Kean̄ eo an Baam̧le—Naan ko jān Anij

Kweilo̧k in eļap an Oktoba 2025 ej kakōļļeik 30 iiō in kōjeļļā eo kōn “”Baam̧le Eo: Juon Naan in Kean̄ n̄an Laļ in.” Kōn karōk kwojarjar, kean̄ in, kōn naan in kanaan ko ie, kar ejaake n̄an “kōjparok im kōkajoorļo̧k baam̧le eo āinwōt pedped in ekkal eo an juon jukjukun.”

Aolep rej uwaan juon baamle men̄e kwoj juon m̧am̧a, baba nejin kōrā, nejin m̧aan, jibūn ajri, jibūn im jim̧m̧an, nej jinen rikorāān, jein jatin m̧aan, kōrā, ak rilikin. Eo aorōk tata, kajjojo iaad, āinwōt an kean̄ eo ba jej “jetōb jitōnbōro likao im jiron̄ nejin jined im jemed ilan̄ … [kōn] mour kwōjarjar im jibadbad ippān.”

Ke kar kūr eō n̄an doulul in rijilōk eo ekwojarjar ilo 2015 eo, kar kapilōk eō, “Kean̄ in ej kiiō am̧. Etam̧ [jitōn̄ļo̧k naan ko ‘Doulul eo an Jon̄oulruo Rijilōk’ ilo taitōļ eo] epād ijo. En̄jake im katakin kake āinwōt n̄e am̧ make.”

Em̧m̧an ippa kean̄ eo an baam̧le. Em̧ōj aō kam̧ool kake peļaakin laļ in jān Africa n̄an Australia im ijo otemjej ikōtaer kōn jerbal eo an baam̧le ilo karōk indeeo eo an Anij. Kean̄ eo ijo ekar itok jāne ekwojarjar, kōn menin jej aikuj kōm̧m̧an n̄ane kōn naan in kautiej jān Anij.

Keememej, ro jeiū im jatū, āinwōt aō kar ba ilo kweilo̧k eo ļo̧k jān jikin kōnono in, “Naan ko raorōk.”

In kwaļo̧k jidik kadkad in kean̄ in āinwōt juon naan dilepān ta jej tōmak.

Ilo 1994 eo, juon iiō m̧okta jān kar kwaļo̧k kean̄ in, Doulul eo an Jon̄oulruo Rijilōk ro raar ekkōnono kōn an jukjuk in pād im kien ko ioļap kar kālikļo̧k jān kakien ko an Anij kōn baam̧le, m̧are, im kadkad in kōrā im em̧m̧aan. “‘Bōtaab ekar jab jem̧ļo̧kin ta jaar loe,” Būreejtōn Russell M. Nelson ekar kōmeļeļe tokālik. “Kōm maron̄ kar lo kijejeto ko an elōn̄ jukjuk in pād ko n̄an kōm̧m̧ane kōn aolep jon̄ak ko im jon̄an ko kōn m̧akūtkūt ko an m̧ōm̧ an kanniōk. Kōm kar lo tarpok eo an nememe ko. Kōm kar lo an aolep men waļo̧k.”

Jon̄oulruo ro raar jek ippāer n̄an kōpooj juon peba in kapene, juon kean̄, ej kwaļo̧k ilo tukadu in ijo Kabun̄ in ej jutak ie ikijeen baam̧le. Ilo iiō eo, Rijilōk rein, rilolo ro kūr jān Anij, raar kōpooj juon kean̄ kōn baam̧le. Būreejtōn Dallin H. Oaks ej keememej aer kar oktakļo̧k n̄an Irooj ilo jar n̄an “ta eo [rej] ba im wāween [aer] ba.” Raar lem̧aanļo̧k n̄an Būreejtōnji eo Kein Kajuon—Būreejtōn Howard W. Hunter, Būreejtōn Gordon B. Hinckley, im Būreejtōn Thomas S. Monson—n̄an aer ļōmņak kake.

Jejjo allōn̄ tokālik, ilo M̧aaj 1995 eo, Būreejtōn Hunter ekar mej im Būreejtōn Hinckley ekar erom kein ka 15 Būreejtōn an Kabun̄ in. Kean̄ eo ekar kiiō pād ium̧win pein. Iien ta eo enaaj kar jim̧we n̄an kōm̧m̧ane kean̄ in n̄an Kabun̄ in? Iien eo ekar itok jiljilijno allōn̄ tokālik.

Raan ko m̧okta jān Jeptōmba 23 kweilo̧k eo eļap an Doulul eo an Kōrā ro m̧oktaļo̧k jān kweilo̧k eo eļap, Būreejtōn Hinckley im rikakpilōklōk ro an raar iioon doon in kapilōk ippān Būreejtōnji eo Eļap an Doulul eo an Kōrā ro. Sister ro, āinwōt Rijilōk ro, raar ļōmņak kōn abņōņō ko kōn kōrā ro im baam̧le ko. Raar pedpede kweilo̧k eo ej itok ioon baam̧le ko.

Būreejtōn Hinckley ekar jikejuuļ n̄an kōnono n̄an kōrā ro ilo koba eo. Ekar kejekļo̧kjeņ kōn tōl eo kōn ennaan ko an. Ke iien ekōnono eo kar wōnm̧aanļo̧k, ekar kōnono kōn āt eo n̄an men eo ekāāl kar ejaake bōtaab jan̄in kwaļo̧k n̄an aolep “Baam̧le Eo: Juon Naan in Kean̄ n̄an Laļ in.” Kweilo̧k in an kōrā ro ekar ke juon jikin eo ejetjet n̄an kōm̧m̧ane kean̄ eo errā kake kōn baam̧le?

Būreejtōn eo Eutiej an Doulul eo an Kōrā ro Elaine Jack ekar kōmeļeļe tokālik: “Kōm kar jab jeļā ta kean̄ eo kōn Baam̧le ilo tōre eo. … [Kōm] kar jeļā jān taitōļ eo an, bōtaab kōm kar en̄jake juon men kōn baam̧le … naaj kar juon men em̧m̧an. … Ekar kanooj em̧m̧an aō en̄jake bwe ewōr ippām membōr ro an Doulul eo an Jon̄oulruo eo me raar bōk revelesōn.”

Kweilo̧k eo an Doulul eo an Kōrā ro ilo Jādede jab eo ekar pād ilo bwebwenato. Būreejtōn Hinckley ekar kwaļo̧k kadkad in kean̄ eo kōn naan kein raorōk: “Kōn ekanooj lōn̄ men ko rej ba wōt ke rem̧ool, ekanooj lōn̄ m̧oņ ko kōn jon̄ok ko im aorōk ko, ekanooj lōn̄ emejaja im ennaan n̄an kadikļo̧k an laļ in ettonoon, kōm eaar en̄jake n̄an kakkōl im kean̄ … kōn jon̄ak, katak, im imenene ko rej jelōt baam̧le me rikanaan, rilolo, im ribōk revelesōn ro an Kabun̄ in em̧ōj aer āliji ilo bwebwenato.”

Innān ekar riiti likio in kean̄ eo. Āinwōt an Irooj kar ba, “Mekarta jān Ainikiō make ak jān ainikien ro rikarejera, ej āinwōt juon.”

Kean̄ eo ej ba, “Baam̧le eo ej ekkapit jān Anij.” Em̧m̧an ippa an lukkuun alikkar naan in. Kean̄ in ej juon kūr n̄an kōj n̄an mour ilo mour in ilo ad kile kwojarjar eo ad im ilju im jekļaj eo ejjeļo̧k jemļo̧kin im̧aad. Būreejtōn Nelson ekar katkain: “Kwoj lukkuun ajri in jetōb nejin Anij. … Jab kalimjōke ilo bōd: Kōjatdikdik eo am̧ ej ekwojarjar. Ilo am̧ tiljek ilo kappukot, Anij enaaj kwaļo̧k jidik in wōn eo kwonaaj erom.”

Ke kar kwalo̧ke, kean̄ in ekar jab jokkun wōt ippān ļōmņak ko an elōn̄ ilo in. Kar jab iien eo. Ejjab kiiō. Ewōr ro me raar metak kōn kean̄ eo kōn baam̧le, m̧are, im kadkad in. Jet raar kwaļo̧k bwe Kabun̄ in en bōjrak, ukōt, ak jolo̧k kean̄ eo.

Kean̄ in kōn baam̧le ej, āinwōt an kar Būreejtōn Hinckley ba, naan in katak, ro jeiū im jatū. Pedped in katak ko rejjab jejļo̧k bōtaab rejetjet ippān wāween ko an Irooj im iaļ in bujen eo An. Katak ko an kean̄ eo raar kwaļo̧k jān ad Irooj Jisōs Kraist n̄an Rijilōk ro An etto im kiiō. En̄in ej Kabun̄ eo An, E ekar ejaake m̧ool ko me jej mour kaki.

Jet iaami remaron̄ kejekļo̧kjeņ kōn kean̄ eo im ba, “Menin ejjab jerbal n̄an n̄a.” “Āinwōt ejajeļo̧kjeņ.” “Baam̧l eo aō ejjab āinwōt in.” “Ijjab ekkarļo̧k.”

N̄an ro ewōr n̄ūrbōktak ko, jeļā bwe kwōj juon nejin ro jined im jemād ilan̄, m̧ōttan baam̧le eo an Jemādwōj Ilan̄. Ejjeļo̧k juon ejeļāļo̧k kajjiōm̧ ak em̧wilaļ an kea kōn kwe jān E. Oktakļo̧k n̄an E; lutokļo̧k būruōm̧ n̄an E; lōke E im kallim̧ur ko An. Kwōj juon iaan ro uwaan baam̧le eo an Rilo̧mo̧o̧r, Jisōs Kraist, eo ej iakwe eok. E ekar itok n̄an laļ in bwe en pinmuur kōn jerawiwi ko ad im ineek eddo ko an bōd ko im raan ko renana ad. E emeļeļe kōn ta eo kwoj jelm̧ae im en̄jake. Oktakļo̧k n̄an E, lōke bwe E enaaj jilkinwaj Jetōb Kwojarjr eo n̄an an pād ippam̧, kotak eok, im tōl eo. En̄jake iakwe eo Aer me ej “kajeeded e ijoko jabdewōt ilo būruōn ro nejin armej … elukkuun ļap kōttōpare jān men ko otemjej …im kam̧ōņōņō tata n̄an jetōb.”

Aolep Rijilōk ro an Irooj rej iakwe eok. Kōmij jar kake eok m pukot tōl eo an Irooj n̄an kwe. Pād wōt ippām. kwōj mour ilo iien ko reppen n̄e rikapok eo ej kappukot n̄an kōm̧m̧an bwe kwon an. Jab jebwābwe. Im n̄e kwōj jebwābwe, bar ro̧o̧ltok. Kōmij erļo̧ke peim n̄an kwe, barāinwōt ro jet me rej iakwe eok

Kean̄ eo ej ba, “Ro jinen im jemen ewōr aer eddo n̄an kōkaajririik ro nejier ilo iakwe im jim̧we.” Bok in Mormon ej letok juon bar kam̧ool kōn m̧ool in. Ilo eoon eo kein kajuon ilo jepta eo kein kajuon, jej riit, “N̄a, Nipai, āinwōt ke iaar ļotak jān jema im jinō ro rem̧m̧an.” Jete iaad em̧ōj an kar jino Bok in Mormon—im kar bar jino im bar jino, im ilo jekjek eo kar keememej naan ko n̄an keememeji? Keememeji ilo būruōm̧.

Juon iaan ennaan ko rem̧m̧an tata ippa ilo kean̄ in ej ba: “M̧ōņōņō ilo mour in baam̧le ej maron̄ tōprak eļan̄n̄e ej pedped wōt ioon katakin ko an … Jisōs Kraist.”

Wōn ejjab kōņaan bwe en m̧ōņōņō?

Im ta katak ko an Jisōs Kraist? Bar juon alen, ilo kean̄ in: “Tōmak, jar, ukweļo̧k, jeorļo̧k bōd, kautiej, iakwe, tūriam̧o, jerbal, im m̧akūtkūt ko rem̧m̧an.”

An wōn mour eo ejjamin naaj em̧m̧anļo̧k jān kōjerbal pedped in katak kein raorōk? Ejjeļo̧k iaad jenaaj weppān; ak jemaron̄ ļoor naan ko an Būreejtōn Hinckley: “Kōmaat am̧ maron̄.”

Jej riit ilo kean̄ eo, “Ro jemen rej tōl ioon baam̧le ko aer ilo iakwe im jim̧we,” im “ro jineer eddo eo aer eaorōk ej n̄an kōkkaajririik ajri ro nejier.” Tōl ejjab meļeļe in irooj ioer im kōkkaajririik ejjab meļeļe in juon jerbal ettāļo̧k. Anij ekar leļo̧k n̄an em̧m̧aan ro im kōrā ro eddo ko rooktak jān doon bōtaab jokkun wōt juon im aorōkier wōt juon me ej rie doon.

In kwaļo̧k juon bwebwenato aorōk n̄an n̄a.

Lio pāleō im n̄a kar katak n̄an jerbal em̧m̧anļo̧k āinwōt m̧ōttā ro reier juon ālkin juon raan ke ikar kāālet n̄an kōm̧m̧ane juon jokāālet aorōk ilo jab kōnono ippān liin. Jerbal eo aō ekar kailbōk liin, ekar kōjeperujruji liin, im likūt e ilo juon jekjek elukkuun epen. Ālkin wōt, liin ej likūt pein ioon aera im dim ilo an kar ba, “Ron, jouj, jab bar kōm̧m̧ane men jab in n̄an n̄a.” Kōmro ļakkar baj lukkuun pād wōt ilo juon jekjek jān tōre eo.

Jej lo ilo kean̄ eo an baam̧e ke: “Ro jemān im jinen rej kallim̧ur n̄an jipan̄ doon āinwōt m̧ōttā ro rej juon wōt.”

Juon wōt ej naan eo me aorōk. Iiō ko m̧aantak kōmro Sister Rasband ej jerbal ippān doon ilo ta eo keān̄ in ej kōmeļeļe āinwōt “eddo kein rekwōjarjar,” kōm kar ejaake juon pālele jokkun wōt juon. Ke kajjojo iaan ajri ro nejim raar m̧are, kōmro Sister Rasband kar kapilōk er im ro pāleer kōn wāween eo n̄an erom juon wōt.

N̄e jej mour kōn juon erreilo̧k wōt n̄an aiboojoj eo an Anij, jej kauteij doon im rie doon. Jon̄ak ko rekwojarjar an jimwe rej tōlļo̧k n̄an pen ilo mour ko ad make, an baam̧le ko ad, im jukjuk in pād.

Jemādwōj Ilan̄ ekar letok kean̄ in kōn baam̧le n̄an jipan̄ tōl kōn n̄an kapijuknene Ippan, n̄an jipan̄ kōj katak im obrak kōn iakwe, kajoor, jibadbad, im meļeļe indeeo. Kōn aolepān aō, ij akweļap ippāmi n̄an mour epaakeļo̧k E im Nejin Jitōnbōro. Ij kallim̧ur ilo am̧ kōm̧m̧ane, Jetōb eo enaaj im̧we im tōl eok im jipan̄ eok en̄jake ilo būruōm̧ aenōm̧m̧an eo Aer kar kallim̧ur kake me “eļļā jān jeļā otemjej.” Ilo etan Jisōs Kraist, amen.