Jekem Ket

Pikja blong man we i raetem stori long fam i kam long Shaun Sutton

Kolosap long en blong taem blong mi olsem wan yang seves misinari, mi bin folem wan kwaet toktok blong givim seves tu dei long wan wik long wan kao boe fam(wan fam we i open blong ol man oli kam visitim) long Yuta blong militeri mo ol famli we oli laef i stap afta we wan famli memba i ded. Mi no gat nating eni eksperiens wetem eni samting we i go wetem wok blong fam, be mi bin glad tumas.

Long stat blong taem blong mi long fam, oli bin askem mi blong klinim ol hos stol (ol smolsmol haos o sed blong ol hos). Oli bin asaenem, Elda Saltern, blong soem long mi wanem blong mekem,gudfala fren mo kompanion blong mi we mi go wetem hem blong stap tij long ol aftenun.

Wan dei taem mi stap go blong kasem las stol blong klinim, mi folem Elda Saltern i go insaed. Long maen blong mi, mi kasem wan sofsof filing blong askem se blong klosem get biaen long mitufala. Mi bin sakemaot tingting ia mo gohed blong wok mo klin.

Shrek, i wan long ol bigfala hos long fam, we i stap long wan long ol stol. Hem i stat blong muv wetem fraet taem mifala i stap klinim ples. Kwiktaem nomo, Shrek i ron i kamaot long stol i go tru long get we i open mo ron pas bitim ol narafala hos aotsaed long fanis we i blokem olgeta.

Tangkyu bigwan, se wan long ol wokman we i gat plante eksperiens long fam i tekem wan baket blong ot(kakae blong hos) mo kwiktaem i tanem tingting blong hos blong i kam bak. Taem hem i putum Shrek i gobak insaed long stol blong hem, hem i lukluk mi mo askem wetem smael, “Wanem nao yumi lanem?”

Lesen we i klia i stap se blong oltaem klosem get. I rimaenem mi long skripja we mi ridim long semmak moning blong dei ia we i tijim mi se blong folem “gudfala toktok blong Tabu Spirit” (Mosaea 3:19).

Taem Elda Saltern mo mi i bin go insaed long stol blong Shrek, mi no bin lisin long kwaet toktok blong Tabu Spirit blong klosem get. Mi bin tekem mi ting se Spirit i blong givim advaes long mi nomo long ol samting we i long saed blong “spirit” we i go wetem ol skripja o ol komanmen. Eksperiens ia i bin mekem mi gat tingting we i stap daon. Mi kam blong luksave se save blong Spirit i bigwan i bitim wanem we mi save—iven long saed blong fam.

Presiden Thomas S. Monson (1927–2018) i bin tijim, “Tingabaot se wok ia i no blong yuwan mo miwan nomo. … Taem yumi stap mekem wok blong Lod, yumi gat raet ia blong kasem help long Lod.”

Maet mi no bin stap tijim gospel long fam, olsem we mi mo Elda Saltern bae i mekem long aftenun ia, be mi bin kasem raet ia long tabu help mo daereksen—iven taem mi stap klinim haos blong ol hos.