Obrak kōn Jon̄ak in Kijenmej

Ilo Māe 2021, jekar loļo̧k Salt Lake Tampeļ ke rej kōkāāle, Būreejtōn Russell M. Nelson ekar ļo̧kjenan kōn kijejeto ko an painier ro, kōn an kar jabwe kein jerbal ko im an kajoor tōmak ko aer rekar kalek juon em̧ eļap kōn kōļmenļo̧kjen eo eweppān an anbwin im jetōb eo me ekar jutak pen. Ijoke, eaar bar loe jorrāān in an m̧akutkut laļ, me eaar kōm̧m̧an kōta ko ilo dekā in pedped eo an tampeļ eo im jab kijn̄en̄e jimeen eo, kakōļļe ko ralikkar n̄an bar kapenļo̧k.

Rikanaan eo ad ejitōnbōro ekar katakin kōj bwe eaar menin aikuj n̄an jerbale pedped eo an tampeļ eo n̄an maron̄ in jutak pen ņae ļan̄ ko rekajoor, jej barāinwōt aikuj in bōk jon̄ak ko reļļapļo̧k—bōlen jon̄ak ko jejan̄in kar būki m̧okta—n̄an kōkajoorļo̧k pedped in jetōb eo ad make ilo Jisōs Kraist. Ilo enaan ko an jeban meļo̧kļo̧ki, ejako ak ekar letok n̄an kōj ruo kajjitōk ko reļļap n̄an an juon make kejokļo̧kjeņ: “Epen ke pedped eo ami ? Im ta kein kōkajoor ko remenin aikuj n̄an naan in kam̧ool eo ami im meļeļe eo ami kōn gospel eo?”

Gospel eo an Jisōs Kraist ej letok n̄an kōj im̧we ko rekwojarjar im un ko rewājepdik n̄an bōbrae ļan̄ in kakure ko ilo jetōb ko ad, kōkajoorļo̧k pedped eo ad im jipan̄ bōbrae jān kōk ko ilo tōmak eo ad im bōbrae jān pere naan in kam̧ool ko ad im ad meļeļe kōn m̧ool ko rekwojarjar an gospel eo. Juon pedped eaorōk n̄an tōpar kōttōpar in ej waļo̧k ilo jekjōn 12 in Katak im Bujen Ko, juon revelesōn kar leļo̧k n̄an rikanaan eo Josep Smith kōn Josep Knight, juon em̧m̧aan eo ejim̧we im eaar pukot n̄an jeļā ankilaan Irooj, jab kōnke ro jet ren loe ak n̄an lukkuun tiljek im kar kallim̧ur n̄an erom̧ rikaļoor Jisōs Kraist—“pen āinwōt joor ko jurōn lan̄.” Irooj eaar kean̄:

“Lo, Ij ekkōnono n̄an eok, im barāinwōt n̄an aolep ro ewōr aer ikdeelel n̄an kōjerkak tok im kajutak jerbal in;

“Im ejjeļo̧k emaron̄ jipan̄ ilo jerbal in ijello̧kun wōt n̄e enaaj ettā im obrak kōn iakwe, ewōr an tōmak, kōjatdikdik, im iakwe-em̧ool, im ejatōr ilo men otemjeļo̧k, jabdewōt naaj lōke n̄an kōjparok eo an.”

Tōl eo an Rilo̧mo̧o̧r, kar ļo̧o̧ke ilo revelesōn in ekwojarjar, ej kakeememej kōj bwe kijenmej ej juon kōkajoor eo eaorōk n̄an dim ilo Jisōs Kraist. Ej juon iaan jon̄ak ko aikuji, jab wōt n̄an ro me raar kūr n̄an jerbal ak barāinwōt n̄an aolep ro raar kōm̧m̧ani bujen ko rekwojarjar ippen Irooj im kāālōt n̄an ļoor E ilo tiljek. Kijenmej ej jipan̄ kobaik im kōkajoor m̧wil ko jet an Kraist kar kwaļo̧k ilo revelesōn in: ettā bōro, tōmak, iakwe em̧ool eo ej itok jān E. N̄an kōmeļeļeikiļo̧k, kōļapļo̧k kijenmej ej juon wāween n̄an kōjparok jetōb ko ad ņae kapo ko remakijkij im aolep iien rej itok jān kareleel ko an laļ me remaron̄ in kam̧ōjņoik pedped eo ad ilo Jisōs Kraist.

Ilubwiljin jinōkjej ko rikaļoor ro rem̧ool an Kraist rej būki, kijenmej ej make ļo̧k iaan āinwōt juon waanjon̄ak in Rilo̧mo̧o̧r make, juon leen eo eaorōk an Jetōb, epojak n̄an ro rej kōppeļļo̧k buruōer make n̄an im̧we ko rekwojarjar. Ej jon̄ak eo me ej bōktok kam̧ōņōņō n̄an bōro, ejaaki kōņaan ko im en̄jake kōn māletlet im jokane. Ilo jeje ko rekwojarjar, kijenmej ej waļo̧k āinwōt juon m̧ōttan eaorōk ilo wōnmaanļo̧k eo ilo iaļ eo ad ilo jetōb, ej tōl ļo̧k kōj n̄an kijejeto, m̧wil em̧m̧an, im tūriam̧o ilo an kōkāāl en̄jake ko ad, naan ko ad, im m̧akūtkūt ko ad.

Rikaļoor ro an Kraist im rej kajjieon̄ in kan̄ōltok m̧wil in an Kraist ej ļapļo̧k aer ettā im obrak kōn iakwe. Juon kajoor in aeņōm̧m̧an eļapļo̧k ippāer, im remaron̄ em̧m̧anļo̧k n̄an kōmmaanwa, kōļapļo̧k kijenmej, im kōm̧m̧an n̄an ro jet kōn meanwōd, kautiej, im m̧ool, jekdo̧o̧n kōto in māllijon̄ ko rekajoor rej kōm̧m̧an kaamijak. Rejjab wōnmaanļo̧k wōt in m̧akūtkūt ak kāālet n̄an kōm̧m̧ane kōn māletlet, bōk tōl jān ineem̧m̧an im im̧we ejouj an Jetōb Kwojarjar. Ilo wāween in, ej dikļo̧k aer m̧ōjņo jān jorāān ko ilo jetōb kōnke, āinwōt an Rijilōk Paul kar katakin, rejeļā bwe remaron̄ in kōm̧m̧an men otemjej ilo Kraist, eo ej kakajoor er jekdo̧o̧n ilo iien apan̄ ko me remaron̄ in kōm̧akūt naan in kam̧ool eo aer ilo E.

Ilo Leta in an n̄an Taitōs, Paul ej leļo̧k kapilōk eo ekwojarjar ikkijeen karbōb ko an ro rej kōņaan piņej jenkwaņ Rilo̧mo̧o̧r im kōm̧m̧ane Ankilaan kōn tōmak im wujlepļo̧k. Ekar ba bwe rej aikuj in kain eo e m̧ōkaj an lale armej, em̧m̧an m̧wilin, wānōk, im kwojarjar—bōnjān me ej kwaļo̧k kajoor in kijenmej.

Ijoke, Paul ekar kakkōl bwe rej aikuj in “jab ankeke, jab bōro karu , … [im] jab rire.” Bōnjān kein rej āinjuon n̄an ļōmņak eo an Rilo̧mo̧o̧r im kapan̄ eddōkļo̧k eo em̧ool ilo jetōb. Ilo meļeļein eoon eo, “jab ankeke” ej juon eo me ej makoko in jerbal ippān utiej bōro; “jab bōro kadu” ej juon eo me ej kejekdo̧o̧n an kipel e im ejaje kijenmej im ematōrtōr; im “jab rire” ej kōnono n̄an juon eo edike akweel, illu, im nana tamwin ilo kōnono, m̧akūtkūt, im en̄jake. Ilo ad wōnmaanļo̧k wōt im ukōt m̧wilid kōn tōmak im ettā bōro, jemaron̄ in dim im emjak wōt n̄an dekā in kajoor im tūriam̧o eo An im erom̧ kein jerbal ko kar karreoiki ilo pā ko Pein Rekwojarjar.

Kejakļo̧kjeņ kōn aikuj eo n̄an kaiboojoj wānōk in jatōr, ij keememej naan ko an Hanna, jinen rikanaan eo Samuel—juon kōrā in tōmak ekabwilōn̄lōn̄ eo me, jekdo̧o̧n ālkin mālijjon̄ ko ekar al juon al in kam̧m̧oolol n̄an Irooj. Ekar ba, “Jab bar kōnono aplep; aplep en jab waļo̧ktok jān lo̧n̄ōmi: bwe Jeova Anij in jeļāļo̧kjeņ, im ej jon̄e jerbal ko.” Al eo an eaar ļapļo̧k jān juon jar—ej juon kūr eaar leļo̧k kōn e make kōn ettā bōro, jeļā make tōlarōke, im kauwe. Hanna ej bar kakeememej kōj bwe m̧ool in kajoor ilo jetōb ejjab waļo̧k ilo wāween ekaiirir ak naan ko renana ak ilo kijenmej, m̧wil ko me rekkar ilo māletlet an Irooj.

Ekkā, an laļin nebar m̧wilin ko relāj, utiej bōro, jaje kijenmej, aineļap, ekkā allo̧ki m̧wil rōt kein jān aere ko kajjojo raan im kōņaan nebar im bun̄bun̄. N̄e jej ukōt mejād jān jon̄ak eo an kijenmej im kōjekdo̧o̧ne jouj im kajoor in im̧we an Jetōb Kwojarjar ilo wāween ad makūtkūt im kōnono, epidodo ad lokjak ilo aujiid eo an rikōjdāt eo, eo im ej tōlļo̧k kōj n̄an ba naan ko im ukōt m̧wilid me jenej ajļo̧k kaki, men̄e jem̧jerā ko ilo jukjukin pād ko, baam̧le ko ak im̧ōn jar ko. Gospel in an Jisōs Kraist ej kūr tok kōj n̄an mour in kijenmej eļaptata ilo iien ko rapan̄, bwe ejim̧we im jejjet ilo iien kein bwe m̧akūtkūt eo em̧ool an kajjojo armej en waļo̧k. Āinwōt an Martin Luther King Jr. kar ba, “Lukkuun jon̄ak eo an juon armej ejjab ia eo ej jutak ie ilo iien aeņōm̧m̧an im em̧m̧anļo̧k, ak ia eo ej jutak ie ej ilo iien in apan̄ im poktak.”

Āinwōt armej in bujen, em̧ōj kūr kōj n̄an dāpdep wōt kōn kallim̧ur ko rekwojarjar jekar kōm̧m̧ani ippān Irooj, kanooj kōjparok am̧ ļoore jon̄ak eo Eaar kajutake kōn waanjon̄ak eo An eweepān. N̄an ukōtļok, E kar kallim̧ur, “Em̧ool, em̧ool, Ij ba n̄an kom̧, en̄in ej unleplep in katak eo aō im eo ej ekkal ioon ej ekkal ioon Aō ejm̧aan, im aor ko an hell reban jutak ņae er.”

Iien kwaļok eo an Rilo̧mo̧o̧r kar jenolo̧k jān jon̄ak eo an kijenmej ilo aolep m̧wian̄ōn kadkad eo An. Kōn waanjon̄ak eo An eweepān, E kar katakin kōj bwe “Kwōn ineem̧m̧an ilo en̄taan ko, jab kōnono ņae ro rej kōnono ņae.” Āinwōt Ekar katakin bwe jen aikuj jab illu kōn iakweel ko im aetwerōk ko, Ekar ba, “Kom̧ aikuj ukeļo̧k, im ero āinwōt juon ajri edik.” Ekar barāinwōt katakin bwe ro otemjej rej kōņaan itok n̄an Ippān kōn aolepen būruōm̧ aikuj kajim̧we ippān ro rej illu im jum̧ae er. Kōn juon m̧wilin kijenmej im būruōn tūriam̧o, Ekar kareel kōj bwe n̄e rej kōm̧m̧an n̄an kōj ilo eddo, lāj, jaje kautiej ak im rej kōjekdo̧o̧ne kōj, An jouj naaj jab ilo̧k jān kōj, im bujen aeņōm̧m̧an eo An naaj ban kōm̧akūti jān mour ko ad.

Jet iiō remootļo̧k, lio ippa im n̄a kom̧ro kar bwebwenato ippān jet membōr ro rekajoor ilo Kabun̄ in ilo Mexico City. Elōn̄ iaer, jim̧or er make ak ro rejitōnbōro ippāer, rekar dipuki apan̄ ko reppen, ekoba koot armej, m̧ōrō, im jorāān ko jet renana.

Ke kom̧ro kar kalimjōk mejān rein Rekwojarjar, jekar jab loe aer illu, n̄ūrboktak, ak kōņaan n̄an bar ukōt nana. Ijjelo̧kin, jej loe ettā bōro. Paaktokier, men̄e rekar burom̧ōj, rekar kwaļo̧k juon ikdeleel em̧ool n̄an bōk kōmour im kaenōm̧m̧an. Barāinwōt buruweer eaar rub kōn en̄taan, armej rein Rekwojarjar rekar wōnmaanļo̧k wōt kōn tōmak ilo Jisōs Kraist, kālet n̄an jab kōtļo̧k bwe mōjno ko aer ren kōm̧m̧an kōtaan tōmak eo aer ak kōm̧m̧an an dikļo̧k naan in kam̧ool eo aer kōn gospel in.

Ilo jem̧ļo̧kin in aiintok in ekwojarjar, kōm kar iakiakwe kajjojo iaer. Aolep pein iakwe, aolep atbakwoj raar erom naan in kam̧ool bwe kōn jipan̄ eo an Irooj, jemaron̄ in kālet n̄an ukōtļo̧k ilo kijenmej inepata ko im mālijjon̄ ko an mour in. Aer ikōn̄ im jab ba wōt kōn waanjon̄ak eo kar leļo̧k āinwōt juon kūr n̄an etetal ilo iaļ eo an Rilo̧mo̧o̧r kōn kijenmej ilo menotemjej. Jej en̄jake āinwōt n̄e jekar pād turin mejān enjeļ ran.

Jisōs Kraist, eo ekajoortata jān aolep, kar en̄taan kōn kōj m̧ae iien Ekar bōtōktōk ilo aolepān ānbwinin, Ekar jab kōtļok illu bwe en bōd an kareel Būruōn, ak jab lāj, nana, ak naan in kanejnej ko rej wōtlo̧k jen Lo̧n̄iin, aeet ilubwilijin m̧ōjno kein. Kōn kijenmej eweepān im ettā bōro, Ekar jab ļōmņak kōn E make ak kōn kajjojo ajri ro nejin Anij—mokta, rainin, im ilju im jekļaj. Rijilōk Piter ekar kam̧ool kōn m̧wil eo an Kraist ke ekar ba, “Eo ke raar kōnono ņae E, Ear jab bar kōnono ņae; ke Ear en̄taan, Ear jab kalōn̄lōn, a Ear make likūt E n̄an Eo ej ekajet jim̧we.” Aeet ilo ilubwilijin en̄taan ko An reļļap, Rilo̧mo̧o̧r ekar kwaļo̧k kijenmej eweepān im kwojarjar. Ekar ba, “Mekarta, aiboojoj n̄an Jema, im Iaar bōke im kadedeļo̧k m̧aanjāppopo ko Aō n̄an ro nejin armej raņ.”

Ro jeiū im jatū rejitōnbōro, ij lewaj juon karuwainene n̄an aoleped wōj n̄an kobrak ļōmņak im en̄jake ko ad kōn jon̄ak eo an kijenmej āinwōt Kraist āinwōt juon uwaak ekwojarjar n̄an kūr eo kar kanaan kake kōn jitōnbōro eo ad Būreejtōn Russell M. Nelson. Ilo ad wōnmaanļo̧k wōt kōn tōmak im tiljek n̄an kijenmej ilo makūtkūt ko im naan ko ad, ij kam̧ool bwe jenaaj kōkajoor im emjake mour ko ad ilo ad kapene ioon pedped eo em̧ool an ad Ripinmuur.

Ij lukkuun kwaļok aō kam̧ool bwe ad kajjieon̄ kijenmej ej karreo jetōb eo ad im kōkwojarjar būruwōd imaan mejen Rilo̧mo̧o̧r, kepaakļo̧k kōj n̄an E im kepooj kōj, kōn kōjātdikdik im aeņōm̧m̧an, n̄an raan en eaiboojoj n̄e jenaaj ioon E ilo Itok eo An Kein Karuo. Ij kwaļo̧k naan kein rekwojarjar ilo etan ad Rilo̧mo̧o̧r, Jisōs Kraist, amen.