Rikanaan ro an Anij
N̄an ron̄jake im pokake ainikien rikanaan eo eaorōk n̄an ekkeijel pen ion men otemjej em̧m̧an mae Itok eo Kein Karuo.
Jodikdik ro rejitōnbōro, ej juon m̧wen̄an kweilo̧k eo aiboojoj jej ioone! Em̧ōj ad ron̄jake jilu iaan Rijilōk ro an Jisōs Kraist. Ej juon lukkuun kōjeram̧m̧an eļap! Im jenaaj bar ron̄jake bar juon, Elder Henry B. Eyring. Kwojkwoj eo ilo jetōb ej wōnm̧aanļo̧k wōt!
Ke ikar kōnono iiō eo ļo̧k, jekar jeļā elmen jelmae apan̄ im māllijon̄ ko an laļ in kōn en̄jake eo an Devid ippen Golaiat. Kemeemej dekā ko ļalem an Devid? Rainin ij jeere juon bwebwenato in Kallim̧ur M̧okta ikar riiti ke iaar dedjab kani am̧, me ekar kōm̧m̧an aō kōņaan āinwōt kōrā eo ie. Baibōļ ejjab jiron̄ kōj etan, innem jenaaj en̄inn̄in etan lio in Shunem kōnke en̄in ej etan jikin eo an.
Juon raan, rikanaan Ilaisha ear ilo̧k n̄an Shunem, im jej riit bwe eaar “juon kōrā e utiej; im lio ekar [karuwainene] e bwe en m̧ōn̄ā pilawe. Im āindein, jabdewōt iien ke ear eļļā, ear deļo̧n ijo … bwe en m̧ōn̄ā.” Ij pijakiļo̧k rikanaan Elisha ekar lukkuun m̧ōņōņō kōn karuwainene eo m̧ōn̄ā ilo m̧weo im̧ōn kōrā eo. Elōn̄ alen an kar etal juon raan lio ear ba n̄an ļeo pāleen, “Kiiō, ij kile bwe ļein ej juon armej an Anij ekwōjarjar.”
Lio ej ba, “Kiiō Ij kile.” Ej āinwōt lio ear karuwainene Ilaisha n̄an m̧weo im̧ōn ilo jab jeļā ear juon rikanaan; lio ear bōk naan in kam̧ool eo an kōn Jetōb Kwojarjar jen an kanooj ron̄jake ta eo Ilaisha ear ba im katakini. (Kemeemej, ear ejjeļo̧k pija ilo tōre eo! Innem ear pen n̄an kile rikanaan eo jen reitok mejen.)
Bōtaab bwebwenato in ejjab bōjrak ijin. Juon raan lio ear ba n̄an ļeo pāleen, “Jen kōm̧m̧an juon po e dik … im jen likūt ijo n̄an e, juon bed im juon tebōļ, im juon jikin jijet, im juon jikin lamp; im n̄e ej itok n̄an ipped enaaj deļo̧n̄ ijo.”
liin eļap an tōmak ear kōņaan kōm̧m̧ane juon ruum̧ ilo m̧weo im̧ōņ innem bwe rikanaan eo en, ilo̧k ilo jikin in, maron̄ in wōr juon jikin n̄an pād ie!
Rainin jemaron̄ ekkatak juon katak ekajoor jen menin eaar waļo̧k.
Irooj ekar kam̧ool n̄an kōrā in Shunem in bwe Ilaisha ear juon rikanaan an Anij im lio ear kōm̧m̧ane jen an kōpeļļo̧k m̧weo im̧ōņ n̄an bōk e.
Kōj jej barāinwōt maron̄ bōk juon ad make naan in kam̧ool kōn rikanaan eo an Anij rainin im kōpeļļo̧k būruwōd im ļōm̧ņak ko ad—m̧weo im̧ōd—n̄an naan eo Jemed Ilan̄ ear kepooje n̄an kōj ilo raan ko āliktata.
Jodikdik ro rejitōnbōro, ij kūr karuwainene kom̧ n̄an kajjitōk ippemi kajjitōk in: Ewōr ke juon aō make naan in kam̧ool kōn rikanaan eo an Anij emour?
Jen ijjino jān jinoin.
Ta in juon rikanaan? Juon rikanaan ej juon em̧m̧aan eo Anij ear kūri n̄an kōnono n̄an E. Elōn̄ rikanaan ro ion laļ in rainin āinwōt ear wōr ilo tōre ko etto.
Rikanaan ro rej rilolo im ribōk madenļo̧k ro. Meļeļein bwe rej maron̄ loe ta eo ro jet rejjab loe, im rej maron̄ kannaan kōn iien ko rej itok. Rej maron̄ bar kepooj kōj n̄an jorrāān ko. Rikanaan ro rej būki kien ko im revelesōn ko jen Irooj. Ilo laajrakin tōmak ratimjuon ej kōnono kōn an itok revelesōn ilo raan ko āliktata. Ej ba, “Kōmij tōmak aolep men ko em̧ōj an Anij kwaļo̧ki, aolep men ko E ej kwaļo̧ki kiiō, im kōmij tōmak bwe Enaaj kwaļo̧k elōn̄ men ko reļļap im aorōk im rej ekkejelļo̧k n̄an Aelōn̄ in Anij.”
Elder Gary E. Stevenson ekar ba, “Irooj ej wōnm̧aanļo̧k wōt im kwaļo̧k kien ko An im n̄an rikanaan ro An rainin kōnke Ej kōņaan tōl kōj n̄an m̧ōņōņō eo an mour in n̄an aiboojoj eo an seletial ilo mour eo tok juon.”
Rikanaan ro rej bar kwaļo̧k kōn gospel eo im rej jet rūkaki ro rej im̧we im ribōktok naan an Anij n̄an aolep ion laļ.
Kajjojo membōr in Būreejtōnji eo Kein Kajuon im Doulul eo an Jon̄oulruo Rijilōk ro ej juon rikanaan, rilolo, im ribōktok madenļo̧k. Jerbal einwōt juon ko̧o̧njeļ ium̧in tōl eo an Irooj, ewōr an mālim n̄an kean̄ im ukōt katak eo im ejaak kakien n̄an Kabun̄ in. Rej kanooj jar im ko̧o̧njeļ, n̄an jokālet ko an doulul ko rej aikuj in juon wōt errā. Ilo wāween in, Irooj kakkōl kōj bwe An kilaan enaaj kōm̧m̧an.
Rikanaan ro rej kam̧ool kōn Kraist—An mour, Jerbal in karejar An, im kaninlan̄ eo An.
Jen riiti jet iaan naan in kam̧ool ko jān rikanaan ro ilo Bok in Mormon eo.
Abinadi ekar kwaļo̧k:
“Anij e make naaj wanlaļtak ilubwiljin ro nejin armej, im naaj lo̧mo̧o̧ren armej ro An.
“Im kōnke e jokwe ilo kanniōk naaj kūr e Nejin Anij.”
Samuel riLeman eo ear bareinwōt kanaan bwe “Jisōs Kraist, eo Nejin Anij, Jemān lan̄ im laļ, Rikōm̧anm̧an aolep men ko otemjeļo̧k jān jinoin.”
Im rikanaan eo Moronai ekar ba, “Iaar loe Jisōs, im … bwe eaar kōnono ippa ilo jelm̧ae doon.”
Ke Kraist ear loļo̧k riNipai ro, juon ian men ko Ear kōm̧m̧ane ekar kūr Jon̄oulruo Rijilōk ro. Im Ekar ba n̄an armej ro,“Em̧ōņōņō kom̧ eļan̄n̄e kom̧ naaj eo̧ron̄ naan ko an rein jon̄oulruo ro Iaar kāālet.”
Kiiō, kōtļo̧k bwe in jeere jejjo naan n̄an m̧am̧a im baba ro ak ro jet uwan baam̧le im rej lale ajri ro. Irooj make ear katakin Adam im Iv m̧ool ko an karōk in lo̧mo̧o̧r. Im tokālik Ear ba n̄an er, “Ij lewōj n̄an eok juon kien, n̄an katakin men kein ilo ejjeļo̧k idadik n̄an ro nejimi.”
Ta meļeļein n̄an katakin ilo ejjeļo̧k idadik? Ej meļeļein ekkatak m̧ool ko an gospel eo, bōk juon naan an make naan in kam̧ool kake er, im jeere jeļā eo ippen ro nejid. Ej n̄an ļōn̄aj jim̧or iien katakin ko re karbab im jab karbab. Ej mour ekkar n̄an jeļā eo im naan in kam̧ool eo.
Bok in Mormon eo ej kōmļeļe kōn 2,060 likao em̧m̧an ded ro einwōt “armej in m̧ool im jatōr, bwe kar katakin er n̄an kōjparok kien ko an Anij im etetal jim̧we im̧aan mejān.” Likao em̧m̧an ded rein raar tiljek ilo pokake Hilamōn, eo me ear ilo tōrein kar ritōl in kapen an tariņae im bareinwōt aer rikanaan, im raar kile bwe ro jineer rekar kobrak būruweer kōn m̧ool im tōmak.
Mama im baba ro, ilo laļin ijo me elōn̄ ainikien ko im jet eļap marok, Anij make eaar jiron̄ kōj n̄an kōkaajririk ro nejid ilo mera im m̧ool. Ekar lōke kōj kōn juon eddo n̄an katakin ajri ro nejid m̧ool ko an gospel eo. Eļan̄n̄e jenaaj likjab in kōm̧m̧ane innem, laļ in ban kōm̧m̧ane.
Rūm̧m̧an ded ro m̧ōtta rejitōnbōro, ewōr aō karuwainene n̄an kwe: Ilo raan kani rej itok, ij karuwaineneik eok n̄an bukwelōlō, kōpeļo̧k būruem, im jar kōn tōmak n̄an Jemedwōj Ilan̄, kajjitōk Ippān n̄an kamool n̄an kwe ke rikanaan im rijilōk ro An E ekar kāāleti rej Ainikien ilo laļin.
Kōrā in Shunem eo ear katakin kōj bwe jemaron̄ bōk naan in kam̧ool eo kōn Jetōb Kwojarjar eo. Ij kallim̧uri kom̧ bwe ālkin ad jeļā ke rej jet ro kar ekapit in Anij, mour ko ad renaaj pidodo ļo̧k mekarta apan̄ ko rej waļo̧k n̄e jenaaj pokake ainikier kōn lōke, tōmak, im kōjātdikdik. N̄an ron̄jake im pokake ainikien rikanaan eo eaorōk n̄an ekkeijel pen ion menotemjej em̧m̧an mae Itok eo Kein Karuo an adwōj Rilo̧mo̧o̧r.
Laļin ej nana, bōtaab kabun̄ in an Jisōs Kraist im aelōn̄ in kiin̄ in An ej kajoorļo̧k jen mokta. Zaion ej kōņak nuknuk ko an re wūlio, im thron an Kraist eban jako. Irooj ej aikuji ad kajoor ilo naan in kam̧ool ko ad, n̄an obrak kōn tōmak, im n̄an ukeļo̧k aolep iien. Ad Rilo̧mo̧o̧r, Jisōs Kraist ej pedped ioon kajjojo iaad wōj n̄an kotak jerbal in An.
Juon iien, Rikanaan Josep Smith ekar ba “Ro jeiū im jatū, ta jeban bun̄m̧aanļo̧k ilo juon jibadbad eļap ke? Ijoke, kōnke ennaan in ej n̄an kom̧, jodikdik ro, ikōņaan kōjerbal naan eo jodikdik ro im jab ro jeiū im jatū Pojak?
“[Jodikdik ro], ta jeban bun̄m̧aanļo̧k ilo juon jibadbad eļap ke? Bun̄m̧aanļo̧k im jab kōmtālik. Peran, [jodikdik ro]; im wōnm̧aanļo̧k, wōnm̧aanļo̧k n̄an anjo̧! Būruōmi ren lan̄lōn̄, im m̧ōņōņō otem m̧ōņōņō.”
Ij kam̧m̧oolol kōn tōl im kijejeto in wujlepļo̧k eo an rikanaan ro remour. Ij lewaj n̄an kom naan in kamool eo aō aorōk bwe rej kūr jān Anij n̄an kotak, kalōk, im tōl aelōn̄ eo An ilo laļin rainin. Im enaaj aolep iien andein. Enaaj iien otemjej Irooj eo ej kāālete ro ri Karejeran. Ilo etan Jisōs Kraist, amen.