?Huia i Fulumap Wota long Ples blong Baptaes?

Pikja i kam long David Miles

Afta we mitufala i mestem wan bas long Naerobi, Kenia, mi mo kompanion blong mi gat tingting blong serem gospel wetem evriwan we mitufala i luk taem mitufala stap wet from wan nara bas blong go long eria blong mitufala. Mitufala i toktok long kolosap ova 400 pipol.

Wan long olgeta i Benard, we i wok long konstraksen kolosap. Mitufala i givim wan Buk blong Momon long hem mo jalenjem hem blong ridim evri dei mo askem God sapos hem i ol toktok blong Hem.

Fo manis i pas, mi transfea i go long Naerobi Long fas sakramen miting blong mi long we, mi luk Benard. Hem i bin baptaes finis long taem ia mo i oden i go long Aronik Prishud.

Wetem gladhat Benard i invaetem mifala blong visitim hom blong hem mo tijim Megan, waef blong hem. Taem mifala i mit wetem Megan,mifala i sapraes long bigfala fet we hem i gat. Taem hem i prea blong save se mesej blong mifala i tru, God i ansarem prea blong hem.

Mifala i invaetem Megan blong baptaes long nekis Sandei. !Be long wik ia, siti blong Naerobi i anaonsem se bae oli katem wota blong 10 dei! Afta long baptaes intaviu blong Megan long Satedei, mi mo kompanion blong mi i bin prea se bae baptaes blong hem i mas hapen long nekis dei.

Mitufala i lego kaekae, toktok wetem ol lida blong mitufala, mo traem ol defren wei blong gat wota— be nogat nomo. Long naet ia mitufala i gohed blong rere from baptaes. Afta mitufala i nildaon mo prea bakegen. Mitufala i gat tingting ia we i kam long Spirit blong hukum wan en blong wan kaoju long wan tap blong wota we i stap insaed long kijin blong wan mitinghaos mo putum nara en blong paep insaed long ples blong baptaes. Mitufala i talem wan moa prea, lokem doa , mo go hom.

!Long nekis moning taem mitufala i go long mitinghaos, long sapraes blong mitufala , ples blong baptaes i fulap long wota! Mitufala i jekem tap blong wota long kijin, be i no gat wota i kamaot. Nogat wan long branj i gat save long hao ples blong baptaes i bin fulap long wota.

Megan i bin baptaes long dei ia. Ful wod i kam blong witnesem baptaes blong hem mo welkamem hem long Jos. Tap blong wota i drae i stap, be ae blong evriwan i wetwet wetem fasin blong talem tangkyu.

Presiden Russell M. Nelson i bin tijim, “Lod bae i blesem yu wetem ol merikel we yu nidim sapos yu biliv long Hem, ‘ no gat tu tingting nating long eni samting;’ [Momon 9:21]. Mekem wok long saed blong spirit blong lukaotem ol merikel.” Mi save se from mi mo kompanion blong mi, i bin mekem wok long saed blong bodi mo spirit—stap prea, stap traem ol defren wei, mo stap folem ol kwaet toktok blong Spirit—mitufala i bin luk wan merikel we i kam long Lod