Menin Letok Indeeo an Naan in Kam̧ool

E emeletlet bōtata im kajoor bōtata. Kōn Meram an Kraist im jerbal eo an Jetōb Kwojarjar, An kareel ej ilo jikin otemjej. Ej ilo lukkuun Piktokin n̄an kōjeraam̧m̧an kōj.

E ej lo iien ko etto, kiiō, im mejānkajjik indeeo eo ad. Ejjeļo̧k men maron̄ eņņojak jān E.

Kūr eo an Būreejtōn Russell M. Nelson n̄an “ļōmņak kōn selestial ej kōketak kōj n̄an ļoor visōn im piktok eo an Jemādwōj Ilan̄.”

Kōnke kōn bōnjān ko An rekwojarjar, Jemādwōj Ilan̄ ej letok n̄an kōj mennin letok otemjej em̧m̧an, kajjojo kōn kalimjōk indeeo eo An im visōn ilo ļōmņak.

Ej bar eddo eo n̄an bar kāālet.

Jisōs Kraist ekar kōļļāik wōņāān eo āliktata n̄an jim̧we jab in kōn Bōtōktōkin aorōk.

Jet iien jemaron̄ tōmak bwe anemkwoj in kāālet meļeļe in kōm̧m̧an jabdewōt men jekōņaan. Ak m̧ool eo ej bwe wōn̄āān eo ekar kōļļāikej meļeļe in anemkwoj in kāālet eo ej juon mennin letok kwojarjar.

Jej rijerbal ro, im rijerbal ro rej bōk eddo juon men. Ilo jekjek in, jej eddo kōn kāālet ko jej kōm̧m̧ani pedped ioon jeļā eo ewōr ippād im mennin letok ko kar litok n̄an kōj. Jemaron̄ jab kōm̧m̧ane juon kāālet ilo ad jab bōk in eddo nej kaje ko.

Etke ewōr ad anemkwoj in kāālet?

N̄an kāālet em̧m̧an.

N̄an kāālet Kraist.

N̄an kāālet mour indeeo—im bar kāālet mour indeeo.

Juon kam̧ool jān Jetōb Kwojarjar eo eļapļo̧k jān loe kōn mejād. E ej rikam̧ool bōtata eo an Jemān im Nejin. Būreejtōn Nelson ekar katakin, “Ilo raan ko rej itok, enaaj maron̄ pen n̄an bōk jipan̄ ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”

Ro jeiū im jatū, en̄in ej etke kōj kajjojo ej aikuji kajoor eo an Jetōb Kwojarjar ranin.

Juon naan in kam̧ool kōn Jetōb Kwojarjar eo emaron̄ itok ilo elōn̄ wāween ko. Āinwōt juon tōm̧a ilo juon ruum̧ emarok, emaron̄ ebbōl ilo an kabwilōn̄lōn̄ im idin̄. Emaron̄ itok āinwōt tak in aļ jidik kōn jidik ak jān iien n̄an iien. Emaron̄ itok āinwōt juran meram ko, iien n̄an iien jedmatmat n̄an jeļāļo̧kjeņ eo erreo. Jekdo̧o̧n ta wāween eo, ta eo aorōk ej bwe ej itok kōn Jetōb Kwojarjar.

Ikar rūttoļo̧k ilo Jamaica, ekar limo im aiboojoj. Ijo ke, ke ikar jino high school, ro m̧ōtta me raar jab meļeļe kāālet eo aō n̄an erom juon membōr in Kabun̄ eo an Jisōs Kraist. “Ekōjkan am̧ maron̄ kobaļo̧k ilo kabun̄ jab in?,” rekōn kajjitōk. “Ekōjkan am̧ maron̄ tōmak bwebwenato jab eo?”—kōnono kōn Visōn eo M̧oktata. “Ekōjkan am̧ maron̄ riiti bok jab eo?”—kōnono kōn Bok in Mormon. “Kwoj ke lukkuun tōmak aolep menin?” Im “Etke kwoj joļo̧k waan mour eo am̧?”

Ekar kōmmetak, eļap tata n̄e ekar itok jān armej ro ikar kea kaki.

Ak ta eo raar jab jeļā ekar en̄in: Ekar wōr juon aō en̄jake ippān Jetōb Kwojarjar Ilo an naan in kam̧ool jab eo kar kobrak būruō, ekar kōmeraikļok metak eo an raan ko, im “n̄an juon iien ekadu, kalimjōk [waļo̧k] an lan̄ ekar pād im̧aan meja.”

Bōlen em̧ōj kar kajjitōk ippam̧ jet iaan kajjitōk kein ippān ko jet. Bōlen jekdo̧o̧n kiiō em̧ōj kajjitōk elōn̄ kajjitōk ko reppan āinwōt kar n̄a.

Mennin letok im kam̧ool eo an Jetōb Kwojarjar rej pād n̄an aolep.

Jamaica n̄an n̄an ej āinwōt Palmyra n̄an kar Josep Smith. Ej aō Bukwin Wōjke Kwojarjar. Ijjab lukkuun jeļā ia eo Josep ekar bukwelōlō im jar ie ilo Bukwon Wōjke eo Ekwojarjar, ak ij lukkuun jeļā ia eo Bukwon Wōjke eo aō ekar erom̧ juon men elukkuun m̧ool. Ekar waļo̧k ilo Grove Road, Mandeville, Jamaica, ilo em̧ jidikdik eo aō, ilo 6:00 jibbon̄ ilo juon Wōnje jilu iiō ālkin aō kar peptaij. En̄jake kwojarjar in ekar waļo̧k kōnke ruo wiik ko m̧oktaļo̧k juon sister mijenede eim̧we ekar kajjitōk ippa n̄an riiti Bok in Mormon. Sister Audrey Krauss ej pād ilo kweilo̧k in rainin ippān baam̧le eo an, im ij iakwe e n̄an indeeo.

En̄jake in eaar ukōt eō.

Ro jeiū im jatū, juon naan in kam̧ool ejjab letok n̄an kōjerbale jidik wōt iien. Menin letok eo jān Jemedwōj Ilan̄ eo ej iakwe ej kōņ mour indeeo kōnke ej riletok mour. Juon naan in kam̧ool ejjab aikuj wōr juon iien emaat kitien. Ej aikuj jab m̧ōjņo̧ļo̧k ak makunļo̧k kōnke juon men ilo mour eo aō ekar oktak ak juon men ilo laļ in ekar oktak. Ej aikuj kajoorļo̧k kōnke, āinwōt rikarejeran eo ekapāāl ilo būrabōļ kōn tōļan ko, naan in kamo̧o̧l eo aō make ej juon mennin letok aikuj orļo̧k—en jab kalbwin.

Reilikļo̧k n̄an raan in idajon̄jon̄ ko reppen im kōjdāt me iaar iiooni āinwōt juon ajri ekar jipan̄ eō bōk jikin ijo ij kiiō jeļā kōn eō make. Ijjab wōt tōmak, kōjatdikdik, ak lōke, men̄e men kein rej aorōk an m̧ōttan ko an tōmak ilo iaļ eo n̄an juon kam̧ool em̧ool. Ij nebar kom̧ kōn ami kōm̧m̧ane iaļ eo ami make kōn kajjitōk kajjitōk ko, ekkatak, jar, jitlo̧k im kejekļo̧kjeņ. Jouj jab bōjrak. Ewōr tokjān aolep kijejeto n̄an pukot iaļ in n̄an naan in kam̧ool. Wōn ak ta eo kwonaaj kōtļo̧k bwe en bōke? “Ta kam̧ool eļapļo̧k kwo maron̄ bōke jān Anij?”

Aolep ļaddik ak leddik nejin Anij maron̄ bōk juon jeļā em̧ool em̧wilaļļo̧k, edimļo̧k, im em̧ooļo̧k kōn er make. Āinwōt Josep Smith, eo ekar ba naan in kam̧ool eo an jekdo̧o̧n jum̧ae, jemaron̄ ba, “ikar jeļā, im iaar jeļā bwe Anij ekar jeļā, im iban kar maron̄ kariab e, im jab maron̄ kajjion̄ in kōm̧m̧ane.”

Ro jeiū im jatū jitōnbōo, kōtļo̧k bwe ine eo edik an naan in kam̧ool en jerbal ilo kwe m̧ae iien ej kajoorļo̧k n̄an juon jeļā edim im aiboojoj n̄an indeeo

N̄an kōj ro me raar peptaij im kapen membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata ak rej kakkōt wōt kōn, “Ijjab jeļā eļan̄n̄e ijeļā,” jouj keememej kallim̧ur in: “bwe Jetōb eo An en maron̄ pād ippāer iien otemjej.” Kōnke kōn kallim̧ur in, kajjojo iaad emaron̄ pukot iaļ eo n̄an naan in kam̧ool im juon jeļā em̧ool.

Kiiō en̄in ej juon m̧ool eļap: Ilo jabdewōt wāween juon naan in kam̧ool ej lewaj—men̄e ej jidik kōn jidik āinwōt tak in al ak ej itok ilo juon visōn aiboojoj—ej aikuj wōt juon kāālet n̄an bōk mennin letok aiboojoj in.

Ba “Ij kāālet n̄an tōmak” ej kōm̧m̧an an pidodoļo̧k bōk juon kam̧ool jān Anij. Eļan̄n̄e jej lo an m̧ōjņoļo̧k naan in kam̧ool eo ad, keememej bwe ej kāālet ko jej kōm̧m̧ani me rej kadikļo̧k kajoor eo an naan in kam̧ool eo. Bōtaab naan in kam̧ool eo ejjan̄in etal n̄an juon jikin. Jej aikuj n̄an kāālet n̄an bar koba ippān.

Kāālet n̄an tōmak ej menin māletlet im wāween eo ekajoor n̄an kōjerbal anemkwoj in kāālet eo ad.

Ijjab maron̄ lo juon wāween em̧m̧anļo̧k n̄an kōjerbal aenmkwoj in kāālet eo aō ilo baare naan in kam̧ool eo aō.

Būreejtōn Nelson ekar katakin: “Ij akweļap ippāmi n̄an bōk eddo in naan in kam̧ool eo ami. Jerbal n̄an e. Bōke bwe en wōjam̧. Kōjparoke. Kajiririki bwe en eddōkļo̧k. Naajdik kōn m̧ool.”

N̄an n̄a, naan eo bōk eddo, jerbal, kea, make, kōkaajriri, im naajdik rej āinwōt ribōk jenkwan eo ej leļo̧k eddo in juon men eo eaorōk im eaiboojoj.

Ilo tōre ko m̧oktata an Kabun̄ in, Parley P. Pratt ekar en̄jake illu ippān Rikanaan Josep Smith im kar kāālet n̄an kōraate e im Kabun̄ in. Ke John Taylor, eo Parley ekar katakin gospel eo ekar itok n̄an bukwōn eo, Parley ekar bōke ippānļo̧k im kakkōle n̄an jab ļoor Josep. John Taylor ekar ba n̄an Parley:

“Mokta jān am̧ ilo̧k jān Canada, kwaar kwaļo̧k juon naan in kam̧ool epen n̄an Josep Smith kōn an juon rikanaan an Anij, … im kwar ba kwar jeļā men kein kōn revelesōn im mennin letok an Jetōb Kwojarjar.

“… Ewōr ippa kiiō ejja naan in kam̧ool eo wōt me kwaar lan̄lōn̄ kake tōre eo. Eļan̄n̄e jerbal eo ekar m̧ool jiljino allōn̄ remootļo̧k, ej m̧ool rainin. Eļan̄n̄e Josep Smith ekar juon rikanaan tōre eo, e ej kiiō juon rikanaan.”

Ij kam̧ool bwe Josep Smith ekar juon rikanaan an Anij im bwe mālim in rikanaan ekar bōke ej wōnm̧aanļo̧k wōt ilo tōre in. Jisōs Kraist ej tōl jerbal in.

Ij kūr kom̧ n̄an ļōmņak kōn iaļ eo am̧ n̄an juon naan in kam̧ool em̧ool kōn Jisōs Kraist im gospel eo An. Bōk eddo in naan in kam̧ool eo am̧, kōjerbal anemkwoj in kāālet ilo lo̧ļe im kile riletok eo im aolep bōnjān aiboojoj ko An. Ij kwaļo̧k kam̧ool eo bwe kajoor eo ej lilo kwe. Ejjeļo̧k juon emaron̄ kāālet n̄an kwe. Ejjeļo̧k juon emaron̄ bōkļo̧k mennin leļo̧k in. Kwomaron̄ kāālet n̄an tōmak

Ij kallim̧ur bwe ilo am̧ kōm̧m̧ane menin, am̧ kam̧ool im naan in kam̧ool enaaj erom juon “dān in mour, ej jebarļo̧k n̄an mour ejjeļo̧k jem̧ļo̧kin.” Enaaj juon emjak im juon rūkōketak, im enaaj rejtak eok ilo iien ko reppen. Enaaj kōmaron̄ eok n̄an ejaake mennin letok in jetōb ko Enaaj jipan̄ eok ilo iien jerbal in karejar eo am̧ make im jerbal. Enaaj juon kein tariņae ņae Setan im rijum̧ae ro am̧ Am̧ naan in kam̧ool enaaj bōk waj lan̄lōn̄ ilo am̧ loe an waļo̧k ilo ajri ro nejūm̧. Enaaj kajoor n̄e kwoj kwaļo̧ke im kōjerbale n̄an kam̧ool.

Eļan̄n̄e kwojeļā ewōr am̧ naaj in kam̧ool, kwojeļā. Ijeļā bwe ijeļā. Jaikuj elōn̄ļo̧k rikam̧ool ro kōn Jisōs Kraist im gospel eo An gospel. Ejaak juon naan in kam̧ool ekajoor! Pukote! Libjerjere! En̄in ej tōre in bōk eddo eo āliktata—tōre in bōk eddo eo an tarlep in iien ko.

Jisōs Kraist ekar kwaļo̧k m̧ool in: “Lan̄ im laļ renaaj jako, a naan ko Aō re jāmin jako.”

Ro jeiū im jatū, juon naan in kam̧ool kōn Jisōs Kraist ekar jab meļeļe in n̄an erom juon mennin letok an jidik wōt iien. Ejjeļo̧k men bajjōk—jaab mennin letok eo make, jaab ribōktok mennin letok eo, jaab kōn wōn eo mennin letok ej kake. Am̧ naan in kam̧ool en maron̄ kwaļo̧ke ilo ejja jekjek in wōt. Men̄e “lan̄ im laļ renaaj jako” am̧ naan in kam̧ool im kam̧ool kōn gospel eo an Jisōs Kraist en jab jako. Kiiō ej iien n̄an dāpij menin letok eo em̧m̧an. Ilo etan Jisōs Kraist, amen.