“Ministri blong Ol Aposol: Wan Wok We Narafala Man i No Save Mekem,” Liahona, Maj 2025.
Ministri blong ol Aposol: Wan Wok We Narafala Man i No Save Mekem
Olsem wanem ministri blong Ol Aposol blong Lod long tedei raon wol i tajem wanwan man blong gud.
Kworom blong Olgeta Twelef Aposol ol Witnes blong Jisas Kraes long wol. Koling blong olgeta i spesel mo i hevi. Afta we oli singaotem olgeta blong givim seves, olgeta oli sarem doa long ol defdefren wok blong olgeta blong dediketem taem mo ol talen blong olgeta blong blesing ol narafala man. Wanwan oli kam wetem ol spesel presen mo talen long koling blong olgeta, oli kam moa antap from seves ia blong laeftaem, stap tijim gospel mo stap lanem, mo winim ol jalenj wetem fet long Lod.
Elda Ronald A. Rasband blong Kworom blong Olgeta Twelef Aposol mo waef blong hem, Melanie, oli jes sidaon blong lisin long apu pikinini boe blong tufala long Krismes konset blong skul taem prinsipol i wokabaot i kam from Elda Rasband mo askem hem sapos hem i save welkamem ol man long taem ia.
Taem hem i stap stanap mo lukluk i go long ol man mo miusik ban—evriwan oli wet blong program i stat—hem i tingting blong welkamem ol ges nomo mo wisim olgeta wan gudfala aftenun. Be afta hem i tingbaot koling blong hem olsem wan aposol blong oltaem stanap olsem wan spesel witnes long evri ples. “Ol man mo ol woman,” hem i talem, “Mi no save mestem janis ia [long] sisen ia we Kraes i bon blong serem witnes long nem blong Hem mo ministri blong Hem.”
Weaples olgeta oli go, huia man oli mitim, mesej blong Ol Aposol i blong diklerem se Jisas Kraes Hem i Pikinini blong God we i pemaot man. “Faswan mo moa impoten wan, evri taem, mifala i ol witnes blong Lod Jisas Kraes we i stap laef,” Elda David A. Bednar i talem, .
“Jisas Kraes hem risen ia we mekem yumi stap ia tedei,” Elda Dale G. Renlund i talem long wan devosen blong ol Rilif Sosaeti sista long London las yia. “Mi save fulwan se Hem i laef! … Ril merikel i hapen insaed long laef blong yu taem yu save hemia yuwan.”
“Olsem wanem nao mi save help blong bildim fet blong olgeta long Jisas Kraes?” Elda Quentin L. Cook i askem long ol memba long Sidni, Ostrelia, taem hamas kwestin ia i bin stamba blong ol mesej blong hem blong plante yia.
Ol tijing blong olgeta i soem hem i impoten tumas mo i nogat taem blong wet, mo oli wantem tumas blong ol narafala man oli kam moa klin, blong luk mo filim Sevya, mo eksperiensem bigfala lav blong Hem we Hem i givim tru long atonmen blong Hem. (luk long 3 Nifae 11:15). Ol tijing blong olgeta i fulap long lav mo andastaning. Olgeta oli askem strong long yumi blong sakem sin, be long wan kwaet wei. Olgeta oli wantem tumas blong ol memba oli gro long ol samting blong God, yumi save luk hemia long olgeta mo yumi no save talem yumi no luk. Taem pipol oli harem wan testemoni we wan Aposol i serem, i tajem hat blong olgeta mo ol laef oli jenis.
Ol Witnes blong Jisas Kraes.
Wanwan Aposol i gat ol spesel talen mo eksperiens blong serem long asaenmen blong hem. Wanwan i gat wan spesel wok blong hem. Wanwan i defren long fasin mo stael, be olgeta oli serem ol semmak kwaliti. Oli hapi, gat gud paoa, mo yu filim kamfot taem yu stap raon long olgeta. Plante taem, olgeta we oli mitim wan Aposol blong Jisas Kraes oli laekem respek we olgeta oli soem, mo ones fasin we oli gat.
I gat wan samting we i impoten abaot ol Aposol blong mekem samting—blong blesem, blong givim kamfot, mo blong serem witnes.
“Blong teti yia, hem i bin wan ona mo janis blong wok wetem ol memba blong Kworom blong Olgeta Twelef Aposol blong Jos Ia blong Jisas Kraes blong ol Lata-dei Sent,” Akting Presiden blong Kworom blong Olgeta Twelef Aposol i talem. “Evriwan long ol man ia oli bin helpem mi blong i kam wan moa gud disaepol blong Jisas Kraes.
“I no longtaem i pas mifala bin kam tugeta blong tekem wan kworom foto, mi bin kasem wan filing blong bigfala tangkyu blong stap pat long wan oda we i gohed tedei olsem we i stap bifo, olsem ol Disaepol blong Jisas Kraes.
“Ol nem mo ol fes … long kworom ia oli stap jenis: be wanem we i impoten hem i stap nomo: wanwan aposol oli akseptem wok ia blong stap ‘ol spesel witnes long nem blong Kraes long ful wol’ [luk long Doktrin mo Ol Kavenan 107:23]. I nogat wan wok we i swit moa we yu save givim long eniwan, o eni grup blong ol impoten man we blong oli mekem.”
Elda Dieter F. Uchtdorf i toktok long wan spesel konfrens blong Jerusalem Distrik long BYU Jerusalem Senta long Eprael 22, 2023.
“Ol filing blong tangkyu long Sevya i fulumap mi tedei taem yumi tingting long sakrifaes blong Hem long tu spesel ples,” Elda Dieter F. Uchtdorf i talem, taem hem i stap visitim ol tabu ples long Isrel long 2023. “Mifala i visitim hol blong ston,” ples we oli putum bodi blong Kraes insaed long hem.
“Mifala i visitim eria we samfala oli lukim olsem Garen blong Getsemane. Taem mifala wokbaot long medel blong ol olfala stamba blong olif tri, mifala i lisin long ol skripja ves we i tokbaot promes sakrifaes blong Sevya long bihaf blong yumi insaed long garen mo long kros.
“Bigfala harem nogud blong Jisas Kraes long Garen blong Getsemane mo long kros i winim ful respek blong yumi mo fasin blong talem tangkyu. Long semmak wei, naesfala samting we i hapen long namba tri dei afta we oli hangem Hem long kros i nidim respek blong yumi, mo tangkyu we i nogat en insaed long ol hat mo maen blong yumi.
“Olsem wan disaepol blong Kraes, Mi mi gat blesing blong talemaot testemoni blong mi se Hem i laef!”
Long wan sosol media post abaot fasin blong talem tangkyu long Lod, Elda Gerrit W. Gong i leftemap tingting blong yumi blong, “Oltaem letem yumi toktok wetem kaen mo kwaet fasin blong talem tangkyu from ol wok blong God mo glori, mo gudfala wok, mo sore, mo gladhat blong Jisas Kraes mo sakrifaes blong Atonmen blong Hem.”
Rere long wan Aposol
“I tekem Lod wan long taem blong tijim wan Aposol blong Lod,” Presiden Russell M. Nelson i talem. “Taem oli singaotem man ia i go blong joen Twelef ia, Lod i gat wan spesel samting we hem i wantem blong man ia i mekem.”
Long rod blong wanwan Aposol i gat ol tes—“ol tes blong leftemap tingting mo fasin blong wet longtaem”—oltaem lukluk gud long ol filing mo tingting blong yuwan, samtaem i putum laef long denja blong ded.
“Oltaem i gat tes,” Presiden Nelson i talem, taem hem i stap tokbaot wok ia long seves blong Lod. “?Yu wiling blong mekem ol had samting? Taem yu soem se yu wiling blong mekem pat blong yu, Hem bae helpem yu.”
Taem hem i stap givim toktok long ol memba long Ostrelia, Elda Cook i givim smol saed blong eksperiens blong hem taem hem i talem olsem wanem ol memba blong Kworom blong Olgeta Twelef Aposol oli filim se oli no redi, mo no inaf olsem we ol wod lida oli stap filim samtaem. “ Blong stap wan Aposol, long seves long Lod, hem fulap wetem tingting i stap daon” hem i talem.
Olsem wan Aposol we oli jes singaotem, Elda Neil L. Andersen i eksplenem se nomata hem i filim se hem i no inaf mo gat wan tingting i stap daon, hem i filim kamfot se Lod i bin blesem hem wetem wan kwalifikesen: “Mi save fulwan mo wetem strong tingting tru long paoa blong Tabu Spirit se Jisas hem i Kraes, Pikinini Boe blong God we Hem i lavem tumas.”
“Oli bin askem mi se mi filim olsem wanem blong stap olsem wan niufala Aposol,” Elda Patrick Kearon i talem long sem dei afta long koling blong hem olsem Kworom blong Olgeta Twelef.
Mi bin gat evri kaen filing man i save filim, mo mi save hemia i bigwan bitim mi. Be mi bae askem help. Mi bilif fulwan long wan Papa long Heven we i gat lav mo Pikinini blong Hem, Sevya blong yumi. Mo mi save se Olgeta bae oli help. Mi dipen long hemia. Mi bae traem bes blong mi blong kam, long ol taem we i stap kam, samtaem folem ol laen blong wan Aposol we yu maet gat long pikja long maen blong yu.
“Mo long dei ia taem mi stap traehad, 24 aoa afta long koling ia, blong akseptem mo dil wetem hemia, sapos yu fesem jalenj wan dei … se yu no pikjarem nomo se bae i olsem, yes, mi mi stap ia wetem yu.”
Presiden Russell M. Nelson i bin lidim wan grup blong ol lida blong Jos, we Elda Gerrit W. Gong tu i pat long hem, long wan visit i go long king mo kwin blong Tonga long 2019. Ol Aposol oli mit wetem ol hae man mo ol hed blong ol stet long wok blong olgeta blong openem ol doa blong ol nesen long gospel ia. Hemia i nidim plante yia blong rere long ol Aposol from bigfala asaenmen ia, Presiden Nelson i talem.
Ol Ambasada long Wol ia
Lukluk long Doktrin mo ol Kavenan 107:23, we Lod i singaotem Olgeta Twelef Aposol blong stap olsem “ol spesel witnes long nem blong Kraes long ful wol ia,” Presiden Nelson i talem: “Wanwan memba blong Twelef hem i wan Aposol blong ful wol ia. Hem i nidim blong lanem abaot evri pat blong wol, folem wetem pipol mo ol lanwis mo histri.”
Wok blong olgeta i kasem evri ples long wol ia. Olgeta oli mit wetem ol hed blong stet, lokol lida, media, ol memba long Jos long bigfala miting ples mo insaed long ol smol miting ples. Ol aoa oli save longfala mo nidim olgeta blong mekem moa. Olsem ol ambasada blong Lod Jisas Kraes, laef blong olgeta i nomo blong olgeta wan.
Long wan 12 dei ministri tua raon wol tru long sikis kantri long Yurop las yia, we program blong hem i taet gud—taem slip i kam long taem blong wan flaet long naet bitwin ol kantri —Elda D. Todd Christofferson i mit wetem o lida blong gavman, ol fultaem misinari, mo ol lokol Jos memba.
Wan impoten samting hem i we hem i bin miting wetem Minista blong Kalja mo Media long Kroesia, ples we hem i givim sapot blong Jos blong helpem plante man we oli bin lego hom kantri blong olgeta i go long kantri blong hem from wo long Yukren. “Mifala … i bin se i gat plante defren wei … mifala i save wok tugeta. speseli [blong helpem] olgeta we oli stap long bigfala nid,” Elda Christofferson i talem.
Afta we hem i visitim ol lokol lida long Dar es Salam, Tansania, blong anaonsem wan help we i kam long Jos blong helpem wan yumaniterian projek long 2024, Elda Gary E. Stevenson i mit wetem ol memba mo ol misinari.
Long wan naen dei travel i go long sam kantri long Afrika las yia, Elda Gary E. Stevenson i bin visitim Makuburi Helt Senta long Da es Salaam, Tansania, ples we Jos i stap help blong mekem i bigwan senta ia. “Taem yumi luk seves ia we yumi givim i kasem ol mama mo ol pikinini long ples ia,” Elda Stevenson i talem, “i bin tajem ol hat blong mifala.”
Blong makem 30 yia aniveseri blong Jos long Kambodia, Elda Renlund i mit wetem Praem Minista blong Kambodia, we hem i tokbaot olsem “wan gudfala man.”
Wan Aposol, we i bin wan dokta blong hat, i bin talem long Praem Minista se Jos Ia blong Jisas Kraes i stap givim kolosap US $2.2 milian blong mekem se oli save mekem wan senta blong sik blong hat long wan hospital long Siem Reap, we i stap samples 320 kilo mita long not blong Phnom Penh, blong mekem se i save gat helt kea we i moa gud blong olgeta olsem angkel blong Praem Minista, we i bin ded from wan sik blong hat.
Elda Dale G. Renlund i sekhan wetem Samdech Moha Borvor Thipadei HUN Manet, we i Praem Minista blong Kingdom blong Kambodia, long Phnom Penh long 22 Jenuware, 2024. Histri miting ia i ripresentem fas taem we wan lida blong Jos i bin mitim hed blong gavman blong Kingdom blong Kambodia.
“Mi bin gat janis blong stap wetem ol memba, ol lida, mo ol misinari long Ulanbatoa, Mongolia, mo long Kyoto, Hiroshima, Fukuoka, Sapporo, mo Tokyo, Japan,” Elda Ulisses Soares i talem afta we hem i visitim Asia Not Eria long 2024. “Long evri miting o kontak blong mi wetem ol nara man, mi filim bigfala lav mo fet blong olgeta pipol ia long Lod. Ol naesfala stori long jenis long laef blong olgeta i tajem mi bigwan mo mekem testemoni blong mi long Jisas Kraes i strong mo long gospel blong Hem we i kambak.
“… Hem i wan blesing blong mi blong filim Spirit blong Lod mo lav blong Hem long medel blong ol bigfala disaepol blong Kraes long ol kantri ia.”
Wok blong Ol Aposol
Blong stap open doa long gospel long defdefren kantri hem i wan stamba responsabiliti blong wan Aposol: “Olgeta Twelef, Lod i sendem olgeta oli go, oli holem ol ki blong openem doa taem oli talemaot gospel blong Jisas Kraes, mo faswan long olgeta Jentael, mo afta long olgeta Jiu” (Doktrin mo Ol Kavenan 107:35).
Long eksperiens blong Presiden Nelson olsem wan memba blong Twelef, ol doa blong gospel oli bin open long ol defdefren wei. Samtaem Spirit i wok long wan gavman lida kasem taem “hem i stat blong jenisim tingting blong hem,” Presiden Nelson i talem. Wan narafala taem wan man we hem i no wantem toktok wetem ol lida blong Jos, oli tekemaot hem long ofis mo Lod i bin givim long “mifala wan man we mifala i save toktok long hem.” Long sam situesen, Presiden Nelson i talem “mesej [long heven] long mi hem i semmak: ‘Putum moa efot. … No fraet blong mekem. Afta taem yu nomo save go moa, Mi bae Mi helpem yu’”
Glad long wan wok blong wan Aposol hem i, kam taem hem i balensem ol nid blong toktok long wan bigfala grup long semtaem blong givhan long wanwan man. Olgeta oli visitim ol memba long ol hom blong olgeta blong givim wan blesing, talem tangkyu, o givim kaonsel we oli nidim.
Elda Bednar i talem se: “Lod i sendem wan memba blong Kworom blong olgeta Twelef long wan ples we oli nid blong go long hem, long wan stret taem we ol fetful Lata-dei Sent mo ol nara man i stap traehad o oli nidim kamfot mo blong oli leftemap olgeta. God nao i lidim olgeta miting ia.”
Elda David A. Bednar mo waef blong hem, Susan, tufala mitim pipol afta long toktok long wan miting long Toluca, Mexico, long Novemba 5, 2023.
Samtaem seves blong olgeta i kamaot long pablik, olsem taem we Elda Stevenson i bin tekem pat long wan spesel nius konfrens long Naerobi, Kenya, we oli brodkastem laef long nasonal TV. “Wan kwestin we ating i … stap long tingting blong yu hem i, ‘Wanem hem i wan Aposol?’” Elda Stevenson i talem long taem blong brodkas ia. “Mifala … oli singaotem mifala blong go long evri nesen long wol mo serem witnes abaot tabu rilesensip blong Jisas Kraes, Pikinini Boe blong God we i stap laef.”
“Hem i abaot Hem,” Elda Dieter F. Uchtdorf i talem. “Mifala i ripresentem Hem. Evri samting hem i abaot God mo gudfala fasin blong Hem, mo hamas Hem i impoten long hapines blong ol pikinini blong Hem.”
Wok blong olgeta samtaem i kolosap nomo long hom—Hemia i trutok. Elda Bednar i stap fiksim ruf blong hom blong hem wan dei mo bin go long wan lokol stoa blong pem sam samting. Hem i bin werem klos blong wok: longfala traoses mo sus, wan T-Set, mo wan besbol hat.
“Wan man i kam kolosap mi taem mi stap selektem ol saplae blong mi mo talem, ‘Elda Bednar, klos we yu werem blong man i no luksave yu i no wok nomo.’ Mitufala i laf, mo afta hem i askem, ‘?I oraet sapos mi askem wan kwestin long yu?’
“Mi ansa, ‘hemia nao from wanem mi mi stap ia.’
“Hem i ansa wetem wan kwestin bakegen, ‘?Wanem nao yu minim?’
“Mi se, ‘… Mi mi stap ia from God i save se bae yumitu mit insaed long stoa ia mo se yu gat wan samting we yu wantem blong askem. Plis gohed mo serem wetem mi kwestin blong yu.’
“Mitufala i toktok long rod blong wokbaot kolosap 15 minit, mo mi traem blong helpem hem blong faenem ol ansa long kwestin blong hem. ?Hem bin wan aksiden we mi bin go tru long hem wetem wan gudfala man long wan lokol stoa? O hem i wan tabu iven we i folem plan blong wan Sevya we i … ansa long ol wari blong ol fetful man—wan?
“Mi biliv se long wok blong Lod, i no gat wan samting se hem i hapen olsem wan aksiden. Valiu blong ol sol i bigwan tumas long ae blong God.”
Elda Neil L. Andersen i stanap kwaet from wan foto long Febwari 22, 2024, insaed Jaime Cardinal Sin Vilij, Manila, Filipines, ples we Jos i riperem tri wota tank.
Stap Fesem Jalenj wetem Fet long Lod
Ol bigfala mo had problem we Ol Aposol oli Fesem Tedei Olgeta oli lukaotem insperesen taem oli tij mo givhan long pipol blong ful wol blong moa long 17 milian Jos memba we oli fesem tes long ol jalenj olsem raorao blong politik, ponografi, presa blong sosol media, ekonomi we fiuja blong hem i no klia. Raorao bitwin ol kantri i spolem wok. Ol valiu blong tradisen oli stap lus we i jalenjem pis long sosaeti.
Ol memba blong Twelef oli tekem responsabiliti blong olgeta i impoten mo wantem tumas blong bildim fet insaed long wan wol we namba blong ol pipol we i nogat fet i stap go antap.
“Hem i klia se paoa blong Lod i stap muv long ol lida blong Jos, we i leftemap tingting blong olgeta blong wetem … tekem impoten aksen ia kwiktaem,” Presiden M. Russell Ballard (1928–2023), Akting Presiden blong Kworom blong Olgeta Twelef Aposol i talem. “?Kwestin we yumi evriwan i mas askem long yumiwan se, ‘Yumi stap folem spid blong [ol lida blong yumi]?’ Wanwan long yumi i mas rere blong ansarem kwestin ia. Mi talem tru long yu se hem i wan topik blong storian long medel blong Kworom blong Olgeta Twelef Aposol. … Hemia i no wan taem blong spel o muv sloslo wetem ol koling ia. …”
“… Yumi mas rere blong kipim spid wetem ol lida blong yumi, tekem ol longfala step folem ol longlongfala step blong olgeta.”
“Olsem ol man blong folem Jisas Kraes, yumi lukaotem blong kam olsem Sevya mo folem eksampol blong Hem long evri samting we yumi mekem,” Elda Uchtdorf i talem. “Long taem we yumi putum leg blong yumi long rod blong stap olsem wan disaepol, ol blesing blong God we yu save luk mo hemia we yu no save luk, bae oli stat blong kam long yu.
“Nomata weaples yu stap, yu mo mi i save wokbaot long rod blong stap olsem wan disaepol. Letem yumi putum tingting i stap daon; letem yumi prea long Papa we I Stap long Heven wetem ful hat blong yumi mo talemaot we yumi wantem blong kam kolosap long Hem mo lanem samting abaot Hem.”