Irooj ej Kalimjōk Bōro
Aolep aikuj ko an Anij ej n̄an kōttōbrak jibadbad ko An im n̄an jipan̄ kōj erom̧ ro E ekōņaan bwe jen erom̧ ej n̄an ad kajjojo ukōtļo̧k aolepān būruwōd n̄an E.
Ke ekar kakien er n̄an kāālete kiin̄ in Israel eo ekāāl jān ilubwilijin ļaddik ro nejin Jesse, rikanaan Samuel, ilo an kalimjek ļaddik eo erūtto tata nejin Jesse, Eliab, ekar ļam̧ōj kōn m̧ōņōņō, “E ṃool eo Jeova enaaj kapit e ej iṃaō.” Ak Eliab ekar jab rijerbal eo Irooj ekar kāālete. Rilo̧mo̧o̧r ekar kakkōl Samuel: “Kwōn jab lale turun mejān ak aetokan, bwe Iar joḷọk e; bwe Jeova e jab lo āinwōt armej ej lo; bwe armej ej lale ālikin armej, a Jeova ej lale būruon.”
Men̄e Devid emaron̄ jab kar kajoor ilo ānbwin ak ekar kapāāl tata iaan ļaddik ro jein, būruwōn ekar kajoor ilo mejān Anij. Ekar iakwe Anij kōn aolepān būruwōn im kar wōr juon an ikdeleel em̧wilaļ n̄an pokake E. Ejjeļo̧k pere ilo tōmak kōn iakwe eo an Irooj, kajoor, im kōjeraam̧m̧an ko kallim̧ur kaki, āinwōt tokālik ekar kōmeļeļeiki ke ekar ejjeļo̧k an mijak in ire im kaluuji Golaiat kōn jipan̄ eo an Irooj.
Bwebwenato in ej katakin kōj bwe aolepān men eo Irooj ej aikuji n̄an kōttōbrak jibadbad ko an im n̄an jipan̄ kōj erom̧ ro E ekōņaan bwe jen erom̧ ej n̄an ad kajjojo ukōtļo̧k aolepān būruwōd n̄an E. N̄an rikien eo, Ekar kean̄, “Kwōn yokwe Irooj aṃ Anij kōn aolepen būruoṃ im kōn aolepen aṃ.” N̄an Rikanaan Josep Smith, Ekar ba, “Lo, Irooj ej aikuj bōro eo im ļōmņak eo em̧ōņōņō.” Im n̄an RiNipai ro, jerkakpeje Rilo̧mo̧o̧r ekar leļo̧k naan in karuwainene in: “kom̧ naaj ajetok āinwōt juon katok n̄an Eō bōro e rup im jetōb ettā.”
Etke menin eaikuj āindein? Rilo̧mo̧o̧r ekar katakin bwe eļan̄n̄e būruwōd rej lukkuun oktakļo̧k n̄an E, kōn wōt katok in pinmuur eo An jemaron̄ jeraam̧m̧an kōn kajoor im mennin letok eo an jetōb jej aikuji n̄an anjo̧ jān apan̄ ko an kanniōk, kattoļo̧k kapo, bōk tōl im meļeļe, im en̄jake lan̄lōn̄ im aenōm̧m̧an ilo mour ko ad. “Im jān men ko reddik ej jebarļo̧k men eo eļap.” Ekar ba Emaron̄ “kōm̧m̧an mennin m̧ōjņo̧ ko ren erom kajoor” im kōjeraam̧m̧an kōj kōn men otemjej jej aikuji n̄an tōprak ilo mour in kanniōk in im n̄an bōk mour in indeeo. “E m̧ōņōņō ro erreo būrueir,” Ekar ba, “bwe re naaj lo Anij.”
Ij tōmak en̄in ej unin, kōn wāween in, Jisōs Kraist emakijkij an kajim̧we skraib im Parisi ro ilo iien kwaļo̧k eo An ilo mour in. Ijoke niknik ilo kōjparok kien eo An, rekar kōm̧m̧ane kōn un ko rebōd. Ekar kajim̧we er, eba, “Armej rein rej kabun̄ n̄an Eō kōn tieir, a būrueir ettoḷọk jān Eō.”
En̄in ej juon kakeememej n̄an aolep rikaļoor ro An bwe ejjab baj kōn ta eo jej kōm̧m̧ane—naan ko ad im kōm̧m̧an ko—ak barāinwōt etke jej kōm̧m̧ane ta eo Jisōs Kraist ekar kajjitōk ippād n̄an kōm̧m̧ane—ikdeelel ko ad im kōttōpar ko. Ekar ba, “N̄a, Irooj, I naaj ekajet aolep armej raņ ekkar n̄an jerbal ko aer, ekkar n̄an ikdeelel ko an burueer.” Jemedwōj Ilan̄ ekōņaan eļapļo̧k jān baj m̧akūtkūt in pokake ko im jerbal in jipan̄ ko jān ajri ro Nejin. Ekōņaan bwe jen kōm̧m̧ane men kein kōn lukkuun bōro kōnke jej iakwe E kōn aolepān būruwōd. Ekōņaan bwe jen kōņaan erom̧ āinwōt E.
Kiiō, eļan̄n̄e ājmour in jetōb eo an bōro ko ad ej lukkuun juon mennin inepata an Rilo̧mo̧o̧r—ta eo ej pukōte ilo juon rikaļoor em̧ool—ewi wāween jemaron̄ in etale būruwōd im jeļā eļan̄n̄e ej jim̧we ilo mejān Anij?
Ejjab etto, ke kōrā eo pāleeō im n̄a kar ro̧o̧l jān mijen eo am ilo Portugal, kōm̧ ar kōm̧m̧ane jejjo kakkōlkōl in ājmour n̄an etale ājmour eo an ānbwinnūm̧. Jet iaan kakōlkōl ko rekar pedped wōt ioon ājmour eo an menono eo ad—āinwōt kakkōlkol in bōtōktōk ko, echocardiograms, im kakkōlkōl kōn aer in kōmālij. Ij tōmak bwe Rilo̧mo̧o̧r ekar barāinwōt letok n̄an kōj juon kakōlkōl ilo jetōb jemaron̄ kōjerbale n̄an etale būruwōd im ājmour in jetōb eo ad. In kwaļo̧k jet iaer n̄an kom̧.
Etale Menono eo Am̧ kōn Kein ko Kakōlkōl ko an Jetōb
Juon, Jibadbad ko Ad, Kāālet ko raorōk, im Jibadbad ko
“Bwe ijo am̧ mennin aorōk ej pād, ijo buruōm̧ enaaj pād ie barāinwōt,” Jisōs ekar katakin. Juon mennin aorōk ej juon men eo eaiboojoj n̄an kōj, juon men eo jej joļo̧k kijejeto ko ad im leļo̧k ad n̄ane. Ia eo jej kāālet n̄an joļo̧k iien ko ad ie im mijōk wōt men ko jej m̧ōdjaki, barāinwōt ta eo ej kalimotak kōj n̄an kōm̧m̧ane, ba eļap kōn būruwōd. Rilo̧mo̧o̧r ekar kakkōl bwe elōn̄ ro kar kūr jān E, iiet ro kāālet er “Kōnke burueer rej kanooj likūti ioon men ko an laļ in, im jibadek utiej ko an armej raņ.” Ij ke kōm̧m̧an bwe Rilo̧mo̧o̧r en juon kāālet eaorōk ilo mour eo aō? Mej ko meja rej ke reilo̧k wōt n̄an aiboojoj eo An ilo aolep men ko ij kōm̧m̧ani?
Kein karuo, Mōņōņō in Pokake Kien ko an Anij
Ilo aolepān jeje ko rekwojarjar, Irooj im rikanaan ro An rekar kobaik utiej bōro im jab pokake ippān juon bōro epen. Nipai ekar kōketak ļōm̧aro jein, ba: “Lo, iaar ba n̄an er: Ekōjkan ami jab kōjparok kien ko an Irooj? Ekōjkan ami naaj jako, kōn pen in būruōmi?” N̄an Armej ro Rekwojarjar ilo Missouri, Irooj ar kakkōl, “Ak eo ej jab kōm̧m̧an jabdewōt m̧ae jiron̄ e, im bōk juon kien kōn būruōn pere, im kōjparok e kōn jerwaan, ejja in wōt em̧ōj an jako.” Ilo an Rilo̧mo̧o̧r jab kōtmāne ad wānōk ilo kōjparok kien ko An, Ej kajjitōk bwe jen ikdeleel im kijejeto n̄an kōjparoki kōn aolepān būruwōd.
Jilu, Tiljek eo Ad ilo Ekkatak Jeje ko Rekwojarjar im Kappukot Revelesōn
Irooj ekar kōketak Oliver Cowdery n̄an “ko̧koņi naan kein ilo būruōm̧.” Em̧ōj karuwaineneik kōj n̄an kappukot jeje ko rekwojarjar ilo tiljek, im, jān kajoor eo an Jetōb Kwojarjar, kappukot n̄an bōk meļeļe im juon kam̧ool kōn m̧ool eo an gospel ilo būruwōd.
Rikanaan Abinadai ekar kajook pris ro renana an Kiin̄ Noa kōn aer jab kōm̧m̧ane menin, ba, “Kom̧ ar jab ajeļo̧k būruōmi n̄an meļeļe; kōn menin, kom̧ ar jab mālōtlōt.” Ij ke kōm̧m̧ane juon kijejeto em̧ool n̄an katak jeje ko rekwojarjar aolep iien im likūt ilo būruwō n̄an meļeļe kōn jar?
Emān, Ļōmņak ko Ad im Naan ko Ad
Rilo̧mo̧o̧r ekar katakin “Bwe ḷōmṇak ko re nana, rej itok jān bōro” Bwe kōn bōro e obrak ej kōnono i lọn̄iin.” Aorōk eo an ļōmņak ko ad im naan ko ej juon kakōļļe em̧m̧an in erreo eo an būruwōd. Ij ke kaajririki elōn̄ ļōmņak ko renana kōn m̧akūtkūt ko an ro jet ak kōņaan ko, ak aaet kōn n̄a make? Em̧ōkaj ke aō ekajet im liaakeļo̧k ro jet? Ij ke kappukot n̄an lo jekpen ko ak bōbrae kōn bōd ko aō? Im ta kōn naan ko aō? Rej ke kotak im im̧we ro otemjej ipeļaakū? Ak emakijkij ke aer kōm̧m̧an poktak im elotaan?
Ālkin an kakkōlkōl in ānbwin eo aō kar dedeļo̧k, taktō eo aō ekar jiron̄ eō bwe, ilo mool, menono eo aō ekar ājmour—ak ekar wōr jejjo n̄ūrbōktak ko me aikuj in kōnono kake kiiō, m̧okta jān aer erom̧ men ko reļļap. Innām ekar kwaļo̧k tok jet wāween mour ko rej aikuj oktak. Barāinwōt, ilo am̧ kōm̧m̧ane ekkatak in ilo jetōb an būruwōm̧ im kile jet kakōlkōl ko renana rej jino aer waļo̧k, jouj jab ko̧r! Rilo̧mo̧o̧r ekar kōpooje uno eo em̧m̧antata ilo jetōb im kōm̧adm̧ōd eo n̄an jipan̄ eok. Aaet ekar kallim̧ur n̄an lewaj juon bōro ekāāl! Erkein jet iaan m̧akūtkūt ko remaron̄ in kōkōm̧anm̧anļo̧k kajoor in jetōb eo an būruwōm̧.
Kōkōm̧anm̧an Ājmour in Jetōb eo an Būruwōm̧
Juon, Kōkajoorļo̧k Jem̧jerā eo am̧ ippān Kraist
Ilo ad aje ļo̧k aolep iien n̄an itok epaakeļo̧k Kraist, būruwōd rej oktak. Katak jān jeje ko rekwojarjar aolep raan, kobaļo̧k kōn jar eo em̧ool im jitlo̧k aolep iien, naaj kōļapļo̧k iakwe eo am̧ n̄an Rilo̧mo̧o̧r im kōkajoorļo̧k tōmak eo am̧ im ikdeleel eo n̄an ukweļo̧k im ettā leļo̧k būruōm̧ n̄an Anij. Lōm̧ņak kōn waanjon̄ak in jān Nipai: “Kōn menin Iaar kūr n̄an Irooj; im lo Eaar lotok eō; im Eaar kōm̧m̧an bwe buruō en bārōk bwe in maron̄ tōmak naan ko jema eaar kōnono.”
Ilo ad wōnm̧aanļo̧k wōt im naajdik ine in tōmak eo jān ikdeleel ko rejim̧we im m̧akūtkūt ko, jenaaj en̄jake ejja ko̧kwojarjar in būruwōd āinwōt RiNipai ro: “Raar jitlo̧k im jar emmakijkij, im eaar kanooj kajoorļo̧k im kajoorļo̧k ilo aer ettā, im penļo̧k im penļo̧k ilo lōke Kraist, n̄an obrak in burueer kōn m̧ōņōņō im ineem̧m̧an, aaet, em̧ool n̄an karreoik im kokwōjarjare būruweer, kokwōjarjare eo ej itok kōnke aer kōtļo̧k burueer n̄an Anij.”
Kein karuo, Kajim̧we Ankilaam̧ ippān Ankilaan
Rilo̧mo̧o̧r ekar katakin, “Eļan̄n̄e kom̧ij iakwe eō, kōjparok kien ko aō.” Ej karuwaineneik kōj n̄an kwaļo̧k iakwe eo ad ilo ad kōm̧m̧an im kōjparok bujen ko Ippān. Ilo ad kajjieon̄ aolep iien n̄an kōjparok kien ko An, m̧ool in ukweļo̧k jān jerawiwi ko ad, im niknik ilo bōk Etan iood im kajim̧weik ankilaad, ippān Ankilaan, jenaaj maron̄ jeraam̧m̧an kōn jem̧jerā eo an Jetōb Kwojarjar.
Nipai ekar kam̧ool: “ijeļā bwe n̄e kom̧ naaj ļoor Nejin, kōn aolepān m̧wilaļ in buruō, kōn ejjeļo̧k etao im ejjeļo̧k m̧oņ im̧aan Anij, ak kōn bōro em̧ool, ukeļo̧k jān jero̧wiwi ko ami, im kam̧ool n̄an Jemān bwe kom̧ij m̧ōņōņō in bok ioomi etan Kraist, kōn peptaij … , innām kom̧ naaj bōk Jetōb Kwōjarjar.” Jetōb Kwojarjar eo enaaj tōl eo im jipan̄ eok jeļā Ankilaan Irooj im kōm̧m̧ani kāālet ko rem̧m̧an.
Āliktata, Jerbal n̄an Anij im Ro Jet kōn Aolepān Būruōm̧
Rilo̧mo̧o̧r ej karuwaineneik aolep n̄an “jerbal n̄an E kōn aolepān būruwōm̧.” N̄e jej kāālet n̄an kōm̧m̧ani men ko Irooj ej kajjitōk ippād n̄an kōm̧m̧ane—āinwōt kōjparoke kien ko, bōk m̧ōttan kwojkwoj eo, kabun̄jar ilo tampeļ eo, im jerbal n̄an ro jet—kōn juon bōro em̧ool im lukkuun in jibadbad, kajjojo jerbal in jipan̄ im kabun̄jar renaaj erom̧ juon en̄jake in jetōb ekajoor me enaaj kōkajoorļo̧k tōmak eo ad im naan in kam̧ool ko im kobrak būruwōd kōn lan̄lōn̄ im iakwe n̄an Anij im ro m̧ōttad.
Kajitōk eo an rikanaan Alma me ej pād wōt irainin: “Kom̧ nan̄in ke ilo jetōb kar ļotak jān Anij? Kom̧ ar bōk ke nememen ilo paotok ko ami? Kom̧ ar bōk ke oktak in ekajoor ilo būruōmi?”
Ro jeiū im jatū, ij karuwaineneik kom̧ n̄an leļo̧k aolepān būruwōm̧i n̄an Rilo̧mo̧o̧r rainin Kōm̧m̧an bwe kajjojo jerbal in kabun̄jar im jerbal in jipan̄ rej erom̧ m̧ool im ilo kōņaan. Kōjenolo̧k mennin m̧ad ko an laļ in im kajjieon̄ bōk juon iien ewōr tokjān n̄an Irooj aolep raan in mour ko am̧i. Ukweļo̧k im ro̧o̧ltok n̄an E kōn aolepān būruwōm̧, im Enaaj jeorļo̧k am̧ bōd im kabooļ eok kōn pein iakwe eo An. Jab kappukōt men ko an laļ in, ak kāālet n̄an kōm̧m̧an bwe mejām̧ en mejōkļo̧k wōt aiboojoj eo An im kappukot men ko rem̧m̧anļo̧k. E ejeļā ļōmņak ko am̧ im ikdeleel ko an būruwōm̧, im ilo am̧ itok n̄an Ippān, Enaaj kōjeraam̧m̧an eok kōn kajoor, lōke, aenōm̧m̧an, im lan̄lōn̄ ilo mour in im juon jikin ilo laļ an celestial n̄an indeeo im indeeo.
Ijeļā bwe Jisōs Kraist ej mour. E ej ad Ripinmuur. Im Ej iakwe eok im n̄a kōn aolepān Būruwōn. Ilo etan Jisōs Kraist, amen.