Jetōb ko Rettā ilo Lokatok ko Rej Bukwelōlō

Jān Elder Jeremy R. Jaggi

Jān Jiljilimjuonn̄oul eo

Ilo ad kōm̧m̧an im kautiej bujen ko ad, jej likwōj kōj make n̄an Rilo̧mo̧o̧r eo, bōk eļapļo̧k maron̄ n̄an bōk tūriam̧o̧ eo An, kōjparok, kokwojarjar, kōmour, im kakkije.

Kom̧ em̧ool, kuwaer eo, kōn naan in kam̧ool eo ami jān al eo ekāāl.

Al in kwojkwoj eo ekāāl “Bread of Life, Living Water” ej kobrak aō. Juon ļain ilo al eo ej ba, “Kiiō ij itok m̧aan lokatok eo, ajeļo̧k n̄an E būruō erup.”

Aō meļeļe kōn naan ko kar ļapļo̧k ālkin wōt an baam̧le eo am kar ilo̧k jān Newbury Park, California, n̄an jerbal ilo Utah Odgen Mijen ilo 2015. Ikar bōk juon kūr n̄an alooje Hill Air Force Base eo epaake Layton, Utah. Ijjan̄in kar pād ilo juon military base, ak kar iioon juon military chaplain ak em̧m̧aan im kōrā ro me rej jerbal n̄an letok ineem̧m̧an im kōjparok n̄an lal eo aer.

Chaplain Harp, āinwtōt taujin ro jet rej baļintier im professional chaplain ro me rej jerbal ilo kalbuuj ko ad, aujpitōļ ko, im jikin military ko peļaak in laļ in, kar im̧we im kōketak eō. Bōjrak eo am āliktata ilo base eo ekar jikin kabun̄ eo. Ikar kajjitōk ippān chaplin eo eļan̄n̄e ekar kōm̧m̧an jar n̄an aolep armej me raar kōņaan kejekļo̧kjeņ, jar, im ļōmņak, im kabun̄jar. Ekar ilo̧k n̄an ijo im̧aan chapel eo im ekar ineek nam̧ōj tak juon debwāāl jān tulikin katiin̄ ko. Ekar ba ej kōjerbal debwāāl eo n̄an iien jar ko an Protestant im Catholic. Ikar kajjitōk ta eo ekar kōjerbale n̄an brother im sister in Jewish ro, im ekar etal n̄an rejet in wall eo juon im̧aan im ekar kanōktok juon Star of David.

Innām ikar kajjitōk, “Ta eo kwoj kōm̧m̧ane n̄an iien jar ko an Armej Rekwojarjar ilo Raan ko Āliktata?” Ekar iuunļo̧k kakōļļe ko im jitōnļo̧k juon lokatok eļap ilo ioļapļap in jikin jar eo. Ekar ba bwe membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata rej kōpooj im kōjeraam̧m̧an pilawe im dān eo ioon lokatok eo. Ikar kajjitōk n̄e lokatok eo eļap, āinwōt em̧ōj katōk n̄ai ijo kar kōm̧akūti m̧okta jān iien jar ko an brother im sister in Jewish ro, Muslim ro, ak Protestant ro. Ekar ba bwe lokatok eo ej pād wōt ijo, n̄an jet iaan kabun̄ ko rej barāinwōt kōjerbal lokatok eo ilo jet wāween.

Ebream ekar kalōk juon lokatok, liāpe Aisak, im pojak in katok kōn ļeo nejin make, bōtaab pein ekar bōjrak, im ekar kean̄, āinwōt Irooj kar kean̄, “N̄a e”! Jete kōttan an “Rilo̧mo̧o̧r eo ak juon iaan rikanaan ro An kar baļintier, N̄a e”?

Ilo Kwaļo̧k eo An ioon Toļ eo, Rilo̧mo̧o̧r eo ekar kajjitōk ippān n̄an kōkōm̧anm̧an kōta eo ad ippān ro jeid im jatid m̧okta jān ad jibadōk lokatok eo. Paul ekar katakin bwe jej aikuj “kokwōjarjar” ilo lokatok eo kōn Pinmuur eo an Jisōs Kraist.

Rikanaan Liai ekar “likūt m̧weo im̧ōn, … an mennin aorōk otemjej. … [Innām] eaar kalōk juon lokatok …⁠ kōm̧m̧ane juon joortak … , leļo̧k kam̧m̧oolol n̄an Irooj.”

Baibōļ im Bok in Mormon rej katakin kōj n̄an kabun̄jar n̄an Nejin Anij ilo lokatok ko. Etke?

Ro jined im jemād m̧oktata, Adam im Iv, kar kalōk im kabun̄-jar ilo lokatok ko. Ālkin kar kadiwōjļo̧k er jān Jikin Kallib Eden im kar kabun̄-jar ium̧win “elōn̄ raan ko,” juon enjeļ ekar loļo̧k er im kajjitōk juon kajjitōk me maron̄ kar kajjitōk ippād kajjojo: “Etke kwoj ajiļo̧k katok ko n̄an Irooj?”

Adam ekar uwaak, “Ij jab jeļā.”

Uwaak eo an enjeļ eo n̄an kile ettā eo an Adam ekabwilōn̄lōn̄: “Men…in ej juon kakōļleen katok eo an eo Nejin Eaar Make Keotak in Jemān. … Kōn menin, kwōn kōm̧m̧an aolep men kwōj kōm̧m̧ani ilo etan Nejin, im kwōn ukeļo̧k im kūr ioon Anij ilo etan Nejin jān kiiō n̄an indeeo”

Tebōļ in kwojkwoj eo im lokatok ko an tampeļ rej kakōļļeen katok eo an Jisōs Kraist im Pinmuur eo An indeeo.

Ilo ad kōm̧m̧an im kautiej bujen ko ad, bōk kain̄i ko an kwojkwoj eo ilo m̧ōn jar eo im bōk menin letok kwojarjar eo im liāp ilo tamleļ, jej kor kōj make n̄an Rilo̧mo̧o̧r eo, ļapļo̧k ad bōk tūriam̧o, kōjparok eo An, kokwojarjar, kemour, im kakkije.

Tūriam̧o im Kōjparok Kōn Bujen ko

Āinwōt juon 15 iiō dettan, ikar kajjitōk ippān jema n̄e imaron̄ ke jab pād ilo kweilo̧k in kwojkwoj eo—juon Jabōt ilo Jānwōde n̄an juon ikkure in Football. Ekar ba irūtto n̄an kōm̧m̧ane kāālet eo n̄an n̄a make im kajjitōk ippā n̄an ļōmņak kōn juon kapilōk. Ekar ba, “N̄e kokāālet n̄an jako jān kwojkwoj eo juon kōttan, eļap an pidodoļo̧k n̄an kāālet n̄an bar jako jāne.”

Eļan̄n̄e Rilo̧mo̧o̧r eo ej rikakoba eļap, innām rikapo eo ej rikōjepel eo. E, Setan ej kapo kōj n̄an kōjepel kōj make jān ad kwojarjar jikin kabun̄-jar ko ad im jān kōjparok eo an Jisōs Kraist. N̄e jej kabun̄-jar n̄an Rilo̧mo̧o̧r eo, jej bōk kajoor eo n̄an jutak ņae anjiwiwi ko an mour in.” N̄e jej joļo̧k iien n̄an kōm̧m̧ao Ippān, ewōr ippād juon kallim̧ur n̄an “lo̧mo̧o̧r jān Setan.” “Innām, ilo ad kōjparoki bujen ko ad, Ej letok n̄an kōj An kajoor n̄an kōkajoorļo̧k.” O, eļap aō kaorōk en̄jake eo kōn kōm̧m̧ao ippān Rilo̧mo̧o̧r eo kōn bujen ko kar kōm̧m̧ani ilo lokatok ko rekwojarjar.

Kalōk juon meļeļe kōn Pinmuur indeeo eo an Rilo̧mo̧o̧r lain im bar lain, kain̄i im bar kain̄i, ej letok juon kōjparok ņae kapo ko an rikapo eo. Elder Jaggi ilo Mexico ke ekar dik, Zuster Jaggi ilo Belgium, im mijenede ro jet ilo aolepān laļ in eļap wōt aer naaj lo ro m̧ōttaer bōk kōjeraam̧m̧an ko an peptaij im bōk menin letok an Jetōb Kwojarjar eļan̄n̄e ro m̧ōttaer rej etal n̄an kweilo̧k in kwojkwoj eo ilowan wiik eo kein kajuon in aer kōnono ippāer.

Juon rūm̧m̧an ded ilo Tonga ak Samoa eļapļo̧k an naaj liāp ilo tampeļ eo an Irooj eļan̄n̄e rekar kōppopo n̄an bōk menin letok kwojarjar eo aer ālkin wōt aer kadiwōjļo̧k jān jikuuļ. Ilo menin letok kwojarjar eo, membōr ro rej kajjitōk n̄an mour, pokake, im kōjparok ļalem kien ko me ej leļo̧k n̄an mour ko aer kajoor im bōbrae. Ilo ad kōm̧m̧ani bujen ko ippān Irooj, juon jemjerā in ukōtļo̧k ej ejaak. Jej kwaļo̧k m̧ool eo ad im iakwe n̄an E. Ad kajoorļo̧k im kajoor ej eddōkļo̧k ippān kajjojo kallim̧ur kar kōm̧m̧an im kōjparok.

Kejōkļo̧kjeņ im Kokwojarjar

N̄e jej ettā im bukwelōlōl ilo lokatok ko an Irooj, ej juon iien em̧m̧an n̄an kejekļo̧kjeņ, “bōbrae [kōj] kōn juwa in [būruōd], … [kōttāik kōj make] im̧aan Anij.” M̧oktak jān aō kar diwōjļo̧k ippān ro m̧ōttan āinwōt juon jodikdik, jinō ekōn emakijkij an ba, “Keememej wōn kwe, im kōjjeļāik eō n̄e kwoj tōkeak tok m̧win.” Jet bōn̄ ikar likjab in kōjjeļāik jinō kōnke ikar itakļo̧k m̧weo. Ij būrom̧ōji iien lotok ko aō raorōk ippān jinō.

Rainin ij reim̧aanļo̧k n̄an ekkejelļo̧k ippān Jemādwōj Ilan̄. Ilo jon̄ak eo aō aolep iien kōn kabun̄jar eo aō make ij bukwelōlō ilo jar, turin peet eo aō ak kar koba ippān baam̧le eo aō, ij lo aō make bukwelōlō ilo lokatok ko, kejekļo̧kjeņ kōn im etale mour eo aō. Ij ļōmņak kōn kwojkwoj eo, men̄e aolepān m̧ōttan ko an pilawe eo, kar ruje im ruje n̄an kōj, kajjo ej kakōļļe in ānbwinnin Rilo̧mo̧o̧r eo ad kar ruje. Ij keememej an Būreejtōn Dallin H. Oaks katakin bwe “kajjojo m̧ōttan pilawe eo ejej uwaan, ejja wōt kajjojo ro rej bōk m̧ōttan ejej uwaer.” N̄e ij bukwelōlōl ilo jar, ij ļōmņak kōn ekōjkan aō maron̄ leļo̧k n̄an Anij ankilaō.

Elder David A. Bednar ekar katakin bwe: “Kain̄i eo an kwojkwoj ej juon kūr eo ekwojarjar n̄an eo ej lukkuun ukweļo̧k ilo m̧ool n̄an kōkāāl mour in jetōb. Jerbal in bōk m̧ōttan kwojkwoj eo, ilo im jān e, ejjab karreoik kōj jān jerawiwi ko. Ak ilo ad lukkuun kōppopo im bōk kunaad ilo kain̄i in ekwojarjar kōn bōro erup im juon jetōb ettā, innām kallim̧ur in ej bwe jen maron̄ iien otemjej bōk iood Jetōb eo an Irooj. Im jen kokwojarjar in kajoor eo an Jetōb Kwojarjar ilo ad jem̧jerāik, jemaron̄ iien otemjej bōk joeorļo̧k in jero̧wiwi ko ad.”

Ke Amy im n̄a kar kanooj keememej en̄jake ko ilo mour ko am, kōmij kam̧m̧oolol kōn menin letok an iakwe eweppān im katok eo an Jisōs Kraist. Kōmij bar lo ekōjkan an illu an hell kar rōļo̧k. Ekōjkan ad maron̄ anjo̧ ioon kalimjōk in kōraat, tarukelel, jab m̧ōņōņō, kāānjer, tōn̄al, bully ilo online, ko̧o̧ti m̧weiūm̧, ejako am̧ bōro̧ro, mej nejūm ajri, būratōr, im jemam̧? Kōnke Jisōs ekar bōk kab eo emeo̧, kab in illu—kōn n̄a, kōn baam̧le eo aō, kōn kōj wōj aolep!

“Kab eo emeo̧” E ekar idaak ilo Jikin Kallib Gethsemane im An en̄taan “kar ļapļo̧k” ioon debwāāl ilo Calvary kōtļo̧k bwe jen ajiļo̧k en̄jake ko reppn, lāj, jorrāān, kūtōtōr, im wūdiddi eo ioon lokatok ko an Irooj im “kokwōjarjar jān bōke Jetōb Kwōjarjar,” iien otemjej.

Sister Patricia Holland ekar ba, “Jar eo em̧wilaļ tata kōn kwe im n̄a rainin ej bwe jenaaj kōmaatļo̧k, ajeļo̧k kōj make ilo lokatok in kallim̧ur ko an Anij im aenōm̧m̧an jekdo̧o̧n jepād ia im jekdo̧o̧ņ ta eo jaar kōm̧m̧ane.”

Juon Jikin Kemour im Kakkije

N̄e jej itok n̄an lokatok eo, jejjab bōk juon jinekjej, jej katak kōn Riletok Menin Letok eo. Ilo katak jab in im bujen korak in ej itok kemour. Nipai ekar ba, “Eaar kobrak eō kōn iakwe eo An, em̧ool n̄an jako eo an ānbwinnū.” Im ad Rilo̧mo̧o̧r ekar kajjitōk, “Kom̧in jab ke kiiō ro̧o̧l tok n̄an Eō, im ukeļo̧k jān jero̧wiwi ko ami, im oktak, bwe In maron̄ kōmour kom̧?”

Ke leddik ro ruo nejim̧ rerūtto, Mackenzie im Emma, rekar dik, juon iaan bwebwenatoko rem̧m̧antata ippāer ekar The Chronicles of Narnia: The Lion, the Witch im the Wardrobe. Jej aolep lukkun iakwe ļaiōn eo, Aslan. Juon iaan joteen ko ban meļo̧kļo̧k riiti bok eo ekar ke ļain eo em̧m̧an ekar ajeļo̧k mour eo an kōn Edmund. Ban meļo̧kļo̧k kōnke m̧am̧a im baba im leddik ro nejier raar kōmejaaļaļ ke mour eo an ļaion kar bōke ņai ioon Stone Table eo jān Witch eo. Ban meļo̧kļo̧k kōnke kōjatdikdik jab jokod, jekdo̧o̧n kabūrom̧ōjm̧ōj eo, m̧ae an juon men aiboojoj kar waļo̧k. Ainikien lan̄lōn̄ eļļaaj ekar pan̄ijn̄ij ilo ruum̧ in kiki eo ke Aslan ekar jerkakpeje im ba, “N̄e Witch eo ekar jeļā m̧ool in meļeļe in katok, … liin en kar jeļā bwe n̄e juon eo em̧ōņōnō me ekar jab liaakeļo̧k emej ilo ijello̧kin rikinaakļo̧k eo, Stone Table eo en kar kōk, im me mej make en kar jino mijaļ.”

Jisōs Kraist ej kōmour aolep kinej ko. Jisōs Kraist ej kōm̧m̧an bwe en pidodo n̄an bar mour.

Ilo kōnono eo an ilo Oktoba 2022 kweilo̧k eo eļap, Būreejtōn Russell M. Nelson ekar kōmeļeļeik juon kumi in alooj ej itok ilo juon kōpeļļok tampeļ n̄an lale. Juon ļaddik ekar pād ijo. Būreejtōn Nelson ekar katakin:

“Ke kurup in rialooj ro rej deļo̧n̄e ruum̧ in bōk menin letok kwojarjar eo, ļaddik eo ekar jitōn̄ļo̧k lokatok eo, ijo armej ro rej būkwelōlō n̄an kōm̧m̧ani bujen ko ippān Anij, im ekar ba, ‘O, ej’ em̧m̧an. Ijin ej juon jikin an armej ro kakkije ilo iaļ eo aer ilo tampeļ.”

“… Ejjeļo̧k an jeļā kōn ekkejeļ eo ikōtaan kōm̧m̧ane juon bujen ippān Anij ilo tampeļ im kallim̧ur eo an Rilo̧mo̧o̧r.

“‘Kom̧win itok n̄an Ippa, kom̧ otemjej rej jerbal im ban, im Inaaj kakkijeik kom̧⁠.

“‘Kom̧win bōk Aō ine, im katak Ippa; … im kom̧ naaj lo ami kakkije.

“‘Bwe Aō ine ej em̧m̧an, im men eo Ij ineke e m̧ōrā’ [Matu 11:28–30, naan ko kar kobaiktok].”

“Nejin Armej ejjeļo̧k jikin An kababu bōran” mekarta E ekar kūr rikaļoor ro An, kwe im n̄an, n̄an tebōļ in kwojkwj eo n̄an kakkije Ippān ijo. N̄e “jetōb ko rettā rej bukwelōlōl ilo lokatok ko,” aenōm̧m̧an orļo̧k. Pein ad Rilo̧mo̧o̧r ej erļo̧k, An tebōļ ajeeded. Itok kabun̄-jar n̄an Nejin Anij ilo lokatok ko rekwojarjar An. Ilo etan Jisōs Kraist, amen.