Jos i Givim Help long Olgeta we Oli No Save Wokbaot tru long Bigfala Solwota we i Fulumap Ples blong Ol Man Papua Niu Gini

Taem we “king taet” we i no stap hapen oltaem i wasemaot aelan blong Parama we i stap hemwan, long wes blong Papua Niu Gini long 22 Oktoba, 2024, olgeta we oli stap nomo long vilej ia blong taon, oli no gat ples blong tanem olgeta i go long hem blong kasem help. Blong wan sot taem blong ol aoa nomo, bigfala wota ia i wasemaot mo spolem gud plante hom, ol fam we oli stap lukaotem gud oli brokbrok, mo ol wel blong komuniti i nomo klin from solwota i fulumap.

i gat kolosap fo handred pipol we oli stap long naesfala be yet wan aelan we i stap hemwan long wes blong Papua Niu Gini. Kolosap 1/3 long olgeta, oli oli ol memba blong Parama Branj blong Daru Stek blong Jos Ia blong Jisas Kraes blong Ol Lata-dei Sent.

Taem we toktok i kasem stek senta long Daru, ol lida blong Jos oli tekem aksen kwiktaem blong sendem help i go hariap. Kaekae, wota, ol tapolen mo ol filta blong wota, oli bin sendem long sip aot long kapitol siti blong Papua Niu Gini, we i Port Moresbi go long wan smol sip we i stap wet long Daru.

Long Daru, ol saplae, folem wetem ol misinari blong Jos Yumaniterian we oli gat skil blong mekem gud samting bakegen, mo ol lokol Jos misinari mo ol lida, oli travel i go antap long Galf blong Papua blong i go long Fly Reva, mo afta, long graon blong kasem Parama Aelan.

Taem oli kasem ples ia, oli faenem ol hom mo ol risos blong komuniti we oli damej, be ol pipol we oli stap long ples ia, mo Ol Sent we oli gat strong tingting, oli stap wok finis blong mekem pat blong olgeta blong bildimap bakegen vilej blong olgeta we i damej.

Taem sip mo ol smol sip we i bin go tugeta i go kasem ples ia long moning we taem i go finis mo taet i go daon long 29 Oktoba, wota i no dip inaf blong letem olgeta i tekem ol saplae blong olgeta i go insaed long vilej, mekem se, oli transferem i go long ol bot we i moa smol, we i muv i go moa kolosap long so.

Be long en, ol smol bot ia oli no save kam moa kolosap bitim wan kilo mita long so, mekem se ol pipol long vilej oli kam long olgeta.

Truaot long aftenun ia, ol man long vilej oli kam tugeta wetem ol misinari blong stap wokbaot i go kam tu kilo mita krosem ol pul blong taet blong kolektem kaekae, klin wota, ol filta blong wota mo karem olgeta i go long so.

Aot long evri samting, i tekem moa long tri aoa blong transferem ol saplae aot long ol smol bot i go long vilej.

Oli stakem ol help saplae long vilej skwea, long ples ia oli mekem rere olgeta blong serem long ol pipol long vilej.

Taem we oli karem evri saplae i go long vilej, ol famli oli kasem olgeta help ia wetem bigfala tangkyu from ol saplae we oli jes karem nomo i kam krosem wota.

Long Port Moresbi, Johnny Leota, Kantri Ofis Maneja, i luklukbak long ol blesing we oli kam afta long ol hadtaem. “Afta long bigfala harem nogud we i kam from ol king taet, ol man blong ples ia mo fet blong ol pipol blong Parama Aelan oli saen tru, taem oli kasem ol help long saed blong ol samting blong wol wetem bigfala glad we i kam blong helpem olgeta long taem blong jalenj ia long laef blong olgeta. Fasin blong olgeta blong talem tangkyu mo lav blong olgeta long Sevya i kam antap taem oli witnesem lav blong Hem tru ol imejensi hadwok we i kam tru long Jos. Ol hadwok help ia bae i gohed blong stap faenem ol ansa wetem ol lokol lida blong komuniti blong stap sef mo waj bifo ol disasta i stap kam long fiuja.”

Blong mekem gud bakegen Parama Aelan i kambak nomol, bae i no hapen kwiktaem. Be Ol Sent wetem ol fren blong olgeta mo ol neba, oli save se bae oli no fesem ol hadtaem olgetawan, mo we Jos Ia blong Jisas Kraes blong Ol Lata-dei Sent i stanap rere blong givim sapot, long tugeta saed blong ol samting blong wol mo long saed blong spirit, taem Ol Sent ia blong God mo ol neba blong olgeta oli wok tugeta blong bildimap bakegen naesfala mo aelan hom blong olgeta we i bin damej mo i stap hemwan.