Bok in Mormon—Juon Mennin Aorōk Ļapļap ilo Iaļ in Ad
Ilo ad kwojkwoj ioon naan ko an Kraist loi ilo Bok in Mormon, Jetōb eo enaaj jipan̄ kōj meļeļe m̧ool ko indeeo.
Kwomaron̄ ke keememej juon iien ke juon ekar lewaj n̄an eok juon mennin lewaj me ekar ukōt am̧ mour? Oktoba in ej kakōļļeik 40 iiō ko jān ke ikar bōk juon iaan menin letok ko reļļap tata ilo mour eo aō. Ke ikar pād ilo high school, ikar kile bwe juon iaan rijikuuļ ro m̧ōtta ewōr ippān juon meram eo me ekar oktak jān elōn̄ iaan jodikdik ro jet. Ikar m̧ōņōņō in pād iturin. Juon raan ekar jiron̄ eō ke ekar juon uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata. Innām ekar letok n̄an eō juon mennin letok: juon kape in Bok in Mormon. Ekar kajjitōk ippa n̄an riiti jejjo peij ko im iioon ruo m̧ōttan ro remaron̄ uwaaki kajjitōk ko aō. Rein m̧ōttan raar mijenede ro.
Ke ikar iioon mijenede ro, raar katakin eō katak eo an Kraist im karuwaineneik eō n̄an ļoor kūr eo an rikanaan Moronai: “N̄e kom̧ naaj būki men kein, ikōņaan kōketak kom̧ bwe kom̧in kajjitōk ippān Anij, Jemān Indeeo, ilo etan Jisōs Kraist, eļan̄n̄e men kein rej jab m̧ool; im eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar, im ewōr tōmak ilo Kraist, Enaaj kwaļo̧k m̧ool in n̄an kom̧, jān kajoor eo an Jetōb Kwōjarjar” (Moronai 10:4).
Ikar riiti jejjo peij in Bok in Mormon im kar jar. Men̄e ijjan̄in de kar bōk juon meļeļe em̧wilaļ kōn aolep men ko me mijenede ro raar katakin eō, ikar en̄jake ilo būruō bwe ta eo ikar riiti ekar em̧m̧an im kar itok jān Anij. Ikar bōk kam̧ool kōn kallim̧ur eo an Moronai: “Im jān kajoor eo an Jetōb Kwōjarjar kom̧ maron̄ jeļā m̧ool eo an men ko otemjeļo̧k” (Moronai 10:5).
Ālkin aō kar peptaij n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata, jet ro m̧ōtta jān jikuuļ raar kajjieon̄ kareel eō bwe ikar kōm̧m̧an juon kāālet ebōd. Bōtaab kajjojo iien ikar jelm̧ae kain pere ko ak jum̧ae, ikar bōk kapen ekāāl jān ekkatak jeje ko rekwojarjar im jar n̄an m̧ool wōt n̄an bujen ko aō ikar deļo̧n̄i ippān Anij. Jān tōre eo, Bok in Mormon ekar eo m̧ōtta im ekar erom juon menin aorōk ļapļap ilo iaļ eo aō.
Bok in Mormon ejjab juon bok bajjōk. Ej bar juon kallim̧ur kōn Jisōs Kraist, kar jeje jān rikanaan ro etto kōn jitbōn kanaan im revelesōn.
Iien eo aorōk tata kar je ilo Bok in Mormon ej kōn jerbal eo an Irooj Jisōs Kraist make ilubwiljin riNipai ro ālikin wōt An kar Jerkakpeje. Bok in Mormon “ej jake m̧aantak pedped in katak ko ilo gospel eo, ļamļame tok karōk im lo̧mo̧o̧r eo, im jiron̄ armej ta rej aikuj kōm̧m̧ane n̄an bōk aenōm̧m̧an ilo mour in im mour indeeo ilo mour eo ej itok” (Kadkad In Bok in Mormon).
Edition eo m̧oktata an Bok in Mormon: Bar Juon Kallim̧ur kōn Jisōs Kraist ekar publish ilo juon bukwōn edik ilo stata eo an New York ilo M̧aaj 1830 eo. Rikanaan Josep Smith ekar 23 wōt iiō dettan ke ekar kadedeļo̧k ukook eo an bok eo ilo 1829 eo. Ekar ukōt enan̄in aolepān bok eo eietļo̧k jān 75 raan ko, im jerbal in print eo ekar bōk enan̄in jiljilimjuon allōn̄ ko.
Rainin, tarrin 80,000 mijenede ro rej jerbal aolep raan ilo elōn̄ļo̧k jān 150 laļ ko rej jerbal āinwōt baļintier ro, ajeļo̧k mour ko aer n̄an kwaļok kam̧ool bwe Bok in Mormon ej m̧ool im bwe ej kam̧ool kōn Jisōs Kraist.
Ilo seminar eo kiiō n̄an ritōl ro an mijen rekāāl ilo Juun in iiō in, Būreejtōn Russell M. Nelson ekar kwaļok naan in kam̧ool eo an ekajoor kōn Bok in Mormon: “Bok in Mormon ej … naan an Anij. Ej katakin kōn katak eo an Kraist im ej kōmeļeļeik eļapļo̧k kōn Pinmuur eo an Rilo̧mo̧o̧r eo jān jabdewōt bar bok.”
Ikōņaan lewaj jilu ļōmņak ko me remaron̄ jipan̄ kam̧wilaļļo̧k oktak eo ad n̄an Jisōs Kraist jān ekkatak Bok in Mormon.
1. Niknik im jab Jokod ilo Ekkatak eo am̧ Raan Otemjej
Āinwōt Alma im ļōm̧aro nejin Mosaia, jej aikuj “[lin̄ōri] jeje ko rekwōjarjar ilo niknik, bwe [jen] maron̄ jeļā naan an Anij” im kajoorļo̧k ilo m̧ool eo (Alma 17:2).
Ke ikar jerbal āinwōt ritōl ro an mijen ilo Georgia Atlanta Mijen, lio pāleō im n̄a kar kōketak aolep mijenede n̄an ekkatak Bok in Mormon diktata 30 minit aolep raan. Kallim̧ur jab in ekar kōļapļo̧k tōmak eo am im kar jipan̄ kōm kōtmeni mennin bwilōn̄ ko.
Emaron̄ pidodoļo̧k bwe ālkin mijen eo jemaron̄ jab bōk kain iien rōt in n̄an ekkatak jeje ko rekwojarjar aolep raan, bōtaab ij kallim̧ur bwe eļan̄n̄e kwoj lukkuun likūt im̧aan tata ekkatak Bok in Mormon kajjojo raan, kwonaaj lo eļapļo̧k kajoor ilo jetōb im lōke ilo Irooj im kallim̧ur ko An.
2. Kōļapļo̧k Meļeļe in Ekkatak eo am̧ kōn Kwojkwoj Ioon Naan ko an Kraist
Nipai ekar katakin: “Kwojkwoj ioon naan ko an Kraist; bwe lo, naan ko an Kraist renaaj jiron̄ kom̧ aolep men ko kom̧ij aikuj kōm̧m̧an” (2 Nipai 32:3).
N̄an kwojkwoj meļeļe in eļapļo̧k jān riit wōt—ej meļeļe in nemake, kejekļo̧kjeņ, im kōjerbale. Ilo am̧ ekkatak Bok in Mormom, ļōmņak kōn wāween ko rej kōm̧m̧an bwe am̧ ekkatak jeje ko rekwojarjar en ļapļo̧k meļeļe in. N̄an waanjon̄ok:
-
Kōjerbal kein jipan̄ ekkatak ko ewōr ilo Gospel Library app eo.
-
Kili m̧ool ko indeeo me rej jipan̄ kōj meļeļe karōk eo an Anij im tōlļo̧k kōj n̄an kōm̧m̧ani im kōjparok bujen ko ippān Jemādwōj Ilan̄.
-
Kalikkar eoon ko raorōk im ļo̧o̧ki en̄jake ko am̧ n̄an kōjparok ta eo kwar katak ilo iien ekkatak eo am̧.
Bok in Mormon ewōr kajoor eo ie n̄an uwaaki kajjitōk ko an jetōb ko ad. Āinwōt an Nipai kar ba, jej aikuj “karōki tok aolep jeje ko rekwōjarjar n̄an kōm, bwe en n̄an am maron̄ jeraam̧m̧an im jeļā” (1 Nipai 19:23).
Ij kūr kom̧ n̄an kwōjkwōj ioon naan ko an Kraist, im renaaj kōpeļļo̧k kōjām eo n̄an revelesōn im kwaļo̧k n̄an kom̧ ta eo kwom̧ij aikuj kōm̧m̧ane ilo elōn̄ jekjāek ko an mour eo ami n̄an kepaakļo̧k E.
3. Kwaļo̧k am̧ Naan in Kam̧ool kōn Tarlep in M̧ool eo an Bok in Mormon.
Ejja āinwōt an Liai kar ikdeelel n̄an leļo̧k leen wōjke in mour eo n̄an baamle eo an (lale 1 Nipai 8:12), n̄e jej bōk juon naa in kam̧ool kōn Bok in Mormon, jej ejaake juon ikdeelel n̄an kwaļo̧k lan̄lōn̄ eo me ej itok jān jeļā gospel eo an Jisōs Kraist.
Juon iaan sister ro am, Sister Benson, eo ekar kobatok ippād ilo m̧wen̄an in, ekar kwaļo̧k ippa ikdeelel eo an n̄an jipan̄ ļeo jatin. Ilo iien eo, ekar kōppop n̄an etal n̄an kaļōj im kar jab jeļā kōn jerbale juon mijen. Ikar en̄jake n̄an karuwaineneik Sister Benson n̄an riiti Bok in Mormon ilo allōn̄ ko emān im̧aan ilo mijen eo an, kakōļļeik eoon ko rem̧m̧an tata ippān, innām jilkinļo̧k kape eo n̄an ļeo jatin.
Sister Benson ekar jilkinļo̧k kape in Bok in Mormon eo ekar kakōļļeik im karuwaineneik brother eo an n̄an riit jāne kajjojo bon̄. Tokālik liin ekar ba menin n̄an n̄a: “M̧okta jān mijen eo aō, brother eo aō ekar jab jeļā eļan̄n̄e ekōņaan jerbale juon mijen edipio. Jidik kōn jidik, ke ekar riiti Bok in Mormon, ekar lo eļapļo̧k lan̄lōn̄ ilo mour eo an im kar jino ļōmņak in jerbale juon mijen.
Ruo wiik m̧okta jān an Sister Benson kar kadedeļo̧k mijen eo an, brother eo an ekar bōk kūr in mijen eo an. E ej kiiō jerbal ilo Mexico Tuxtla Gutierrez Mission. Kōn Bok in Mormon, Elder Benson ekar lo mour eo an kōn alikkar in jetōb, eo ekar tōlļo̧k e n̄an jerbal n̄an Irooj im lōke bwe men ko renaaj jetjet. Kāālet jab in ekar juon kabwilōn̄lōn̄—kar kareel jān kajoor in naan ko an Anij.
Ro jeiū im jatū jitōnbōro, ij kōketak kajjojo iaami n̄an kam̧wilaļļo̧k ekkatak eo ami kōn Bok in Mormon. Ijeļā ilo ad kwōjkwōj ioon naan ko an Kraist loe ilo Bok in Mormon, Jetōb eo enaaj jipan̄ kōj meļeļe m̧ool ko indeeo im kwaļo̧k ad naan in kam̧ool kōn tōmak edim n̄an ro me Irooj ekar kōpooj er n̄an ron̄ ennaan eo An. Irooj ekar ba, “Aō rikāālet rej ron̄ Ainikiō im jab kapen burueer” (Katak im Bujen Ko 29:7. Ij kam̧ool bwe ro me rej kajjitōk ippān Anij ilo tōmak naaj bōk juon naan in kam̧ool kōn m̧ool eo im kwojarjar eo an Bok in Mormon kōn kajoor an Jetōb Kwojarjar. Kōn menin ij kam̧ool ilo etan Jisōs Kraist, amen.