Ālkin Mour In
Uwaak ko n̄an Jet Kajjitōk ko
Karōk eo an Jemedwōj Ilan̄ emaron̄ letok n̄an kōj errem̧aanļo̧k im aenōm̧m̧an kōn mour ālkin mej.
Kōmeļeļe jān Thomas Arnaud
Ta ej waļo̧k ālkin ad mej?
Bōlen en̄in ej kajjitōk eo ippān elōn̄ kabun̄. Uwaak eo epād ippād kōn wōt Jisōs Kraist im gospel eo An ekajoor. Mour in ejjab jemļo̧k eo. Kōn wōt an kar Jisōs Kraist jerkakpeje, jetōb ko ad renaaj bar koba ippān doon ippān ānbwinid, im jenaaj aolep jerkakpeje juon raan.
Aaet, ebar wōr jet meļeļe ko kōn mour ālkin mej me rej itok n̄an kōj jen kanaan ko raan kein me remaron̄ uwaaki kajjitōk ko jet ewōr ippād. Errein jet iaan kajjitōk ko, ippān jet uwaak ko rekadu.
Elmen ānbwin jetōb ko ad?
Jetōb ej men eo eaorōk, n̄an “eļapļo̧k an ekkwedik ak erreo” (Katak im Bujen Ko 131:7). Ābwin jetōb ej āinwōt ānbwinin rūtto.
Ewi laļ eo an jetōb?
Ta eo ej waļo̧k ilo laļ en an jetōb?
Ilubwiļjin men ko jet, jetōb ro raar bōk gospel eo kar ejaake er n̄an kwaļo̧k gospel eo n̄an jetōb ro raar jab bōk gospel in. Jetōb ro remaron̄ kāālet n̄an bōke ak jab bōke.
Ta jekjek in jetōb ko rej jerkapeje?
Ānbwin ko rekar jerkakpeje reban mej, rej kanniōk im dii, im reweeppān. Raiboojoj im rōm̧m̧an. “Ejjeļo̧k bar juon men eaiboojoj ļo̧k n̄an lale jān juon em̧m̧aan ak kōrā emōj an jerkakpeje.”
Ta eo ej waļo̧k ilo laļ en selestial?
Ro rej pād ilo laļ eo eutiej an selestial rej erom̧ Jemedwōj Ilan̄ im en̄jake juon lan̄lōn̄ eo ejjeļo̧k jemļo̧kin. Rej bōk aolep ta men ko ewōr ippān Jemed. Rej bōk koņaer ilo jerbal im aiboojoj eo An. Raar liāp ilo m̧are n̄an indeeo im kiiō rej mour ilo baam̧le ko indeeo, wōr make nejier ajri in jetōb indeeo.
Ak eita armej ro reban m̧are ilo mour in?
Jemedwōj Ilan̄ ejouj im tūriam̧o. “Irooj ekar kallim̧ur bwe ilo mour indeeo ejjeļo̧k kōjeram̧m̧an naaj bōbrae n̄an m̧aan im kōrā ro nejin ro rej kōjparok kien ko, rej m̧ool n̄an bujen ko, im ikdeleel n̄an kōm̧m̧ane ta eo ejim̧we.”
Jinō im jema rekar liāp ilo tampeļ, ak kiiō em̧ōj aer jepel. Wōn ro inaaj liāp ippāer?
Kwomaron̄ kar “ļotak ilo bujen” (āinwōt, ļotak ālkin an jinōm̧ im jem̧ōm̧ kar liāp ilo tampeļ), ak kwomaron̄ kar liāp ippān ro jinōm̧ im jem̧ōm̧ ilo tampeļ ālkin aer kar liāp n̄an doon. Ilo wāween in, kōjeraam̧m̧an ko am̧ rej pād wōt men̄e ro jinōm̧ im jem̧ōm̧ raar kāālet n̄an jepel im kar kāānjōļ e liāp eo aer.
Kāālet ko an ro jinōm̧ im jem̧ōm̧ eban jelet kōjeraam̧m̧an ko am̧. Men eo eaorōk ej bwe kwon tiljek wōt im pukot kōjeraam̧m̧an ko an tampeļ kōn kwe make. Jekdo̧o̧n baam̧le eo am̧, kwoj aikuj “lōke Irooj im pukot aenōm̧m̧an eo An,” jeļā bwe “Jemedwōj Ilan̄ enaaj lukkuun lale bwe kajjojo armej en bōk aolep kōjeraam̧m̧an ko an ej ikdeleel kaki im kāāleti.”
Ta eo ej waļo̧k n̄an armej ro rej bōk make mour?
Jejjab jeļā ta eo ej waļo̧k n̄an armej ro rej bōk make mour, im jeban ekajete er (ejjeļo̧k oktak, n̄an aolep armej). “Leļo̧k iakwe em̧m̧antata ro rejitenbōro, ritōl ro, im ro retijem̧ļo̧k, bōk mour ejjab aolep iien uwaak eo. …
“Ejjab jim̧we bwe juon armej en bōk make mour eo an. Ijoke, Anij wōt eo emaron̄ ekajete ļōmņak ko an armej, kōm̧m̧an ko, im jon̄an eddo ko an (lale 1 Samuel 16:7; Katak im Bujen Ko 137:9). …
“Ro ekar jako juon eo ejitenbōro ippān kōn bōk make mour remaron̄ lo kōjatdikdik im kōmour ilo Pinmuur eo an Jisōs Kraist.”