet longtaem Tru long Hadtaem
Mi tingting se from wanem mi mas givim seves wetem ful hat mo sol blong mi sapos wanem we mi mekem i tekem hadtaem i kam long laef blong mi.
Foto blong man we i raet i kam long Shaun Sutton
Taem mi kambak hom long Sot pat blong Filipin long 2016 afta we mi givim seves olsem wan fultaem misinari long not pat blong Filipin, mi bin wantem tumas blong stadi long Brigham Young University–Hawae mo eksperiensem evri narafala gud taem aktiviti we i stap blong ol yang singgel adalt.
Be kwiktaem nomo, mi stat blong lusum weit. Dokta blong mi i tritim mi wetem wan sik ia hyperthyroidism. Hem i mekem mi fraet wetem ol samting we oli save hapen sapos oli no tritim sik ia.
Nomata long tritmen, bodi blong mi i stat blong jenis. Ol ae blong mi oli stat blong solap i kam aotsaed, mo mi kam bunbun. Mi traem oli no tekem foto blong mi mo iven stap lukluk long mira from lukluk blong mi i no naes.
Meresin i stap stat blong helpem mi sloslo. Be tri yia afta, mi go long jekap mo oli faenem wan sik namba tu taem— wan sik long saed blong tingting we i mekem man i lusum intres long aktiviti we bifo i bin givim glad. Tufala sik ia i stilim biliv blong mi long mi wan. Mi faenem i had blong kamaot long bed mo go long skul, mo mi filim se mi no save givim seves insaed long Jos.
Mi kros from God i letem blong samting ia i hapen long mi. Mi gat kwestin ?from wanem mi mas givim seves wetem ful hat blong mi mo sol, sapos blong mekem olsem i karem i kam moa hadtaem? Nomata long hemia, mi tekem kamfot long ol toktok blong Presiden Jeffrey R. Holland, Akting Presiden blong Kworom blong Olgeta Twelef Aposol: “Ol tingting we oli brok oli save hil semmak olsem ol bun we oli brok mo ol hat we oli brok oli hil.” Mi krae taem mi harem ol toktok ia. Mi bin gat wan tingting we i brok we i nidim hiling.
Mi bin groap insaed long wan fetful hom, mo fet blong mi long Papa long Heven mo Jisas Kraes i stap semmak nomata long bigfala harem nogud mo tu tingting. Sloslo, mi akseptem mo jenis folem niufala situesen blong mi.
Naoia, eit yia afta, mi mi nomo slo folem ol sik blong mi. Mi akseptem olgeta olsem wan pat blong laef blong mi. Mi filim se mi fulwan. Mi save givim seves mo laef long laef ia fulwan, nomata ol helt jalenj i save gohed long laef blong mi. Mi bin lanem se blong gat fasin blong save wet longtaem tru long ol had taem hem i pat blong laef yet long wol ia (luk long Doktrin mo Ol Kavenan 121:7–8). Mi mi stap lanem blong dring konkon wota ia mo gohed blong stap strong.
Naoia mi wok long wan dipatmen we i lukluk long ol wokman, long wan kampani we krietem ol kompiuta we oli mekem wok blong man, mo semtaem tekem ol onlaen klas long naet long Brigham Young University–Pathway Worldwide. Mi bin stop blong askem “?From wanem mi?” mo stap stat blong askem “?Wanem mi save lanem? ?Olsem wanem nao mi save kasem wan gud samting long eksperiens?”
Taem mi stap lukluk i gobak, mi luk save se Papa long Heven mo Jisas Kraes oli bin stap wetem mi long rod ia. Lukluk long fored, mi save huia mi save trastem (luk long Ol Proveb 3:5–6; 2 Nifae 4:34).