Ilo̧k im Kōm̧m̧ane Barāinwōt
Ikōņaan kalikar mijinede rein ro me kar kūr n̄an kōm̧m̧an jerbal ko an jerbal in jipan̄. Rej waanjon̄ak eo n̄an kōj.
Ilo an Rilo̧mo̧o̧r kar ito-itak ilo Bethsaida, jet armej raar bōktok juon em̧m̧aan epilo n̄an E. Bōlen raar kōtmene n̄an loe juon menin bwilōn̄ jinountata. Rilo̧mo̧o̧r “ej kabwijere pein ļeo e pilo, im ān̄inļo̧k e jān jikin kweilo̧k eo” n̄an kemour e ilo ittino. Ilo m̧okta, kemour eo ekar jab jerbal. Em̧m̧an eo “ear relōn̄ļo̧k, im ba, Ij lo armej āinwōt wōjke ko, rej etetal.” Jisōs, kōn meanwōd, “ej bar likut pein ņa ioon mejān, im ej kalimjeke.” Kōn kobain an Rilo̧mo̧o̧r un̄ur kōn pein, ļeo epilo eaar kiō “lo … alikkar.”
Menin ej juon waanjo̧n̄o̧k kōn wāween kadkadin mour eo an Rilo̧mo̧o̧r kōn jerbal in jipan̄ ko an rettā. Ej kakmejmej kōj ke E “ear jab itok bwe armej ren jerbal n̄an E, ak bwe En jerbal” im ālkin karuwaineneik kōj n̄an ļoor waanjo̧n̄o̧k eo An im kōm̧m̧an eļapļo̧k, leļo̧k n̄an ro rej kajjitōk jān kōj, im iakwe ro riturid. Ke kar kajjitōk, “Wōn eo ej rituru?” Kraist ekar kwaļo̧k juon būrabōl eo an RiSamria eo em̧m̧an, kōn juon iruj n̄an “ilo̧k, im kōm̧anm̧an āinwōt.”
Mijenede ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata rej annan̄ e ļo̧k tōre ko etto in riSamaria eo em̧m̧an me Kraist eaar karuwaineneki kōj n̄an erom. Ikōņaan kalikkar mijinede rein me kar kūr n̄an kōm̧m̧an jerbal ko an jerbal in jipan̄. Rej waanjo̧n̄o̧k n̄an kōj kōn ekōjkan an jerbal in jipan̄ (1) kepeļļo̧k bōro ko n̄an gospeļ eo an Jisōs Kraist, (2) kōtļo̧k aolepen kōjwōj n̄an jerbal in jipan̄ jekdoon ta epād ipped, im (3) bōktok kajoor eo an Kraist ilo mour ko ad.
M̧okta, Jerbal in Jipan̄ ej Kōpeļļo̧k Bōro ko n̄an Gospeļ eo an Jisōs Kraist
Ilo enan̄in 91 MK, Ammōn, juon mijinede ilo Bok in Mormon, eaar kwaļo̧k kajeen n̄an Kiin̄ Lamonai im ba, “Ikōņaan jokwe ilubwilijin armej rein n̄an jidik iien; … [im] Inaaj am̧ rijerbal.” Kōn wōt jerbal eo an n̄an kiin̄ eo, Ammōn ear bōk juon iien em̧m̧an n̄an “kōnono ilo peran, …im ba n̄an [Kiin̄ Lamonai] … jān kajoor ta” eaar kōm̧m̧ane jerbal in jipan̄ eo an. Ilo o̧ktan, kiin̄ eo eaar kalim̧ur ke “mekarta jabdewōt [Ammōn] kōņaan … [kiin̄ eo enaaj] leļo̧k n̄an e.” Kajitōk de eo an Ammōn eaar bwe kiin̄ eo en ron̄jake naan ko jān gospeļ eo an Jisōs Kraist. Kar tōprak in jerbal eo an Ammōn ilo “elōn̄ armej [bōktok] n̄an ukeļo̧k.”
Ilo raan eo ad, jerbal in jipan̄ ej etal wōt n̄an tōl ro jet n̄an gospeļ eo. Sister Bevan eaar jerbal āinwōt juon rikaki mejinede ke ekar jino en̄jake aban ko an ejmour kōm̧m̧an bwe en jepļaak n̄an kapijukunen eo an n̄an taktō. Ijeļo̧kin kar kōtļo̧ke, eaar maron̄ kar wōnm̧anļo̧k wōt im jerbal āinwōt juon mejinede eo ej jerbal in jipan̄ jān kapijukunen.
Ke ekar loļo̧k juon baak, Sister Bevan im eo m̧ōttan raar en̄jake n̄an kenono n̄an juon mama eo ewōr emān ajri jiddik ippān, ak raar aepedped im baam̧le eo ekar mootļo̧k. Raan eo juon, raar bar ro̧o̧l n̄an baak eo, jar bwe ejja baam̧le in remaron̄ in pād ijo. Kabwilōn̄lōn̄ eo, mama eo eaar jijet ilo ejja jikin eo wōt āinwōt raan eo m̧okta. Iien in Sister Bevan im eo m̧ōttan raar etal ippān mama eo, kar jino jeļā kajeen, im kar loe ke eaar lukkun aikuj jiban̄ ilo anbwin. Raar leļo̧k jipan̄ im āļkin karuwaineneiki n̄an katak kōn gospeļ in.
Kōn wōt jerbal in jipan̄ eo im karuwainene eo, mama eo im ajri eo nejin erūtto tata raar peptaij, im eo kein karuo eritto juon iiō tokālik. Rej pād im membōr ro remourur rainin. Sister Bevan eaar jeļā ke en̄jake in eaar lukkun kar ellowetak ekwōjarjar, im ej “kam̧ool n̄an [e] bwe [e] eaar jim̧we ijo Anij eaar aikuji [e] n̄an pād.”
Āinwōt Ammōn im Sister Bevan, āinwōt ad jerbal in jipan̄ n̄an ro jet, jej “kwaļo̧k waanjo̧ņo̧k ko em̧m̧an n̄an er” im rej ikideelel n̄an jeļā “wūn eo jān kōjatdikdik eo epād [ippād].”
Jisōs ej karuwaineneik kōj n̄an “Etal, im kōm̧m̧an āinwōt.”
Karuo, Jerbal ej Kōmaron̄ Aolepen Kōj n̄an Jerbal in Karejar Jekdoon Ta Epād Ippād
Būreejtōn Russell M. Nelson eaar kūr ioon “aolep rerreo, ekeke ānbwinnier n̄an m̧aanjabpopo n̄an im jerbale juon mijen” im n̄an jiron̄ ro im sister ro rekeke ānbwinnier n̄an “jar bwe komin jeļā eļan̄n̄e Irooj enaaj kōņaan bwe [en] jerbale juon mijen.” Eaar kallim̧ur bwe “kāālet eo am̧ n̄an jerbale juon mijen, mekarta juon mijen in ito itak ak juon jerbal in jipan̄ mijen, enaaj kōjeraam̧m̧an eok im elōn̄ ro jet.” Mijen in jerbal in jipan̄ em̧ōj an ukōt meļeļe eo an naan maron̄. Kiiō aolep likao im jiron̄ ro rerreo ro raar ikideelel n̄an jerbal juon full time mijen n̄an Irooj emaron̄ kōm̧m̧ane menin, kōn jet men ko remaron̄ kōm̧m̧ani.
Elder Holgado ej juon waanjo̧n̄o̧k kōn maron̄ in n̄an jerbal jekdo̧o̧n ta ko reped ippād make. Eaar ļo̧tak kōn juon nan̄inmej ejeja, eo kar bōbraeik e jān jerbal āinwōt juon rikaki in mijinede. Elder Holgado kar kappeiki āinwōt juon mijenede in jerbal in jipan̄ im kar bōk ko̧ņaan ilo bishops’ storehouse, ijo eaar jiban̄ ro jet kōn aikuj ko aer. Eaar ekkar m̧weik ko, pākiji vegetable ko, im jipedi bo̧o̧k ko.
Āinwōt an Elder Holgado kar kenono ilo kweilo̧k in kwojkwoj eo āļkin mijen eo an, eaar jaketo-jaketak ke “Anij ej aikuj mijenede in jerbal in jipan̄. Ej aikuj armej n̄an iakwe im jerbal n̄an ro jet. Armej rein raar ekkar toilet pepa, pakij broccoli, kalōki kobat ko, im raar meanwōd n̄an armej.”
Kwojjab aikuj bōk juon kūr in jerbal in jipan̄ ak kōņak juon name tag n̄an kōm̧m̧an em̧m̧an. Aolep makūtkūt in jerbal in jipan̄ kar kile ej jān Rilo̧mo̧o̧r. Kōj aolep jemaron̄ jipan̄ ro jet itok n̄an Kraist ilo ad jerbal in jipan̄ kōn iakwe im jouj. Jemaron̄ aolep jerbal in karejar ilo etan Kraist n̄an eo juon kōn kajoor in Jetōb Kwojarjar im mour āinwōt waanjon̄ak in tōmak ilo Jisōs Kraist. Jerbal in jipan̄ ej kōtļo̧k kōj n̄an kwaļo̧k kōj make āinwōt kein katok ko remour eo raar m̧ōņōņō in bōk n̄an Anij.
Jisōs ej karuwaineneik kōj n̄an “etal, im kōm̧m̧an āinwōt.”
Kajilu, Jerbal in Jipan̄ ej Bōktok Kajoor eo an Kraist n̄an Mour ko Ad
Juon mijenede rūm̧m̧an ded eo eaar em̧m̧akūt jān juon ijjitōn̄ in rikaki n̄an juon jerbal in jipan̄ eaar kakkōt kōn jet apan̄ ko an make eo ekar aikuji kemour eo ekajoor an Kraist. Wujlepļo̧k in jerbal in jipan̄ eo an ekar boktok kajoor eo n̄an mour eo an. Eaar ba, “Iaar en̄jake bwe tōre eo iaar kakkōt, ij maron̄ en̄jake Kraist ej kotak lōn̄ļo̧k eō. Ewōr juon men eo ejeno̧ļo̧k em̧m̧an kōn lale ļo̧k An kōjeram̧m̧an armej ilo juon jikin kakwon m̧ōn̄ā, ilo tampeļ eo, im kōn gospeļ eo An.”
Elder in eaar jino en̄jake m̧wilaļ in laudin̄din̄, im m̧ōņōņō eo an ekāāl ekar kōjeram̧m̧an e im aolepān baam̧le eo an. Jetōb eo eaar delo̧n̄ m̧weo m̧weer elapļo̧k, raar pād tempeļ ippān doon elapļo̧k aolep iien, im Kraist eaar erom juon men eo elapļo̧k ilo reilo̧k n̄ane ilo baam̧le in aer. Mijenede in ej tōmak bwe Kraist eaar lo̧mo̧o̧ren mour eo an im kōjeram̧m̧an baam̧le eo an kōn jerbal in jipan̄.
Būreejtōn Nelson eaar katakin, “Kōņaan jerbal in jipan̄ im kōkajoor ro jet ej jutak āinwōt juon kōkalle an juon pojak in mour” kōn kajoor in pinmuur eo an Rilo̧mo̧o̧r.
Jisōs ej karuwaineneik kōj n̄an “etal, im kōm̧m̧an āinwōt.”
Mijinede ro rej Jerbal in Jipan̄ Rej Waanjon̄ak in Rikalo̧o̧r ro an Jisōs Kraist rej Wujlepļo̧k
N̄e kwe ak juon uwaan baam̧le eo am ejeram̧m̧an kōn juon kūr n̄an mijenede in jerbal in jipan̄, ej juon iien n̄an m̧ōņōņō. Baam̧le eo am enaaj kiiō wōr juon ripinej-jenkwan ejenolo̧k an Irooj Jisōs Kraist jokwe ilo m̧weo im̧ōm̧. Enaaj ukōt aolepen kom̧ n̄an em̧m̧an eo. Ejjab aikuj wōr inepata ilo jabdewōt kūr n̄an jerbal. Jej al, “Inaaj ilo̧k ijo kwon kōnaan bwe in ilo̧k” im “Inaaj erom ta eo kwoj kōņaan bwe in erom.” En̄iin ej juon iien em̧m̧an n̄an kwaļo̧k ke jej lukkun m̧ool kōn ta eo jej ba!
N̄an kom̧wōj ro rej jerbal, im elaptata elapļo̧k jān 4,000 mijenede rūm̧m̧an ded ro rej jerbal in jipan̄, kemij iakwe eok! Eļan̄n̄e rikaki mijinede ro rej lo̧n̄iin Irooj, innām jerbal in jipan̄ minijede ro rej pā ko pein Irooj, im kwe kwojjab mijinede ro rewaan. Kajjojo iaami ej aorōk n̄an aiintok eo an Israel. Bureejtōn Nelson eaar katakin bwe “jabdewōt iien jej kōm̧m̧ane jabdewōt men ko me rej jipan̄ jabdewōt armej … n̄an kōm̧m̧an im kōjparok bujen ko aer ippān Anij, jej jipan̄ aiintok Israel.”
Kom mijenede ro rej jerbal in jipan̄ komij aiintok Israel ilo elōn̄ wāween ko, im jerbal eo am̧ ej ukōt mour ko kajjojo. Ekkā am̧ jab jeļā wōn ej bōk jem̧ļo̧k in jerbal in jipan̄ eo am̧, ak Anij ejeļā. Aolep iien keememej bwe “toun wōt ami [jerbal] juon iaan rein ro ediktata, … ami [jerbal n̄an E].” Komij ron̄ ainikiem̧ āinwōt kwar bōk koņaam̧ ilo call center ko an Kabun̄ in; komij loe ettōn̄dikdik ko ilo am̧ jiban̄ ilo doulul ko an jukjuk in pād; im komij en̄jake am̧ meram ilo am̧ jerbal ilo tampeļ ko. Kwōj najidik eo ekole, kanuknuk eo ejjeļo̧k ballin, im leļo̧k den n̄an eo emaro.
Kōj aolep ej aikuj etal im kōm̧m̧ane bārāinwōt
Jerbal in Jipan̄ ej Bōtōktōk in Mour an Rikaļoor ro an Kraist
Jerbal in jipan̄ ewōr an kajoor n̄an kepeļļo̧k bōro ko n̄an gospeļ eo im kōmāļim kōjwōj n̄an aolepen ad jetōb n̄an Kraist. Ej ukōte bōro ko n̄an erom āinwōt E elapļo̧k, im ilo m̧akūtkūt in, jenaaj kotak ro jet. Būreejtōn Nelson ekar kajjitōk juon iien, “Ilo laļ in obrak kōn jetōb edikļo̧k, kajjojo emaron̄ ke … kōm̧m̧an oktak?” Uwaak eo an: “Aaet! … ‘Armej in Bujen ro an Irooj, … raar pojak … kōn kajoor in an Anij ilo aiboojoj eļap’ … maron̄ kotak mour ko an aolep armej.” Kōn̄ jerbal in jipan̄ jej ukōt bōro ko—im laļin.
Kraist “ej etetal im kōm̧anm̧an em̧m̧an.” Ekar jerbal in karejar n̄an rinan̄inmej ro, kaloļo̧kjeņ ripilo, im loļo̧k ro ri jeram̧ōl. Ekar kōmat elōn̄ m̧ōn̄ā ko, kar jiban̄ ilo m̧ōn̄ā ko an kwōjkwōj in pālele ko, im najidik taujin ro raar kwōle. Ilo ad leļo̧k jerbal in jipan̄ ilo etan Kraist n̄an eo juon, jej lapļo̧k ad erōm̧ kwojarjar im weppān kōn menin letok eo an mour indeeo. Jisōs Kraist ej mour. E ej aō Rilo̧mo̧o̧r im am̧. E ej ad Ripinmuur. Ej ej ad waanjo̧n̄o̧k ekajoor kōn jerbal in karejar. Ij karuwaineneik kōj kajjojo n̄an etal im kōm̧m̧ane barāinwōt. Ilo etan Jisōs Kraist, amen.