Wan Sakramen Hym Eksperiens

Blong plante wik, mi atendem Sakramen Miting long wod blong mifala mo tekem sakramen blong riniu kavenan blong baptaes blong mi mo kam klin aot long ol sin blong mi. Oltaem mi faenem se i isi blong mekem tabu odinens ia i kam wan nomol samting blong stap mekem, wan samting we mi stap mekem be mi no stap tingting tumas long hem. Be oltaem, Lod i stap blesem mi wetem eksperiens we i gat paoa long saed blong spirit we i stastap wetem mi.

Wan kaen eksperiens olsem i bin hapen long taem blong wan wod konfrens long Park Ridge Fas Wod blong Ostrelia Beenleigh Stek. Long taem ia, mi bin wok olsem wan asisten klak blong stek, we mi responsibol blong stap rekodem ol infomesen blong stek histri. Mi bin kam long miting wetem notbuk blong mi, rere blong mekem asaenmen blong mi, be mi aot wetem wan filing blong mekem i kam niu bakegen, stamba tingting mo strong paoa long tingting.

Taem kongregesen oli singsing long hym namba 191, “Luk Gudfala Ridima i Ded,” yumi kam long ol toktok ia:

“Papa Yu tekemaot kam ia long mi.

Be sapos i tingting blong yu, bae mi dring,

Mi bin mekem ol wok blong Yu,

Mi bin mekem ol wok blong Yu,

Plis tekem Mi long ples blong Yu.”

Kwiktaem, ol toktok ia oli stikim hat blong mi.

Tingting blong mi i gobak long ol hadtaem we mi mo waef blong mi i bin fesem ova long ol yia. Plante yia i pas, helt blong hem i kasem wan series sik we kolosap i eksperiensem ded, we i lid i go long ol jalenj long saed blong bodi we long en, i kam blong sidaon long wan wiljea. Blong ol yia we i pas, mi bin stap kea long hem fultaem, stap helpem hem blong faenem wei aot long ol jalenj ia, mo long semmak taem, mi stap traem blong lukaot long ol problem blong helt blong miwan. Tugeta, mitufala i bin stanap strong blong go tru long plante hevi samting, we gat, hat i brok, blong stap luk sam long ol pikinini mo apupikinini blong mitufala, oli aot long gospel. Wanwan taem, mi filim se “kap” blong mi fulap tumas.

i tajem mi stret se, yumi evriwan i gat wan wok blong mekem long laef ia. Yumi wanwan i kasem wan kap blong yumiwan blong drink. Nomata hem i blong stap olsem wan papa, mama pikinini, o long wok blong yumi, skul, ol koling o famli responsabiliti, yumi evriwan i fesem ol jalenj we i save testem yumi long olsem wanem blong yumi stretem. Samtaem kap ia bae yumi filim olsem se i no posibol blong tekem.

Mi tingting abaot olgeta we maet oli stap fesem ol jalenj long saed blong bodi, oli lusum wok, oli stap traehad long skul, olgeta we oli adiksen, o hevi responsabiliti blong stap lukaot long wan memba blong famli we i olfala, i sik o i gat spesel nid. Olgeta hadtaem ia, oli had tumas olsem we oli stap, oli pat blong wok we Lod i givim long yumi. Oli ol Janis blong yumi pruvum lav we yumi gat long Hem mo olgeta we oli stap raon long yumi.

Long taem ia, mi askem miwan wan series kwestin: ?Mi mi rere blong drink flatem?”

Eksampol blong Sevya i kam long maen blong mi. Insaed long Garen blong Getsemane, Hem tu i traehad andanit long weit blong kap blong Hemwan, i stap krae, “Papa, sipos yu save mekem, plis yu tekemaot ol samting ya we i stap mekem mi mi harem nogud tumas.” Be yet, long tingting we i stret gud evriwan, Hem i ademap “Be yu no mekem olsem we mi mi wantem, yu mekem olsem we yu nomo yu wantem.”

Save ia i bin givim mi wan niutingting bakegen blong gohed strong i go fored wetem fet. Mi hop from dei ia we bae mi stanap long fored blong Lod mo harem ol toktok ia, “!Ei, yu yu mekem wan gudfala wok!” Blong kasem dei ia, mi save se mi mas gohed blong drink long kap we Lod i bin givim long mi, nomata taem i konkon.

Eksampol blong Sevya i bin tijim mi se, ol hadtaem we yumi fesem oli no blong brebrekem yumi, be i blong mekem yumi kam moa gud. Mi bin kam blong andastanem se, “kap” ia we Lod i givim long wanwan long yumi i no wan tes blong fet blong yumi nomo, be tu, i wan invitesen blong dipen long Atonmen moa fulwan mo blong trastem lukluk ia we i no save finis. Olsem Job long OlTesteman, mi bin kasem strong paoa long tingting aot long save ia we God i save wanem mi nidim blong polisim mi, iven taem mi no mekem. Mo taem mi filim se oltaem hevi samting blong mi oli hevi tumas, mi save talem mo no gat wari se, oli wan samting nating nomo we i no bitim safaring we Sevya i bin go tru long hem from yumi.

Ol eksperiens ia i mekem lav blong mi i kam mo dip long waef blong mi mo i mekem i kam moa strong tingting blong mi blong wantem stap wan gudfala eksampol long ol pikinini blong mi. Oli bin tijim mi tu blong luk sakramen wetem wan niu ae, taem mi tingting hevi long bodi blong Sevya we i brokbrok mo blad blong Hem, mo tingbaot olsem wanem fasin blong Hem blong obei we i stret gud evriwan, i mekem i posibol long mi blong stanap strong long ol hadtaem blong mi. Mi bin krae plante wota blong ae, speseli long kwaet naet, be long ol sot taem ia, mi tu mi givim mi fulwan long Hem iven tru long taem we mi filim nogud, mo talem: “Be yu no mekem olsem we mi mi wantem, yu mekem olsem we yu nomo yu wantem.”

Long yia blong 76, mi bin mekem finis, sko blong mi blong tri mo ten. Mi no save hamas moa yia mi gat, be mi hop se bae oli faenem se mi stap fetful kasem en. Wanem kaen “kap” we Lod i gat yet i stap blong mi, bae mi drink long hem wetem tingting blong wantem mekem, from mi save se Sevya i bin drink konkon kap finis from yumi evriwan. From se, tru long Hem, yumi no nid blong mekem yumiwan.