? Mi Rili Save Trastem Kaonsel we I kam long Profet?

I Kam long Savanna Cummings

Oltaem mi stap jusum blong folem profet, ?be bae mi save trastem hem naoia?

Taem mi bin kasem kol se bae mi aot long misin blong mi, mi bin harem nogud mo konfius.

Sam manis bifo mi rilis, Fas Presidensi i bin kamap long tingting blong sendem mi mo sam moa narafala misinari blong gobak hom folem risen we long tingting blong miwan, mi ting se maet oli ol storian blong rod nomo blong wan raorao bitwin ol kantri. I no bin gat eni pruf se bae i gat wan samting bae i hapen.

Mi no bin ting se i gat eni ting blong mi wari from.

Stap Kwestinim Insperesen

Mi bin oltaem wantem blong sevem wan misin mo bin wok had tumas blong kasem gol ia. I had blong kasem mane, be mi bin faenem wan wok we i helpem mi blong gat inaf blong go long misin blong mi. Taem mi openem misin kol blong mi, mi filim se hem i wan raet samting we mi bin mekem, mo mi save se i kam long Papa long Heven.

Be, from se COVID-19 wol sik, oli bin asaenem mi bakegen i go long wan misin long Yuta blong naen manis bifo mi go ova si long misin we oli asaenem mi blong go long hem long fas ples. Mi bin glad tumas from naoia mi stap long stret ples we God i bin singaot mi blong go long hem.

Be, afta sam manis long we , kwiktaem nomo oli tekemaot mi long ol pipol mo kantri we mi lavem. Mi filim olsem se oli tekemaot evri samting long mi.

Mi filim se mi brokbrok. Wetem strong filing mi bin gat kwestin se weta hemia i wan joes wetem insperesen o no.

Wetem filing blong harem nogud , mi flae i go hom long Teksas. Gobak blong mi long hom i hapen hariap tumas mekem se papa blong mi mo ol brata mo sista blong mi oli no bin stap blong welkamem mi long eapot.

Wan Blesing blong Stap Sef

Sam dei afta we mi bin lego misin blong mi, mi bin sek taem wan raorao i bin hapen long ples we mi bin givim seves long hem. Long taem ia, mi bin lanem se blong stap folem profet i bin kipim mi sef long wan ril wei. Mi bin fulap wetem fasin blong talem tangkyu from profet mo insperesen blong hem.

Mi bin mekem wan promes long miwan blong oltaem bae mi folem wanem profet i talem iven sapos i no mekem sens long taem ia.

Elda Ulisses Soares blong Kworom blong Olgeta Twelef i bin talem se: “Blong stap gat ol profet i wan saen blong lav blong God from ol pikinini blong Hem. Oli mekem ol pipol blong Hem oli save ol promes, mo huia stret i God mo Jisas Kraes.”

Mi rili bilif se Presiden Russell M. Nelson i man blong toktok long bihaf blong Lod. Hem i wok stret wetem Papa long Heven wetem Sevya blong lidim yumi long sefti mo givim yumi hop mo daereksen long ol had taem.

Ol Blesing blong Stap Folem Profet

Sapos yu stap tingting yet se weta God i singaot ol profet, advaes blong mi i blong ak long ol invitesen blong hem. Traem blong stap ridim bakegen ol toktok blong Presiden Nelson long konfrens we i bin pas, mo stap stadi long ol skripja we hem i talem. Ak long ol invitesen ia mo stadi long ol blesing we hem i promesem wetem ol invitesen ia.

Elda Soares i tijim tu se, “Blong stap folem [ol profet], bae laef blong yumi i fulap long glad mo bae i no had tumas, ol hadtaem mo ol problem bae oli isi blong yumi karem, mo bae yumi krietem wan klos blong faet long saed blong spirit raon long yumi.”

Mi bin luk ol blesing long laef blong mi taem mi stap folem ol kaonsel blong profet. Mi save ol blesing ia oli stap oltaem blong evriwan we oli putum tras blong olgeta long God mo profet blong Hem.