“Stap Pat long Plan blong God mo insaed long Tempol,” Liahona, Maj 2025.
Stap Pat long Plan blong God mo insaed long Tempol
Tri prinsipol ol rimaenem yumi se yumi evriwan i save kasem ol blesing we God i givim long ol pikinini blong Hem.
Foto blong Barankuila Kolombia Tempol i kam long Leslie Nilsson
Mi sidaon wetem wan grup blong ol memba blong Jos. Mifala i neva bin mitim mifala bifo, be mifala i semmak long wan wei: mifala i singgel.
Nao, mi wantem helpem yufala save wan samting blong wan seken. Insaed long gospel blong Jisas Kraes, oli no singaotem yumi long wan nem. Tru aedentiti blong yumi, Presiden Russell M. Nelson i bin tijim se, yumi “ol spirit pikinini blong God.” Mi save se hem i gat nid blong yumi singaotem sam memba blong Jos ia singgel. I gat ol risen blong hemia. Be samtaem, nem ia long situesen olsem hemia, i save kontribiut blong mekem ol memba oli filim se oli no pat. Hemia bae mekem i moa had blong olgeta oli filim fulwan se oli pat long ol blesing blong fasin blong sevem man, mo fasin blong kam olsem wan god.
Yu luk, mifala i bin stap tokbaot tempol—mo sam pipol long grup oli bin filim se oli no pat blong kasem wan ful tempol blesing from oli singgel. Mi andastanem; se taem yu stap long wan Jos we i fokas long famli be yu no mared yet, hem i had blong kam pat wetem olgeta. Be mi save tu se Lod i no jajem wan man se hem i stret mo klin blong kasem ol promes blesing folem lukluk blong bodi o taetel blong hem. Hem “i lukluk long tingting” (1 Samuel 16:7) mo mekem ol blesing blong Hem i rere i stap blong evriwan we oli jusum blong folem Hem. Mi bilivim hemia wetem ful hat blong mi. Wetem lukluk ia, hemia tri prinsipol blong helpem Ol Lata-Dei Sent we oli singgel blong save se olgeta oli pat long plan blong God mo insaed long tempol.
1. God i mekem plan blong Hem i blong wanwan long ol pikinini blong Hem.
From we kavenan blong mared hem i niu kavenan ia we i nogat en, blong mekem se yumi kam olsem wan god, hem i klia se plan blong God, Hem i no mekem blong olgeta we oli singgel (Luk long Doktrin mo Ol Kavenan 131:1–3). Be Elda Patrick Kearon i bin tijim se: “Naesfala plan blong Papa blong yumi, ‘nambawan’ plan ia blong Hem, Hem i mekem blong i tekem yu go i hom, i no blong kipim yu aot . I nogat wan man i bildim wan blok long rod mo putum wan man i stanap i stap blong mekem yu tanem raon o i sendemaot yu. Blong talem tru, hemia i oposit. God i stap gohed blong wantem gat rilesensip wetem yu. Hem i wantem evri pikinini blong Hem blong oli jusum blong gobak long Hem,’ mo Hem i yusum evri posibol wei blong tekem bak yu.”
I no tingting blong God blong sendem aot olgeta we oli singgel, blong kasem ol blesing we Hem i givim. Presiden M. Russell Ballard (1928–2023), Akting Presiden blong Kworom blong Olgeta Twelef Aposol, i bin tijim se, “ol skripja mo ol profet blong ol las dei ia oli konfemem se evriwan we oli fetful blong kipim ol kavenan blong gospel, bae oli gat janis blong laef olsem wan god.” Evri sol oli impoten long ae blong Papa long Heven—oli impoten tumas i mekem Hem i sendem Stret Pikinini blong Hem we Hem i lavem tumas blong ded mo tekem ol sin blong yumi evriwan blong bae yumi save gat presen ia we i laef we i no save finis (luk long Jon 3:16–17; Doktrin mo Ol Kavenan 18:10–12).
Sapos laef i kam i defren bitim we yumi tingting long hem, yumi bae faenem yumiwan i stap kwestinim stamba tingting insaed long plan blong God, Yet plan blong Hem i neva promes se laef blong yumi evriwan bae i semmak. Yumi no save wetaem bae ol glad, ol wari, ol sakses, ol soa hat bae oli kam. Presiden Dallin H. Oaks, Fas Kaonsela long Fas Presidensi, i talem se, “I gat fulap samting we yumi no save yet, we i mekem se, be wan stret samting we yumi save, i blong gat tras long Lod mo lav we hem i gat long ol pikinini blong Hem.”
Yumi bae no save from wanem rod blong yumi i olsem we i stap naoia. Be blong stap trastem God mo lav blong Hem bae givim klia tingting abaot olsem wanem Hem i krietem plan blong Hem blong evri pikinini blong Hem—we i tekem yu tu.
Foto insaed blong Rom Itali Tempol Visita’ Senta blong Massimo Criscione
2. Tempol i holem ol blesing blong wanwan long yumi.
Yumi maet tingting long ol siling olsem samting blong wan hasban mo waef nomo Be antap long fasin blong yunaetem ol kapol wetem Lod, ol siling oli yunaetem ol famli blong taem we i no save finis. Tru long ol siling, evri pikinini blong God oli save stap glad long ol blesing we i no save finis sapos olgeta oli kipim ol kavenan blong olgeta.
Siling paoa i pruvum se evri prishud odinens long heven mo long wol ia i posibol. Elda D. Todd Christofferson blong Kworom blong Olgeta Twelef Aposol i bin tijim se: “[Siling Paoa] hem i mekem se fasin blong sevem wanwan man mo blong famli i kam olsem wan god, i stap blong evri pikinini blong God long eni ples mo eni taem, we oli laef long wol. I nogat eni nara stadi blong bilif relijin o man, o atoriti we i save givim wan janis olsem we i gat evri samting ia long hem. Siling paoa klia i wan saen blong jastis we i stret evriwan, bigfala sore, mo lav blong God.” Ol blesing we Lod i givim, oli blong evriwan, mo oli stap blong evriwan we bae mekem mo kipim ol kavenan wetem Hem.
Yumi save andastanem gud olsem wanem plan blong God hem i blong yumi evriwan taem yumi wosip insaed long haos blong Lod. Spendem taem insaed long tempol, Presiden Nelson i bin tijim se, “bae helpem yu blong tingting selestial blong kasem wan visen blong huia yu stret, huia yu save kam, mo wan kaen laef we yu save kasem blong oltaem.” Hem i eksplenem tu se stap wosip insaed long tempol bae givim yumi proteksen, wan strong testemoni, kamfot, revelesen blong yuwan, save mo paoa i kam bigwan, mo wan bigfala andastaning long plan blong God.
Nomata yumi mared o singgel, tempol i holem ol samting long saed blong spirit we yumi evriwan i gat raet long hem—hem i wan ples blong kasem paoa mo i givim paoa long evriwan we i gat hat i wantem kam kolosap moa long God. Blong save moa, luk long saed blong “Kasem Paoa tru long Wosip long Tempol.”
3. Insaed long tempol, yumi save mekem rilesensip blong yumi wetem Jisas Kraes i kam strong moa.
Insaed long tempol, fokas hem i long Jesus Christ. Hem i senta blong plan blong God mo Hem i risen we yumi evriwan i save risivim plan blong sevem plan mo kam olsem wan god. Presiden Nelson i bin tijim se: “Haos blong Lod i wan haos blong stap lan. Long ples ia, Lod i stap tijim yumi long wei blong Hem. Long ples ia, wanwan odinens i stap tijim yumi abaot Sevya. Long ples ia, yumi stap lan olsem wanem blong openem vel mo toktok klia moa wetem heven. Long ples ia, yumi stap lanem hao blong ronemaot enemi mo yusum prishud paoa blong Lod blong mekem yumi, mo olgeta we yumi lavem, oli kam strong moa. Wanwan long yumi i mas lukaot ples blong haed long hem long ples ia.”
Yumi save faenem sefti mo filing ia blong pat insaed long tempol taem yumi stap lukaotem Sevya insaed long ol odinens mo ol kavenan. Taem yumi mekem olsem, yumi bae faenem pruf se Hem i lavem yumi mo se “evriwan i semmak long God” (luk long 2 Nifae 26:33). From lav blong Hem long yumi, Hem i wantem yumi blong “fasem taet yumi blong taem we i no save finis” wetem Hem mo gat raet ia long “spesel kaen blong lav mo sore” tru long ol kavenan blong yumi. Sapos yumi mekem mo kipim ol tempol kavenan, yumi save mekem rilesensip blong yumi wetem Hem i strong, i givim yumi “hop, glad, mo fasin blong gat hop long ol ol hadtaem long laef blong yumi”—nomata long ol situesen blong yumi.