“Stap Konek wetem Sevya,” Liahona, Maj. 2025.
Ol Voes blong Ol Lata–dei Sent
Stap Konek wetem Sevya
!Taem mifala i stap kam daon long top blong hil, kwiktaem nomo papa blong mi mo sista i foldaon aot long moto blong tufala!
Pikja i kam long David Miles
Wan sama, famli blong mi i go long wan longfala spel long saot blong Jaena, wan ples we mifala ron nomo long ol moto insaed long ol bus blong ol tri. Taem mifala i kasem kamp blong ol moto, mifala i sapraes taem ol gaed oli givim long mifala ol klos we i kavremap fulbodi blong i protektem mifala, mo ol bigfala helmet mo glas. I luk olsem i tumas long ol man we bae oli ron long wan hot dei,be mifala i werem ol klos ia nomo.
Afta we mifala i kasem ol instraksen, mifala i aot mo kasem hil blong rod we mifala i folem. Long ples ia, mifala i stop blong dring wota mo waepem aot swet long ol fes blong mifala.
Gaed blong mifala i eksplenem se blong gobak daon bae i had. Mifala bae i nid blong stap kolosap tugeta mo fomem wan moto tren, we bae wanwan moto i tajem fored mo biaen blong nara moto blong kipim grup i stap tugeta.
Taem mifala i stat blong kamdaon, mifala i singaot long wanwan long mifala blong talemaot se mifala i stap aot. Sloslo mifala i seraot, be , livim wan spes bitwin moto blong mi mo moto we papa blong mi mo smol sista blong mi stap long hem. Kwiktaem nomo Vivi mo papa blong mi i foldaon aot long moto blong tufala. Papa blong mi i jam antap long Vivi stret long taem blong blokem moto blong i rol ova long hem.
Mifala i filim gud taem mifala i luk papa blong mi mo Vivi i stanap mo karemaot ol doti long klos blong tufala. Tangkyu from ol klos we oli protektem tufala, papa blong mi i kasem smol kil nomo. Vivi i fraet be i no kasem eni kil. Taem mifala i joen wetem grup bakegen, gaed i rimaenem mifala wetem wan strong voes se mifala i mas kipim ol moto blong mifala i stap konek sapos mifala i no wantem foldaon long hil bakegen.
Long laef samtaem yumi fesem temtesen ia blong tingting se yumi save mekem samting yumiwan. Yumi ting se yumi no nid blong putum ol proteksen klos blong faet blong gospel. Long semmak fasin,yumi save faenem se i had samtaem blong stap konek wetem Papa long Heven. Taem yumi no fetful blong mekem olsem, yumi stap putum yumiwan long wan rod we i fulap long fraet mo denja long wol ia, i isi blong yumi foldaon long ol aksiden mo kil long saed blong spirit.
Sapos yumi yusum proteksen ia we gospel ia i givim mo stap konek long Papa long Heven mo Jisas Kraes, yumi save fesem ol jalenj we i stap long fored blong laef blong yumi. Nomata se rod i fulap long fraet o i had, wetem Tufala yumi save kasem sakses.