Gospel eo an Jisōs Kraist Juon Karōk Em̧m̧an
Gospel eo em̧ōj an jepļaaktok ej bōktok kōttōpar im m̧ōņōņō n̄an eok ilo iaļ in am̧ ļo̧k n̄an mour indeeo
Meram in Kōjatdikdik,, jān Simon Dewey
Ke iaar jerbal āinwōt juon mijen ritōl ilo Japan jet iiō remootļo̧k, iaar intōrpiuik juon em̧m̧aan eo ej kab kobatok ilo Kabun̄ in juon iiō m̧oktaļo̧k im ekar lale n̄e emaron̄ bōk juon peba in mālim n̄an deļo̧n̄e tampeļ.
Ilo iien bwebwenato eo am̧ro, membōr in ekāāl eaar kōmeļeļeiki ewi jon̄an an kam̧m̧oolol kōn kōjeraam̧m̧an ko ej būki jen iiō eo ekar peptaij. N̄an n̄a, ej kwaļo̧k juon bujen lōke itok jen tōprak in an meļeļe gospel in, eo ekar katōt e. Eaar juon rikaļoor eo ekar oktak an Jisōs Kraist eo ekar en̄jake juon bōro in oktak eo ekajoor (lale Mosaia 5:2).
Ālkin intōrpiu eo, iaar ba n̄an district būreejtōn eo ewi aō kar en̄jake ke mijenede ro im membōr ro raar loe, im kar naajdik eō ilo jetōb, ekar juon em̧m̧aan eo eļap an aorōk.
Iaar ilbōk ke ij jeļā kōn em̧m̧aan in ilo an kar jino ekkatak ippān mijenede ro im itok n̄an jar, ekar juon homeless im ekar ioon jekjek ko an juon homeless. Būratōr in eaar ekkatak gospel in im an kar oktak allōn̄ ko ļo̧k ekar tōlļo̧k n̄an oktak eo an ekabwilōn̄ļōn̄, likūt e ilo juon iaļen mour in jetōb im kanniōk im lan̄lōn̄.
Gospel in eaar leļo̧k n̄an būratōr in juon pija eo ealikkar kōn jibadbad eo an mour eo an. M̧ool ko an gospel in reļam waan im raiboojoj raar bōktok n̄an e uwaak ko kōn kajjitōk ko raorōk an mour in. Kain kōjeraam̧m̧an rot in rej n̄an eok im aolep ro nejin Anij ilo gospel in an Jisōs Kraist.
Jibadbad eo an Mour in
Gospel eo an Jisōs Kraist em̧ōj an bar jepļaaktok kōn Rikanaan Josep Smith. Ilo naan in kam̧ool eo an āliktata n̄an Kabun̄ in, Būreejtōn M. Russell Ballard (1928–2023), kar–Rijipan̄ Jenkwan Būreejtōn eo an Doulul eo an Jon̄oulruo Rijilōk ro, ekar ba:
“Jejeļā wōn in Anij, jejeļā wōn in Rilo̧mo̧o̧r kōn wōt Josep. …
“… Ewi jon̄an ad jeraam̧m̧an n̄an jeļā ta eo jejeļā kōn jibadbad in ad mour, kōnke jej pād ijin, ta eo jej aikuj in kajjieon̄ kōm̧m̧ane im kadedeļo̧k ilo mour ko ad kajjojo raan.”
N̄an membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata, jeļā in ekitbuuj juon jeļaļo̧kjeņ kōn “karōk eo eweeppān” an Anij kōn lo̧mo̧o̧r, eo ej barāinwōt jeļā kake ej “karōk in m̧ōņōņō eo eļap,” “karōk in lo̧mo̧o̧r,” im “karōk in tūriam̧o kake” (Alma 42:8, 11, 15). Karōk eo an Anij “ebōk mennin ittiņo̧ an mour im men ko ejjeļo̧k ad jeļā kaki kōn ilju im jekļaj.” Eaorōk im ej io̧lepen ilo karōk in im jibadbad eo an mour in ej “katak eo an Kraist.”
Kōn gospel in, jej jeļā jej ro nejin Anij, eo kar jilkintok n̄an laļ in n̄an kajjieon̄ im pojak n̄an jerkakpeje (lale Katak im Bujen Ko 76:39). Jej jeļā kōn kien ko im rej kwaļo̧k n̄an “em̧m̧an jān nana” (2 Nipai 2:5). Jej jeļā jej pād ijin n̄an iakwe im jerbal im bwe em̧ōj an Rilo̧mo̧o̧r kūr kōj n̄an anjo̧ jen laļin im n̄an jipan̄ ro jet kōm̧m̧ane ejja menin wōt (lale Jon 16:33).
Ta eo Josep Smith ekar ņa etan “karōk eo em̧m̧an kōn gospel in an ad Irooj Jisōs Kraist” enaaj kōkajoorļo̧k kōj ilo raan ko reppen im bōktok eļap meļeļein im jibadbad n̄an kōj im ro jet.
Pokake im Kōjeraam̧m̧an ko
Anij eaar letok n̄an kōj anemkwoj bwe jen maron̄ bōk eddoin kāāļet ko ad make (lale Katak im Bujen Ko 101:78; bar lale 2 Nipa 2:16). Āinwōt m̧ōttan “jum̧ae ilo men otemjej”2 Nipai 2:11), Setan ekōņaan kapo kōj n̄an kojerbal anemkwoj in kāālet eo ad ilo bōd.
Ilo tōre in ad, Irooj Jisōs Kraist eaar kūr Rikanaan Josep Smith im “kar kōnono n̄an e jān lan̄, im kar leļo̧k n̄an e kien ko” (Katak im Bujen Ko 1:17). Irooj ej wōnm̧aanļo̧k wōt im kwaļo̧k kien ko An im n̄an rikanaan ro An rainin kōnke Ej kōņaan tōl kōj n̄an m̧ōņōņō eo an mour in n̄an aiboojoj eo an seletial ilo mour eo tok juon.
Kiin̄ Benjamin ej Kwaļo̧k n̄an riNiapi ro,, jān Gary L. Kapp
Katakin Katak ko Rem̧ool, jān Michael T.
Josep Smith ej Kwaļo̧k Naan, jān Sam Lawlor
Pokake kien ko an Anij eaikuj waļo̧k ilo ad wujlepļo̧k im iakwe n̄an E. Rilo̧mo̧o̧r ekar katakin, “Eļan̄n̄e kwōj yokwe eō, kōjparok kien ko aō” (Jon 14:15). Wāween eo ilo ad kwaļo̧k ad iakwe n̄an Irooj ej ilo kōjparok kien ko An ej kōjeraam̧m̧an bwe ej bōktok m̧ōņōņō im lan̄lōn̄ Katak im Bujen Ko 130:20–21).
Kōn juon erreim̧aanļo̧k eo ealikkar kōn mejen kajjik eo ad indeeo, jej jeļā bwe “men eo enaaj lukkuun kōm̧m̧an bwe [ad] mour wabanban en em̧m̧antata emaron̄ in lukkuun in jejjet kōn men ko renaaj kōm̧m̧an bwe mour eo [ad] indeeo en em̧m̧an tata eo emaron̄ waļo̧k!”
M̧ōņōņō ilo Iaļ in Am̧
M̧ōņōņō eo an juon eo ej kab oktak tok iaar ioone ilo Japan iiō ko ļo̧k kar loe gospel in em̧ōj an kar jepļaaktok an Jisōs Kraist kōn an tiljek koba mijenede ro im membōr ro. Eaar lo jibadbad eo an im kar kōļapļo̧k visōn eo an kōn karōk in m̧ōņōņō eo eļap, eo ekar bōktok n̄an e kōjeraam̧m̧an ko im m̧ōņōņō eo ekar ļōn̄aj e ilo mour in jetōb.
Elder Patrick Kearon jen Doulul eo an Jon̄oulruo rijilōk ro ekar katkain:
“Kōn wōt karōk in iakwe eo an Jemedwōj Ilan̄ n̄an kajjojo ro Nejin, im kōn mour in lo̧mo̧o̧r im mijen eo an ad Rilo̧mo̧o̧r, Jisōs Kraist, jemaron̄—im aikuj—armej ro relem̧ōņōņōtata ioon laļ in! Jekdo̧o̧n n̄e ļan̄ ko an mour in ilo lalin emakijkij an kainepata kōj, jemaron̄ ejaake juon wāween m̧ōņōņō im aenōm̧m̧an itulowa kōn kōjātdikdik eo ad ilo Kraist im ad meļeļe jepād ia ilo karōk in m̧ōņōņō eo aiboojoj.”
Ij lewaj aō kam̧m̧oolol, im naan in kam̧ool kake, kōn gospel eo em̧ōj an jepļaaktok an Jisōs Kraist im karōk in m̧ōņōņō eo eļap. Ij karuwaineneik eok n̄an bōk m̧ōttan leen gospel in im n̄an en̄jake eļapļo̧k m̧ōņōņō ilo iaļ in am̧ ļo̧k n̄an mour indeeo.