?Olsem Wanem Nao Ol Kavenan blong Yumi Oli Helpem Yumi kam Kolosap long Paoa blong God?

Foto i kam long Connor Johnson

Wanwan long yumi i gat janis ia blong mekem ol tabu kavenan wetem God blong heven. Yumi mekem ol kavenan taem yumi stap tekpat long ol prishud odinens. Taem yumi kipim ol kavenan, Hem i blesem yumi wetem paoa blong Hem.

Tingbaot wetem mi daereksen blong profet, Presiden Russell M. Nelson abaot olsem wanem blong gat akses long paoa blong God: “Evri man mo evri woman, we i tekpat long ol odinens blong prishud, mo oli mekem mo kipim ol kavenan wetem God, oli save yusum paoa ia blong God.” Daerek akses long paoa blong God hem i wan presen we Hem i serem fri nomo wetem ol pikinini blong Hem.

?Paoa ia we i wok taem man i kipim ol kavenan we hem i mekem tru long ol prishud odinens,i luk olsem long evri dei laef blong yumi? ?Olsem wanem nao wan kavenan woman i save kam kolosap long tabu paoa ia?

Mi hop se wan eksampol blong miwan bae helpem yu taem yu mekem ol wok long saed blong spirit we yu filim strong blong mekem, blong lanem wanem i minim blong endao wetem paoa blong God.

Wan dei mi kasem wan teks mesej long waef blong boe blong mi we i talem: “Talem wan prea blong Dottie.”

Apugel blong mi Dottie i no bin slip long las naet. Amy i bin stap wetem hem ful naet mo talem se Dottie i bin fiva. Amy i givim hem sam meresin, but Dottie i hot nomo mo i no save slip. Mo boe blong mi Connor i bin travel from wok mo bae i kambak hom afta long tu dei.

Taem ples i delaet, Amy i faenem maot blong Dottie i blu. Han blong hem tu oli blu mo kolkol taem yu tajem. Amy i kasem strong filing ia blong, “Tekem Dottie i go long dokta blong ol pikinini.” Hem i folem filing ia, hem i kolem ofis blong dokta blong ol pikinini, mo oli talem se bae Dottie i save go.

Be, ofis blong dokta blong ol pikinini i stap long narafala strit kolosap long haos blong mama blong mi. Amy i kasem filing ia se hem bae draev i go long haos blong mama blong mi. Mama blong mi i stap wok long yad blong hem mo hapi blong lukaot Goldie, 4 yia sista blong Dottie, taem Amy i takem Dottie i go long dokta blong ol pikinini. Hem i wan ansa long wari blong Amy abaot nid ia blong lukaot Goldie mo semtaem lukluk long Dottie.

Dokta blong ol pikinini ia i faenem se Dottie i gat sik long lang blong hem, we hem i bin kasem afta we hem i pulum wota blong swim i go insaed long lang blong hem long ol dei we i pas. Dottie i kasem ol meresin blong tritim hem mo tekem haf blong dei ia blong ledaon long han blong mama blong hem we i leftemap hem smol antap blong hem i save pulum gud win.

Mi ofa blong pikimap sam kakae blong aftenun long rod blong mi i go long haos. Mo Amy i letem mi, we mi mi talem tangkyu from. Mi tingting long olsem wanem Amy i bin manejem afta long wan naet we hem i no slip gud, wari long wan bebi we i sik, mo nid blong lukluk Goldie.

Mi wokbaot i go insaed long hom wetem basket blong kakae ia mo faenem Amy mo ol gel long pis. Amy i wokbaot long glad mo i gat laet raon long hem. Hem i gat pis, iven we hem i fesem wan moa naet hemwan wetem sik Dottie Hem i no bin fraet. Hem i gat strong tingting. Hem i wan pis we i winim andastaning. Mi wantem sidaon nomo mo filim fulwan wanem we i bin hapen.

Amy i traem blong kipim ol kavenan blong hem wetem God mo God i blesem hem wetem paoa blong stap strong. Spirit i bin givim hem tingting blong tekem ol aksen we hem i bin tekem blong kea long Dottie. Paoa blong Lod i givim hem moa paoa blong lukluk long nid blong famli blong hem wetem fasin blong stap wet longtaem mo lav, wetem filing ia se evri samting bae oraet.

Hemia hem i blesing blong paoa blong God, we i stap blong yumi save kasem tru long ol tabu kavenan blong yumi, mo tru long atonmen sakrifaes blong Sevya. Paoa ia i jenisim yumi, mekem yumi strong, mekem yumi stap kwaet, givim yumi strong tingting, givim yumi pis, mo leftemap paoa blong yumi blong mekem ol tabu responsabiliti blong yumi olsem ol woman.