Papa long Heven i Wantem Toktok long Yu

Long Adam mo Iv mo evriwan we bae oli folem tufala, wan enjel i talem, “Bae yu sakem sin mo bae yu prea long God long nem blong Pikinini blong oltaem gogo i no save finis” (Moses 5:8).

Jisas i gohed i talem: “Sipos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala” (Matiu 7:7). “Be taem yu yu prea,… prea long Papa ya blong yu … we i save luk ol samting we yu mekem we man i no save luk” (Matiu 6:6). “From hemia, yufala i mas prea long fasin ia: Papa blong mifala we i stap long heven, nem blong yu i tabu” (Matiu 6:9).

Jisas i prea oltaem long Papa blong Hem. “Jisas i go antap long wan hil blong prea. Mo hem i stap long ples ya wan fulnaet, i stap prea long God” (Luk 6:12). “Mo … Hem i go antap long wan hil blong prea” (Mak 6:46). “Mo olgeta oli bin kam long wan ples we oli singaotem Getsemane: mo Hem i talem long ol disaepol blong Hem, Yufala i sidaon long ples ia, mo bae mi mi go prea” (Mak 14:32). Long kros, Jisas i prea from ol soldia we oli krusifaem Hem: “Papa, plis yu fogivim olgeta ya; from we oli no save samting ya we oli stap mekem” (Luk 23:34).

Ol skripja oli givim yumi kaonsel ia blong “prea oltaem” (Luk 21:36; 2 Nifae 32:9; 3 Nifae 18:15; Doktrin mo Ol Kavenan 10:5; 19:38; 20:33; 31:12). “Kaonsel wetem Lod long evri samting, mo bae hem i lidim yu i go long ol gud samting” (Alma 37:37). Moa tu, yumi “i givim evri tangkyu mo pres we ful sol blong yumi i gat paoa blong holem,” (Mosaea 2:20), stap luksave evri samting we Papa blong yumi i mekem from yumi.

Presiden Russell M. Nelson i bin eksplenem se: “Fasin blong gat strong tingting long yuwan long saed blong spirit i stat wetem fasin blong luksave se wanwan niu moning hem i wan presen we i kam long God. … Hem i holemtaet yumi tedei mo i sapotem yumi long wan taem i go long narafala taem. (luk long Mosaea 2:21).”

Nifae i talem se, “From sapos yufala i lisin long Spirit we i tijim wan man blong prea, bae yufala i save se yufala i mas prea; from ivel spirit i no tijim wan man blong prea, be i tijim hem se hem i no mas prea” (2 Nifae 32:8).

Ol samting Kraes i Mekem gel blong Jaeras i girap bakegen long ded, i kam long Greg K. Olsen

Wetem eksampol blong Sevya mo kaonsel blong ol enjel mo ol profet long ol handred yia we i pas, yumi save i klia se prea evri dei blong talem tangkyu from ol blesing blong yumi, mo blong kipim wan prea insaed long hat blong yumi oltaem. Yumi gat responsabiliti ia blong toktok wetem Papa blong yumi.

Be i givim moa glad taem Papa we I Stap long Heven i ansarem ol prea blong yumi. Wan kwestin blong tingting long hem long wol ia blong gud mo nogud hem i, ?olsem wanem yumi save kasem gud mo save ol ansa, daereksen, mo kamfot we i stap kam long Papa blong yumi?

Long moa long seventi yia blong laef blong mi, mi save se Papa blong yumi i toktok long yumi. Yumi no stap yumiwan. Olgeta we oli stap long heven oli stap lukluk long yumi mo helpem yumi taem yumi lukaot blong folem Sevya.

Stap kasem ol ansa blong ol prea blong yumi i stat wetem fet blong yumi long papa long Heven mo long Pikinini Boe blong Hem Jisas Kraes. Jisas i singaot, “Yufala i no fraet, yufala i no fraet, yufala i biliv nomo.” (Mak 5:36). Yumi trastem Hem, mekem wanem we yumi save mekem blong kipim ol komanmen, mo lukaot han blong Hem long evri samting. “Man i no save mekem God i kros long wan samting, … , be nomo, olgeta we oli no luksave han blong God long evri samting, mo oli no obei long ol komanmen blong hem.” (Doktrin mo Ol Kavenan 59:21).

Han blong God long laef blong yumi i no minim se Hem i mekem ivel o ol bigfala safaring long wol blong yumi. Be, i minim se long ol hadtaem blong yu mo taem we laef we laef i no fea, Hem bae stanap wetem yu, givim yu paoa blong mekem samting, kamfot long yu, mo“ bae hem i konsekretem ol hadtaem blong yu blong oli kam wan blesing blong yu” (2 Nifae 2:2).

Taem yumi gat fet long Hem mo kipim ol komanmen blong Hem, yumi lanem isi blong harem gud voes blong Hem.

Long Septemba 1993, fas yia blong mi olsem wan Jeneral Atoriti, Presiden James E. Faust (1920–2007), long taem ia, hem i wan memba blong Kworom blong Olgeta Twelef Aposol, i bin invaetem waef blong mi, Kathy mo mi blong go long wan divosen blong Brigham Young Yunivesiti wetem hem. Tingbaot, 1993 hem taem we smatfon, sosol media, mo intanet, plante man oli no yusum yet.

Long toktok blong hem we taetel blong hem, “Voes blong Spirit,” Presiden Faust i givim woning ia se: “Long jeneresen blong yu, yu bae harem plante defren voes we oli stap talem long yu olsem wanem blong laef, olsem wanem blong mekem wanem we yuwan yu glad long hem, olsem wanem blong kasem evri samting ia. Yu bae gat samples faef handred televisen janel long ol fingga blong yu. Bae i gat plante kaen sofwea, kompiuta we i save mekem wok blong yu; kompiuta we i save pablisim samting, ol satelaet we oli kasem samting, ol netwok blong komunikesen we bae givim yu plante infomesen. … Voes we yu mas lanem blong harem hem i voes blong Spirit.”

Presiden Boyd K. Packer (1924–2015), Presiden blong Kworom blong Olgeta Twelef Aposol i tokbaot smol, kwaet voes blong Spirit taem hem i stap tokbaot wan eksperiens blong John Burroughs, wan man we stadi histri blong neja, taem hem i stap wokbaot wetem ol fren blong hem long wan ples we i fulap long ol man. Hemia ol toktok blong President Packer:

“Antap long ol noes blong laef blong siti [Mr. Burroughs] i harem singsing blong wan pijin.

“Hem i stop mo lisin! Olgeta we oli stap wetem hem oli no bin harem. Hem i lukluk raon. I nogat wan man i bin luksave.

“I mekem hem i wari se evriwan oli mestem wan samting we i naes tumas.

“Hem i tekem wan selen long poket blong hem mo sakem i go long antap. Hem foldaon long rod wetem wan noes, be i no laod bitim singsing blong pijin ia. Evriwan i tanem olgeta; olgeta oli save harem!

“Hem i had blong seperetem evri noes blong ol trak blong siti long wan singsing blong wan pijin. Be yu save harem Yu save harem klia nomo sapos yu trenem yuwan blong harem.”

Ol tijing blong Presiden Packer abaot Tabu Spirit i bin tekem ples blong 1979, wan taem we laef i bin kwaet mo noes blong wol i bin kwaet bitim taem blong tedei.

Presiden Nelson i tijim se, “Sapos yu tekem moa taem long ol apdeit long sosol media bitim blong tekem moa taem long ol smol kwaet voes blong Spirit, yu yu stap putum laef blong yu long saed blong spirit long denja.”

Presiden Faust i talem se, “Sapos yumi lisin gud long voes blong Spirit, yumi mas openem tu ol sora blong yumi, tanem ae blong fet blong yumi i go long stamba blong voes, mo lukluk oltaem i go long heven.”

Voes blong Spirit i kam tugeta long maen mo ol filing blong yumi. “Yes, luk, bambae mi talem long yu insaed long maen mo insaed long hat blong yu, tru long Tabu Spirit, we bambae i kam insaed long yu mo bambae i stap insaed long hat blong yu” (Doktrin mo Ol Kavenan 8:2). Lisin long filing blong yu—revelesen i stap stat long ples ia nao.

Prea wetem wan Hat we i stap Biliv

Ol ansa mo filing oli no kam wetem fos. Yumi prea mo yumi wet wetem wan hat we i stap biliv. Samtaem ol ansa bae oli kam long laef ia, be long olgeta we oli stret mo gud, Lod bae oltaem sendem pis blong Hem (luk long Jon 14:27). Ol ansa, plante taem, oli kam taem yumi stap prea blong helpem olgeta raon long yumi. Samtaem, olgeta oli kam “tingting folem tingting, rul folem rul” (Doktrin mo Ol Kavenan 98:12).

Voes blong heven i save kam long yumi long ol taem we yumi no save mo long ol ples we yumi no save, be yumi faenem ol janis olsem ia long ol kwaet spes mo ol tabu ples. Long kwaet taem long ol eli moning prea mo tingting hevi blong mi, mi faenem ol blesing we ol no stap hapen oltaem. Ol kwaet taem blong stadi skripja blong miwan, we mi mekem olsem wan nomol praktis, i tekem i kam voes blong spirit insaed long ol hat long yumi olsem faea samtaem.

Samtaem ol filing ol kam tru long wanem we yumi stap ridim, mo sam narafala taem, wanem we yumi stap tingting hevi long hem i tekem wan ansa i kam long wan defren level blong wari. Tingbaot ol toktok blong Elda Robert D. Hales: “Taem yumi wantem blong toktok long God, yumi prea. Mo taem yumi wantem Hem blong toktok long yumi, yumi ridim ol skripja.”

Taem noes mo ol samting blong wol we oli pulumaot tingting mo oli kavremap yumi, Lod i daerektem ol profet blong hem blong bildim moa mo sam moa tempol. Insaed long tabu haos blong Lod, taem yumi lego ol jalenj blong yumi aotsaed afta go insaed wetem ol prea mo wari blong yumi, yumi kasem ol tijing blong ol trutok abaot laef we i no save finis.

Las yia, Presiden Nelson i bin givim long yumi wan naesfala toktok:“Ol dia brata mo sista blong mi, hemia promes blong mi. I no gat wan samting bae i helpem yu moa blong hang strong long aean rel bitim we blong stap wosip long tempol oltaem long taem we yu save mekem. I no gat wan samting bae i protektem yu moa taem yu stap long medel blong tudak blong wol. I no gat wan samting bae i mekem testemoni blong yu long Lod Jisas Kraes mo Atonmen blong Hem i kam strong moa o helpem yu andastanem moa naesfala plan blong God. I no gat wan samting bae i givim yu moa kamfot long spirit long taem blong harem nogud. I no gat wan samting bae i openem ol heven moa. !I nogat!”

Evri jeneral konfrens i tekem i kam moa blesing. Long manis Eprael, wan moa taem, bae yumi harem mo mit insaed long jeneral konfrens blong harem voes blong Lod. Yumi kam long jeneral konfrens we yumi bin prea mo rere from. Wanwan long yumi, i gat ol wari mo kwestin we yumi wan faenem ansa blong olgeta. Yumi kam blong riniu fet blong yumi long Sevya, Jisas Kraes, mo mekem paoa blong yumi blong winim temtesen i kam strong. Yumi kam blong kasem ol tijing we oli kam antap. Mi promesem yufala se taem yufala i rere, mo yufala kam long ol sesen blong jeneral konfrens we yufala i prea from, bae yufala filim ansa blong wari blong yufala, mo yufala bae save se “han blong heven” i stap long yu.

Gat fet se Papa long Heven i stap toktok long yu. . !Yes Hem i mekem! Letem fet blong yu long Hem mo long Pikinini Boe blong Hem we Hem i lavem tumas, tufala i helpem yu go tru long ivel mo harem, voes blong Papa blong yu Mi testifae se Hem i stap mo Hem i lavem yu moa bitim we toktok i save talem.