Iakwe in Pinmuur eo an Jisōs Kraist

Eļan̄n̄e kwaar kōm̧m̧ani jerawiwi ko reļļap im kwoj pād ilo jekjek eo an ukweļo̧k ak ewōr ikdeelel n̄an m̧ool in ukweļo̧k im en̄jake lan̄lōn̄ in eļap an jeorļo̧k bōd, jouj jeļā kabwilōn̄lōn̄ in ej kōttar kwe. Rilo̧mo̧o̧r eo ej wōnm̧aanļo̧k im kūr, Kom̧win Itok n̄an Ippa.”

Kōkajoorļo̧k am̧ tōmak ilo ad Rilo̧mo̧o̧r, Jisōs Kraist, enaaj kadimļo̧k jan̄inuade eo an jetōb eo am̧ n̄an jeļā E, tōmak ilo E, im kobaik būruōm̧ n̄an E. Inōs ekar kajjitōk kōn jeorļo̧k bōd eo an make, “Irooj, ekōjkan an men in kōm̧m̧an?” Irooj ekar uwaak, “Kōnke tōmak eo am̧ ilo Kraist, eo kwōj jan̄in kar m̧oktaļo̧k ron̄ ak lo.”

Im Moronai ekar kakkobaba, “eļan̄n̄e kom̧ naaj kaarmejjete kom̧ make jān aolep men ko rejjab em̧m̧an, im iakwe Anij kōn aolep am̧ maron̄, ļōmņak, im kajoor, innām An jouj enaaj bwe n̄an kom̧.”

Oktakļo̧k jān jerawiwi, oktakļo̧k n̄an Anij, im kōkajoorļo̧k am̧ tōmak ilo Jisōs Kraist ej juon ijjino aiboojoj. Ettā ilo ajeļo̧k ankilaam̧ n̄an Anij ej kitbuuj kwaļo̧k jerawiwi ko reļļap n̄an bisop ak branch būreejtōn eo am̧, bōtaab talep in jeorļo̧k bōd eo am̧ ej itok jān Rilo̧mo̧o̧r eo. Jeorļo̧k bōd ej juon mennin letok kwojarjar kar letok kōn jouj an Jisōs Kraist.

Juon ikdeelel n̄an m̧ool in ro̧o̧l n̄an Anij ej itok kōn kijejeto n̄an lukkuun m̧ool n̄an Jemādwōj Ilan̄, ippam̧ make, ippān ro me raar jorrāān, im ippān ritōl ro an priesthood eo am̧. Jemedwōj Ilan̄ ej m̧ōņōņō ilo am̧ kajjieon̄ itok n̄an E kōn juon bōro erub im jetōb ettā. Wōr juon jetōb ettā ej likūt am̧ lōke ettā ilo pein Anij; wōr juon bōro erup ej bōktok ta eo Rijilōk Paul kar kōmeļeļeik āinwōt “būrom̧ōj ekkar n̄an Anij,” juon ikdeelel aitok an jetōb eo n̄an ro̧o̧l n̄an E jekdo̧o̧n ta kaarmejete eo.

Am̧ kajjieon̄ tōl eok n̄an kōņaan kōm̧m̧ane ta eo kwaar rubwe. Aaet, kile men ko me rejjab ilo kajoor eo am̧ n̄an kōm̧m̧ane, am̧ emakijkij jar bwe Irooj, kōn An jouj, enaaj jipan̄ kōmour ro kwaar kōmetak er ilo kōm̧m̧an ko am̧.

Walo̧k ko an jerawiwi ko reļļap ioon ro jet ekkā aer kōmmetak im pen etal jāni. Kwoj ke ļoore waanjon̄ak eo an ļōm̧aro nejin Mosaia, ro raar “ilo peran kijejeto n̄an kajim̧we aolep jorrāān ko raar kōm̧m̧ani”? Kōnono kōn ro me kwoj kautiej kōn ta eo kwomaron̄ in jab kili.

Ilo aō kar kōpooj kōnono in, ikar bōk juon email ikar jab kōtmāneiki jān juon eo ej pād ilo jekjek eo an ukweļo̧k im ikdeelel n̄an ro̧o̧ltok n̄an Kabun̄ in. Lio kar pāleen m̧okta ekab de jorrāān jān luuji “m̧are indeeo [aerro], [apan̄ ko ippān ajri ro], jerwane jāān in jortoklik eo, … an [jab] maron̄ in kōļļāik bill ko, [im] en̄jake ko rōkkōmetak kōn an rup lōke eo an jān bar juon.”

Ekar kwaļo̧k ippa ekōjkan an ritōl eo an priesthood eo an “kar en̄jake n̄an [kajjitōk ippā] n̄an jar im ļōmņak kōn ta eo [eļapļo̧k emaron̄ kōm̧m̧ane n̄an lio kār pāleen m̧okta im ajri ro].” Kōn mālim, ij kwaļo̧k jidik in email eo an:

“Ikar [m̧okta] ļōmņak kōn [jāān ko] ikar liļo̧k n̄an kar lio pāleō ekkar n̄an peba in jepel eo ekar kanooj ļap jān jon̄an, bōtaab branch būreejtōņ eo aō ekar kōketak eō n̄an jitlo̧k im jar kake. …

“Ilo jino in, kar ļon̄tak kōn ļōmņak eo n̄an leļo̧k eļapļo̧k jipan̄. Kōnke jerawiwi ko aō rejjab kōn jāān, iaar ļōmņak ta lukkuun meļeļein … [ak] tok ālik iaar kile ekar jab kōn jāān.

“Priesthood ritōl eo aō ekar kweilo̧k ippān [kar lio pāleō m̧okta] im ajri ro nejū im kile bwe rekab de ļon̄tak im kar jan̄in mour. …

“Kōttōpar eo aō ekāāl ekar n̄an wōnm̧aanļo̧k kōn tōmak. … Ikar kwaļo̧k ikdeelel eo aō n̄an jipan̄ kōn ejjeļo̧k men kōtmene n̄an bōk. Ikar kāālet n̄an [jilkinļo̧k juon dettan jāān eo n̄an kar lio pāleō m̧okta] juon kōļļā, eo ekar juon dettan eo ebwe jān kōļļā eo aō. M̧okta wōt jān kōm̧m̧ane kōļļā eo im̧aan tata, Irooj ekar [im̧we ļōmņak eo aō bwe ikar aikuj] kōļļāik [ruo alen dettan eo].

“Ikar katak bwe bar kōro̧o̧lļo̧k ejjab kōn wōt jāān. Ej kōn ettā in wūjlepļo̧k eo aō n̄an Irooj. … Jāān eo n̄an jipan̄ bōk jikin ta eo ikar bōke jān baam̧le eo aō kōn kāālet ko aō. Ej kōn kōm̧m̧an im kōjparok kallim̧ur ko ilo jab kōtmene jabdewōt n̄an lewaj im jipan̄ liin jab inepata kōn bill ko bwe en maron̄ pukot Jetōb eo.”

Kijejeto ko am̧ n̄an bar kōjepļaak ta eo kwaar rupe emaron̄ jab kōn jāān, ak ilo am̧ ettā kapilōk ippān Irooj, kwomaron̄ lo eļapļo̧k men kwomaron̄ kōm̧m̧ane.

Ilo am̧ kappukot jeo̧rļo̧k bōd eo an Irooj, kwon kijenmej ilo am̧ kōttar An lukkuun kōmālimi. Ļōmņak eoon in:

“Raar … kōttāik er … em̧ool ilo m̧wilaļ ko in ettā bōro; im … raar kanooj kūr n̄an Anij. aaet em̧ool aolepān raan eo. … [Bōtaab] Irooj eaar rum̧wij n̄an ron̄ kūr eo aer kōnke jero̧wiwi ko aer.”

“Mekarta Irooj eaar ron̄ kūr ko aer; im jino … kameraikļo̧k eddo ko aer; … im … raar jino jebanļo̧k jidik-illo̧k-jidik.”

Kwōn kijenmej ilo an Irooj lewaj n̄an eok An kōjeraam̧m̧an im kōmālim jidik-illo̧k-jidik.

Ilo iien eo an Irooj, kwōnaaj en̄jake An ainikien jiron̄ eok, “Kwōn kōtļo̧k bwe men kein rejjab bar kainepataik eok.” Juon raan, ilo am̧ wōnm̧aanļo̧k n̄an oktakļo̧k n̄an Rilo̧mo̧o̧r, Jemam̧ Ilan̄ enaaj “bōkļo̧k ruōd jān buruōd, kōn em̧m̧an ko an Nejin.”

N̄an kom̧ eo kom̧ kar metak kōn bōd ko reļļap jen ro jet, ij kōņaan kwaļo̧k kōn iakwe eo an Rilo̧mo̧o̧r im tūriam̧o, An aenōm̧m̧an im inem̧m̧an.

Būrom̧ōj eo kom̧ kar en̄jake, rup bōro, jako eo, en̄jake ko rōkkōmetak kōn an rup lōke eo an jān bar juon, jerbal ko reļļap im kakkure an juon me em̧ōj aer ukōt jokkun am̧ mour—ij lewaj n̄an kom̧ aō kallim̧ur, Rilo̧mo̧o̧r ejeļā im iakwe kom̧. Kappukotļo̧k E. Ej am̧ kaenōm̧m̧an im kajoor, E enaaj jilkinwaj enjeļ ro An n̄an kotak eok. N̄aat eo metak ko am̧ renaaj jako, būrom̧ōj eo am̧ apdikļo̧k, ememļo̧k ko jab kōņaan naaj meļo̧kļo̧k? Ij jab jeļā. Bōtaab menin ijeļā: E ewōr an kajoor n̄an bōkļo̧k aiboojoj jān melkwarar in am en̄taan.

Ro jeiū im jatū jān Grand Blanc, Michigan, kōn tōmak ko aer rekajoor ilo Jisōs Kraist, ippān peran eo aer im aer jab ļōmņak kōn er make, ro rekar bōk im naaj, ilo wiik ko im allōn̄ rej pedo tok, rej bōk eļapļo̧k iakwe im tūriam̧o̧ an Rilo̧mo̧o̧r eo.

Ilo am̧ wōnm̧aanļo̧k n̄an likūt am̧ lōke ilo E, kōdo̧ ko am̧ remarok im en̄taan būrom̧ōj ilo bon̄ naaj oktak n̄an kōmejaaļaļ ko an lan̄lōn̄ im aenōm̧m̧an ilo meram in jibbon̄. “Am Būrom̧ōj enaaj oktak n̄an lan̄lōn̄. … Am lan̄lōn̄ [ejjeļo̧k] juon enaaj bōke jen kwe.” Iien jab in enaaj itok. Ij kam̧ool bwe enaaj itok.

Iakwe in Pinmuur eo an Jisōs Kraist maron̄ loe ilo jekjek ko reppen, ak jej aolep aikuji pinmuur in jouj eo an ad Rilo̧mo̧o̧r. Būreejtōn Dallin H. Oaks ekar katakin: “Kōn en̄taan in pinmuur eo An ilo mour in, ad Rilo̧mo̧o̧r emaron̄ kaenōm̧m̧an, kemour, im kōkajoorļo̧k aolep m̧aan im kōrā aolep jikin, bōtaab ij tōmak Enaaj āindein wōt n̄an ro me rej pukōt E im kajjitōk kōn jipan̄ eo An. Rijilōk James eaar katakin, “Kōttāik kom̧ im̧aan mejān Irooj, im enaaj koutiej kom̧” ( Jemes 4:10 ). Jej karbōb n̄an kōjeraam̧m̧an eo n̄e jej tōmak ilo E im jar kōn jipan̄ eo An.”

Ikar bōk mālim jān eo m̧ōtta jitōnbōro im emeritus Ritōl Eutiej Jiljilimjuonn̄oul, Elder Robert E. Wells, kiiō 97 iiō dettan, n̄an kwaļo̧k en̄jake in an elōn̄ļo̧k jān 60 iiō ko remootļo̧k.

Ke ekar jokwe ilo Paraguay ilo 1960 eo im kar jerbal āinwōt juon internation banker, Robert Wells, ekar 32 an iiō, im kōrā eo ippān, Merly, ekar juon pilot in ruo baļuun, kelo̧k jān Uruguay n̄an Paraguay. Ioon kōdo̧ ko remmijel, Rober im Meryl raar jab lo ļo̧kjeņ im jab maron̄ kōnono ilo retio n̄an doon. Robert ekar m̧ōkaj an jok, ijo ekar jeļā kōn kūrāāj eo an baļuun eo waan lio pāleen. Jim̧or lio pāleen ak ro ruo m̧ōttan raar keļo̧k ippān raar mour. Ro nejin, ilo kapijuknen ilo Asunción, dettaer raar jimjuon, ļalem, im ruo iiō.

Elder Wells ekar kōnono kōn būrom̧ōj eo an:

“Naan ko rejjamin naaj bwe ilo kwaļo̧k metak eo me ekar kobrak eō, bōk en̄jake ko aō im kamej en̄jake ko aō. Kar jab maron̄ bōjrak jān aō jan̄ kōn aō būrom̧ōj. N̄an kōm̧m̧an bwe en nana ļo̧k, ke ļōmņak eo aō ekar kajjion̄ in ņa mejļan kile eo ekabūrom̧ōjm̧ōj bwe lio pāleō emej, ikar lo eō make en̄jake eļap ajļo̧k in bōd kōn en̄jake eo bwe n̄a eo ikar bōk eddo in kūrāāj eo.”

Robert ekar ņa ruōn make kōn an kar jab kōm̧m̧an bwe lukkuun kanooj etale baļuun eo im jab leļo̧k n̄an lio pāleen ebwe kōmeļeļe ko kōn kein ekkāke ko rem̧m̧anļo̧k. Ekar en̄jake e ekar bōd kōn jatiljek.

Robert ekar ba:

“Ļōmņak eo aō ekar marok. … Ikar pād—[kōn wōt ajri ro,] ejjeļo̧k juon men eļapļo̧k.”

“Ikar … jerwane ikdeelel eo aō n̄an wōnm̧aanļo̧k wōt.”

Ilo juon iien, Robert ekar jeraam̧m̧an kōn juon en̄jake em̧wilaļ ilo jetōb. Ekar keememej:

“Juon joteen, emaron̄ juon iiō tokālik, ke ikar bukwelōlō ilo jar, juon kabwilōn̄lōn̄ ekar waļo̧k. Ke ikar jar im akweļap n̄an Jema Ilan̄, ikar en̄jake āinwōt n̄e Rilo̧mo̧o̧r eo ekar itok n̄an turu im ikar ron̄ juon ainikien ej kōnono naan kein n̄an aō im n̄an lo̧jilin̄ū: ‘Robert, katok in pinmuur eo aō ekar kōļļāik jerawiwi ko im bōd ko am̧. Lio pāleem̧ ej jeorļo̧k am̧ bōd. Ro m̧ōttam̧ rej jeorļo̧k am̧ bōd. Inaaj kotak eddo eo am̧. …’

“Jān iien jab eo, eddo eo kōn bōd [im ebbweer] ekar jako jān n̄a. Em̧ōj lo̧mo̧o̧ren eō! Ekar m̧ōkaj aō meļeļe kajoor eo an Pinmuur eo an Rilo̧mo̧o̧r im … bwe ej kajju jerbal n̄an n̄a. … Ikar … en̄jake meram im lan̄lōn̄ eo āinwōt ikar jab jeļā kake m̧oka. Kar letok n̄an eō juon mennin letok jab bōke—mennin letok an jouj an Irooj. … Ikar jab karbōb n̄ane—ikar jab kōm̧m̧an jabdewōt n̄an tōllo̧ke, bōtaab Ekar letok mekarta.”

Ro jeiū im jatū, jemaron̄ ke kōm̧m̧an bwe jen aolep “kwojarjar ilo Kraist kōn jouj eo an Anij, kōn toorļo̧k bōtōktōk in Kraist … [ilo ejjeļo̧k] libijinjin, ekwojarjar.”

Ij kam̧ool kōn iakwe eo, tūriam̧o eo im jouj eo an ad Rilo̧mo̧o̧r im Ripinmuur. E ej mour. Jej ro An; jej armej in bujen ro. Ilo ad tōmak ilo E, ļoor E, im lōke E, Enaaj kotak kōj jān būrom̧ōj ko ad im jerawiwi ko ad. Innām, ilo mour in, ilo im̧weeo im̧ōn Jemād, jenaaj mour Ippān n̄an indeeo. Ilo etan Jisōs Kraist, amen.