Nuuj eo Em̧m̧an ilo Gospel in

Eļan̄n̄e em̧ōj am̧ kar loe ļo̧k kapijuknen eo aō state eo an Louisiana, bōlen kwojeļā kōn elōn̄ m̧ōn̄ā ko kijōm̧ renno̧—gumbo, jambalaya, étouffée, im laajrak in enej etal wōt.

Jān iien n̄an iien, ij loe n̄a make en̄jake aō peran n̄an kōm̧ate juon iaan iiōk in m̧ōn̄ā kein renno̧. Juon bun̄tōn ejjab pād ilo kōmeļeļe eo ālkin am̧ iiōki aolep kāāre ko im ļoore kōmeļeļe ko em̧ōj dibidiki ej n̄an kōm̧m̧ane teej in nōm̧ak eo āliktata im lale eļan̄n̄e elōn̄ men eņ ejako. Ilo iien ņe, imaron̄ ron̄ ainikien an Creole rikōm̧at eo ebun̄bun̄ unoojdikdik ilo lo̧jiln̄ū, “Kwon bar likut eļapļo̧k Tony n̄ane.” Tony ej juon kein Kāāre kōm̧m̧an in Opelousas, Louisiana, bukwōn eo aō. Emakijkij kōjerbale āinwōt juon “iiōk ejenolo̧k” ejjan̄in wōr ejeļā kake n̄an kōjerbale n̄an wāween ko rekar jab jejjet kar kōm̧m̧ani ālkin ļoore iiōk eo.

Kōrā eo pāleeō, Michelle, im n̄a rej kam̧m̧oolol n̄an maron̄ jerbal āinwōt ritōl ro an mijen ilo Louisiana. Ewōr juon am̧ro imminene in katakin mijenede ro wāween kōm̧ate iiōk in jambalaya eo an ejenolo̧k ilo bōn̄ eo aer āliktata ilo opiij eo an aolep mijenede m̧okta jān aer kar jepļaak n̄an baam̧le ko aer. Ilo kakkobaba n̄an naan in kam̧m̧ool ko aer kōn gospel eo em̧ōj an jepļaaktok an Jisōs Kraist, mijenede ro am̧ rekar em̧m̧akūt jān mijen eo kōn juon kam̧m̧oolol kōn iiōk kein.

Jejjo allōn̄ rej m̧ootļo̧k, ikar bajjōk alooje Church Media Library eo im loe juon liin̄ n̄an elōn̄ pija ko em̧ōj kobaiki ņae etan Restoration Conversations with President Russell M. Nelson. Taitōl in juon iaan pija ko rekadu ilo laajrak eo ekar tōt meja ie im kar kōm̧m̧an aō ettōn̄ dikdik. Etan ej “Jeje ko Rekwojarjar Rej Iiōk in Mōn̄ā ko an Anij n̄an Mour eo Elem̧ōņōņō.” Ekar m̧ōkaj aō jibede ioon pija eo ruo minit in im kar alooje an Būreejtōn Nelson katakin juon kurub in ajri in Būraimere ro juon ennaan eļam waan im kajoor kōn ewi wāween ad maron̄ m̧ōņōņō. Ekar katakin: “eļan̄n̄e kwoj iiōke juon cake, kwoj ļoore kōmeļeļe ko, kwoj ke? Im kwonaaj bōk tōprak eo em̧m̧an aolep iien, koban ke?”

Ekar wōnm̧aanļo̧k wōt, kōnono kōn an ejjab etto oktak n̄an 95 iiō rūtto in: “Armej rej ba, ‘Ta eo kwoj kan̄n̄e? Ta ņe eaorōk kwojjab kwaļo̧ke?’” Ekar uwaak, “Men eo ettiņo̧ ņae etan jeje ko rekwojarjar. Komaron̄ riiti im kajjieon̄i.”

Ekwe, en̄ņe epād ippād. Men eo ettiņņo̧ eļam waan n̄an mour lem̧ōņōņō ej baj ļoore iiōk in m̧ōn̄ā eo an Anij āinwōt em̧ōj tibidiki ilo jeje ko rekwojarjar. Ij ņae etan “Juon Kōmeļeļe kōn juon Mour Elem̧ōņōņō Maron̄ Loe ilo Gospel eo.”

Ta eo kwoj kōm̧m̧ane eļan̄n̄e ewōr juon men ej bōd am̧ kōm̧m̧ane ilo am̧ ļoore kōmeļeļe an iiōk in m̧ōn̄ā eo? Ekwe, kobaiktok ilo Juon Kōmeļeļe kōn juon Mour Elem̧ōņōņō ilo Gospel eo ej “kāāre eo ejenolo̧k” n̄an lukkuun lale bwe aolep iien ej jim̧we ilo jem̧ļo̧kin. Uwaak eo ej aolep iien Jisōs Kraist.

Ij ļōmņak kōj aolep elōn̄ ad iien ko n̄e jej en̄jake kāāre ko ad rejjab bwe, ak jej likjab in ļoore kōmeļeļe ko, ak bōlen jej kōm̧m̧ane juon men ejem̧ļo̧k kitien ak juon men ej waļo̧k me ejjeļo̧k ad maron̄ kōm̧m̧ane, im ko jet.

Ta uno eo? Elukkuun pidodo n̄an kobaiki eļapļo̧k kōn ta ko rej karuwaineneiki Jisōs Kraist ilo mour eo am̧.

Kōn menin, ta eo emaron̄ in āinļo̧k wōt n̄an kobaik eļapļo̧k Jisōs Kraist ilo mour eo am̧?

Tōre eo ikar jerbal āinwōt mijen būreejtōn, ekar wōr iien em̧m̧an n̄an kweilo̧k ippān kajjojo mijenede ro ad reddik aolep jiljino wiik ko. Ilo iien kweilo̧k eo juon ilo̧k juon, ekkā an waļo̧k n̄an mijenede ro n̄an aer kappukot tōl kōn ewi wāween aer kōkōm̧anm̧anļo̧k jem̧jerā eo kōtaan kōm̧pānion ro aer.

Ilo juon iien, juon mijende ekar itok n̄an intōrpiu eo an make im jijet. Imaron̄ kile juon men jān paaktokin an makūtkūt ke ewōr juon men ekar lukkuun eddo kake ilo kōļmenļo̧kjeņ eo an. Ikar kajjitōk, “Elder, ta eo kokōņaan kōnono kake rainin?” Ekar etal wōt im kōmeļeļeiki jet iaan apan̄ ko ekar jelm̧ai ippān kōm̧pānien eo an im ewi wāween an jelet aer maron̄ kōm̧m̧ane jerbal in mijenede eo. Kōn dān in kōmjaļaaļ ilo mejān, ekar kalimjōke eō im kar kajjitōk, “Būreejtōn, ta eo ij aikuj kōm̧m̧ane?”

Ilo kain jekjek eo, m̧ool ikar jab jeļā ewi wāween aō maron̄ uwaak. Ālkin jidik iien, ikar kajjitōk ippān EMMAN ke n̄e kōm̧ro bukwelōlō ippān doon ilo jar kōn tōl an Jetōb eo. Ekar errā, im kōm̧ro kar bukwelōlō ippān doon im jar kōn im̧we.

Ālkin jar eo, kōm̧ro kar wōnm̧aanļo̧k wōt im bukwelōlō ium̧win jidik iien innām jijet ilo jea ko am̧ro jelm̧ae doon. Ikar kajjitōk eļan̄n̄e kom̧ro maron̄ riiti juon eoon ippān doon. Ke kōm̧ro ej kōppeļļo̧ke jeje ko rekwojarjar am̧, ikar bōjrak im ba n̄an e, “Elder, ilo ad nej riiti eoon in, jouj im kajjitōk ippem̧ kajjitōk in, eļan̄n̄e inej mour kōn m̧wil kein, enaaj ke kōkōm̧anm̧anļo̧k jem̧jerā eo kōtaan kōm̧pānien eo aō im jerbal in mijenede eo am?”

Innām kōm̧ ar kōppeļļo̧ke Moronai 7:45 im kōlaaj ainikiem im riit: “Im iakwe-em̧ool ej meanwōd, im e jouj, im ej jab juunm̧aade, ej jab kappukot men ko an, ej jab illulu, ej jab ļōmņak nana, im jab lan̄lōn̄ ilo nana ak lan̄lōn̄ ilo m̧ool eo, ej kijenmej ilo men otemjej, ej tōmak ilo men otemjej, ej kōjatdikdik ilo men otemjej, ej niknik ilo men otemjej.”

Innām elder eo ekar retok n̄an n̄a kōn dān in kōm̧jaļaļaaļ ilo mejān im ba, “Aaet, Būreejtōn, ak menin epen n̄an kōm̧m̧ane.” Ikar errā im kakeememej e bwe e ej juon ļaddik nejin Anij ippān ewōr kōttōbar ko rekwojarjar ippān n̄an kōm̧m̧ane ippān doon ippān Irooj.

Innām kōm̧ ar jidik kōnono kōn būrabōļ eo an jepāpe in ijo jej pād ie eo kar katakin jān Elder Clark G. Gilbert jān Jiljilijuonn̄oul eo, eo ej kakeememej kōj bwe jej aikuj in jino ilo ijo jej pād ie im, ippān doon ippān Irooj, etal m̧aanļo̧k im lōn̄ļo̧k ilo juon iaļ em̧m̧an. Imaron̄ kar ba bwe ekar en̄jake wōt jidik in tarjān jon̄ak eo kōn bun̄tōn ko tok jet aikuj kōm̧m̧ani, kōn menin ikar kajjitōk ippān n̄an kōmeļeļe meļeļe eo an kōn eoon eo “jān men ko reddik im reļam waan men ko reļļap rej kūrm̧ool.” Ekar etal wōt im kōmeļeļeiki meļeļe eo bwe jān kōm̧m̧ani men ko reddik im reļam̧ waan, men ko reļļap remaron̄ waļo̧k. Ikar kajjitōk ippān n̄an bōk juon minit im kalikkar ruo men ko reddik im reļam̧ waan emaron̄ kōm̧m̧ani n̄an erom̧ jouj n̄an kōm̧pānien eo an.

Ālkin jidik iien, ekar kwaļo̧k ļōmņak ko an. Innām ikar kajjitōk ippān n̄an bōk juon minit im kalikkar ruo men ko reddik im reļam̧ waan emaron̄ kōm̧m̧ani n̄an erom̧ jouj n̄an kōm̧pānien eo an. Enan̄in m̧ōttan jidik ekar kwaļo̧k ļōmņak ko an ruo. Ekar alikkar bwe em̧ōj an kadede kejōkļo̧kjeņ kake menin m̧okta jān kweilo̧k eo am̧ro. Ikar karuwaineneiki n̄an bōk men ko ruo n̄an Anij ilo jar im n̄an kajjitōk kōn kapen, tōl, im im̧we kōn wāween an nej kōjerbale karōk eo an kōn lukkuun bōro em̧ool. Ekar errā. Ke kōm̧ ar kajōm̧ļo̧ke, ikar kajjitōk ippān n̄an letok jidik meļeļe kāāl ilo leta eo an kajjojo wiik.

Ilo an wiik ko jejjo tok eļļā, imaron̄ kar loe ilo leta ko an kajjojo wiik bwe men otemjej rej em̧m̧anļo̧k. Ejjab n̄a wōt ikar maron̄ loe em̧m̧anļo̧k eo ilo kajjojo leta aolep wiik, imaron̄ bar loe ilo leta ko kajjojo wiik an kōm̧pānien eo an. Ilo intōrpiu eo am tok juon, ikar loe juon bon̄ im raan eoktak ilo paatokin im jetōb. Ikar kajjitōk ippān, “Innām, Elder, ej ke m̧ool ke iakwe em̧ool ej jāmin jako?’” Ekar uwaak kōn juon mādikdik ekilep, “Aaet, jān men ko reddik im reļam waan men ko reļļap rej kūrm̧ool.”

Ilo am̧ ļoore Juon Kōmeļeļe kōn juon Mour Elem̧ōņōņō Maron̄ Loe ilo Gospel eo n̄an mour lem̧ōņōņō, keememej katak eo an Būreejtōn Nelson: “Jabdewōt kajjitōk ak inepata ko ippem̧, uwaak eo ej aolep iien loe ilo mour im katak ko an Jisōs Kraist. Katak eļapļo̧k kōn Pinmuur eo An, An iakwe, An tūriam̧ok kake, An katak, im An gospel n̄an kōmour im eddōkļo̧k me em̧ōj an kar jepļaaktok. Oktakļo̧k n̄an E! Ļoor E!”

N̄e kwoj aikuj in “ron̄jake E” im jeļā ewi wāween karuwaineneik Jisōs Kraist ilo mour eo am̧, ļōmņak in ļoore bun̄tōn ne ko Būreejtōn Nelson ekar katakin kōn kōn revelesōn eo ad make.

“Pukot juon jikin elūr ijo me komaron̄ in etal n̄ane aolep raan. Kōttāik eok make im̧aan Anij. Leļo̧k aolepān būruwōm̧ n̄an Jemedwōj Ilan̄. Oktakļo̧k n̄an E kōn uwaak ko im kōn aenōm̧m̧an.

“Jar ilo etan Jisōs Kraist kōn inepata ko am̧, mijak ko am̧, m̧ōjņo̧ ko am̧—aaet, aolepān kōņaan ko an būruwōm̧. Innām ron̄jake! Je ļōmņak ko me rej itok n̄an kōļmenļo̧kjeņ eo am̧. Rekooti en̄jake ko am̧ im wōnm̧aanļo̧k wōt kōn m̧akūtkūt ko me kwōj bōk im̧we n̄an kōm̧m̧ani. Ilo am̧ āliji jerbal ilo raan n̄an raan, allōn̄ n̄an allōn̄, iiō n̄an iiō, kwonaaj “eddōkļo̧k n̄an pedped in abja in revelesōn.”

Ij kamo̧o̧l bwe Jisos Kraist ej ad Rilo̧mo̧o̧r im Ripinmuur. E ekar “kōttōbrak aolep men ko jej aikuji n̄an ad maron̄ ro̧o̧lļo̧k n̄an [ippān] Jemādwōj Ilan̄.” Ilo etan Jisōs Kraist, amen.