Jisōs Kraist im Ijjiņo Eo Am̧ Ekāāl

Jisōs eaar “etetal im kōm̧anm̧an em̧m̧an.” Jej riiti ripoot in ilo bok in Jerbal. Ej juon kōmeļeļe eļap kar kōm̧m̧ane! Em̧ool Jisōs eaar etal im kōm̧m̧an em̧m̧an! E eo ej lukkuun jinoin—im unin—em̧m̧an! Ekar wujlepļo̧k aolepen mour eo An kōm̧anm̧an em̧m̧an. E ej “tūriam̧okake im jouj, e rum̧wij an illu im eļap an tūriam̧okake im m̧ool,” indeeo ilo em̧m̧an im indeeo ilo tūriamo.

Jabdewōt kajjion̄ ilo kōmeļeļeik ak ba ilo tukadu An em̧m̧an im jouj enaaj juon kōmeļeļe ejabwe. Em̧ool, ke Rijilōk Jon eaar kajjieon̄ in kwaļo̧ke, eļan̄n̄e jen kar kajjieon̄ in ļooke aolep waļo̧k em̧m̧an eo an Rilo̧mo̧o̧r, “laļ e jab maron̄ in dāpij bok ko renaaj jej kake.”

Waanjon̄ak ko rein juon jej būki ilo jeje ko rekwojarjar kōn an Jisōs etal im “kōm̧m̧an em̧m̧an” kōm̧m̧an an armej bōk en̄jake ko rekōmetak im kabwilōn̄lōn̄, eļaptata n̄e jej lukkuun ļōmņake ta eo emaron̄ in n̄an pād ijen, n̄an kam̧ool menin bwilōn̄ ko An, n̄an bōk katak ko An, im n̄an en̄jake kōmour eo An. Ekar kōnono n̄an ippen ro rejerata, Ekar un̄n̄ūr rinan̄inmej im ro rettoon, Ekar bōktok aeņōm̧m̧an n̄an ro rej m̧ōk, Ekar katakin m̧ool, im kar kūr ri jerawiwi ro n̄an ukweļo̧k. N̄an kajjojo ri lōba, ļeo e pilo, im kōrā e ļōn̄; n̄an eo ajjukub, ro re ban kōnono, aolep m̧am̧a ro rej liajļōļ, ro ejjeļo̧k jemāer ejjeļo̧k, im jan̄ in kōrā ejako pāleen; n̄an liaakeļo̧k, juon eo ekajookok, im juon eo en̄taan, n̄an ro rejako ilo ānbwin im jako ilo jetōb, ta eo eaar kōm̧m̧ane kar leļo̧k juon ijjiņo ekāāļ. Aaet, juon kam̧ool kōn kōmeļeļe!

Men otemjej Ekar ba im kar leļo̧k juon ijjiņo ekāāl n̄an kajjojo ro im Ekar kemour, kōjeraam̧m̧an, kar katakin er, im kar jeorļo̧k aer jerawiwi. Ekar jab eerļo̧k jen er, im m̧ool Eban ilo̧k jen kom̧. Ļōmņak ilo iien in am ron̄jake jabdewōt ian naan kein rej-letok mour jān E:

“Nejū, e jako jero̧wiwi ko am̧.”

“Damsel, Ij ba n̄an eok, kwōn jerkak.”

“Kwōn erreo.”

“N̄a I jab liaakļo̧k eok: kwōn ilo̧k, im jab bar jero̧wiwi.”

“Nejū, am̧ tōmak ear kemour eok; kwōn ilo̧k ilo aenōm̧m̧an.”

Naan ko an Rilo̧mo̧o̧r eo n̄an armej rein kajjojo rekadu, ak ippāer Ekar leļo̧k jeorļo̧k bōd, kemour, jepļaaktok, aeņōm̧m̧an, im mour indeeo. Im ņuuj eo in eaiboojoj ej Ekar letok ejja wōt ijjiņo eo ekāāl n̄an kwe im n̄an n̄a. Aoleped wōj maron̄ bōk juon ijjiņo kāāl kōn, im kōn wōt, Jisōs Kraist. Em̧ool kwe. Ijjiņo ko rekāāl rej pād ilo io̧ļapļapin karōk eo an Jemen n̄an ro Nejin. En̄in ej Kabun̄ eo an ijjiņo ko rekāāl! En̄in ej Kabun̄ in bar oktak im jinoe!

Kōn peptaij jen den im Jetōb, jej “bar ļotak” im jemaron̄ “etal ilo mour ekāāl.” Ewi jon̄an kōjātdikdik eo ej kōm̧m̧ane bwe en bōktok ijjiņo ekāāl n̄an juon eo me eraļo̧k im pen kōn jerawiwi ak kar en̄taan jen tokja ko an juon mour ejorāān im jemjerā ko rejjab jerbal? Jisōs ejjab aikuj jeorļo̧k jerawiwi E make ak juon ijjiņo kāāl ilo mour, aaet ekar peptaij, kwaļo̧k n̄an kōj iaļ eo n̄an juon ijjiņo ekāāl me Ekar kōm̧m̧an bwe jen maron̄e.

Im ad ijjiņo ekar jab baj waļo̧k juon katten. Jej ļōmņak bwe peptaij eo ad ej ad juon katten ilo juon ijjiņo ekāāl. Ejjab. Jejjab baj bōk e juon iien. Ijjiņo kein remaron̄ waļo̧k aolep raan! Im aaet aolep wiik ilo ad m̧ōn̄ā m̧ōttan kwojkwoj eo ilo emeemej menin letok eo kōn ad Rilo̧mo̧o̧r eweepān, ekar mej kōn juon unin kattapar ealikkar in letok n̄an kōj āinwōt elōn̄ ijjiņo ko rekāāl āinwōt ad aikuj! Jisōs ej letok n̄an kōj āinwōt elōn̄ ijjiņo ko rekāāl āinwōt ad aikuj.

Kōn kallim̧ur im lan̄lōn̄ ilo juon mour ekāāl ilo Kraist, jej maron̄ erom̧ juon “men in kōm̧anm̧an ekāāl,” ijo men ko mokta re jakoļo̧k im aolep men rej erom̧ kāāl. Ta ekar karum̧wijļo̧k bwe kain jo raantak kāāl in ej bōktok n̄an juon armej eo ej kajjieon̄, ilo wōnmaanļo̧k wōt in kāālet tōmak ilo kajoor an Rilo̧mo̧o̧r n̄an kemour im bar kōjepļaaktok, mekarta kapan̄pan̄ ko an mour ilo juon laļ enana? Rilo̧mo̧o̧r eaar jab ebweer ilo kien eo An n̄an kakūrm̧ool ankilaan Jemān im kadedeļo̧k mijen in pinm̧uur eo An ekwojarjar, em̧ool kōn metak bwe kar kōm̧m̧an An wūdidid, n̄an bōtōktōk ilo aolepān ānbwinin, n̄an en̄taan jim̧or ilo ānbwin im jetōb, im n̄an jar bwe kab eo emeo̧ maron̄ bōkļo̧k e. Bar juon alen, E ekar kwaļo̧k n̄an kōj ta ewi wāween niknik tiljek maan mejen Anij.

Kōn aolep bujen jej kōm̧m̧ani im aolep kijejeto jej leļo̧ke n̄an dāpiji, jemaron̄ in bōk juon “bōro ekāāl” im juon jon̄ak eļap in “juon jetōb ekāāl.” Jidik kōn jidik, eļapļo̧k ad kōm̧m̧an men ko rej kōtļo̧k ad en̄jake em̧m̧an eo An im joļo̧k iminene ko rej kabweer, ad erom̧ armej ro An kōnke jej m̧ool in likūt E bwe en ad Anij. Jisōs elukkuun kōņaan bwe en ad Kiin̄ im ad Seperd im ad Irooj in Aeņōm̧m̧an, im jemaron̄ kāālet n̄an likūt E ilo būruwōd im ļōmņak ko ad make.

Ukweļo̧k ej ejaake juon iien em̧m̧an n̄an ijjiņo ko ad rekāāl, jinoe ekāāl, im katten kein karuo. Katak ko an Rikanaan eo ad ejitōn bōro Būreejtōn Russell M. Nelson em̧ōj aer kajim̧we tōmak ko rebōd kōn kwojarjar eo an ukweļo̧k, im ij ļōmņak āliktata jej jino meļeļe.

Ekaitoktok limo n̄an ron̄jake an jodikdik ro nejid kōmeļeļeik ta meļeļein ukweļo̧k n̄an er. Ikar ron̄ moktaļo̧k an juon jiron̄ kar ba, kōn juon turin mejān ettōn̄ dikdik, “N̄e ij ļōmņak kōn ukweļo̧k, ukweļo̧k aolep raan, ij en̄jake lan̄lōn̄ im kōjātdikdik. Ikar en̄jake iakwe im m̧ōņōņō eo an Jema Ilan̄ im aō Rilo̧mo̧o̧r. Ij jab mijak in itok n̄an ippen Jemed Ilan̄ ilo jar im kajitūkin jipan̄ eo An kōn jabdewōt ta eo ij apan̄ kake. Ijeļā Rejjab kajjieon̄ in jibwe aō kōm̧m̧ane juon men ebōd. Rej pojak im m̧ōņōņō in jipan̄ kōj ilo juon wāween iakwe. Menin ej ukweļo̧k n̄an n̄a,” ekar ba. Jiron̄ in emeļeļe bwe kōn wōt Jisōs Kraist, liin emaron̄ wōr an ijjino ko rekāāl!

Kwoj ke aikuji juon ijjiņo ekāāl? Komaron̄ ke kōm̧m̧ane juon ijjiņo ekāāl, em̧ool kwe? Ļōmņak kōn armej ro Rilo̧mo̧o̧r ekar jerbal in karejar n̄an—armej ro Ekar katakin, kemour, jeorļo̧k aer bōd, im bar kōjepļaaktok. Ekar ke kāālet er jān juon kilaaj in kumi rejeraam̧m̧an ak wāween mour? Ekar ke kōjenolo̧k kōtaan ro ri wānōk im ri jerawiwi ro? Ekar ke mije wōt armej kōnke rekar aikuj in ak kar iakwe? Jaab.

Jet raar etal n̄an Ippān kōn eļap tōmak, tōmak ilo kajoor in kemour eo An—āinwōt kōrā eo ekar nan̄inmej kōn to̧o̧rļok, jeban eo an ri Rom eo karejeran ekar nan̄inmej, rileba eo, Jairus, im ripilo̧ in Bartimaeus eo. Rej kajjojo māllijon̄ tōmak eo aer ilo jetōb, kōjātdikdik bwe em̧m̧an im kajoor eo an rabbai eo jān Nazeret emaron̄ in ukōt mour im ļōmņak ko aer. Im E ekar. Ekar kōtļo̧k ajejeej in An kōmour.

Ak Jisōs eaar barāinwōt kōjeraam̧m̧an ro me edik aer tōmak, āinwōt jemān ajri eo e nan̄inmej ekar lamōj im ba, bōlen āinwōt kwar, “Irooj, ij tōmak; kwōn jipan̄ eō kōn aō jab tōmak.” Im Ekar kwaļo̧k ilo ejjeļo̧k wōneen tūriam̧o ion ro rejjan̄in kappukot E, āinwōt kōrā eo jibwe ilo ļōn̄, kōrā eo ejako pāleen Nein, em̧m̧aan eo e jorāān neen ilo juon ļwe in Batesda, im em̧m̧aan eo ekar pilo ke ear ļotak. Em̧ōj ke am̧ en̄jake An etetal im kōm̧anm̧an em̧m̧an ilo mour eo am̧ mekarta kwojjan̄in kar kappukot E ak ļoor E?

N̄an kajjojo iaan kōmļeļe kein ilo jeje ko rekwojarjar, im ro otemjej renaaj ron̄jake im uwaak, Ekar letok juon ijjiņo ekāāl, men̄e eaar juon mour kāāl kar jeorļo̧k an jerawiwi ak juon mour ekāāl kar kemour jen nan̄inmej ak juon mour ekāāl kar kotake jān mej.

Ta meļeļein menin n̄an kwe im n̄an n̄a? An em̧m̧an im tūriam̧o im iakwe-ejouj ejjeļo̧k jon̄an. Ijjiņo ko rekāāl rej pād ilo io̧ļapļapin karōk eo an Jemed! Jiņo ko rekāāl rej mijen eo an Nejin Maan! Joraantak ekāāl, jepta ekāāl, im iien ekāāl rej juon pedped epidodo an ņuuj ko an gospel eo em̧m̧an!

Innām, em̧ōj ke am̧ jako jān bujen ko am̧ n̄an bōk juon ijjiņo ekāāl? Jaab. Em̧ōj ke am̧ kōm̧m̧ane juon men ejjab alikkar ak elōn̄ alen n̄an maron̄ bōk bar juon iien? Jaab. Em̧ōj ke am̧ jako ettoļo̧k jān Kraist n̄an An jipan̄ eok jeiki juon bwebwenato ekāāl jān ijin im ilo̧k? Jaab. Ri kapo eo ej e wōt me ej bōk jeraam̧m̧an ko jān ļōmņak in ke koban ejmour. Kwojjab.

Im ijjiņo ko rekāāl reļļap jen jerawiwi im bōd ko ad. Kōn em̧m̧an eo im jouj eo an Rilo̧mo̧o̧r, jemaron̄ in ijjiņo kāāl bwe en kōļapļo̧k an ukōt ļōmņak ko m̧okta, m̧wil ko renana, kōm̧m̧an jāmeme, ļōmņak ko rebōd, en̄jake ko re m̧ōjņo, im men ko rejjekar n̄an ņa ruwōn ro jet im joļo̧k eddo eo an make. Komaron̄ in ukōt men ko kōn kwe make me rej kam̧ōjņo eok aolep iiō ko maantak. Kwomaron̄ in bar ijjiņo kōn kajoor eo an M̧aajta eo an ijjiņo ko rekāāl. Eban m̧ōk in letok ijjino ko rekāāl n̄an kōj.

N̄an ro rej kakkōt kōn ejja jerawiwi eo wōt ak ejja kapan̄pan̄ ko rej waļo̧k aolep iien, kwōn wōnmaanļo̧k wōt. Ejjan̄in kar likūt juon men me enaaj kabōjrak kwe. Ejjan̄in kar karōke juon jon̄an n̄an iien ko am̧ kein karuo. Kwōn wōnmaanļo̧k wōt. Kwōn kajjieon̄ wōt. Kwōn pukot jipan̄ jān ro peļaakim. Im kwoj lōke ilo ijjino eo ekāāl bwe ej pād n̄an kwe aolep iien kwoj oktakļo̧k n̄an Jemam̧ ilo bōro em̧ool. Joļo̧k kōm̧m̧ani men kein, ejja bōd ko wōt, im utiej bōro im jum̧ae im rejjekar bwe ren jab bar m̧ōttan mour eo am̧. Kwojjab aikuj in āinwōt kwe eo kar mokta. Jelm̧ae ijjiņo eo am̧ ekāāl, eo am̧ kein karuo ak kajilu ak ka emen—ak jibukwi—kōttan, kar lewaj n̄an eok kōn bōtōktōk in pinm̧uur eo an Jisōs Kraist.

N̄aij kam̧oolol ilōn̄in kōmeļeļe kōn ijjino ko rekāāl kar letok n̄an n̄a im kōn ko renaaj letoki.

Rilo̧mo̧o̧r eo ad eaar letok juon kōmeļeļe āliktata eo, me eban maron̄ kōm̧m̧an bwe en wōr kōjātdikdik ak lan̄lōn̄ rainin. Ālkin metak im en̄taan ko ilo Getsemane im jemļo̧k ļo̧k ilo debwāāl in m̧anm̧an eo, Ekar ba, “Em̧ōj.” Kanaan eo kōn Mesaia ekar kūrm̧ool, im likio in wōneen m̧uri eo n̄an jerawiwi ko an aolep armej im en̄taan em̧ōj kar kōļļāiki. Ekar ba “Em̧ōj” m̧ool eo An im katok eo ej n̄an indeeo. Aaet Pinm̧uur eo An eban maron̄ in dedeļo̧k m̧ae iien Ej Make en̄jake mour ekāāl ilo raan eo kein kajilu, ijjino eo, āinwōt juon eo aiboojoj, armej jerkakpeje kōn kajoor eo an Jemān

Kōnke Ekar kōm̧m̧an men ko rej kabun̄būruon Jemān, im kōnke Ekar “pokake ankilaan Jema ilo men otemjeļo̧k,” kwe im n̄a maron̄ bōk ijjiņo ko rekāāl. Jouj bōk ijjiņo eo am̧ ekāāl, em̧ool rainin, kiiō wōt. Jisōs Kraist ej Ri tōl im Ri koweeppān tōmak eo ad, jeje elōn̄ jepta ko rekāāl ippād. E ej Jinoin im Jem̧ļo̧kin—jemļo̧kin ad jook im en̄taan im jinoin juon mour ekāāl ilo E, kōtļo̧k ad bōk jouj eo An, likūt n̄an ilik men ko an jemaan im bar jinoe kōn juon joraantak ekāāl āinwōt an jon̄an wōt an lōn̄ iien jej aikuj. Ilo m̧ool An “em̧m̧an wōt im jouj renaaj ļoor [kōj] raan ko otemjej in [ad mour].” ilo etan Jisōs Kraist, amen.