Anij Ej Pād Ippam̧ Iien Otemjej

Ke ikar rualitōk aō iiō, mijenede ro raar ioon bubu im juon nej jinō kōrā ilo iaļ eo. Ālkin am ekkatak kōn gospel eo, kōm aolep kar peptaij. Ilo 2020, mekarta, kōm ekar bōjrak jān am etal n̄an m̧ōnjar kōn wōt COVID. Kōm ekar bōjrak am tōmak

Ruo iiō remootļo̧k, iaar jab bar tōmak ilo Anij ak jeļā eļan̄n̄e E em̧ool. Juon raan ālkin jikuuļ, ikar kōņaan kijoone iaļ eo n̄an wia juon snack. Bōtaab juon ainikien ekar jiron̄ eō n̄an jab kijoone iaļ eo. Ikar bōjrak, im ruo wa raar itaak im̧aan wōt meja. Eļan̄n̄e iaar kijoone iaļ eo, wa ko remaron̄ in kar dibōj eō ak bōlen bōk mour eo aō. Iaar jeļā iien eo bwe Anij ekar jeļā kajjieō im kar iakwe eō. Men̄e Ijjab tōmak ilo E im jab etal n̄an m̧ōn jar tōre eo, Ekar iakwe wōt eō im kōjeparok eō.

Ikar jino aō bar riiti Bok in Mormon eo im jino in jeļā bwe ej naan an Anij. Ikar jino bar rool im etal in jar. N̄e ij etal n̄an jar, ij en̄jaake aeņōm̧m̧an, iakwe an Anij, im jipan̄ eo An. Ij loe bwe Ej pād ippa iien otemjej, im ej kam̧ōņōņōik eō.

Al in jar eo emmantata ippa ej “N̄a Nejin Anij” kōnke ej kakeememej eō bwe Jemedwōj Ilan̄ ej iakwe kōj im ej jipan̄ kōj. Ebarāinwōt em̧m̧an ippa eoon eo 2 Nipai 2:27, im ej kōnono kōn wāwein ad anemkwoj n̄an kālet ikōtaan jimwe im bwōd.

Elōn̄ allōn̄ ko remootļo̧k, ļaddik eo jatū eo aō ekar jino itok im jar ippa, ijoke ālkin jet iien ekar bōjrak. Ekar inepata kōn ta eo ro jeran im ro jet renaaj lōmņak kake e. Eaar ļōmņak bwe emenin kajookok n̄an etal n̄an m̧ōn jar eo am, ak ikar jiron̄ e bwe ejeļo̧k tokjen ta ko ro jeran rej ļōm̧ņaki. Ej ta eo Anij ej ļōm̧ņak ej eaorōk.

Baam̧le eo aō rejjab etal im jar. Ij make iaō im etal. Kōnke iaļ eo aō ejeļo̧k juon baj ej etal n̄an m̧ōn jar eo, ij etetal laļ 30 minit n̄an tōpar ijeņ. Baam̧le eo aō rej inepata kōn ta eo ro jet renaaj ļōmņake kōn er, ak ij ba bwe ejeļo̧k tokjen kōnke ijeļā menin em̧ool.

N̄e ij kobaļo̧k ippān ro jera, jet iien rej idaak ko̧pe. Im n̄e ij loe menin, jet iien ij kōņaan bar idaak ko̧pe. Ijoke ij kemeemej bwe Anij ej pād ippa. Ej dāpij peiū im ej jipan̄ eō. Ij ron̄ juon ainikien ej jiron̄ eō bwe in jab kōmmane menin, im ijeļā bwe Anij ej jipan̄ eō anjo ioon māllijon̄ kein.

N̄e in kar leļo̧k naan in rōjan̄ n̄an juon eo im ej pād ilo jekjek eo aō, in kar ba n̄an er bwe kolukkuun in jeraam̧m̧an, im eļap am̧ tōmak. Kwojjab make iaam̧ kōnke aolep membōr ro an Kabun̄ in im mijenede ro remaron̄ in lewaj n̄an eok naan in rōjan̄. Anij ej iakwe eok. Kwoj ļaddik im leddik ro Nejin, im E kōņaan jipan̄ eok.