God i bin Toktok long ol Sent blong Taem Bifo—?Hem i save Toktok long Mi?

Prea blong Josef wetem Tingting i Stap Daon

I stat wetem wan kwestin. Mo hem ia i kam wanem we Elda Alexander Dushku blong olgeta seventi i tokbaot olsem wan “bigfala mo strong kamkamaot blong laet mo trutok .” Prea blong Josef Smit wetem tingting we i stap daon i lid i go long wan naesfala visit blong Papa long Heven mo Jisas Kraes (luk long Josef Smit—Histri 1:14–17). Olsem we i naes tumas blong save toktok wetem God, long fes, ol eksperiens olsem oli hapen wanwan taem mo oli tabu.

From se bae i no yumi evriwan bae i gat semmak janis olsem Josef, “yumi tu yumi save gat bigfala laet ia blong yumiwan—wan smol laet long wan taem afta wan narawan.” Taem yumi askem wan kwestin mo nildaon long prea wetem tingting we i stap daon, bae yumi kasem wan ansa we i kam long God tru long Tabu Spirit.

Foto blong ples blong baptaes insaed long Ogden Yuta Tempol

Paoa blong tempol

Olgeta sent long Ketlan, Ohaeo, i bin sakrifaesem taem, mane, mo wok blong bildim haos blong Lod. Long dedikesen blong Ketlan Tempol, Josef Smit i bin prea se God bae i blesem ol fetful Sent ia wetem paoa taem oli kam insaed mo wosip (luk long Doktrin mo Ol Kavenan 109:13). Tempol i sapos blong stap olsem “wan haos blong prea, wan haos blong livim kakae, wan haos blong fet, wan haos blong lan, wan haos blong glori, wan haos blong oda, mo wan haos blong God” (Doktrin mo Ol Kavenan 109:16).

Long ol las dei, yumi gat blesing blong ol tempol raon long wol. Yumi kasem promes ia tu se bae yumi kasem revelesen taem yumi atendem tempol. I no long taem i pas, Presiden Russell M. Nelson i talem “insaed long tempol bae yumi save ‘kasem Tabu Spirit fulwan’ [Doktrin mo Ol Kavenan 109:15]. Pikjarem long maen wanem promes ia i minim long toktok ia blong stap gat ol heven i open from olgeta we oli lukaotem trutok we i no save finis wetem wan truhat.”

Kwestin blong Haeram i go long profet

?Yu stap tingting se bae i olsem wanem blong yu askem profet blong i toktok long God long bihaf blong yu? Haeram, brata blong Josef i mekem olsem ia nao. Hem i kasem kaonsel ia we i kam long Lod tru Josef: “Luk, yu yu Haeram, boe blong mi; lukaotem kingdom blong God, mo evri narafala samting bambae oli ademap folem wanem we i stret.” (Doktrin mo Ol Kavenan 11:23).

Samtaem ol daereksen oli no kam tru ol nara pipol. Presiden Russell M.Nelson i bin givim kaonsel long yumi blong : “lukaotem help long ol voes we yu save trastem—long ol profet, sia mo reveleta mo long ol kwaet voes blong Tabu Spirit.” From se yumi evriwan i no save askem stret long profet ol kwestin blong yumi, yet yumi save kasem ol ansa from ol kwestin blong yumiwan.

Pikja droing blong Oliva Kaodri kam long Lewis A. Ramsey

Stadi blong Oliva long Fet

Oliva Kaodri i bin wan impoten help long Josef long taem blong transletem Buk blong Momon. Be long 1829, hem i bin harem nogud. From wanem hem i no save mekem wok blong translesen? Lod i bin givim long Oliva sam spesifik kaonsel long olsem wanem blong kasem ansa long kwestin blong hem—kaonsel i aplae long yumi tu tedei.

Taem yumi gat kwestin, oli leftemap tingting yumi blong mas stadi gud long hem insaed long maen blong yumi, gat fet mo lukluk long ol filing mo tingting. (luk long Doktrin mo Ol Kavenan 9:6–9). Ol filing mo tingting i save kam long wei blong spirit, ol wom filing , o pis long maen. Olsem we Elda Mathias Held blong olgeta Seventi i talem, “Taem [ol risen we ol waes wetem ol insperesen blong Tabu Spirit ] i kam wan long sol blong yumi ,wan komplit pikja i soemaot ril samting we i stap hapen blong ol samting olsem we i stap.”

Foto i kam long Craig Alan Shelley

Ol Petriakel blesing blong Famli Smit

Ol petriakel blesing oli bin pat blong Jos stat long taem blong OlTesteman i kam (luk long Jenesis 48). Taem oli oganaesem Jos long ol lata dei, God i bin talem long Josef blong singaotem papa blong hem, Josef Smit Senia., olsem petriak long 1834. Tri dei afta, Smit famli i kam tugeta blong Josef Smit Senia, bae i save givim wan petriakel blesing long wanwan long ol pikinini blong hem wetem ol waef blong olgeta. Ol blesing ia oli givim kaonsel mo kamfot long laef blong olgeta.

Antap long dikleresen blong wanem laen yu kamaot long hem, wan petriakel blesing “i wan skripja blong yu.” Taem yumi gohed blong stadi long ol petriakel blesing blong yumiwan, yumi “mas holemtaet ol toktok blong hem, tingting hevi long ol toktok ia, mo mas laef klin inaf blong kasem ol promes blesing long laef ia mo long taem we i no save finis.”

Pikja droing blong Ema Smit,i kam long Lee Greene Richards

Daereksen blong Ema hemwan i kam long God

Olsem waef blong profet, wanwan taem Ema Smit i traehad blong fesem ol hadtaem mo ol raorao we famli blong hem i mas gotru long hem. Long Doktrin mo Ol Kavenan 25, yumi save ridim ol toktok blong kamfot mo paoa we Papa long Heven i givim long Ema.

Taem yumi stap lukaotem ol wanwan mesej blong yumi blong kamfot we i kam long Papa long Heven, yumi save askem ol prishud blesing. Presiden Jemes E. Faost (1920–2007), Seken Kaonsela long Fas Presidensi, i tijim se : “Prishud blesing i save helpem long ol smol mo ol bigfala desisen long laef blong yumi. Sapos, tru ol prishud blesing blong yumi, yumi save mekemaot wan smol pat blong huia man/woman God i wantem yumi blong kam olsem, bae yumi lusum ol fraet blong yumi mo neva gat tu tingting bakegen.”

Pikja droing blong Josef F. Smit i kam long Albert Salzbrenner

Skripja Stadi blong Josef F. Smit

Taem we sik, wo, mo ded i kavremap wol long 1918, profet Josef F. Smit i lukluk long ol skripja from ol ansa. Hem i stat blong luklukbak mo tingting hevi afta we hem i stadi long ol toktok blong Pita. Hem i bin luk wan visen blong Jos we hem i bin luk Sevya i stap oganaesem misinari wok long spirit wol. (Luk long Doktrin mo Ol Kavenan 138.)

Olsem we Elda Robert D. Hales (1932–2017) blong Kworom blong Olgeta Twelef Aposol i bin tijim se: “Taem yumi wantem toktok long God, yumi prea. Mo taem yumi wantem Hem blong toktok long yumi, yumi ridim ol skripja.” Ol skripja oli ol toktok blong God we oli rekodem tru long ol raeting mo long dijitol taem blong yumi tedei, i mekem i moa isi blong yumi aksesem. Taem yu ridim mo tingting hevi long ol skripja, bae yumi faenem help long heven we yumi nidim.

Foto i kam long Jon McKinney

Ol Efot blong Wantem Harem Hem

Presiden Russell M. Nelson i tijim: “Taem yumi stap lukaot blong stap ol disaepol blong Jisas Kraes, ol hadwok blong yumi blong stap lisin gud long Hem i mas kam wetem moa tru tingting. Hem i minim se yumi hadwok wetem tingting, oltaem, blong fulumap evri dei laef blong yumi wetem ol toktok blong Hem, ol tijing blong Hem, mo ol trutok blong Hem.” Semmak olsem ol Sent long taem bifo, yumi save kasem ol mesej we i kam long God we oli yumiwan mo oli ril.

God i bin toktok long olgeta. Bae Hem i toktok long yumi. Yumi jes nidim blong harem Hem.