Ol Tabu Wei blong Komunikesen

Blong stap luksave taem God i toktok i nidim fet mo tras. Fet oltaem i lukluk nomo long Jisas Kraes. Yumi nidim tu blong trastem Hem. Hem i bin talem:

“Yes, luk, bambae mi talem long yu insaed long maen mo insaed long hat blong yu, tru long Tabu Spirit, we bambae i kam insaed long yu mo bambae i stap insaed long hat blong yu.

“Nao, luk, hemia i spirit blong revelesen” (Doktrin mo Ol Kavenan 8:2–3).

Be revelesen mo tabu daereksen i no kam nomo taem yumi stap wet from wan saen we i kam long spirit. Yumi mas mekem aksen. Olsem we waef blong mi i bin talem long mi blong mekem wetem konfrens tok blong mi, samtaem yumi nidim blong mekem i simpol nomo, blong “stat naoia.”

Taem mi mo Isabel i bin givim seves olsem ol misin lida long Franis Lion Misin, mi nidim blong jusum weaples wanwan misinari i sud go long hem insaed long misin mo wetaem blong mekem asaenmen ia. Mi faenemaot se Spirit bae i lidim mi sapos mi prea from help mo afta yusum ol bes tingting blong mi. Ansa bae i kam taem evri samting i stap long ples blong hem.

Long koling we mi gat naoia, oli sendem mi i go long ol stek truaot long Jos blong oganaesem bakegen ol niu stek presidensi. Taem mi mo kompanion blong mi i stap mekem intaviu wetem wanwan man, mifala i gat ol tingting, ol filing mo ol aedia we i kam long mifala. Afta mitufala i kaonsel mo prea tugeta. Long en, revelesen i kam, mo Lod i konfemem long mifala huia Hem i singaotem blong givim seves.

Hem i wan proses blong luksave taem we God i toktok mo blong luksave wanem Hem i wantem. Yumi nidim blong soem se yumi wantem blong mekem aksen wetem fet mo tras.

Wan impoten wei we God i toktok long ol pikinini blong Hem i tru long ol profet. !Blong gat profet tedei long wol ia i wan gudfala nius! Hem i stap kasem ol revelesen long God blong lidim mo gaedem Jos (luk long Amos 3:7). Yumi save kasem tu long gaed mo proteksen taem yumi stap folem ol tijing blong hem. Hemia i no isi oltaem, be Lod i daerektem yumi blong folem profet “wetem fasin blong save wet longtaem mo wetem fet” (Doktrin mo Ol Kavenan 21:5).

“Famli: Wan Ofisol Toktok i go long Wol,” wan eksampol we i givim pruf abaot toktok blong profet, stat long taem we oli introdiusum 30 yia i pas. Hem i tokbaot plante samting we yumi no ting se bae yumi save gat mo i givim gaed we yumi no ting se bae yumi nidim—be naoia yumi save. Maet ol gaed blong profet i no wanem we yumi wantem harem oltaem. Maet i no semmak wetem ol valiu blong sosaeti blong naoia. Nomata long hemia, bae yumi kasem gaed mo proteksen taem yumi folem profet.

Askem ol kwestin mo Lukaotem ol Ansa

Long ol eli dei blong Restoresen, samtaem God i toktok blong ansarem ol kwestin we i kam long hat we Josef Smit mo ol narawan oli gat. Taem we Josef mo Oliva Kaodri i bin stap wok blong stap transletem Buk blong Momon, oli kam long tijing blong Sevya abaot doktrin blong Baptaes (luk long 3 Nifae 11:23–33). Tufala i wantem blong lanem moa mo tufala i bin go insaed long ol bus blong tri blong prea. I no longtaem, Jon Baptaes i kamkamaot mo i putumbak atoriti blong mekem baptaes andanit long wota blong kam klin aot long ol sin.

Long wan nara taem, Emma, waef blong Josef, i bin wari abaot toti we ol man we oli stap smokem paep mo kakae tabak oli mekem long taem blong ol miting. Josef i tekem wari ia i go long Lod mo kasem wan revelesen—“wan Tok blong Waes” (Doktrin mo Ol Kavenan 89:1)—abaot ol praktis we i helti long saed blong bodi mo spirit, blong gud blong ol pikinini blong God.

Ol eksampol ia—mo plante nara eksampol—oli rimaenem yumi se i ORAET blong gat ol kwestin, sapos nomo yumi stap lukaotem ol ansa long raet daereksen. Sapos yumi tekem ol kwestin blong yumi i go long Lod, bae yumi faenem ol ansa. Samtaem ol ansa bae i kam semtaem nomo. Be, plante nara taem, ol ansa oli kam “tijing folem tijing, rul folem rul, smol long ples ia mo smol longwe”(2 Nifae 28:30). Ating yumi mas wet long ol ansa blong helpem yumi blong lanem samting mo gro, be God bae i ansarem yumi folem tingting, wei mo folem taem blong Hemwan.

Taem yumi mas wet long God blong toktok long yumi, hem i impoten se yumi holemtaet wanem yumi save mo ol eksperiens we yumi bin gat. Sapos no, bae yumi save lusum olgeta. Yumi no wantem gat tu tingting long ol eksperiens we i pas finis wetem Spirit hemia from se naoia yumi stap traehad. Long ol taem olsem, yumi mas luklukbak mo tingbaot olsem wanem yumi filim taem yumi bin filim kolosap long God.

Wan taem, Alma i bin askem ol kwestin ia long ol pipol blong Sarahemla:

?Yufala i bin bon long God long saed blong spirit? ?Yufala i bin kasem pikja blong hem long fes blong yufala? ?Yufala i ting se yufala i bin kasem bigfala jenis ia long hat blong yufala? …

“Mo nao luk, mi talem long yufala, … sapos yufala i bin gotru long wan jenis long hat, mo sapos yufala i bin filim blong singim singsing blong lav blong pemaot man, bae mi askem: ?yufala i save filim samting ia naoia?” (Alma 5:14, 26).

Yumi mas mekemsua se yumi tingbaot ol eksperiens long saed blong spirit mo no ting nating long hem. Yumi mas oltaem askem yumiwan, “Mi save filim samting ia naoia?” Hemia i givim paoa long yumi long ol taem we yumi filim se God i stap kwaet. Bae yumi kam moa gud tu blong luksave ol taem we Hem i toktok long yumi.

Fasin blong toktok wetem Papa long Heven i wan laef samting. Yumi mekem pat blong yumi blong kipim i laef i stap taem yumi stap lukaotem mo krietem ol janis blong kasem ol tabu komunikesen. Oltaem mo wetem paoa, yumi save prea long God blong kasem pis, kamfot mo blong Hem i gaedem yumi. Yumi save stadi ol toktok blong Hem insaed long ol skripja mo filim paoa blong Spirit. Yumi save folem tu ol toktok blong profet.

Taem yumi joen wetem Papa blong yumi long Heven we yumi lavem, yumi save kam ol tul long ol han blong Hem blong helpem Hem long bigfala mo gudfala wok blong Hem. Taem yumi stap harem save ol revelesen mo ol kwaet toktok we yumi kasem, yumi save helpem ol narawan blong filim se God i save olgeta mo i lavem olgeta mo i wantem toktok long olgeta.

Promes ia se God i harem mo i toktok long ol pikinini blong Hem i wan bigfala blesing. Tabu komunikesen wetem Hem oltaem, i soem rod we yumi nidim blong folem long laef ia.