Folem Profet

Raon long 600 BK, afta we Nebukanesa i bin prapa spolem gud Jerusalem, king blong Babilon, wan smol grup blong laen blong Juda, oli bin letem olgeta blong stap long graon ia, mo oli karem evri narawan oli kam ol prisena blong Babilon. Long medel blong olgeta we oli bin stap long ples ia i gat profet Jeremaea, mo Johanan, pikinini boe blong Karea, wan lida blong ol ami.

Hemia i bin wan had mo impoten taem tumas blong laen blong Juda we oli stap stret long rod blong tu nesen we oli gat bigfala paoa, we tufala i stap wantem blong kam agensem tufala long faet. Ol pipol oli fesem wan bigfala desisen: ?Bae oli stap nomo long Jerusalem? O, olsem we plante oli stap wantem, ?bae oli go long Ijip blong stap laef long ples ia? Blong lukaotem daereksen, Johanan mo ol pipol, oli tanem olgeta i go long Jeremaea mo askem hem blong prea long Lod long bihaf blong olgeta, mo talem, “Mifala i wantem se yu yu prea long hem, blong hem i soemaot long yumi, wanem rod bambae yumi folem, mo wanem samting bambae yumi mekem” (Jeremaea 42).

Jeremaea i agri mo talem, “i gud. Bambae mi mi prea long hem olsem we yufala i talem, mo wanem ansa we hem i givim, bambae mi kam talemaot long yufala. Bambae mi no save haedem wan samting we hem i talem long mi.” Ol pipol oli promes se, “Hae God we i God blong yumi, hem i tru, mo yumi save bilif strong long ol tok we hem i givim. Sipos yumi no obei long ol tok ya, hem nomo bambae i tok agens long mifala. Mifala i askem long yu blong yu yu prea long hem from mifala. Mo sipos hem i givim ansa, nating we mifala i glad long hem, no mifala i no glad, be bambae mifala i mas obei long hem.”

Jeremaea i askem kaonsel long Lod, mo Johanan mo ol pipol oli bin promes blong obei long eni samting we Lod bae i talemaot. Afta ten dei i pas, Jeremaea i kasem toktok blong Lod. Hem mekem ol pipol oli kam tugeta mo talemaot mesej: “[Lod i talem.] Sipos yufala i glad blong stap oltaem long kantri ya, mi bambae mi no mekem yufala i foldaon, bambae mi leftemap yufala. … Bambae yufala i no moa fraet long king ya blong Babilonia; … bambae mi stap wetem yufala, mo bambae mi tekemaot yufala long han blong hem. … Yufala i no mas aot long ples ya blong go long Ijip: Mo mi tok strong long yufala blong wekemap yufala” (Jeremaea 42–43).

?Olsem wanem nao ol pipol oli folem kaonsel ia we i kam long Lod, tru long profet blong Hem? Sore tumas we, oli mekemap tingting blong olgeta finis. Oli lukaotem apruvol be i no daereksen. Asaria, mo Johanan mo ol narafala stronghed we oli stap long ples ya, oli talem long hem se, “Profet. Yu yu stap giaman ya: Hae God i no sanem yu, blong yu kam talem ol toktok ya, blong blokem yumi blong yumi no go stap long Ijip.” Nomata ol instraksen blong Lod, Johanan, ol kapten mo l pipol, oli no obei mo go long Ijip. Olsem we oli bin profesae, Babilon i winim Ijip (Jeremaea 43).

?Olsem wanem nao yumi stap ansa long ol toktok blong ol profet we oli stap laef? Lod i bin harem prea blong smol laen blong Juda mo ansa long olgeta tru long profet blong Hem. Tedei hem i gohed blong toktok tru long ol profet blong Hem we oli stap laef mo olgeta we oli singaotem olgeta blong stap lid. Lod i talemaot, “Nomata oli kamaot tru long voes blong miwan o tru long voes blong ol wokman blong mi, i semmak” mo i promes se, “wanem we bae oli talem taem Tabu Spirit i lidim olgeta, bae i kam skripja, bae i tingting blong Lod, bae i maen blong Lod, bae i toktok blong Lod, bae i voes blong Lod, mo paoa blong God we i go kasem fasin blong sevem man” (Doktrin mo Ol Kavenan 1, 68).

Tedei, i gat plante voes we i raonem yumi, wanwan i stap talemaot trutok mo ol bilif blong olgetawan. Olsem Koriho insaed long Buk blong Momon, plante long ol voes ia oli klemem se i no gat Kraes, se i no gat wan i save talem wanem i stap kam long fiuja, se yumi no save biliv long wanem we yumi no luk, mo se man i gat sakses folem waes tingting blong hem mo stap win Folem paoa blong hem (Alma 30). Blong stap Folem ol kaen voes ia, bae i lidim yumi i go lus. Be, olgeta we oli strong long saed blong spirit, mo lisin gud long ol kwaet toktok blong spirit, bae devel i no save giaman long olgeta. Be wan bigfala denja i save kam, taem yumi stap akseptem ol aedia ia, we i save mekem yumi letem eni samting i blokem mo blong ting nating long fasin blong yumi olsem wan disaepol.

Insaed long Jos Ia blong Lod we i bin kambak, yumi gat blesing blong kasem daereksen we i kam long wan profet we i laef, Presiden Russell M. Nelson. Tingting long insperesen kaonsel blong hem: mekem Sabat i kam wan glad, letem God i win long laef blong yu, “Lisin Gud long Hem,” tingting selestial, mekem ol wok long saed blong spirit blong kasem revelesen blong yuwan, holemtaet paoa blong faea long saed blong spirit, yusum stret nem blong Jos, stadi long Buk blong Momon, stap wan man blong mekem pis, mo spendem moa taem blong stap wosip insaed long tempol.

Presiden James E. Faust i bin tijim, “Yumi bin kasem promes se Presiden blong Jos bae i kasem daereksen blong yumi evriwan, olsem reveleta blong Jos. Sefti blong yumi i hang strong long taem yumi stap lisin gud long wanem we hem i talem mo stap folem kaonsel blong hem.” Letem yumi evriwan i folem profet mo kasem ol blesing blong heven.