Meram Ilo Iien ko Aō Reppen

Jet iien ejjab to, iaar ioon jet men relukkuun pen. Jema im jinō rekar jepel, im jinō ekar jerbal ettoļo̧k. Iaar rūttoļo̧k ippān jibū—ej e eo ekar bōtok eō n̄an gospel in im Kabun̄ in. Ak iiō in, ekar mej ilo ejjeļo̧k kōtmāne.

Ej armej eo āliktata ikar ļōmņak en kar jab mej. Jet iien ij ļōmņak in kar mej m̧okta jen e kōnke ekar elukkun em̧m̧an an mour! Ekar jab kwaļo̧k an m̧ōjņo̧ im ekar aolep iien kōkajoor e im̧aan meja. Ij jab maron̄ ļōmņake mour e aō n̄e ejjab e.

Ālkin an mej, jet iien ij kōtmāne n̄e in kar bar mej. Iaar ļōmņak in bōk make mour eo aō. Ak iien eo wōt iaar etal n̄an m̧akūtkūt an jodikdik ro ilo stake ijo kōm kar ekkatak kōn karōk in lo̧mo̧o̧r.

Iaar jeļā kōn karōk in lo̧mo̧o̧r, ak bōlen jeļā eo aō edik kōn wōt ta eo ekar waļo̧k n̄an jibū. Ke ij ron̄jake, iaar ļōmņak, “ikar meļo̧kļo̧k kōjeraam̧m̧an ko kōn en̄taan eo an Jisōs Kraist kōn eō.”

Iaar kile bwe Jisōs Kraist ekar mej n̄an lo̧mo̧o̧ren eō. Ijjab aikuj bōk make mour eo aō kōn wōt jorrāān ko ij iooni. Karōk in m̧ōņōņō eo ej letok n̄an eō kōjatdikdik bwe imaron̄ bar lo jibū juon raan, kōnke mour ejjab jemļo̧k n̄e jej mej. Ij aikuj ļo̧ore Rilo̧mo̧o̧r eo bwe in maron̄ bar lo e.

Ālkin an kar jibū mej, eo rilikū ekar itok im jokwe ippa im ekar bōk eddoiū. Ro rilikū rej ro m̧ōtta rōm̧m̧antata, ak oktak ekar lukkuun pen wōt. Ij aikuj in kōm̧m̧ani aolep jerbal ko me jibū ekkā an kōm̧m̧ani. Ij aikuj kamejin mour eō make n̄an jikuuļ im loloor jake m̧weeo.

Bisop eo aō eaar aolep iien kōnono kōn un̄are peid make, kōn menin iaar pukote ilo Gospel Ļaibrāre. Ekar jipan̄ eō jeļā n̄an jutak kōn neeō make

Ij kōnono wōt ippān jema. Juon raan, kom̧ kar akweel. Ekar lukkuun pen ippa, ak em̧ōkaj an waļo̧k juon iien tūreep in tampeļ an jodikdik ro. Ke ij pād ilo tampeļ eo, iaar en̄jake aenōm̧m̧an. Ikar jab ļōmņak kōn jorrāān ko ilo m̧weeo. Ikar jab ļōmņak kōn illu eo aō ippān jema. Ikar ļōmņak kōn men ko me imaron̄ kar kōm̧m̧ane n̄an jipan̄ e. Ikar ļōmņak kōn kōm̧m̧ane juon waanjon̄ak em̧m̧an. Ikar ļōmņak kōn men ko an indeeo, kōn liāp ippān ro jinō im jema ilo tampeļ juon raan. Iaar pepe in joļo̧k aō bōd ippān jema kōn aō akweel ippān.

Iaar jeļā n̄an aolep iien mije wōt Jisōs Kraist im jemedwōj Ilan̄. Iaar bōk aō kajoor jen Er, im ij keememej bwe Raar kōjparok eō.

Meļeļe kōn karōk in lo̧mo̧o̧r eo, eļaptata Pinmuur eo an Rilo̧mo̧o̧r, ekar jipan̄ eō anjo̧ jen ļōmņak in bōk mour eo aō make. Ej jipan̄ eō en̄jake aenōm̧m̧an an mour in. Ej letok n̄an eō kōjatdikdik bwe imaron̄ ioon jibū ilo turājet ron̄ōl eo juon iien juon raan.

Jisōs Kraist ej unjen kōjatdikdik eo ilo mour eo aō men̄e ij ioon apan̄ ko. An iakwe n̄an eō eban jemļo̧k. E ej meram ilo mour eo aō. N̄e ej ļan̄ ak wōt, E ej pād ijeņ. E ej aō Rilo̧mo̧o̧r. E ej aō kapijuknen. E ej aō mour. E ej letok n̄an eō bwe in wōnm̧aanļo̧k wōt. E ej unjen bwe in mour.