Jipan̄ im Tōļ n̄an Ilju im Jekļaj eo Am̧

Ekar 17 aō iiō ke rikanaan, Būreejtōn Spencer W. Kimbaal (1895–1985), ekar lotok South Korea ilo 1975. Iaar loe e ilo juon kweilo̧k ijo bōlen 400 jodikdik in Korea ro rej kuk ippān doon im ron̄jake ainikien.

Būreejtōn Kimball eaar kwaļo̧k wāween an kar ekkatak jeje ko rekwojarjar im jar kajjojo raan jen ke eaar dik. Ekar kōnono kōn aorōk eo n̄an karōk men ko raorōk m̧oktata. Ekar ba jej aikuj pād ilo jemenere, kōppopo n̄an mijen im m̧are indeeo, im jerbale lo̧mo̧o̧r eo ad make. Ekar bar kwaļo̧k naan in kam̧ool eo an.

Naan ko an rikanaan eo ekar kōmeram aō kōļmenļo̧kjeņ. Ikar pād ilo high school, ak ekar jab itok limoū ilo men ko an jikuuļ. Ekar em̧m̧an ippa ikkure! Iaar ikkure jōkar n̄e ewōr aō iien im ekkā wōt aō ikkure jen ekkatak. Iaar jab juon rijikuuļ eo em̧m̧an. Ālkin ron̄jake naan eo an rikanaan eo, ekar em̧m̧an wōt jōkar ippa, ak iaar pepe n̄an karōk jet men raorōkļo̧k.

Imaron̄ kōm̧m̧ane ijo em̧m̧antata n̄an ekkatak. Imaron̄ jerbale juon mijen, liāp ilo tampeļ, im wōr juon baam̧le eo elem̧ōņōņō. Iaar jeļā bwe n̄e ikōņaan bōk juon ilju eo em̧m̧an, ij aikuj ļoor rikanaan eo—jekdo̧o̧n ta.

Kōn aolep iien ko rem̧m̧an im rapan̄ kwonaaj iooni, kwonaaj pād ilo EM̧M̧AN ilo am̧ ļoor tōl eo me rikanaan eo emour ej letok.

Iaar kōm̧m̧ane juon kallim̧ur n̄an jerbale juon mijen, ak ekar wōr juon kōjjeļā kōn jerbal in tariņae ilo South Korea. Ālkin high school, elōn̄ ļaddik ro raar deļōn̄e tariņae, kakūrm̧ool jerbal in tariņae eo aer, im m̧ōkaj aer pād ilo jikuuļ im ellolo jerbal. Ekar pen n̄an joļo̧k ruo iiō n̄an jerbal in mijenede. Ekar wōr wōt jejjo̧ elder in Korea iien eo.

Ke eaar 19 aō iiō, iaar dāpij wōt kallim̧ur eo aō im kar keppopo im kar jilkinļo̧k peba in mijen ko aō. Kar kūr eō n̄an jerbal ilo Korea Busan Mijen. Juon iiō tokālik, kar kāālet n̄a n̄an etaļ n̄an tariņae. Iaar inepata bwe ij aikuj kōbōjrak aō mijen.

Ke ej dedeļo̧k jerbal in tariņae eo aō jilu iiō tokālik, iaar en̄jake bwe ejjan̄in dedeļo̧k mijen eo aō. Aolep raar ba n̄an n̄a, “Em̧ōj am̧ kar jerbale juon mijen. Irooj emeļeļe jekjek eo am̧, jerbal ilowaan juon iiō EM̧M̧AN.”

Iaar kajjitōk ippān eo m̧ōtta em̧m̧an jān jemenere ta eo ij aikuj kōm̧m̧ane. Eaar ba bwe ejeļā ke imaron̄ bar jerbale bar juon iiō ilo mijen eo aō. Lōke eo an eaar letok n̄an eō peran im kapen bwe in jerbal eļapļo̧k. Iaar jerbale iiō eo kein karuo ilo mijen eo aō ilo Korea Seoul Mijen. Ilo tōre eo ke ij dedeļo̧k, ekar 25 aō iiō. Tokālik iaar m̧areik ejja eo m̧ōtta im kom̧ro kar liāp ilo Laie Hawaii Temple.

En̄jake in eaar katakin eō bwe kwonaaj pād ilo jokne men̄e men ko rejjab waļo̧k ilo wāween eo kwoj kōņaan. N̄e karōk im kōttōbar ko am̧ rekkar ilo ankilaan Irooj n̄an kwe, E enaaj jipan̄ eok ilo kāālet ko ilo mour eo am̧.

Men̄e iaar jab jeļā āinwōt juon jodikdik naaj kain rot mour eo aō, iaar lo bwe likūt men ko an jetōb m̧oktata ej kii eo n̄an tōprak—ejjab wōt ilo mour in, ak barāinwōt ilo mour eo ej itok.

Ilo iien eo kwaar peptaij, kwaar bōk menin letok eo an Jetōb Kwojarjar. Ilo am̧ mije im̧we ko kwoj būki, Jetōb Kwojarjar enaaj kōjparok eok im tōl eok ilo iaļ eo ejim̧we n̄an etal. Kwonaaj bar en̄jake ineem̧m̧an im aenōm̧m̧an.

Ilo am̧ keppopo n̄an ilju eo am̧, keememej in:

• Ekkatak jeje ko rekwojarjar.

• Wōnm̧aanļo̧k wōt im jar.

• Ļoor rikanaan eo.

• Pedped ioon Irooj.

Ke ikar iiō kaņe am̧, iaar ekkatak kōn m̧wiļ im paoktokin Rilo̧mo̧o̧r im elmen aō maron̄ erom āinwōt E. E eweeppān. Iban lukkuun āinwōt E ilo mour in, ak imaron̄ kajjieon̄ ijo imaron̄e, im imaron̄ em̧m̧anļo̧k n̄an kōm̧m̧ane āindein.

Ijeļā bwe Jisōs Kraist ej mour. Kōn wōt E, ewōr juon aō kōjatdikdik em̧m̧an kōn ilju—im kwomaron̄ barāinwōt!