Իմացեք, թե ով եք դուք իրականում

Մի քանի տարի առաջ մեր դուստրը նշանակալից փորձառություն ունեցավ իր միսիայի ընթացքում։ Նրա թույլտվությամբ, ես կիսվում եմ այդ շաբաթ նրա գրած նամակից մի հատվածով.

«Երեկ եկեղեցի վերադարձող անդամներից մեկը խնդրեց մեզ հնարավորինս շտապ այցելել իրեն։ Երբ մենք ժամանեցինք, տեսանք նրան հատակին ընկած՝ անզուսպ արտասվելիս։ Արցունքն աչքերին նա մեզ ասաց, որ կորցրել էր աշխատանքը, նրան վտարելու էին իր բնակարանից և կրկին անօթևան էր դառնալու»։

Մեր դուստրը շարունակում էր գրել. «Ես սկսեցի հանդուգն կերպով թերթել իմ սուրբ գրությունները՝ փորձելով գտնել մի բան, որը կօգներ նրան։ Անհրաժեշտ հատվածը փնտրելիս մտածեցի. «Ի՞նչ եմ անում»։ Սա այն չէ, ինչ Քրիստոսը կաներ։ Սա այնպիսի խնդիր չէ, որը ես կարող եմ լուծել, բայց նա Աստծո դուստրն է, որը իմ օգնության կարիքն ունի։ Ուստի, ես փակեցի սուրբ գրություններս, ծնկի իջա նրա կողքին և գրկեցի նրան։ Որոշ ժամանակ միասին արտասվում էինք, մինչև որ նա պատրաստ էր վեր կենալ և դիմակայել այս փորձությանը»։

Այս կնոջը մխիթարելուց հետո, մեր դուստրն օգտագործեց սուրբ գրությունները՝ օգնելու նրան հասկանալ իր աստվածային արժեքի իրականությունը և սովորեցնելու նրան մեր գոյության ամենահիմնարար ճշմարտություններից մեկը՝ մենք Աստծո սիրելի որդիներն ու դուստրերն ենք` մի Աստծո, որը կատարյալ կարեկցանք է ցուցաբերում մեր հանդեպ, երբ մենք տառապում ենք, և պատրաստ է օգնել մեզ, երբ սկսում ենք պայքարել։

Հատկանշական է, որ մեր միսիոներների կողմից ուսուցանվող վարդապետության առաջին ճշմարտությունն այն է, որ Աստված մեր սիրող Երկնային Հայրն է։ Յուրաքանչյուր հաջորդող ճշմարտություն հիմնված է մեր իրական էության հիմնարար ըմբռնման վրա։

Երեխաների միության գերագույն նախագահ Սյուզան Հ. Փորթերը սովորեցրել է. «Երբ գիտես և հասկանում ես, որ լիակատար սիրով սիրված ես՝ որպես Աստծո զավակ, ամեն ինչ փոխվում է։ Փոխվում է վերաբերմունքդ քո նկատմամբ, երբ սխալվում ես: Փոխվում է զգացողությունդ, երբ պատահում են դժվարություններ։ Փոխվում է Աստծո պատվիրանների մասին քո մտածելակերպը։ Փոխվում է քո տեսակետը մարդկանց մասին և հասկանում ես, որ կարող ես ինչ-որ բան փոխել կյանքում»։

Մենք տեսնում ենք այս փոփոխությունը, երբ կարդում ենք Մովսեսի փորձառության մասին՝ Աստծո հետ դեմ առ դեմ խոսելիս։ Այդ զրույցի ընթացքում Աստված բազմիցս Մովսեսին սովորեցրեց իր աստվածային ժառանգության մասին՝ ասելով. «Մովսես, … դու իմ որդին ես»։ Աստված բացատրեց, որ Մովսեսն Իր Միածնի նմանությամբ էր։ Մովսեսի համար հստակ դարձավ, թե ով էր ինքն իրականում, որ նա աշխատանք ուներ կատարելու, և որ նա սիրող Երկնային Հայր ուներ։

Այս փորձառությունից հետո հակառակորդը մոտեցավ նրան գայթակղելու և անմիջապես դիմեց նրան՝ ասելով. «Մովսես, մարդո՛ւ որդի»։ Սա հակառակորդի զինանոցի տարածված ու վտանգավոր գործիքներից մեկն է։ Մինչ մեր Երկնային Հայրը մշտապես սիրով հիշեցնում է մեզ, որ մենք Նրա զավակներն ենք, հակառակորդը միշտ փորձում է նսեմացնել մեզ, օգտագործելով մեր թուլությունները։ Բայց Մովսեսն արդեն հասկացել էր, որ ինքն ավելին էր, քան «մարդու որդի»։ Նա ասաց սատանային. «Ո՞վ ես դու։ Քանզի ահա, ես Աստծո որդի եմ»։ Նմանապես, երբ մենք բախվում ենք մահկանացու կյանքի մարտահրավերներին, կամ երբ զգում ենք, որ ինչ-որ մեկը փորձում է նսեմացնել մեզ, օգտագործելով մեր թուլությունները, մենք պետք է ամուր կառչենք այն գիտելիքից, թե ով ենք մենք իրականում։ Մենք պետք է հաստատում փնտրենք Աստծուց, այլ ոչ թե ուրիշներից։ Եվ երբ դա անենք, մենք նույնպես կարող ենք համարձակորեն հայտարարել. «Ես Աստծո որդի եմ»։

Չափահաս երիտասարդների համաշխարհային հոգևոր հավաքի ժամանակ մեր սիրելի նախագահ Ռասսել Մ. Նելսոնն ուսուցանել է. «Ուրեմն ո՞վ եք դուք։ Նախ և առաջ, դուք Աստծո զավակն եք, ուխտի զավակը և Հիսուս Քրիստոսի աշակերտը: Երբ դուք ընդունեք այս ճշմարտությունները, մեր Երկնային Հայրը կօգնի ձեզ հասնել ձեր վերջնական նպատակին՝ ապրելու հավերժ Իր սուրբ ներկայության մեջ»:

Պատահական չէ, որ հավանաբար ամենակրկնվող սուրբգրային հատվածում Աստված մեզ հիշեցնում է Իր հետ մեր հարաբերությունների մասին։ Այն բոլոր անուններից, որոնցով հնարավոր էր Նրան դիմել հաղորդության աղոթքում, Նա խնդրել է, որ իրեն անվանեն «Աստված, Հա՛յր Հավերժական»։

Երբ իսկապես իմանանք, թե ով ենք մենք, ավելի շատ կհավատանք, որ մեր սիրող Երկնային Հայրը մեզ համար ծրագիր է պատրաստել՝ կրկին Նրա մոտ վերադառնալու և Նրա հետ ապրելու համար։ Երեց Պատրիկ Քիրոնն ուսուցանել է. «Մեր Հոր գեղեցիկ ծրագիրը, այսինքն Նրա «հիանալի» ծրագիրը, նախատեսված է ձեզ տուն բերելու, այլ ոչ թե ձեզ դրսում պահելու համար: ․․․ Աստված անընդհատ հետևում է ձեզ»: Մի պահ մտածեք այդ մասին. մեր ամենակարող, սիրող Հայրը «անընդհատ հետևում է ձեզ»։

Անկախ նրանից, թե մեր աշակերտության ճանապարհին որտեղ ենք գտնվում, մեր կյանքը հիմնարար կերպով կփոխվի, եթե ավելի լավ հասկանանք, թե ով ենք մենք իրականում։ Թույլ տվեք առաջարկել երկու եղանակ, որոնցով կարող ենք խորացնել այս ըմբռնումը։