Jen Kōnono kōn Jāān!

Jisōs ejeļā bwe elōn̄ men ko kwoj aikuji (n̄an waanjon̄ok, m̧ōn̄ā) im kōņaan (n̄an waanjon̄ok, ikkure ko). Ej katakin, “Kom̧win korļo̧k m̧weiuk n̄an kom̧ i lan̄, ijo dile im jo re jab kan̄i” (Matu 6:19–21). Elōn̄ wōt men ko jāān ej wiaiki rej jako, kōn menin ļōmņak kōn ta ko kwoj wiaiki.

Komaron̄ in ļōmņak/tiljōk kōn jāān ilo am̧ kōjenolo̧k aikuj ko am̧ jān kōņaan ko am̧. Ļōmņak ippam make, “Ij ke wiaiki menin kōnke Ij aikuji menin ak kōnke ij kōņaan menin?” Eļan̄n̄e kwojjab jeļā, kajjieon̄ kōttar juon allōn̄; ālkin an jemļo̧k, bar kajjitōk kajjitōk ko. Jān am̧ kōm̧m̧ane menin, kwonaaj maron̄ bōbrae jān wiaiki men ko ilo m̧akaj im kajjieon̄ in kam̧ōņōņō ro jet. Ijjelo̧kin, kwōnaaj kōmmani kāālet ko rejim̧we kōn n̄āāt ekkar n̄an kōjparok im n̄āāt n̄an wia.

Ilo bārabōļ eo kōn talent ko, Jisōs ej bwebwenato kōn juon maajta eo ej kajju leļo̧k oktak in jāān (ņaetan “talent” ko) n̄an ro rikarijeran jilu. Rikarijaran ro ruo rej koorļo̧k jāān eo kar leļo̧ke, im rikarijaran eo juon eaar kalbwin jāān eo an. Ke maajta eo ej bar rooltok, ej m̧ōņōņō ippān rikarijeran ro ruo raar koorļo̧k kapeel ko aer im jab m̧ōņōņō ippān rikarijeran eo eaar jab (lale Matu 25:14–30).

Āinwōt maajta eo ilo bārabōļ eo ekar leļo̧k kapeel ko n̄an ro rikarijeran, n̄e Anij ej kōjeraam̧m̧an eok kōn jāān, E ej kōtmāne am̧ kōjerbal jāān ko am̧ im kōjeraam̧m̧an eok make im ro jet. Ilo am̧ oņaake ro jet, kwoj kakūr m̧ool kien eo an Jisōs n̄an “yokwe ri turōm̧ im āinwōt kwe” (Mark 12:31).

EMMAN menin n̄an wia men ko rem̧m̧an, ak kwoj aikuj bar ļōm̧ņak kake aikuj ko am̧ make im ro jet m̧okta jen am̧ wia. Ilo am̧ ļōm̧ņak kōn aikuj ko an ro jet, Anij enaaj jipan̄ eok jeļā wāween kōjerbal jāān n̄an kōjeraam̧m̧an armej ro ilo mour eo am̧.

Eļan̄n̄e kwoj inepata bwe ejabwe am̧ jāān kōnke kwoj kōļļā juon mōttan jon̄oul, riiti naan in kaeņōm̧m̧an ko jān Anij: “Kom̧win bōktok aolepen m̧ōttan jon̄oul eo n̄an m̧ōn kakoņkoņ … im kom̧win mālejjon̄ eō kiiō … eļan̄n̄e Ijab kapeļļo̧k wūntō ko an lan̄ im lutōkļo̧k jeraam̧m̧an n̄an kom̧ m̧ae iien enaaj ejjeļo̧k aikuj” (Malakai 3:10). Eļan̄n̄e kwoj kōļļā juon mōttan jon̄oul, Anij enaaj kōjeraam̧m̧an eok eļapļo̧k jān jon̄an am maron̄ ļōmņak!

Komaron̄ in jab jeraam̧m̧an ilo men ko an kanniek—komaron̄ in jab bōk jāān eo kwoj kōņaan n̄an wiaki juon jōōt eo eļap wōneen kwoj kōņaan, kōn menin komaron̄ aikuj in karum̧wij ļo̧k ikitōltōl/ikireelel ko rejidimkij. Ak Irooj enaaj kōjeraam̧m̧an eok. Ālkin jet iien, kwonaaj loe an pidodo ļo̧k n̄an kōļļā juon mōttan jon̄oul, im jetōb eo am̧ enaaj maron̄ kijenmej ņae apan̄ ko am̧ kōn jāān.

Lōke naan ko an Būreejtōn Russell M. Nelson: “Ejjeļo̧k jon̄an n̄an an Rilo̧mo̧o̧r jipan̄ eok” (Okt. 2024 kweilo̧k eo eļap [Liaona, Nob. 2024, 122]). Ilo am̧ tiljek ilo kōjerbal jāān ko am̧ n̄an kakke aikuj ko am̧, oņaake ro jet, im kōļļā juon mōttan jon̄oul eo am̧, kwōnaaj loe juon iakwe em̧wilaļ ļo̧k n̄an Anij im ro jet im juon kam̧oolol kōn ta eo ewōr ippam̧.