Pinniki Wōt Doon

Ejjab to iaar riiti juon en̄jake me ekar un̄uri eō. Ekar bōk jikin ilo USA Masters Track and Field National Championship eo—juon jiāe n̄an ro rerūtto.

Juon iaan ribōk ko̧ņaer ro ilo 1,500 mita eo ekar Orville Rogers 100 an iiō. Rijeje eo ej je:

“Ke bu in ijjino eo ekar jan̄, rittōr ro raar ettōr, kōn Orville kar m̧ōkaj an pād iļo̧kan tata, ijo ekar pād make iaan ie ilo aolepān aekwoj eo, raļo̧k wōt in an ipōr neen ļo̧k. [Ke] rittōr eo āliktata ijello̧kin Orville ej tōprakļo̧k, Orville ekab de wōr ruo im jimettan lap ko n̄an kam̧ōji. Epaakeļo̧k 3,000 rialooj ro raar jijet im alooje an jidik wōt an ettōr ilo jikin ettōr eo—lukkuun make, ikōn̄ jar ko, im dike an make iaan.

“[Bōtaab] ke ej jino lap eo an āliktata, jarlepju eo ijo raar jutak, pinniki im kabbukwe. Ilo iien eo ej pād ilo ijo ekajju, jarlepju eo ekar ekkelo̧k. Kōn pinnik in kōketak eo an taujin rialooj ro, Orville ekar kōmaat kajoor eo an āiktata ekar dāpiji. Jarlepju eo ekar ekkelōk kōn m̧ōņōņō ke ekar kijoon ļain in kōjjem̧ļo̧k eo im kar atbakwōje jān rittōl ro m̧ōttan. Ilo ettā im kam̧m̧oolol Orville eka jeaļ ļo̧k n̄an jarlepju eo im ilo̧k jān jikin ettōr eo ippān ro m̧ōttan rekāāl.”

Kar kein kōļalem in an Orville jiāe aekwōj, im ilo iien kein kajjojo e kar bar pād āliktata. Jet remaron̄ kajjion̄ ekajete Orville, im ļōmņak ke ejjab aikuj kar jiāe ilo iiō eo an—bwe ejjab ekkar n̄an jikin ettōr eo kōnke ej kaitokļo̧k iien ko n̄an aolep.

Ak jekdo̧o̧n ekar aolep iien ej āliktata, Orville ekar rupe ļalem world record ko raan eo. Ejjeļo̧k juon ej alooje an aekwōj en kar tōmak bwe epidodo, ak ejjab rialooj ro ak ro rej jiāer ippān raar riekajet ro. Orville ekar jab rupe jabdewōt kien, im offical ro kar jab kōttāik jabdewōt jon̄ak. Ekar ettōr ejja aekwōj eo wōt im kōm̧m̧an ejja menin aikuj ko āinwōt riaekwōj ro jet. Ak jon̄an apan̄ eo an—ilo jekjek in, kar iiō eo an im jon̄an an m̧akutkut—kar likūt e ilo division eo an 100 iiō im rūttoļo̧k. Ilo division ņe ekar rupe ļalem world record ko.

Ejja āinwōt an Orville kar bōk eļap peran n̄an jutak ilo jikin ettōr eo kajjojo iien, ej barāinwōt bōk eļap peran n̄an juon iaan ro jeid im jatid n̄an jutak ilo nit an mour in aolep raan, jeļā bwe maron̄ ekajete er ilo kalijōkļo̧k jekdo̧o̧n rej kōm̧m̧ane ijo em̧m̧an tata remaron̄ anjo̧ ioon men ko men̄e reppen n̄an ļoor Rilo̧mo̧o̧r eo im kautiej bujen ko aer Ippān.

Jekdo̧o̧n ia eo jej jokwe ie ilo laļ in, jekdo̧o̧n jete ad iiō, emenin aikuj ilo kanniōk n̄an ad aolep en̄jake juon en̄jake in uwaan, n̄an en̄jake bwe ewōr ekōņaan im aikuji kōj im bwe mour ko ad ewōr aer jibadbad im meļeļeir, jekdo̧o̧n ta jekjek ak m̧ōjņo ko ad.

Ilo lap eo āiktata an aekwōj eo, jarlepju eo ekar kanooj pinniki Orville, leļo̧k n̄an e kajoor eo n̄an etal wōt. Jekdo̧o̧ņ ta e ekar āiktata. N̄an ribōk ko̧ņaer ro im jarlepju eo, menin ekar ļapļo̧k jān juon jiāe. Ilo elōn̄ jekjek ko, menin ekar juon waanjon̄ak aiboojoj kōn iakwe eo an Rilo̧mo̧o̧r ilo an jerbal. Ke Orville ej tōprak, aolep raar m̧ōņōņō ippān doon.

Āinwōt Masters Championship eo, jarlepju in jar ko im baam̧le ko ad remaron̄ jikin koba ko ijo jej pinniki doon—jukjuk in pād ko an bujen rie kōn iakwe eo an Kraist n̄an doon—jipan̄ doon anjo̧ jabdewōt apan̄ jej jelm̧ae, leļo̧k n̄an doon kajoor im kōketak ilo ejjeļo̧k ekajet doon. Jej aikuji doon. Kajoor ekwojarjar ej itok jān bōro kuk, im en̄in ej etke Setan ej kajjion̄ kōjpel kōj.

Jerata, n̄an jet iaad, etal n̄an jar emaron̄ pen jet iien. Emaron̄ kōnke juon ej kakkōk kōn kajjitōk ko ikkijeen tōmak ak juon kōn inepata in ikitōltōl ak en̄taan ko an kōmelij. Emaron̄ in juon eo jān juon laļ ak juon eo eoktak en̄jake ko an ilo mour ak wāween an kalimjōk men ko me remaron̄ en̄jake ke ejjab uwaan. Emaron̄ bar ro jinen im jemān ro an nin̄nin̄ im ajri jiddik ro ejabwe aer kiki im en̄taan ilo en̄jake ak juon eo ejjeļo̧k rājetin ilo m̧ōn jar eo ebooļ ripalele im baam̧le ie. Emaron̄ juon eo me ej kajjion̄ in bōk peran n̄an bar ro̧o̧ltok ālkin iiō in an jako ak juon eo kōn juon en̄jake ejjab em̧m̧an me rejjab jetjet im rejjamin naaj uwaan.

Būreejtōn Russell M. Nelson ear ba: “Eļan̄n̄e juon ripālele ilo ward eo am̧ ej jepel, ak juon mijenede ej m̧ōkaj an ro̧o̧l, ak juon jodikdik ej pere naan in kam̧ool eo an, rejjab aikuji ekajet eo am̧. Rej aikuj in en̄jake iakwe eo erreo an Jisōs Kraist ej waļo̧k ilo naan im kōm̧m̧an ko am̧.”

En̄jake eo ad ilo m̧ōn jar eo ej meļeļe n̄an leļo̧k ekkejel ko raorōk ippān Irooj im ippān doon me rej kanooj aikuji n̄an ājmour eo ad ilo jetōb im en̄jake. Kobaiki ilo bujen ko jej kōm̧m̧an ippānn Anij, jino kōn peptaij, ej ad eddo n̄an iakwe im kea kōn ro jet āinwōt ro uwaan baam̧le eo an Anij, ro uwaan ānbwinin Kraist, ejjab n̄an kakōļļeik juon bo̧o̧k ilo juon laajrak in men ko n̄an kōm̧m̧ani.

Iakwe āinwōt an Kraist im kea eo rej utiejļo̧k im ekwojarjarļo̧k. Iakwe eo erreo an Kraist ej iakwe em̧ool. Āinwōt an kar Būreejtōn Nelson katakin, “Iakwe-em̧ool ej iuun kōj ‘n̄an ineek eddo ko an ro jet’ [Mosaia 18:8] ijello̧kin eļap eddo ioon doon.”

Rilo̧mo̧o̧r eaar ba, “Ilo men in armej otemjej renaaj jeļā bwe kom̧ij rū kaļora, eļan̄n̄e kom̧ij yokwe doon.” Im Būreejtōn Nelson ekar kakkobaba: “Iakwe-em̧ool ej pedped in katak kōn kadkad in juon rikaļoor em̧ool an Jisōs Kraist.” Ennaan eo an Rilo̧mo̧o̧r eo ealikkar: rikaļoor ro An rem̧ool rej kalōk, kotak, kōketak, kareel, im im̧we. … Wāween ad kōnono n̄an im kōn ro jet … ewōr tokjan”

Katak eo an Rilo̧mo̧o̧r kōn ejja menin wōt eļem waan. Ej kakobabaik tok Golden Rule eo: jabdewōt koṃij kōṇaan bwe armej ren kōm̧anm̧an n̄an kom̧, en āindein ami kōm̧anm̧an n̄an er. Likūt eok make ilo jekjek eo an armej eo im kōm̧m̧an n̄an er ilo ejja wāween eo kwōj kōņaan bwe ren kōm̧m̧an n̄an kwe eļan̄n̄e kwon kar pād ilo jekjek eo aer.

Kōm̧m̧an n̄an ro jet āinwōt Kraist elļāļo̧k jān baam̧le ko ad im jarlepju ko. Ej koba ro jeid im jatid jān kabun̄ ko jet ak n̄an ejjeļo̧k kabun̄ n̄an jidik. Ekoba ro jeid im jatūd jān laļ im manit ko jet, barāiwōt ro eoktak ikitōltōl ko aer ikijeen men ko an kien. Jej aolep uwaan baam̧le eo an Anij, im E ej iakwe kōj aolep Nejin. E kōņaan bwe ajri ro Nejin ren iakwe E im bar iakwe doon.

Mour eo an Rilo̧mo̧o̧r ekar juon waanjo̧n̄ak in iakwe, aintok, im ļōn̄aj bar ro me jukjuk in pād ej watōk er ri likūn im rettoon. E ej juon waanjon̄ak em̧ōj kakien kōj n̄an ļoore. Jej pād ijin n̄an ejaaki bōnja ko an Kraist im āliktata erom āinwōt ad Rilo̧mo̧o̧r. Gospel eo An ejjab juon gospel in kakōļļeikļo̧k men ko, ej juon gospel n̄an erom—ļo̧k āinwōt E im iakwe āinwōt An iakwe. E kōņaan bwe jen erom armej in Zaion.

Ke ekar 20 jim̧a aō iiō, ikar pād ilo juon jekjek in inepata eļap, im ilo iien jab in, ekar āinwōt n̄e jekjek eo em̧ool bwe Anij ekar mour ekar jako. Ijjab maron̄ kōmeļeļeik en̄jake eo ijjelo̧kin n̄an ba wōt ke ikar jebwābwe. Jān iien eo ikar juon ajri edik, aļakkar jeļā wōt ke Jema Ilan̄ ekar pād ijo im imaron̄ kōnono n̄an E. Ak ilo iien jab eo, ikar jab jeļā eļan̄n̄e ekar wōr juon Anij. Ijjan̄in kar en̄jake kain men rōt in ilo mour eo aō m̧okta, im āinwōt n̄e pedped in mour eo aō eaar rup pedakilkil.

Kōn menin, ekar pen aō tal n̄an jar. Ikar etal, ak jidik kōnke ikar mijak n̄e in kar pād ilo taitōļ eo “inactive” ak “less faithful,” im ikar mijak n̄e in kar erom an juon armej jerbal. Ta eo ikar lukkuun kar aikuji ilo iien jab eo ekar n̄an en̄jake iakwe em̧ool, meļeļe, im rie jān ro ipeļaakū, ejjab n̄an ekajet.

Jet iaan men ko ikar mijak n̄e armej ren kar ļōmņak kōn eō, n̄a make ikar ļōmņaki kōn ro jet ke raar jab ikutkut in jar. En̄jake in ekametak ekar katakin eō jet katak ko raorōk kōn etke kar kakien e kōj n̄an jab ekajete doon ilo bōd.

Ewōr ke ibwilijid me rej en̄taan ilo jab ba jidik, mijak kōn an ro jet jeļā apan̄ ko rettiņo aer kōnke rejjab kōņaan ta naaj uwaak eo?

Irooj wōt elukkuun jeļā jon̄an pen eo me kajjojo iaad ej en̄taan kake ilo mour in—eddo ko, apan̄ ko, im kabbōjrak ko jej jelm̧ai me emakijkij an ro jet jab loi. E wōt emeļeļe kinej ko an apan̄ ko an mour im jorrāān ko jet iaad jemaron̄ kar iooni m̧okta me rej jelet wōt kōj kiiō.

Ekutkut ad ekajete kōj make ilo lāj, ļōmņak jej aikuj in kar kanooj ļe im̧aan ilo iaļ in ettōr eo. Irooj wōt elukkuun jeļā likjab ko ad im ekkeke eo, im kōnke kōn menin , E wōt elukkuun karbōb n̄an ekajeti jerbal ko ad.

Ro jeiū im jatū, jen āinwōt rialooj ro ilo bwebwenato in im pinniki doon ilo iaļ in rikaļoor eo ad jekdo̧o̧n ta jekjek ko ad! Menin eban kōm̧m̧an bwe jen rupi kakien ko ak lelaļļo̧k jon̄ak ko ad. Em̧ool ej kakien eo kein karuo—n̄an iakwe ro rūturid āinwōt ad iakwe kōj make. Im āinwōt an Rilo̧mo̧o̧r kar ba, “Ilo ami kōm̧anm̧an jabdewōt n̄an juon iaan rein ro jatū ediktata … kom̧ ar kōm̧anm̧an n̄an eō,” ilo em̧m̧an ak nana. E ekar bar jiron̄ kōj,“Eļan̄n̄e kom̧ij jab juon kom̧ij jab Aō.”

Enaaj wōr iien ko ilo mour ko ad kajjojo n̄e jenaaj eo eaikuj jipan̄ im kōketak. Jen kallim̧ur kiiō n̄an aolep iien kōm̧m̧ane menin n̄an doon. N̄e jej, jenaaj ejaake eļapļo̧k bōro kuk im jemaron̄ ejaake juon jikin n̄an an Rilo̧mo̧o̧r eo kōm̧m̧ane jerbal kwojarjar eo An im ukōt kōj kajjojo.

N̄an kom̧ ro me kom̧ maron̄ en̄jake ami jab eddōkļo̧k āinwōt ro jet ilo mour in, iaļ in ilo mour in, wōnm̧aanļo̧k wōt. Rilo̧mo̧o̧r eo wōt emaron̄ ekajet ia eo kwoj aikuj kar pād ie ilo iien in, im E ej tūriam̧o im jim̧we. E Ri Ekajet eo Eļap an aikwōj eo an mour, im E wōt elukkuun meļeļe jon̄an apan̄ in am̧ m̧akutkut. E enaaj lale m̧ōjņo̧ ko am̧, maron̄ eo am̧, en̄jake ko am̧ ilo mour, im eddo ko am̧ rettiņo, im bar ikdeelel ko an būruōm̧. Kwō maron̄ bar rupe rekoot ko an laļ in. Jouj jab ebbweer. Jouj wōnm̧aanļo̧k wōt! Jouj pād wōt! Kwe kwōj uwaan! Irooj eaikuj eok, im jej aikuj eok!

Jekdo̧o̧n ia eo kwoj pād ie ilo laļ in, jekdo̧o̧n ewi ettoļo̧k eo emaron̄ in, jouj aolep iien keememej bwe Jemam̧ ilo Lan̄ im am̧ Rilo̧mo̧o̧r rejeļā lukkuun kwe im weppān aer iakwe eok. Er rejjamin meļo̧kļo̧kk eok. Rekōņaan kōrooltok eok n̄an jikūm̧.

Mije wōt Rilo̧mo̧o̧r eo. E ej am̧ aen in dāpdep. Jab kōtļo̧k E. Ij kam̧ool ke E emour im bwe kwomaron̄ lōke E. Ij bar kam̧ool ke E ej pinnik eok.

Jen aolep ļoor wanjon̄ak eo an Rilo̧mo̧o̧r eo im pinniki doon ej jar eo aō ilo etan Jisōs Kraist, amen.