Kajejjet Būruōm̧ n̄an Jisōs Kraist: Mennin Letok Kwojarjar an Al in Būraimere
Al ko an Ajri rej katak ko n̄an rikaļoor ro an Jisōs Kraist, naan in kam̧ool ko n̄an tarlep in m̧ool eo an gospel eo kōjepļaaktok, im jar ko ejaaki āinwōt al.
Juon iaan kōjeraam̧m̧an ko an jerbal eo aō ilo Būraimere ej bwe ikar katak n̄an iakwe armej ro me ijjab kōnono kajin eo aer. Ikar lo lan̄lōn̄ ilo ekkeijelļo̧k ippān Rikwojarjar m̧ōtta kōn kwaļo̧k kajin eo an al rekwojarjar ko. Im eļap tata kōn al ko reļem waan an Būraimere, Jetōb Kwojarjar eo ekar ļe lōn̄in kabbōjrak ko an kajin im kar kobrak būruō kōn An unoojdikdik. Ilo ainikien ajri ro, iakwe eo an Anij im Nejin, Jisōs Kraist, kar kean̄ bwe m̧ool eo epidodo meļeļe im m̧wilaļ an jelet.
Mekarta ikar jab rūttoļo̧k ilo Būraimere, Jetōb eo ekar m̧ōkaj an katakin eō ekkwojarjar eo an al ko an, im raar erom m̧ōttan kabun̄ jar eo aō make. Al in Būraimere ko raar bōk juon kareel ekkwojarjar ilo mour eo aō im kar ļōn̄aj aō jetōb, kar katakin eō m̧ool ko indeeo, im kepaakļo̧k eō n̄an Rilo̧mo̧o̧r im n̄an gospel eo An.
Būreejtōn Dallin H. Oaks ekar katakin bwe “al al in jar ko ej juon iaan wāween ko rem̧m̧an tata n̄an katak katak eo an gospel eo kar kōjepļaaktok.” Naan ko rej m̧ool n̄an aolepād wōj bōtaab eļap tata n̄an ajri ro. Al in Būraimere ej juon iaan kein jerbal ko rem̧m̧an tata an Anij n̄an katōk ine in naan in kam̧ool ko ilo būruōn rikaļoor ro reddik tata an Rilo̧mo̧o̧r. Ro jinen im jemān, ritōl ro, im rūkaki ro rej leļo̧k ōn eo n̄an ine jab eo ilo aer kam̧ool im karuwanene naan in kam̧ool ko an ajri ro kōn aolep ta ko rej jeļā kōn Jemādwōj Ilan̄, Nejin, Jisōs Kraist, im Jetōb Kwōjarjar.
Ilo iiō kein jejjo rej jem̧ļo̧kļo̧k in jerbal eo aō, ikar joļo̧k iien al im katak jān al in Būraimere ko ilo aō kejekļo̧kjeņ kōn jejjo kajjitōk ko.
-
Ekōjkan an al ko an Būraimere maron̄ kar katak ilo iien ajri erom kajin ilo jetōb ajri ro remaron̄ kōjerbale n̄an kam̧ool kaki ilo aolepān mour ko aer?
-
Ekōjkan an al m̧ool ko an gospel eo jipan̄ ajri ro keememej Irooj āinwōt m̧ōttan bujen eo aer im kōpooj er n̄an kain̄i ko An?
-
Ekōjkan an al ko an Būraimere jipan̄ je kien an Anij ilo būruōn rikaļoor rein reddik tata?
Ke Būraimere ekar jino ilo 1878 eo, būreejtōn eo an kein kajuon, Aurelia Spencer Rogers, ekar loe bwe “al ekar menin aikuj.” Al eļakkar aolep iien men aorōk n̄an katakin ajri ro gospel eo. Al in Būraimere ko remaron̄ erom kajin ilo jetōb eo an juon ajri kōnke kōn ļam waan eo aer, melody ko epidodo keememej rej kwaļo̧k juon men n̄an m̧ool ko an gospel. Al kein ewōr ippāer maron̄ eo n̄an pād ippān ajri ro to̧o̧n wōt aer mour, erom m̧ōttan rikaļoor eo aer im juon wāween n̄an er n̄an kam̧ool kōn Rilo̧mo̧o̧r eo.
Katakin Katak eo an Jisōs Kraist Kōn Al
Al in Būraimere ko remaron̄ bar erom kein katakin ko an katak rekajoor. Jet al rej jiron̄ kōn bwebwenato ko kōn mour im jerbal in karejar eo an Rilo̧mo̧o̧r. Ko jet rej katakin bōnjen ko An, ko āinwōt An tōmak, An kōjatdikdik, im An iakwe em̧ool. Im al ko rekwojarjar tata rej kam̧ool kōn Pinmuur eo An ejjeļo̧k jem̧ļo̧kin im iakwe eo me ej itok jān jerbal eo an lo̧mo̧o̧r.
Rikanaan eo an Irooj, Būreejtōn Russell M. Nelson, ekar katakin: “[Al] emaron̄ bōktok juon kareel n̄an em̧m̧an eļļāļo̧k jān iien ko n̄e ajri ro rej ettōn̄ . … “[E] ewōr kajoor [eo] ej letok m̧ōn̄ā in jetōb. Ewōr ie kajoor in kōmour. Ewōr ie kajoor [eo] n̄an jipan̄ kōmeļak kabun̄ jar; ej kōtļo̧k bwe jen kejekļo̧kjeņ kōn Pinmuur eo an [Rilo̧mo̧o̧r] im Jepļaaktok eo an gospel eo kōn pedped in lo̧mo̧o̧r ko an im kain̄i ko ilōn̄ tata. Ej letok kajoor n̄an ad kwaļo̧k ļōmņak ko ad im kwaļo̧k naan in kam̧ool kōn m̧ool kwojarjar ko.”
M̧am̧a im baba, ritōl ro, im rūkaki ro, ad kijejeto ekitbuuj jipan̄ ajri ro bōk kōjeraam̧m̧an ko kallim̧ur kaki kōn katakin kōn jibadbad eo an m̧ool ko an gospel eo loi ilo al ko. Būreejtōn Nelson ekar bar katakin bwe “ajri ro remaron̄ katak katak eo n̄e rej katak n̄an al ainļo̧k wōt aer maron̄ katak katak eo ilo kūlaaj.” Al kein remaron̄ letok juon oran ekilep an katak ko me rej ejaak tōmak em ej jipan̄ ajri ro kwaļo̧k Rilo̧mo̧o̧r eo im jipan̄ er ejaake wujlepļo̧k n̄an gospel eo An.
Jeje ko rekwojarjar rej katakin bwe al ko an ro rejim̧we me rej itok jān bōro rej kam̧ōņōņō n̄an Rilo̧mo̧o̧r eo. Ej ļo̧kjeņ aō kōn lo̧udin̄din̄ eo me ainikien ko an rikaļoor ro reddik tata an Rilo̧mo̧o̧r eo ej bōktok. Ijeļā ke al in jar ko aer rej tōpar lan̄ āinwōt kakōļļe in tōmak ko rej akjoketok Jetōb Kwojarjar eo n̄an kapen m̧ool ko indeeo im kōmeraik im jouj kūr ro jet n̄an bōk kūr eo an ad Rilo̧mo̧o̧r n̄an ļoor E im ro̧o̧l n̄an m̧weo. Āinwōt an Būreejtōn Henry B. Eyring kar kakeememej kōj, ej ilo iien ko an en̄jake Jetōb eo bwe ewōr ippād kein kam̧ool kōn Pinmuur eo an Rilo̧mo̧o̧r ej jerbal ilo mour ko ad.
Je M̧ool eo ilo Bōro
Al in Būraimere ko remaron̄ juon kabwilōn̄lōn̄ ilo aolepān mour ko aer āinwōt rikaļoor me ajri ro nejid renaaj etal ie ļo̧k. Juon al ikar katak ke ikar jiljino iiō detta ekar wōr an kajoor n̄an pād wōt ippa—im maron̄ bar ro̧o̧ltok iiō ko tokālik ilo iien jokāālet ko, kapo, būrum̧ōj, ak lan̄lōn̄. Bōlen ilo iiō ko ad tokālik, naan in al ko ilo “I Will Follow God’s Plan” remaron̄ jerbal āinwōt juon emjak in jetōb me ej kōpan̄ijn̄ij kam̧ool eo an Rijilōk Paul kōn m̧ool in kallim̧ur ko an Anij n̄an kōj. Ak remaron̄ kakeememej kōj bwe kōnke Anij ej kōjparok kallim̧ur ko An, bujen ko An rej letok kaenōm̧m̧an im juon jikin kone im karuwaineneik kōj n̄an likūt ad kōjatdikdik im kam̧ool edim ioon Jisōs Kraist im ilo kajoor in pinmuur eo An.
Membōr ro rerūtto peļaakin laļ, ilo iien ko reppen, ekkā aer keememej im oktakļo̧k n̄an al in Būraimere ko raar katak ke raar ajri. N̄an elōn̄, al kein rekar ejaake tōmak ko aer ilo Jisōs Kraist im rekar jikin ko m̧oktata ekkā an ijo oktakļo̧k eo n̄an gospel eo An rekar ijjino. M̧am̧a im baba, ritōl ro, im rūkaki ro raar kōkkaajririik tōmak eo ilo iiō ko kōn katakin, al, im kam̧ool n̄an ajri ro kōn kea.
Juon sister ekar ba n̄an eō bwe ekar kaorōk al in Būraimere ko, im ālkin 20 iiō ko liin ej nebar kōn m̧ōkaj in oktakļo̧k eo an n̄an gospel eo an Jisōs Kraist. Bar juon membōr ekar kam̧ool bwe Būraimere ekar katōk juon ine in tōmak ke ekar dik im ekar wūn eo ekar maron̄ bar ro̧o̧ltok n̄an Kabun̄ eo an Irooj ke ear 30 jim̧a an iiō. Rilo̧mo̧o̧r ekar kallim̧ur, “Rikaenōm̧m̧an … enaaj katakin kom̧ men otemjej, im kakeememej men otemjej n̄an kom̧.” Al in Būraimere ko emaron̄ erom juon wāween me kallim̧ur ej kūrm̧ool.
Bar juon al in Būraimere ej kwaļo̧k kajoor eo an tōmak eļem waan im naan in kam̧ool ej jutak pen:
Ilo an ajri al, rej kwaļo̧k aer kōņaan juon rikaļoor im ekkatak jon̄ak ko an mour kōn bujen. Jetōb emaron̄ kōjerbal al n̄an kaddep m̧ool ko ilo būruer. Im juon iien, ajri ro remaron̄ kāālet in kajejjet im ukōtļo̧k būruier im mour ko aer n̄an Jisōs Kraist kōn kōm̧m̧an im kōjparok bujen ko rekwojarjar Ippān.
Keememej Bujen ko Ad im Kōppopo n̄an Kain̄i ko
Al kwojarjar ko maron̄ jipan̄ je katak eo an Kraist n̄an lowaan jetōb eo im kōpooj kōj n̄an bōk kain̄i ko An. Ej ekkeijele katak eo an Rilo̧mo̧o̧r n̄an ememļo̧kjen eo ad im ememļo̧kjen eo ad n̄an ļoor E.
Āinwōt ritōl ro an Būraimere, ewōr ippām iien eo em̧m̧an im eddo eo ekwojarjar n̄an kanooj lale bwe al ko ilo Būraimere ej katakin kōn lan̄lōn̄, kōn meļeļe katak eo, im kōn Jetōb. Menin ekoba karuwanene ajri ro n̄an kile ta eo rej en̄jake ilo aer al im jipan̄ er kile bwe en̄jake ko rej itok jān Jetōb Kwojarjar. Kijejeto kein rej jipan̄ kōpooj ajri ro nejid n̄an kain̄i ko rekwojarjar, āinwōt peptaij im kapene, barāinwōt im̧we ememļo̧k kōn bujen eo aer ilo aer aolep iien kōkāāle kallim̧ur ko aer n̄an Anij.
Ilo Kwojkwoj in Kijoone eo, ālkin an Rilo̧mo̧o̧r eo jino kwojkwoj eo, Matu ej je “Im ke em̧ōj aer al, rej diwōj im ilo̧k n̄an toļ Olive.” Kajjojo wiik, membōr ro raar peptaij im kapene an Kabun̄ eo kōjepļaaktok an Irooj, ekoba ajri ro raar peptaij rualitōk aer iiō, rej kōppopo n̄an bōk kwojkwoj eo an Irooj. Jān al al ko rekwojarjar, jarlepju in ajri ro nejin Anij em̧ōj letok n̄an er iien em̧m̧an n̄an kōpooj būruer n̄an kain̄i eo ekwojarjar n̄an bōk iooer Etan, n̄an keememej E aolep iien, im kōjparok kien ko An.
Naan in Kam̧ool in Ikkilōk eo
Ro m̧ōtta jitōnbōro, ij kam̧ool bwe al in Būraimere ko rej katakin m̧ool ko indeeo im katak eo me ej tōlļo̧k kōj n̄an Jisōs Kraist im gospel eo An. Ij kajjitōk ippāmi n̄an ļōmņak kōn ta pedped in m̧ool ko me rekar je ilo būruōmi kōn katak ko reļem waan an al kein im n̄an kam̧ool kōn m̧ool ko n̄an rikaļoor ro reddik an Rilo̧mo̧o̧r eo ilo ami katakin er naan eo em̧m̧an an gospel eo kōn al.
Ijeļā Anij ej Jemād, ilo iakwe eo An indeeo, kar jilkintok Eo Nejin Ejitōnbōro n̄an laļ in n̄an katakin kōj, n̄an kwaļo̧k n̄an kōj iaļ eo, im n̄an lo̧mo̧o̧ren kōj kōn Pinmuur eo An.
Ijeļā bwe mour eo im jerbal in karejar eo An rej m̧ool im raorōk n̄an n̄a. Jeje ko rekwojarjar rej obrak kōn bwebwenato in An kōmour, An jouj, im An kabwilōn̄lōn̄.
Ijeļā bwe Jemādwōj Ilan̄ ej ron̄ im uwaaki jar ko rem̧ool an ajri ro Nejin, jekdo̧o̧n ewi rūttoier, jekjek, ak kajin. E ej ron̄jake akweļap ko an būruōd.
Ij kam̧ool bwe ilo Getsemane, Jisōs ekar ineek eddo in jerawiwi ad, būrom̧ōj ko, im metak ko. E ekar m̧ōņōņō in en̄taan kōnke kōn iakwe eo An n̄an kōj im ekar kōm̧m̧an bwe en maron̄ pidodo ad jeorļo̧k bōd im bar ro̧o̧lļo̧k n̄an jikūd.
Ijeļā jej lukkuun ro nejin Anij, kar ejaak ilo nememein wōt E, jeraam̧m̧an kōn kōtmān ekwojarjar, im ruwanene in jepļaak n̄an mour Ippān n̄e jej kāālet in ļoor Jisōs Kraist.
Ijeļā bwe Jisōs Kraist ej waanjon̄ak eo ad eweeppān, im ilo ad ļoor E ilo jerbal, jeorļo̧k bōd, im iakwe ro jet, jej erom āinwōt E kajjojo raan.
Im ijeļā bwe tampeļ ko rekwojarjar an Irooj rej m̧oko Im̧ōn laļ in. Ilowaer, jej kōm̧m̧an bujen ko rekwojarjar, bōk jeraam̧m̧an ko ejjeļo̧k jem̧ļo̧kier, im ekkatak eļapļo̧k kōn E im en̄jake ao eo An. Tampeļ ej juon jikin ekkatak, aenōm̧m̧an, im kōpooj mour ko ad.
Ij kam̧ool ke kijejeto ko jej kōm̧m̧ani n̄an katakin im al al in Būraimere kein n̄an ajri ro nejid rejjab m̧ōttan ko rem̧m̧an an imminene in kabun̄ eo ad. Rej katak ko n̄an rikaļoor ro an Jisōs Kraist, kam̧ool n̄an m̧ool eo an gospel eo, im jar ko kar ejaaki āinwōt al. Al kwojarjar maron̄ rome Meran in Kraist n̄an ro rej ron̄jake im maron̄ lutakļo̧k n̄an būruōn rial eo. Ro m̧ōtta jitōnbōro, Jisōs ej kōņaan wōt bwe jen juon An meram. Ij lukkuun kam̧ool ilo āt kwojarjar eo etan Jisōs Kraist, amen.