“Endao wetem Paoa we i Kam Antap,” Liahona, Maj 2025.
Ol Lukluk We I Makem Histri abaot Hoas blong Lod
Endao wetem Paoa we i Kam Antap
Olsem ol disaepol blong Niu Testeman, Ol Lata-dei Sent oli bin kasem promes blong endaomen wetem paoa we i kam long Lod.
Long spring blong 1836, Charles Rich i bin wan misinari we i stap prijim gospel we i kambak long Sot Ohaeo. Hem i bin harem nogud se hem i go tru long Ketlan, Ohaeo, long Epril 12—kolosap tu wik afta long dedikesen blong Ketlan Tempol.
Hem i Hem i luk haos blong Lod i stap antap long wan hil wetem blu wol mo red ruf. Be hem i let. Hem i bin mestem dedikesen, tabu kam tugeta, mo hem i ting se hem i mestem, promes endaomen blong paoa we i kam antap tu.
Long Septemba1830, sam manis afta we Jos we i bin kambak fulwan i bin oganaes, Josef Smit i bin kasem wan revelesen long Jisas Kraes blong singaotem ol memba blong Jos blong kam tugeta (luk long Doktrin mo Ol Kavenan 29:7–8). Sam manis afta Lod i talemaot from wanem. Ol Sent oli “go long Ohaeo,” long ples ia, Jisas i talem se, “Bambae mi givim loa blong mi long yufala; mo long ples ia bambae yufala i kasem paoa we i kam long heven; mo stat long ples ia, huia we bae mi jusum bae i go long medel blong evri nesen” (Doktrin mo Ol Kavenan 38:32–33; oli ademap). Ol Jos memba we oli bin harem revelesen ia oli luksave lanwis ia se hem i kamaot long Niu Testeman.
Ol Niu Testeman Disaepol we oli Endao wetem Paoa
Luk 24 i stat wetem wan taem we oli lusum hop. Jisas i bin ded long kros, mo wan grup blong ol woman disaepol blong Hem oli bin gobak long hol blong ston we Hem i stap long hem. Olgeta ol bin faenem se ston doa ia oli bin rolem aot, mo olgeta “oli no luk bodi blong Jisas, Kraes” (ves 3). I no longtaem ol mesenja we oli ol enjel oli givim olgeta hop “Hem i no stap long ples ia, Hem i girap bakegen long ded” (ves 6).
Afta, Lod we i girap bakegen afta long ded i kamkamaot long olgeta disaepol blong Hem mo givhan long olgeta. Hem i bin givim long olgeta wanem ol Kristian raon long wol oli luksave olsem wan “ Bigfala Wok” blong prijim gospel blong Jisas Kraes. Jisas i eksplenem se “ol man oli mas talemaot tok ya, se man i mas tanem tingting blong hem from sin blong hem, nao bambae God i fogivim hem. Tok ya i mas go long olgeta man, i stat long Jerusalem ya, gogo i finisim wol. (ves 47).
Be, Hem i talem long olgeta disaepol blong Hem blong oli no go aot hariap: “Be yufala i mas wet long taon ya gogo paoa ya blong God i aot long heven i kamdaon, i mekem yufala i strong” (ves 49). Endued (o “endao” long Inglis blong tedei) hem i wan translesen blong Greek toktok we i minim “blong kavremap.” Olgeta disaepol blong Kraes long taem bifo oli bin wet insaed long Jerusalem kasem taem we Hem i kavremap olgeta paoa blong antap. Afta, olgeta oli bildim kingdom blong God truaot long wol.
Bifo Hem i go bak antap long heven, Lod i talem long ol disaepol blong Hem se “Be yufala i mas wet long taon ya gogo paoa ya blong God i aot long heven i kamdaon, i mekem yufala i strong” (Luk 24:49).
Ol Lata-dei Sent oli Endao wetem Paoa
Ol Lata-dei Sent oli kam tugeta long Ohaeo long 1830 wetem wan tingting. Olgeta oli wet blong “kasem paoa we i kam long heven” (Doktrin mo Ol Kavenan 38:32) mo tekem mesej blong Jisas truaot long ful wol. Afta samtaem, Lod i talemaot long ol Sent se “oli mas kasem endaomen blong olgeta we i kam long heven insaed long haos blong mi” (Doktrin mo Ol Kavenan 105:33, oli ademap; luk tu long ves 11–12). Yet, plante long ol eli Sent oli no save wanem stret wanem bae i kam.
I no longtaem afta long koling mo odinesen blong Kworom blong Olgeta Twelef long 1835, Josef Smit i bin mit wetem olgeta abaot haos blong Lod. Josef i luksave se Olgeta Twelef oli “wantem save” mo oli no save andastanem wanem i stap kam. Hem i eksplenem long olgeta se oli nidim wan endaomen blong oli save “rere mo save winim ol samting” mo tijim gospel wetem paoa. “Taem yu endao,” hem i eksplenem, Ol Aposol “bambae oli prijim yet long evri kantri, mo famli, mo lanwis, mo pipol.”
Afta long taem ia, Josef Smit i talemaot seremoni we ol pris blong ol Man Isrel blong bifo oli bin stap folem. Blong rere from endaomen, evri prishud ofisa oli go tru long wasem mo kapsaedem oel “wetem semmak kaen blong oel mo long fasin Moses mo Aron i mekem, mo olgeta we oli stanap bifo long Lod long ol taem bifo.”
Long taem naoia, endaomen blong paoa hem i givim raet blong man i kasem bigfala paoa long saed blong spirit long wan spesel tabu miting. Olsem Elaeja Able—fas Blak Seventi insaed long Jos—ol prishud ofisa oli bin fas, prea, mo kakae sakramen blong Sapa blong Lod olsem wan kakae we oli serem tugeta. Oli bin testifae mo profesae, mo God i blesem olgeta wetem paoa. Olgeta we oli endao oli go aot blong bildim kingdom blong God taem oli prijim gospel we i bin kambak. Nomata long ol toktok blong agens, olgeta oli kasem proteksen long ol travel blong olgeta, blong mekem folem prijing blong olgeta, mo kasem blesing long ol famli blong olgeta.
Long Ketlan, ol man nomo oli tekpat long tabu asembli miting ia, we oli endao wetem paoa we i kam long heven. Be, sam yia afta, Ol Sent oli bildim Nauvu Temple. Josef Smit i soemaot se tempol seremoni i bin bigwan we i kam fandesen blong ol tempol eksperiens blong tedei. Long Nauvu, ol woman tugeta wetem ol man oli kasem endao wetem paoa.
Long ol toktok blong Hem i go long ol Rilif Sosaeti sista, Josef Smit i promes se tempol endaomen hem i “ol ki blong kingdom” bae “givim long olgeta,” semmak “olsem ol Elda.” Nomata hem i tekem ova long ten yia bifo ol woman oli kasem kol olsem ol Misinari, ol woman mo ol wok blong olgeta i pat blong bildimap kingdom blong God long wol ia.
Nomata Charles Rich i mestem dedikesen blong Ketlan Tempol, hem i lanem se hem mo sam narafala misinari we oli kam let blong Ketlan, bae oli eksperiensem endaomen. Afta long paten blong ol pris blong ol Man Isrel blong bifo (luk long Eksodas 29; 40), . Hem stap tugeta wetem ol narafala wan, blong fast, prea, mo kakae kakae blong Lod
“Mifala i bin profesae ful naet,” Charles i raetem “Oli bin profesae se plan blong sevem man oli bin raetem long evri han, leg mo bun” blong bodi blong Hem. “Mi fulwan long spirit blong profesi, mo mi bin endao wetem paoa blong heven.”
Hem spendem ful laef blong hem—47 yia—blong wok olsem wan disaepol blong Jisas Kraes blong bildim kingdom blong God.
Stat long taem ia, ol Lata-dei Sent raon long wol oli bin travel i go long haos blong Lod blong endao wetem paoa blong heven. Mo olsem ol eli Sent, endaomen i rere long yumi blong bildimap kingdom blong God olsem ol disaepol blong Jisas Kraes, mo wan dei kam olsem wan god tru long bigfala soa mo lav blong Hem.