Ejjeļo̧k Juon Ej Jijet Make Iaan

Ium̧win 50 iiō ko, ikar ekkatak kōn m̧anit, ekoba m̧anit an gospel eo. Ikar ijjino kōn fortune cookies ko.

Ilo Chinatown ilo San Francisco, kōjota eo an baam̧le eo an Gong kar kōjjem̧ļo̧k kōn fortune cookie im juon naan in meletlet āinwōt “Juon iaļ taujin m̧aiiļ ko ijino kōn juon bun̄tōn emake.”

Ānwōt juon ritto eo edik, ikar kōm̧m̧ani fortune cookies ko. Ekkōņak kuļōb mouj kotin ko, ikar limi im nukuji n̄an ļami bwe ren cookie ko redoulul rebwil aot jān lowaan obin eo.

N̄an aō būlōn̄, ikar katak bwe fortune cookies ko rejjab lukkun m̧ōttan m̧anit eo an riChina. N̄an kile riChina, riAmerica, im riEurope mantin fortune cookie, Ikar kappok fortune cookies in kajojo kain laļ ko—āinwōt an juon en kar kōjerbal kajojo jikin ko n̄an kōjeno̧lo̧k jilu bukōn wojke ko n̄an etale jerbal in kijeek. Restaurant ko an riChina ilo San Francisco, Los Angles, im New York rej elletok fortune cookies ko, bōtaab ejjab ko ilo Beijing, London, ak Sydney. Riamedka ro wōt rej keememe e Raan eo an National Fortune Cookie. Karrellel ko an riChina wōt rej elletok “Authentic American Fortune Cookie ko.”

Fortune cookies ko ej juon kalimomo, waanjon̄ak epidodo. Bōtaab ejja pedped eo wōt n̄an keidi kaminene ko ilo m̧anit ko roktak ilo karōk ko remaron̄ jipan̄ kōj kile m̧antin gospel Im kiiō Irooj ej kōppeļo̧k iien ko rem̧m̧an rekāāl n̄an katak m̧antin gospel eo āinwōt bwebwenato jān Bok in Mormon im Kallim̧ur Ekāāl būrabōl kanaan ko rekar kūrm̧ool.

Aolep jikin armej rej em̧m̧akūt. United Nation ko ej riboote 281 milien ro ipelaakin lal in rej em̧m̧akūt. Menin ej 28 milien lōn̄ļo̧k kajojo ro jān ilo 1990 eo, im elōn̄ļo̧k jān jilu alen ļapļo̧k jān 1970 antoon ko. Aolep jikin, nōm̧ba in jeje ko jān m̧okta ro rej oktak rej lo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Aolep Jabōt, membōr ro im ro m̧ōttad jān 185 laļ ko armij ro raar ļotak ie im jikin ko itōrereier ko rej ippen doon ilo 31,916 eklejia ko an Kabun̄ in. Jej kōnono 125 kajin ko.

Raan kein, ilo Albania, North Macedonia, Kosovo, Switzerland, im Germany, Ikar kam̧oole membōr kāāl ro rej kakūrm̧ool bwebwenato eo ilo Bok in Mormon kōn wōjke olive eo. Ilo Jekab 5, Irooj eo an jikin kallib kūreep eo im rikarejar ro An rej kōkajoorļo̧k jim̧or okar in wōjke olive ko im ra ko jān aer aini im ļami ippān doon men kein jān jikin ko rōkārere. Rainin ro nejin Anij rej juon wōt ippān Jisōs Kraist, Irooj ej letok juon meļeļe ekabwilōn̄lōn̄ n̄an kōļapļo̧k tarlep in ad mour kōn gospel eo An em̧ōj kōjepļaaktok.

Kōpooj kōj n̄an aelōn̄ in lan̄, Jisōs ej kōnono kōn būrabōļ ko kōn kōjota eo eļap im kwojkwoj in pālele eo. Ilo būrabōļ kein, rilotok ro kar kūrto̧k er rej kōm̧m̧an jekpen ņae ko n̄an jab itok. M̧aajta eo ej kōmeļeļeik ro Rikarejeraņ n̄an “jab rum̧wij in ilo̧k ilo iaļ ko re ļap im re dik ilo jikin kweilo̧k” im “ilo iaļ ko im oror wōjke ko” n̄an “ān̄intok n̄an ijin” re jeram̧ōl, ro re jipikpik, ro re ajjukuk, im ro re pilo. Kōnono ilo jetōb, ej kōj kajjojo.

Jeje ko rekwojarjar rej ba:

“Aolep laļ naaj ruwainene” n̄an “kejota an m̧weo im̧ōn Irooj.”

“Kom̧in kōpooj iaļ eo an Irooj … bwe aelōn̄ eo An en maron̄ wōnm̧aanļo̧k ioon laļ, bwe ro rej pād ie ren maron̄ bōk e, im pojak n̄an raan ko rej itok.”

Rainin rein kar karuwaineneik n̄an kōjota eo an Irooj itok jān aolep jikin im m̧anit. Rūtto im dik, m̧weie im jeram̧ōl, aelōn̄ in im peļaakin laļin, jej kōm̧m̧an ad jarlepju in Kabun̄ āinwōt jukjukin pād ko ad.

Āinwōt Rijilōk eo eutiej, Piter ekar lo an lan̄ peļļo̧k juon visōn kōn “juon ko̧o̧j eļap ar door e kōn emān jabōn … rej pād ilowaan … kidu ko.” Piter ekar katakin: “E m̧ool, ij kile bwe Anij e jab ļōmņak kōn okōtan armej. … A ilo aelōn̄ otemjej eo ej mijak [Irooj], im jerbal kwōjarjar, ej kabun̄būruon.”

Ilo būrabōļ eo kōn Risamaria eo em̧m̧an, Jisōs ej karuwaineneik kōj n̄an itok ippān doon im Ippān ilo m̧ōn ruwaimejet eo Im̧ōn—Kabun̄ eo An. E ej kūr kōj n̄an erom̧ ro rūturin rem̧m̧an. Risameria eo em̧m̧an ear kallim̧ur n̄an ro̧o̧l im kōļļāik kōjparok eo an rein ilo m̧weo Im̧ōn. Mour kōn gospel eo an Jisōs Kraist ekitbuuj kōm̧m̧an ruum̧ n̄an kōj aolep ilo Kabun̄ eo An em̧ōj an bar jepļaaktok.

Jetōb eo jān “jikier ilo im̧ōn ruwamāejet” ekitbuuj “ejjeļo̧k juon ej jijet make iaan.” N̄e kwoj itok n̄an m̧ōnjar, eļan̄n̄e kwōj lo juon emake iaan, kwomaron̄ ke jouj im ba iakwe im jijet ippān em̧m̧aan eo ak kōrā eo? Menin emaron̄ jab m̧anit eo am̧. Armej eo emaron̄ oktak paaktokin ak an kōnono jān kwe. Im aaet, āinwōt juon fortune cookie emaron̄ ba, “juon iaļen jemjerā in gospel im iakwe ej jino ippān juon m̧okta iakwe im ejjeļo̧k juon ej jijet make iaan.”

“Ejjeļo̧k juon ej jijet make iaan” barāinwōt ej meļeļe in ejjeļo̧k ej jijet make iaan ilo elap ejake ak ejjetōbtōb. Ikar etal ippān juon baba eo ebrak kōn būrom̧ōj n̄an loļo̧k ļaddik eo nejin. Iiō ko m̧oktaļo̧k, ļaddik eo nejin eaar kōņaan erom juon tikōn kāāl. Ilo iien eo baam̧le in raar wiaik juuj ko an rōkāāl.

Ak ilo im̧ōn jar eo, tikōn ro raar ettōn̄ kake. Juuj ko an raar kāāl, bōtaab raar jab kōpaļpaļ. Kar jook im metak, tikōn jidikdik in eaar ba ejjamin naaj bar etal im bar jar. Būruō ej rup wōt kōn e im baam̧le eo an.

Ilo iaļ ko rebūn̄aln̄al n̄an Jeriko, kajjojo iaam kar ettōn̄ kake, jook im metak, bōlen kar kōjdat ak kar kakkure. Im kōn dettan jon̄ak ko kōn ļōmņak in, kajjo iaad ewōr barāinwōt kar jekdo̧o̧n, jab loe ak ron̄, bōlen kōbo̧uwe in kōmetak ro jet. Em̧ool jaar metak im kar kōmetak ro jet bwe Jisōs Kraist ej bōktok kōj n̄an m̧ōn Im̧ōn. Ilo Kabun̄ eo An im kōn kain̄i ko im bujen ko An, jej kuk ippān doon im n̄an Jisōs Kraist. Jej iakwe im rej iakwe kōj, jerbal n̄an im rej jerbal, jeorļo̧k im rej joļo̧k bōd. Jouj im keememej, “ejjeļo̧k būrom̧ōj an laļ me lan̄ ejjab maron̄ kemouri” eddo ko laļ in rej meraļo̧k—lan̄lōn̄ eo an ad Rilo̧mo̧o̧r ej m̧oolin.

Ilo 1 Nipai 19, jej riit: “Em̧ool lukkuun Anij an Israel [er] rej jujuri ium̧win neer; … rej kajekdo̧o̧n E. … Kōn menin rej den̄ļo̧ke E, im E ej kōtļo̧k e; im rej ubrare E, im E ej kōtļo̧k e. Aaet, rej em̧m̧ōje E, im E ej kōtļo̧k e.”

Professor eo jera Terry Warner ej ba ekajet eo, den̄ļo̧ke eo, ubrare eo, im em̧m̧ōje eo raar jab iien ko raorōk kar waļo̧k wōt ilo tōre in mour eo an Kraist ilo kanniōk. Ekōjkan ad kōm̧m̧an n̄an doon—eļap tata ro me rej kwōle, maro, ro rejeno̧ļo̧k make iaer, ej jekjek in ad kōm̧m̧an n̄an E.

Ilo Kabun̄ eo An karkōjepļaaktok, jej aolep em̧m̧anļo̧k n̄e ejjeļo̧k juon ej jijet make iaan. Jen jab baj leļo̧k ilo pidodo jikin jokwe ak kōtļo̧k melim̧. Jen kukwin in m̧ool karuwainene, kile, jerbal in karejar n̄an, iakwe. Kōm̧m̧an bwe kajjo iaan m̧ōtta, jatū kōrā, jatū m̧aan en jab juon rilikin ak ruwamāejet ak en juon ajri ilo m̧weo.

Rainin elōn̄ rej en̄jake aer make im ettoļo̧k. Social media im artifical intelligence remaron̄ kōm̧m̧an ad jan̄inuwaade jem̧doon in armej eo ad im en̄jake in armej. Jej kōņaan ron̄ ainikein doon. Jej kōņaan lukwin aae em̧ūlaļ im jouj.

Elōn̄ wūn ko jemaron̄ en̄jake jemaron̄ jab koņ ilo m̧ōn jar eo—me, jej watōke, jej jijet make iaad. Jemaron̄ inepata kōn wāween ad kōnono, nuknuk ko, jekjek eo an baam̧le eo ad. Bōlen jej en̄jake ad jabwe, nemān baat, jan̄uwade kōn erreo ilo m̧wil; kar jepel jān juon eo im en̄jake metak im kar jook; ro kjikka ar inepata kōn menin ak kien eņ an Kabun̄ in. Emaron̄ ejjeļo̧k pāleed, kar jepel, ak kar mej pāleen. Ajri ro nejid rōkoļap, ejjeļo̧k nejid ajri. Jaar jab jerbale juon mijen ak kar m̧ōkaj ad ro̧o̧l n̄an kapijuknen jān mijen. Laajrak in ej etal wōt.

Mosaia 18:21 ej karuwaineneik kōj n̄an āj e būruōd ippān doon ilo iakwe. Ij karuwaineneik kōj n̄an kadikļo̧k ad inepata, kadikļo̧k ekajet, kadikļo̧k ad pedped ioon ro jet—im, n̄e ekkar, kadikļo̧k kapene ioon kōj make. Jejjab ejaake Zaion ilowaan juon raan. Bōtaab kajjo “iakwe,” kajjo okmeeņeņ in jouj, ej kepaaktok Zion. Jen lōke Irooj eļapļo̧k im kāālet lan̄lōn̄ n̄an pokake aolep kien ko An.

Katak eo, ilo m̧weo kōn tōmak im jemdo̧o̧n an Rikwojarjar ro, ejjeļo̧k juon ej jijet make iaan kōn wōt wojān bujen ilo Jisōs Kraist.

Kar katakin Rikanaan Josep Smith: “repād wōt n̄an kōj bwe jen loi, bōk koņaad im jipan̄ iuun m̧aanļo̧k aibojooj eo an Raan ko Āliktata, ‘tarlep in iien bōk eddo ko … ,’ n̄e Rikwojarjar ro an Anij renaaj koba ilo juon wōt jān aolep laļ ko, nuki, im armej.”

Anij “ej jab kōm̧m̧an jabdewōt eļan̄n̄e e jab n̄an jeraam̧m̧an eo an laļ; … bwe en maron̄ bōktok aolep armej [im kōrā] n̄an e. …

“… E ej kūrtok er aolep n̄an itok n̄an Ippān im bōk leen em̧m̧an eo An; … im aolep ānwōt juon n̄an Anij.”

Oktak ilo Jisōs Kraist ej aikuj ad n̄an likūtļo̧k lukkuun nememein armej eo ilo kōj im imminene eo an laļ in. Āinwōt an Būreejtōn Dallin H. Oaks kar katakin, Jej aikuj joļo̧k aolep tōmak im imminene ko rejekkar n̄an kien ko an Anij n̄an erom̧ Armej ro Rekwojarjar ilo Raan Ko Āliktata. E ej kōmeļeļeiki, “Ewōr juon m̧anit in gospel eo ejej uwaan, juon men eo eaorōk im kōtmene ko im imminene ko jeļā kaki jān aolep membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata.” M̧anit in gospel eo ekitbuuj kien erreo, etal n̄an jar aolep wiik, bōjrak jān bōk dān in kadōk, jikka, ti, im ko̧be. Ej kitbuuj m̧ool im jim̧we, meļeļe kake ad em̧m̧akūt m̧aanļo̧k, ejjab walōn̄ļo̧k ak walaļļo̧k, ilo kadkad ko an Kabun̄.

Ij katak jān membōr ro elap aer tōmak im ro m̧ōtta ilo aolep āne im m̧anit. Jeje ko rekwojarjar kar katak bwijin kajin ko im m̧antin kōļmeļo̧kjen ko rem̧wilaļļo̧k meļeļe kake gospeļ eo. Oktak ko rewaļo̧k kōn mour āinwōt Kraist ekamwilaļļo̧k ao iakwe im meļeļe kake kōn aō Rilo̧mo̧o̧r. Aolep raar jeraam̧m̧an n̄e jej kōmeļeļeik kajeen m̧anit eo ad, āinwōt an Būreejōn Russell M. Nelson kar katakin, āinwōt juon ajri nejin Anij, juon ajri in bujen eo, juon rikaļoor an Kraist.

Aenōm̧m̧an eo an Jisōs Kraist ej kar n̄an kōj kajjojo. Kiin jem̧aanļo̧k juon likao edik ekar kōtmene ilo kar kajjitōk, “Elder Gong, imaron̄ ke wōt in etal n̄an lan̄?” Ear ļōkjenaan eļan̄n̄e maron̄ in wōt jeorļo̧k bōd. Ikar kajjitōk et eo etan, kar kanooj ron̄jake, kar karuwaineneik e n̄an kōnono ippān bisop eo an, karjuon jiburlep e eļap. Ekar em̧m̧akūt kōn kōjatdikdik ilo Jisōs Kraist.

Ikar kōnono kōn likao eo edik ilo juon bar wāween. Tokālik ikar bōk juon leta kar jab jaiņi me ekar jinoun, “Elder Gong, lio pāleō im n̄a kar karūttoļo̧k ruatimjuon ajri … im kar jerbale ruo mijen ko.” Bōtaab “Aolep iien ikar en̄jake ijjab maron̄ kar kadeļo̧n̄ ilo aelōn̄ in selestial … kōnke jerawiwi ko aō ke ikar jodikdik raar kanooj nana!”

Leta eo eaar etal wōt, “Elder Gong, Ke kwar ba kōn likao eo edik ej tōpar kōjaktdikdik an jeorļo̧k bōd, ikar obrak kōn lan̄lōn̄, jino kile bwe bōlen n̄a [imaron̄ in jeorļo̧k bōd].” Jemļo̧kin leta eo, “Ij barāinwōt iakwe mour e aō make kiiō!”

Bujen in ej kam̧wilaļļo̧k ilo ad itok n̄an Irooj im iaadwōj itok n̄an im̧ōn Ruwaimejet eo. Irooj ej kōjeraam̧m̧an kōj aolep eļan̄n̄e ejjeļo̧k juon ej jijiet make iaan. Im wōn ejeļā? Armej eo jej jijet iturin emaron̄ erom armej eo m̧ōttad em̧m̧antata. Kōm̧m̧an bwe jen lo im kōm̧m̧an jikin n̄an E im n̄an doon ilo kōjota eo an Lamb eo, ilo ettā ij jar ilo āt eo ekwojarjar etan Jisōs Kraist, amen.