Baam̧le eo Ej Dilepen Gospel eo an Jisōs Kraist

Katak eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata ej pedped ioon baam̧le. Aorōk in katak eo ad kōn baam̧le ej tampeļ. Kain̄i ko būki ijeņ rej kōmaron̄ kōj n̄an ro̧o̧lļo̧k āinwōt baam̧le ko indeeo n̄an im̧aan mejen Jemedwōj Ilan̄.

Ilo kar Eprōļ 2025 in kweilo̧k eo eļap, Būreejtōn Russell M. Nelson ekar kōjjeļā n̄an kalōk 200 tampeļ ko rōkāāl. Em̧m̧an ippān kōjjeļā kōn tampeļ ko rōkāāl ilo jemļo̧kin kajjojo kweilo̧k eo eļap, im jaar aolep m̧ōņōņō ippān. Ijoke, kōn an ļap nōm̧ba in tampeļ ko kiiō ilo wāween karōki im kōm̧m̧ani, ekkar bwe jen kadikļo̧k kōjjeļā ko kōn tampeļ ko rekāāl. Kōn menin, kōn mālim eo an Doulul eo an Jon̄oulruo Rijilōk ro, jeban kōjjeļā kōn jabdewōt tampeļ ko rōkāāļ ilo kweilo̧k in. Jenaaj wōnm̧aanļo̧k wōt n̄an kōm̧m̧ani kain̄i ko ilo tampeļ ko n̄an membōr ro an Kabun̄ in ilo aolepen peļaakin laļin, ekoba n̄āāt im ia eo n̄an kōjjeļā n̄an kalōk tampeļ ko rōkāāl.

Jidikin katak in aō me ij tin kwaļo̧k e ekar jeje ālkin mej eo an Būreejtōn Russell M. Nelson. Kiiō ālkin an jeje im kar kōmālim wiik m̧oktaļo̧k, ak inaaj kwaļo̧k wōt katak ko aō, kar im̧we jen Irooj.

Ilo Kean̄ eo an baam̧le, kar kōjjeļā kake 30 iiō remootļo̧k, ej kean̄ bwe “baam̧le eo ej ekkapit jān Anij” im “ej dilepen karōk eo an Rikōm̧anm̧an eo n̄an jipadpad eo n̄an mour indeeo an ajri ro Nejin.” Kōmij kwaļo̧k “bwe kien eo an Anij ej bwe ajri ro Nejin ren timo̧o̧n im wōrļok ioon laļ ejjan̄in oktak.” Im “kōmij bar kwaļo̧k bwe Anij eaar kakien bwe kajoor ko rekwojarjar n̄an ejaak mour rej aikuj kar jerbal ikōtaan wōt ļeo ak lio, Emōj kōmālimi āinwōt ļeo ak lio pālele.” Tōre eo- Elder Russell M. Nelson ekar katakin juon jarlepju in Brigham Young University, bwe baam̧le ej “kanooj aorōk n̄an karōk eo an Anij. … Ilo m̧ool, juon ian jipadpad eo an karōk in ej n̄an an baam̧le eo mour ijo ilōn̄tata.”

Kabun̄ eo an Jisōs Kraist jet iien jeļā kake āinwōt Kabun̄ eo ej pedped wōt ioon baam̧le. Aaet ej! Kadkad eo ad n̄an Anij im jibadbad eo an mour wabanban in ad kar kōmeļeļeik ilo naan ko an baam̧le. Gospel eo an Jisōs Kraist ej karōk eo an Jemādwōj Ilan̄ n̄an jeraam̧m̧an eo an ajri in jetōb ro Nejin. Em̧ool jemaron̄ ba bwe karōk eo an gospel eo ekar m̧oktata katakin n̄an kōj ilo ko̧o̧njeļ an juon baam̧le indeeo, kar kōjerbale ilo baam̧ļe ko ad ilo mour in, im jibadbad eo an kar karōke wōt ej n̄an ļōn̄aj ajri ro nejin Anij ilo baam̧le ko indeeo.

Jekdo̧o̧n ta jekjek eo an katak eo, ewōr jum̧ae. Ilo United States jej jorrāān jān juon dikļo̧k in m̧are im tim̧oņ im wōrļo̧k. Ium̧win enan̄in iturinļo̧k jibukwi iiō ko m̧ōttan eo an m̧ōko tōl jān ripālele ro em̧ōj andikļo̧k, im bar dikļo̧k ajri rej ļotak. M̧are ko im jon̄an ļotak an membōr ro an Kabun̄ in eļap aer em̧m̧an, bōtaab em̧ōj an bar dikļo̧k. Eaorōk bwe Armej ro Rekwojarjar ilo Raan Ko Āliktata rej jab jerwane meļeļe eo an jibadbad eo an m̧are im aorōk eo an ajri ro. En̄in ej jekļaj eo me jej kajjion̄ n̄ane. “Mour ijo ilōn̄tata ej jibadbad eo an juon baam̧le,” Būreejtōn Nelson ekar katakin kōj. “Jān wōt kain̄i in lo̧mo̧o̧r ko an gospel eo an Jisōs Kraist baam̧le ko remaron̄ bōk ijo eutiejtata.”

Dikļo̧k in m̧are im keotak rej meļeļe kaki kōn wūn ko ilo bwebwenato, ak aorōk ko im iminene ko an Armej ro Rekwojarjar ilo Raan ko Āliktata aikuj em̧m̧anļo̧k—jab ļoor—jekjek ko.

Ke ikar ļaddik 80 iiō ko remootļo̧k, ikar jokwe ilo jikin kallib eo an jibū im jim̧m̧aō ilo juon jekjek eo me enan̄in aolep men me raar waļo̧k ilo juon raan kar ium̧win tōl eo an baam̧le eo. Ekar ejjeļo̧k t.v. ak electronic ko jet n̄an kōm̧ad baam̧le eo jān m̧akūtkūt ko aer. Ilo jekjek eo juon, ilo jukjuk in pād eo ilo jikin kweilo̧k jejjo membōr ro rej en̄jake m̧akūtkūt ko an baam̧le rejjab m̧ūjkōk. Mour ilo jikin kweilo̧k ko im iaļ in ito itak ko rainin, kalimomo ko kōm̧m̧ani, im m̧ōkaj in leto letak meļeļe eo kar kapidodoikļok n̄an jodikdik ro n̄an watōk m̧ōko m̧weer jikin kiki wōt im jab joļo̧k iien ie im m̧ōn̄ā jān iien n̄an iien bōtaab edikļo̧k jikin bōk tōl kōn m̧akūtkūt ko aer jān jinen im jeman.

Kareel ko an jinen im jemān em̧ōj barāinwōt aer m̧ōjņo̧ļo̧k kōn wāween eo me elōn̄ wōt membōr ro an Kabun̄ in rej kōm̧m̧an ekkar n̄an jon̄an aer kōm̧m̧an jāān n̄an mour. Ilo iien ko etto, juon iaan kareel ko me raar kobaik baam̧le ko ekar en̄jake eo kōn apan̄ ippān doon ilo pukot juon kōttōpar an aolep—ko āinwōt ukōt juon jikin ejjeļo̧k kobban n̄an jikin kallib ak wia kake men jān e. Baam̧le eo ekar ejaak im kōm̧anm̧an n̄an kōjeraam̧m̧an eo an mour. Rainin, elōn̄ baam̧le ko ijelo̧kin aer kōjeraam̧m̧an ro jet, edikļo̧k jemdo̧o̧n im iaio̧ ko aer āinwōt juon baam̧le.

Ilo an kareel ko an m̧am̧a im baba ro m̧ōjņo̧ļo̧k, Armej ro Rekwojarjar ilo Raan Ko Āliktata ej pād wōt ippāer eddo eo jān Anij n̄an katakin ro nejier n̄an pojak n̄an jinekjej eo an baam̧le eo an indeeo (lale Katak im Bujen Ko 68:25). Elōn̄ iaad rej aikuj kōm̧m̧ane menin n̄e ejjab aolep baam̧le ko ad rej etto. Jepel, mej, im jab pād ippān doon rej men ko rej waļo̧k. Ikar en̄jake men jab in ilo baam̧le eo me ikar rittoļo̧k ie.

Jema ekar mej ke ekar jimjuon aō iiō, kōn menin ļeo im lio jatū im n̄a kar lale jān juon m̧am̧a eo emej pāleen. Ilo iaan jekjek ko repen tata, lin ekar būn m̧aanļo̧k wōt. Liin ekar make im būrom̧ōj, bōtaab katak eo an ekajoor kōn katak eo kōn Kabun̄ eo kōjepļaaktok ekar tōl kōm. Wāween an kar jar kōn jipan̄ in lan̄ n̄an lale ajri ro nejin, im liin ekar jeraam̧m̧an! Kar lale kōm ilo juon em̧ em̧ōņōņō me eo jinem ekar jab kowaan jeļā eo bwe emej eo jemām. Liin ekar katakin kōm bwe ewōr juon jemām im ewōr juon pāleen im kōm naaj aolep iien juon baam̧le kōnke kōn tampeļ m̧are eo aer. Jemām ekar jako ilo juon iien ejjab to kitien kōnke Irooj ekar kūri n̄an juon jerbal eoktak.

Ijeļā bwe elōn̄ baam̧le ko jet rejjab kanooj m̧ōņōņō, bōtaab aolep m̧am̧a ro ejjeļok rejtan maron̄ katakin kōn iakwe eo an Jemedwōj Ilan̄ im āliktata jeraam̧m̧an kōn juon m̧are ilo tampeļ. Kwomaron̄ kōm̧m̧ane men in! Karōk eo an Jemedwōj Ilan̄ ej kallim̧ur kōn menin n̄an aolep. Jej aolep kam̧m̧oolol kōn tampeļ m̧are im kōn kōjeraam̧m̧an ko renaaj itok kōn kar liāp āinwōt juon baam̧le indeeo. Āinwōt jinō, kōm kōņaan kōnono jān kallim̧ur eo an Liai n̄an ļaddik eo nejin Jekab bwe Anij “enaaj ukōti men en̄taan ko am̧ n̄an am̧ ļapļo̧k” (2 Nipai 2:2). Menin ej jerbal n̄an aolep baam̧le in Armej ro Rekwojarjar ilo raan ko Ālitkata, dedeļo̧k ak jab dedeļo̧k ilo iien in. Jej juon kabun̄ pedped ioon baam̧le.

Katak eo ad im tōmak eo ad ilo baam̧le ko indeeo rej kōkajoorļo̧k im kor kōj. Ijjamin naaj meļo̧klo̧k kallim̧ur eo an eo jJim̧m̧aō Harris, ke kōm kar ajri wōt im kar jokwe ilo jikin kallib eo an epaakeļo̧k Payson, Utah. Ekar letok juon naan ekabūrom̧ōjmōj bwe jema ekar mej ilo ijo ettoļo̧k Denver, Colorado. Ikar ettōrļo̧k n̄an ruum̧ in kiki eo im bukwelōlō turin peet eo, kōmaat aolepen būruō. Jim̧m̧a ekar ļoortok eō im kar bukwelōlō ituru im ba, “inaaj eo jemam̧.” Kallim̧ur in em̧m̧an ej juon waanjon̄ak ekajoor kōn ta eo jim̧m̧a emaron̄ kōm̧m̧ane n̄an kanne kōtaan eo ke ekar mej ak jako juon uwaan baam̧le eo.

Ro jinen ak jemān, jeļo̧krejtan ak m̧are—im ro jet, āinwōt būbū im jim̧m̧an ro me rej kōm̧m̧ane eddo jab in n̄an ajri ro—rej rūkaki ļapļap. Katak eo aer eļap kilaan tata ej kōn waanjon̄ak. Doulul an baam̧le ej juon jikin em̧m̧an n̄an kwaļo̧k im katak aorōk ko indeeo ko āinwōt aorōk eo an m̧are im ajri ro, jibadbad eo an mour, im m̧ool in wūnjen lan̄lōn̄. Ej barāinwōt jikin eo em̧m̧an tata n̄an katak katak ko rej raorōk an mour, ko āinwōt jouj, jeorļo̧k bōd, kōjbwebweik eok make, im aorōk in jeļāļo̧kjeņ im jerbal m̧ool.

Aaet, elōn̄ membōr ro an Kabun̄ in ewōr ro uwaan baam̧le eo ejitōnbōro me rejjab kaorōk aorōk ko an gospel in im kōtmene ko. Kain membōr ro rein rej aikuj ad iakwe im kōmman wa. Ilo jelet bar juon uwaan baam̧le, jej aikuj keememej bwe weppān eo jej pukote ejjab wōr jon̄an n̄an aikuj eo an jekjek ko an mour in. Katak eo eļap ilo Katak im Bujen Ko 138:57–59 ej kallim̧uri kōj bwe ukweļo̧k im eddōk ilo jetōb remaron̄ wōnm̧aanļo̧k ilo laļ eo an jetōb me ej itok ālkin mour in. Eo aorōkļo̧k, āinwōt doulul an baam̧le ko kōkajoorļo̧k doon, jej aikuj aolep keememej bwe jerawiwi ko im likjab ko renaaj waļo̧k an aolepād rej iiooni ilo mour in, maron̄ in meļo̧kļo̧ki kōn ukweļo̧k kōnke kōn aiboojoj im Pinmuur eo an Jisōs Kraist.

Ad Rilo̧mo̧o̧r Jisōs Kraist ej waanjon̄ak eo ad eļap tata. Jenaaj jeraam̧m̧an eļan̄n̄e jej ļōm mour ko ad ālkin katak ko An im kaarmejet an juon. Ļoor Kraist im ajeļo̧k kōj make ilo jerbal n̄an doon ej uno eo em̧m̧an tata n̄an jab ļōmņak juon make im makeļo̧k me kiiō ej āinwōt kanooj iminene kake.

Ro jinen im jemān ewōr barāinwōt juon aer eddo n̄an katakin ro nejier kapeel ko kōn jerbal ejenolo̧k jān pedped ko an gospel. Doulul in baam̧le ko rej koba ippān doon n̄e rej kōm̧m̧ani men ko raorōk ippān doon. Atke ko an baam̧le rej kalōk jemjerā ko an baam̧le. Baam̧le eo em̧ōņōņō ej en̄jake kajoorlo̧k in kōtaaan ko an baam̧le. Kāām, m̧akūtkūt ko an sport ko, im m̧akūtkūt ko rekam̧ōņōņō rej aorōk n̄an kobaik baam̧le ko. Baam̧le ko rej aikuj karōk reunion ko an baam̧le n̄an kakeememej rūtto ro, eo ej tōlļo̧k n̄an tampeļ.

M̧am̧a im baba ro rej aikuj katakin ajri ro ilo kapeel ko raorōk an mour, ekoba jerbal ilo meļan eo im m̧weo. Katak kajin ko ej juon kōppopo ewōr tokjān n̄an jerbal in mijenede im mour in raan kein. Rūkaki ro an unin katak kein remaron̄ ro jinen im jemān ak būbū im jim̧m̧a ro ak ro uwaan ro nukun baam̧le. Baam̧le ko rej eddōk n̄e rej katak āinwōt juon kumi ak ko̧o̧njeļ ippān doon ilo aolep men ko n̄ūrbōktak kaki n̄an baam̧le eo im ro uwaan.

Jet remaron̄ ba, “Ak ejjeļo̧k am iien n̄an jabdewōt iaer.” N̄an pukot juon iien n̄an kōm̧m̧ane ta eo elukkuun aorōk, elōn̄ m̧am̧a im baba renaaj lo bwe remaron̄ ukōt baam̧le eo aer n̄e renaaj aolep kune aolep techologies ko nejier. Kiiō, m̧am̧a im baba, keememej, ta eo ajri ro rej lukkuun kōņaan ilo iien m̧ōn̄ā in jota ej iien eo am̧ ippāer.

Kōjeraam̧m̧an ko reļļap rej itok n̄an baam̧le ko eļan̄n̄e rej jar ippān doon, bukwelōlō bon̄ im jibbon̄ n̄an leļo̧k kam̧m̧oolol kōn kōjeraam̧m̧an ko im jar kōn inepata ko. Baam̧le ko rej barāinwōt jeraam̧m̧an ilo aer kabun̄ jar ippān doon ilo iien jar ko im ilo iien nokon ko jet. Kadkad ko baam̧le rej barāinwōt kajoorļo̧k kōn bwebwenato ko an baamļe, ejaaki imminene an baam̧le, im kwaļo̧k en̄jake ko rekwojarjar. Būreejtōn Spencer W Kimball ekar kakeememej kōj bwe “bwebwenato ko reim̧we jān mour ko ad make im an ro jibūd im jim̧m̧ad rej katak ko rekajoor.” Ekkā aer wūnjen im̧we ko rem̧m̧an tata n̄an kōj im ro indeed.

Ij kam̧ool kōn Irooj Jisōs Kraist, eo ej Make Wōt Jitōnbōro Nejin Anij Jemād Indeeo. E ej kūr kōj n̄an ļoor iaļ in bujen eo me ej tōlļo̧k n̄an juon ippānn doon eo an baam̧le ilan̄. Kajoor ko an liāp an priesthood eo, kar tōl kōn kii ko kar kōjpeļaaktok ilo Kirtland Tampeļ, rej kobaik baam̧le ko n̄an indeeo (lale Katak im Bujen Ko 110:13–16). Rej kiiō kōjerbali ilo juon oran eo ej eddōkļo̧k an tampeļ ko an Irooj ilo aolepān laļ in. Menin em̧ool. Jen erom m̧ōttan, ij jar, ilo etan Jisōs Kraist, amen.