Hem i sendem mitufala i go long Tahaa blong givim seves long ol pikinini blong hem

Mitufala i gat wan naesfala eksperiens olsem pat blong ol projek blong yumaniterian blong mitufala.

Brata Eric Graffe, we i helpem mitufala wetem ol projek blong mitufala, i talem long mitufala abaot wan problem blong wota we oli stap drink long Tahaa. Kwiktaem, mifala i setemap wan vidio konfrens wetem Madam Patricia Amaru, Meya blong Tahaa.

Long sapraes blong mitufala, hem i statem wetem wan prea. Afta, mitufala i askem hem wanem i ol fas nid blong olgeta. Wetem wota long ae blong hem, i talemaot se: “Yufala i ansa blong prea blong mi, from se yestedei nomo, mifala i bin gat wan series problem. Mo mi no gat inaf paoa blong stretem.”

Hem i gohed blong eksplenem se, netwok blong stap serem wota i go olbaot, i nomo save wok, we i mekem se i had blong saplaem wota i go long wan bigfala pat blong aelan.

Mekem se mitufala i go stret long Tahaa blong luk wanem oli nidim. Olsem we wota i wan long ol fas samting long ol projek blong yumaniterian, mitufala i disaed blong putum tugeta wan ripot we bae mitufala i sendem i go long ofis blong presiden. Sapos i gat sakses, bigfala projek ia bae i blesem laef blong ova long 2,000 pipol.

Stret long taem we mitufala i finis blong visitim ol fasiliti, Madam Amaru i stap sore blong lego mitufala, from se hem i mas atendem wan miting, “wetem wan yang man long jos blong yu we i stap go long wan misin”.

Hem i tru se, i long wan taem blong wajem wan fiuja misinari i openem leta blong misin kol blong hem. Mitufala i askem hem sapos i wan memba blong famli blong hem. “!No!” hem i ansa. “Be mi go eni ples we oli invaetem mi blong go.”

“!Okei, olsem mitufala tu i glad blong kam wetem yu!”

Taem mifala i kasem ples ia, mitufala i luk wan branj we i fulap wetem lav long fiuja misinari ia we i bin lusum mama blog hem wan yia i pas. Wanem we i moa long hemia i we, !hem i fas misinari blong branj ia… !blong 40 yia!

Branj presiden i askem long meya mo hasban blong hem blong talem wan toktok. Tufala tugeta i bin givim advaes blong wan “papa mo mama” stap leftemap tingting blong hem blong stap obei mo gat respek, blong gohed blong putum tingting i stap daon, speseli i no blong stap long ples ia, (Sol Lek Siti Misin) afta long misin blong hem.

Bifo mitufala i aot, mitufala i lanem se kapol ia, we tufala i kolosap long ol pipol long komuniti blong tufala, tufala i jes atendem wan apoenmen blong japel. Wanem we i moa long hemia i we, long taem blong seven manis blong konstraksen, tufala i welkamem ful branj i kam long hom blong tufala (i no ol bilding blong minisipol, be blong tufalawan nomo) !blong ol miting blong Sandei!

Hem i wetem ol hat we oli fulap tumas wetem lav mo fasin blong talem tangkyu blong wan bigfala namba blong ol pipol we oli putum olgeta daon we bae mitufala i lego olgeta bakegen.

Wetem no kwestin, mitufala i talemaot se Papa long Heven i stap waj ova long ol pikinini blong Hem wetem bigfala sore, mo we Hem i bin sendem mitufala i go long Tahaa blong givim seves long olgeta; mo se Jos nao i risen ia from wanem, hemia i hapen.