“Mi Mi Gud Inaf?,” Liahona, Maj 2025.
Ol Pikja blong Fet
?Mi Mi Gud Inaf?
Mi ting se bae mi faenem fet, lav, ol trutok long saed blong spirit taem mi stap laef folem wan defren laefstael . Be mi no faenem. Mi faenem olgeta long Jos Ia blong Jisas Kraes blong Ol Lata-dei Sent mo insaed long tempol.
Foto i kam long Leslie Nilsson.
Taem mi wan yangfala long ol yia 1960 olsem, wo i stap gohed strong long Vietnam. Oli bin kilim John F. Kennedy, semmak long Martin Luther King Jr. mo Robert Kennedy. Mi bin go agensem papa mo mama blong mi mo evri kastom mo skul long taem ia. Mi no bin wantem blong mared mo karem ol pikinini i kam long wan wol we i fulap long faet, i no ones mo fulap long trabol.
Mi bin lego hae skul long junia yia blong mi, mo muv i go long Haight Ashbury Distrik blong San Francisko, Kalifonia, YSA, mi livim laef blong wan hipi (wan man we i go agensem ol valiu mo fasin blong wan oganaesesen be i sapotem o faet from pis mo lav, i dresap long ol kala klos mo i gat longfala hea) long yia 1969 kasem 1972. Mi stap wetem wan grup blong ol pipol we mifala i serem ol samting tugeta, mi wok long eni kaen wok we mi save faenem, mo mi glad long wan laefstael we i fokas long ol naesfala samting blong laef ia mo ol tingting se bae evri samting i kam gud mo i fulap long fasin blong yusum tumas drag.
Taem Randy i bin wan yangfala, hem i ting se laef blong hem i no gat wan hapi fiuja. Hem i se: “Mi bin go agensem papa mo mama blong mi mo evri kastom mo skul long taem ia,”
Long semtaem, hem i stap lukaotem fet, lav, mo trutok long saed blong spirit. Mi bin tingting plante mo stadi long ol defren relijin, mo traem blong tekemaot long olgeta eni samting we i klia long mi we i tru mo i gat valiu. Be,evri hadwok blong lukaot, i en wetem harem nogud mo kros. Brata blong mi, Jon, we i save abaot wanem mi stap lukaotem, i sendem long mi wan Buk blong Momon.
Jon i bin joenem Jos finis mo i raet i kam long mi “Yu mas ridim buk ia”.
Taem oli sakemaot mi long wok blong mi long fiul stesen from mi bin stap ridim Buk blong Momon, mi tingting miwan, “Hemia i no wan gudfala samting.” Mi bin sakemaot buk ia.
I no long taem i pas, Jon i talem long mi se bae hem i stap kam long San Francisco Bei Eria wetem wan grup blong singsing long Brigham Yang Yunivesiti.
Mi wantem blong luk yu,” hem i talem, mo i se bae mitufala i mit long Kalifonia Oklan Tempol.
Taem mi stap ron long Bei Eria long naet, oltaem mi stap luk tempol. I pulum intres blong mi long saed blong spirit , mekem se mi go rid abaot tempol mo wantem blong go insaed. Mi mo Jon i mit wan eli moning long ol graon blong tempol. Afta long visit blong mitufala, hem i se, i taem nao blong hem mo grup blong hem i go insaed long tempol.
Jon i talem long mi se “Randy,bae yu no save kam insaed long tempol.”
“Mi save, Mi wan hipi,” mi talem, “be mi bin stadi long ol Is relijin, mi wan man blong no kakae mit, mi laef wetem wan grup blong ol man we mifala i serem evri samting, mo mi gat $20. ?Hamas nao blong pem blong kam insaed?”
“I bitim wanem we yu gat,” Jon i talem. “Yu no gud inaf.”
Long taem ia, mi tekem miwan se mi save mo mi gud long evri samting, long saed blong ol tingting, mo long saed blong spirit. ?Olsem wanem nao mi no gud inaf?
Fulap wetem Hop
Blong sam yia, papa mo mama blong mi i no save wea ples mi stap long hem. Tufala i ol gudfala pipol we oli traem blong givim long mi bes edukesen mo wetem andastaning oli no bin glad long ol joes we mi bin mekem. Taem papa blong mi i stat blong sik, mama blong mi i fosem mi blong gobak hom long Wasington, D.K. Taem mi kasem, Jon i faenem wan wok blong mi long wan kampani we oli stap bildim Wasington D.K. tempol.
Mi no bin save, be hem i bin mekem arenjmen blong mi wok wetem wan grup blong ol riten misinari. Mi sapraes se Jon Howel, we i lid foman, bae i askem wan grup memba blong prea long stat blong wanwan dei blong wok—wan samting we mi neva luk ol grup we mi bin wok wetem bifo oli mekem.
Wan dei long wok, sam long mifala we i stap leftemap wan long ol hevi doa blong fored blong tempol, taem hem i foldaon mo i smasem fingga blong mi i smol olsem wan koen. Jon i hariap i kam, i luk fingga blong mi, mo i singaotem blong oli karem oel we oli konsekretem , mo i givim mi wan blesing. Fingga blong mi i hil kwiktaem mekem se mi no nid blong luk wan dokta.
Long wan nara taem, oli givim wan resa bled long mi mo talem blong mi skrasem ol toti aot long simen floa.
“?From wanem?” Mi askem long wan long ol grup memba. “Bae oli no putum kapet daon?”
“Randy, yu save se haos ia blong huia, yu save?” hem i askem long mi. “Yumi stap mekem haos ia i gud mo stret evriwan blong Wan we i Stret mo i Gud evriwan.”
Wol ia i stap draon long krangke fasin, konkon fasin, fasin blong no laekem man, mo fraet, be eksampol mo ol tijing blong ol yang man ia, oli bin fulumap mi wetem hop. Taem ol memba blong grup oli serem ol bilif blong olgeta wetem mi, mi save oli stap ones mo tru. Oli bin givim tu yia blong laef blong olgeta blong sevem ol nara man, mo oli gat wan waes mo gudfala lukluk. Mi wantem se bae ol tijing blong olgeta i tru. Mi filim olsem mi stap stat blong kasem save long wanem mi bin stap lukaotem mo se Lod i bin stap rere from mi long saed blong spirit.
Jon Howel i givim tingting blong mi mit wetem ol ful-taem misinari. Be, mi jusum blong gat brata blong mi mo wan long ol fren blong hem, wan moa riten misinari, blong tijim mi. Taem oli stap tijim mi, mi wantem wan saen olsem pruf se wanem mi stap lanem i tru. Mi no wantem gohed wetem ol storian sapos i no gat pruf.
Taem mi askem long tufala hao tufala i kam blong save trutok, tufala i talem, “Mifala i bin ridim mo bin prea mo bin filim wan witnes we i kam long Tabu Spirit.” Oli talem long mi se mi tu mi nidim semmak witnes.
Long naet ia mi bin go wan bus blong ol tri kolosap long ples we mi laef long hem wetem ol neba. Mi no save hao blong mi bin prea, be mi bin mekem wetem strong tingting blong wantem. Mi askem God semmak kwestin ia fo taem se: “?I rili tru we Buk blong Momon i tok blong God? ?I tru se Yu mo Pikinini Boe blong Yu i kamkamaot long Josef Smit? ?Hemia i tru Jos Ia blong Jisas Kraes? ?Mi mi gud inaf blong kam wan memba?”
Ansa blong wanwan kwestin i kam olsem wan kwaet voes long sol—“Yes”—fo taem. Ol wispa ia i kam wetem filing we i kwaet wetem paoa.
Wetem hed we i stap lukluk daon, stap nildaon long prea mo fulap long ol wota blong ae, mi singaot: “?Sapos hemia i ansa we bae Yu givim long mi, bambae mi akseptem mo bae mi komitim ful laef blong mi long Yu mo gospel ia from Yu mekem i klia long mi.”? Ol toktok i no save eksplenem ol tingting, ol filing , mo ol trutok we i bin fulumap mi.
Mi no save tanembak long witnes we mi bin kasem long naet ia mo i stap semmak olsem long taem we i bin hapen. Stat long taem blong prea ia, God i bin pruf blong ol ansa long mi long plante taosen mo ril wei blong merikel.
“Jos ia i wan merikel” Randy i talem,pikja blong hem long ples ia wan manis afta long baptaes blong hem. “Mo laef blong mi long Jos i bin fulap long ol merikel.”
Wan Faea we I Bin Stap Bon Insaed long Mi
Afta sot taem we mi bin baptaes long 1974, mi atendem fas jeneral konfrens long Sol Lek Siti wetem brata blong mi, Jon. Mi sapraes taem we Elda Boyd K. Packer (1924–2015) blong kworom blong olgeta Twelef Aposol, we i bin mitim anti blong mi long Niu Yok Siti tri wik bifo konfrens, i tokabaot mi mo Jon long toktok blong hem long Sandei moning.
Hem i ripitim wanem we anti blong mi i talem, Elda Packer i se: “Tu long ol pikinini boe blong brata blong mi i joenem Jos blong yu. Mi no save bilivim jenis we i bin hapen long laef blong tufala.”
Tru long bigfala jenis ia (Luk long Alma 5:14), wan faea i bon insaed long mi mekem se mi wantem serem. I no long taem, mi faenem miwan long Aedaho olsem wan ful-taem misinari. Hafwei long misin blong mi, papa blong mi, we i bigfala hiro mo bes fren blong mi, i lusum laef blong hem. Mama blong mi i bin kolem misin presiden blong mi mo askem sapos mi save kam hom mo givim laef stori blong hem. Taem we misin presiden blong mi i givim joes blong weta mi save go, mi talem long hem mi wantem blong prea mo fas blong 24 aoa bifo mi mekem wan joes.
Long naet ia mi bin gat wan drim. Papa blong mi i kamkamaot long mi. Long medel blong naesfala mo storian blong mitufala we i gat bigfala mining, hem i talem long mi, “Boe, stap long misin blong yu.”
Mi folem kaonsel blong papa mo mi stap.
Tru long bigfala jenis ia we i folem fasin blong jenisim laef blong hem, “wan faea i bon insaed” long Randy mekem se hem wantem serem olsem wan ful-taem misinari.
Sikis manis afta long misin blong mi, mi holem han blong mama blong mi taem hem i stap pulum las win blong hem. Ten yia afta, waef blong mi, Lisa, i faenem wan leta insaed long wan olfala bokis, we i kam long papa mo mama blong mi. Papa i bin raetem i kam long mi long taem mi stap long misin be hem i bin ded bifo hem i sendem i kam.
“Ol hat blong mitufala i bin mo i stap mo bae i oltaem fulap wetem lav from yu. Mi kam blong luksave se ol samting bae i no oltaem i stret evriwan, be laef i olsem nao. … Kraes i no talem, ‘Folem mi mo bae i isi.’ Hem i talem se,‘Karem kros [blong yu], mo biaen long mi’ [Matiu 16:24]. Hem i bin karem kros, be yumi evriwan i gat wanwan pis blong wud. Maet ples blong yumi long heven bae i dipen long olsem wanem yumi stap wokemaot blong yumi. Boe,mifala i lavem yu tumas.”
Wanem We Mi Stap Lukaotem
Taem mi stap gro i kam antap, mi bin mekem nogud long papa mo mama blong mi, be mi neva gat tu tingting long lav blong tufala. Long taem we mi faenem Jos, mi bin wokhad blong talem tangkyu long olgeta mo givim ona long tufala.
Long 17 Febwari, 2018, tu wik bifo oli klosem Wasington D.K. Tempol blong oli fiksim bak, mi bin sil i go long papa mo mama blong mi,42 yia i pas afta tufala i pas tru long vel i go long taem we i no save finis. Bigfala boe blong mi, William i mekem proksi long bihaf blong papa blong mi mo Lisa i mekem proksi blong mama blong mi. Mi filim se papa mo mama blong mi, we oli bin silim tufala long taem ia i bin stap long spirit.
Insaed long tempol yumi faenem ol rop we i fasem yumi tugeta i go wetem olgeta we yumi lavem blong taem we i no save finis. Mi save hemia i tru.
Taem mi yang, mi no bin wantem blong mared o gat pikinini. Be tedei waef blong mi, ol pikinini blong mi mo ol apu pikinini blong mi oli ol bigfala tresa blong mi. Jos Ia i wan merikel, mo laef blong mi long Jos Ia i bin fulap long ol merikel. Wetem Josef Smit, mi talem se: Sapos mi no bin eksperiensem wanem we mi bin go tru long hem, bae mi no save bilivim tu miwan.”
Fifti yia we i bin pas, mi bin wan konstraksen wokman long Wasington D.K. Tempol Mi gat strong tingting se laef blong mi bae i no gat wan hapi fiuja. Tedei mi wan odinens wokman insaed long semmak tempol, we mi bin akseptem invitesen blong Lod blong folem Hem, kasem hiling blong Hem, stap glad long ol odinens blong Hem mo traehad blong kam olsem Hem.
Randy mo waef blong hem, Lisa, i givim seves insaed long Wasington D.K. Tempol, we hem i help blong bildim 50 yia i pas.
Foto i kam long Leslie Nilsson.
Jos Ia we i kambak i no wan aedia, wan tingting o wan komuniti o kalja nomo. Hemia i tru Jos Ia blong Lod mo Sevya, Jisas Kraes.
Mi ting se bae mi faenem wanem we mi stap lukaotem long San Fransisko Be mi no faenem. Mi faenem insaed long Jos Ia blong Jisas Kraes blong Ol Lata-dei Sent mo insaed long haos blong Lod, “Rij samting we i stap olsem hat blong king blong Kambak ia blong gospel blong Jisas Kraes.”