Нигүүлслийн төлөвлөгөө

Өнгөрсөн 4-р сард Сүм Көртландын ариун сүмийг худалдан авсан тухай баяртай мэдээг дуулгасны дараахан ерөнхийлөгч Рассэлл М.Нэлсон биднийг Сургаал ба Гэрээнүүдийн 109-р хэсэгт цэдэглэсэн Көртландын ариун сүмийн онцгойлон адислах залбирлыг судлаарай гэж уриалсан. Ерөнхийлөгч Нэлсон онцгойлон адислах залбирал нь “энэ эцсийн өдрүүдэд сорилтуудтай тулахад ариун сүм та биднийг хэрхэн сүнслэг байдлаар хүчирхэгжүүлдэг тухай заавар” болохыг хэлсэн.

Та 109-р хэсгийг судалснаар таны ойлгосон олон зүйл таныг адисалсан гэдэгт би итгэж байна. Энэ орой би бошиглогчийнхоо урилгыг дагаснаар мэдэж авсан хэдэн зүйлээ хуваалцъя. Намайг амар амгаланд хүргэсэн тэрхүү судлах зам надад Их Эзэн нигүүлсэнгүй бөгөөд бидний Тэнгэрлэг Эцэгийн авралын төлөвлөгөө үнэхээр нигүүлслийн төлөвлөгөө юм гэдгийг сануулсан.

“Шинээр дуудагдсан номлогчдод ариун сүмийн хишгээ аль болох хурдан хүлээн авч, боломжийнхоо хэрээр ариун сүмд байнга орж байхыг зөвлөд[гийг]” та нар мэдэж байгаа байх. Хишгээ нэгэнт хүртсэн бол тэд мөн “номлогчоор үйлчилж эхлэхийн өмнө ариун сүмийн …ажилтнаар үйлчилж болно.”

Номлогчийг Бэлтгэх Төв (НБТ) рүү орохын өмнөх тэр цаг нь ариун сүмийн гэрээний адислалуудыг дэлхий нийттэй хуваалцахаасаа өмнө тэдгээр гэрээний талаар илүү ихийг сурч мэдэхэд шинэ номлогчдод тусалдаг тул гайхалтай адислал болж болох юм.

Харин 109-р хэсгийг судалж байхдаа би ариун сүмд Бурхан шинэ номлогчдыг, үнэн хэрэгтээ бид бүгдийг ч мөн илүү ариун нандин арга замаар хүчирхэгжүүлдгийг мэдэж авсан. Илчлэлээр өгөгдсөн онцгойлон адислах залбиралдаа бошиглогч Иосеф Смит: “Таны үйлчлэгчид таны нэрийг гэрчлэхээр өргөөнөөс тань гарч ява[хад],” “дэлхийн агуу ихэс дээд[ийн]” мөн “бүх хүн,” “бүх ядуу, гачигдагсад … зовж зүдрэгсдийн” … “зүрх сэтгэл зөөлөр[нө]. … Тэдний сэжиг таавар үнэний өмнө зам тавьж өгөхийн тулд, мөн таны хүмүүс бүхний мэлмийд таашаалыг олж болохын тулд буюу; Таны үйлчлэгчид болох бид таны дуу хоолойг сонссон, мөн та биднийг илгээсэн гэдгийг дэлхийн бүх хязгаар мэдэж болохын тулд буюу” хэмээсэн.

Шинээр дуудагдсан номлогчийн хувьд “үнэний ачаар гадуурхал арилж”, “бүхний мэлмийд таашаалыг олж”, дэлхийд Их Эзэн тэднийг илгээсэн гэдгийг мэдүүлнэ гэдэг юутай сайхан амлалт вэ. Бидний хүн нэг бүрд энэ адислалууд гарцаагүй хэрэгтэй. Хөршүүд, ажлынхантайгаа харьцахад зүрх сэтгэл зөөлрөх нь юутай сайхан адислал вэ. Онцгойлон адислах залбиралд бидний ариун сүмд өнгөрүүлэх цаг бусдын зүрх сэтгэлийг хэрхэн зөөлрүүлэхийг тодорхой тайлбарладаггүй ч Их Эзэний өргөөнд байх цаг хугацаа биднийг Есүс Христ дээр болон Түүний нигүүлсэл дээр төвлөрүүлснээр зүрх сэтгэлийг маань хэрхэн зөөлрүүлдэгтэй холбоотой гэдэгт би итгэлтэй байна.

Көртландын онцгойлон адислах залбирлыг судалж байхдаа би, Иосеф Их Эзэнээс Сүмийн гишүүд, Сүмийн дайснууд, улс орны удирдагчид, дэлхийн улс үндэстнүүдэд нигүүлсэнгүй байхыг ахин дахин гуйсныг мэдээд гайхширсан. Үүний зэрэгцээ хувь хүнийхээ хувьд тэрээр Их Эзэнээс өөрийг нь санаж, хайрт Эммад нь болон үр хүүхдүүдэд нь нигүүлсэнгүй байхыг гуйсан.

Тэр өдрөөс долоо хоногийн дараа буюу 1836 оны 4-р сарын 3-ны Христийн амилсны баяраар Көртландын ариун сүмд Аврагч Иосефт болон Оливер Каудерид үзэгдсэн ба Сургаал ба Гэрээнүүдийн 110-р хэсэгт цэдэглэснээр, “би энэ өргөөг хүлээж авлаа, мөн миний нэр энд байх болно; мөн бибээр энэ өргөөнд өөрийн хүмүүст нигүүлсэлд өөрийгөө үзүүлэх болно” хэмээжээ. Тэр үед Иосеф юу мэдэрсэн бол оо. Нигүүлслийн энэхүү амлалт түүний хувьд онцгой учир агуулгатай байсан байх. Мөн ерөнхийлөгч Нэлсоны өнгөрсөн 4-р сард заасанчлан энэ амлалт мөн “өнөөгийн онцгойлон адислагдсан ариун сүм бүрд хамаатай.”

Бид Их Эзэний өргөөнд олон арга замаар нигүүлсэл олох боломжтой. Их Эзэн Израилд асар барьж, төвд нь “эвлэрүүлгийн таг” байрлуулахыг анх зарлиг болгосноос хойш ийм боломжтой болсон. Ариун сүмд бид байгуулсан гэрээнүүдээсээ нигүүлсэл олдог. Баптисмын гэрээнээс гадна эдгээр гэрээ нь биднийг Эцэг, Хүү хоёртой холбож, ерөнхийлөгч Нэлсоны заасан “еврей хэлэнд hesed гэ[гд]дэг” “онцгой хайр, нигүүлслийг хүртэх” боломжийг нэмэгдүүлдэг.

Бид гэр бүлтэйгээ үүрд мөнхөд лацдан холбогдох боломжоос нигүүлсэл олж болно. Ариун сүмд бид түүнчлэн Бүтээлт, Уналт, Аврагчийн цагаатгагч золиослол, мөн бидний Тэнгэрлэг Эцэгийнхээ оршихуйд дахин орох чадвар буюу авралын төлөвлөгөөний хэсэг бүр үнэхээр нигүүлслийн илрэл гэдгийг илүү тод томруунаар ойлгодог. Авралын төлөвлөгөө нь “нигүүлслийн төлөвлөгөө” учир үүнийг аз жаргалын төлөвлөгөө гэж хэлж болох юм.

110-р хэсэгт өгсөн Их Эзэний ариун сүмдээ нигүүлслээр Өөрийгөө харуулах болно гэсэн гайхалтай сайхан амлалтын төлөө би талархдаг. Мөн энэ нь биднийг Иосефын нэгэн адил нигүүлсэл хүсэн гуйх болгонд Их Эзэн хэрхэн Өөрийгөө нигүүлслээр үзүүлэхээ илчилсэнд би талархдаг.

109-р хэсэг дэх Иосеф Смитийн нигүүлслийн гуйлт нь ийн хүсэн гуйсных нь хариуд илчлэл өгөгдсөн анхны тохиолдол биш юм. Ариун төгөлд залуу Иосеф аль Сүм үнэн гэдгийг мэдэхийг хүсэн залбираад зогсохгүй “Өөр хэнд ч хандан нигүүлслийг хүлээн авах боломжгүй байсан тул нигүүлслийг хүсэн Их Эзэнд хандан залбирсан” гэдгээ бас хэлсэн. Ямартаа ч, зөвхөн Их Эзэний үзүүлж чадах нигүүлсэл түүнд хэрэгтэй байсныг хүлээн зөвшөөрсөн нь тэнгэрийн цонхыг нээхэд тусалсан. Тэр явдлаас хойш гурван жилийн дараа тэнгэр элч Моронай Иосефыг “Бүхнийг Чадагч Бурханд хандсан залбирал мөн даруухан гуйлтад өөрийгөө зориулан, миний бүх нүгэл бас тэнэглэлүүдийг уучилна уу” хэмээн залбирсны дараа ирэв.

Нигүүлсэл үзүүлэхийг гуйсны дараах илчлэл хүлээн авдаг энэ загварыг судруудаас элбэг харж болно. Инос өршөөл гуйн залбирсныхаа дараа л Их Эзэний дуу хоолойг сонсжээ. Лемонай хааны эцгийн хөрвөлт “би таныг мэдэхийн тулд бүх нүглээ орхих болно” хэмээн залбирснаар эхэлдэг. Бид яг ийм гайхалтай үйл явдлаар адислагдахгүй байж болох ч заримдаа залбирлын хариултаа авахгүй байгаа мэт санагдаж буй хүмүүсийн хувьд Их Эзэний нигүүлслийг эрэлхийлэх нь Ариун Сүнсний гэрчийг мэдрэх хамгийн хүчирхэг арга замуудын нэг билээ.

Ийм нэгэн зарчмыг Моронай 10:3–5-д маш сайхан заасан байдаг. Бид заримдаа чин сэтгэлээсээ залбирснаар Мормоны Ном үнэн эсэхийг мэдэх боломжтой гэдгийг заахдаа эдгээр шүлгийг товчлон ашигладаг. Гэхдээ ийн товчлох нь нигүүлслийн чухал үүргийг орхигдуулж болох юм. Моронай уг урилгаа “Та нар эдгээр зүйлийг уншихдаа … Адам бүтээгдсэнээс бүр та нар эдгээр зүйлийг хүлээн авах тэр цагийг хүртэл Их Эзэн хүмүүний үрсэд хэчнээн нигүүлсэнгүй байсаар буйг та нар санан мөн үүнийг зүрх сэтгэлдээ тунгаахыг та нарт ухуулъя би” гэж эхэлснийг сонсоорой.

Лацдах гэж байсан энэхүү цэдгийг нь уншаад зогсохгүй мөн “Их Эзэн хүмүүсийн үрсэд хэчнээн нигүүлсэнгүй” болох талаар Мормоны Ном юу илчилдгийг зүрх сэтгэлдээ тунгаан бодоорой хэмээн Моронай биднийг уриалсан. Их Эзэний нигүүлслийн талаар тунгаан бодох нь биднийг “Бурхан, Мөнхийн Эцэгээс, Христийн нэрээр, эдгээр зүйл үнэн эсэхийг асуух[ад]” бэлтгэдэг.

Бид Мормоны Номын талаар тунгаан бодохдоо: Алмагийн заасанчлан, Бурханы нигүүлслийн төлөвлөгөөний дагуу энэ дэлхий дээр амьдарч байсан хүн бүр амилуулагдаж, бүх зүйл өөрсдийн зохих мөн төгс хэлбэртээ сэргээгдэнэ гэдэг нь үнэхээр үнэн үү? Амюлекийн хэлсэнчлэн, Аврагчийн нигүүлсэл нь бидний төлөх ёстой байсан шударга ёсны бүх таагүй бодит шаардлагыг хангаж, оронд нь “[бид]нийг аюулгүйн гараар хүрээлж чадах” болов уу?

Алмагийн гэрчилсэнчлэн, Христ зөвхөн бидний нүглийн төлөө бус “өөрийн хүмүүсийг сул байдлуудынх нь дагуу хэрхэн халамжлахыг мэдэж болохын тулд” “өвчин, зүдгүүр[ийг]” тэвчсэн юм болов уу? Бенжамин хааны заасанчлан, Их Эзэн үнэхээр нигүүлсэнгүй тул үнэгүй бэлэг болгон “өөрсдийн талаарх Бурханы тааллыг мэдэлгүйгээр нас барсан тэдний, эсвэл үл мэдэн нүгэл үйлдсэн тэдний нүглүүдийг” цагаатгасан уу?

Лихайн хэлсэнчлэн, “Адам, хүмүүс оршиж болохын тулд унасан; мөн баяр баясгалантай байж болохын тул хүмүүс орш[дог]” уу? Түүнчлэн Исаиаг эш татан, Абинадайн гэрчилсэнчлэн, Есүс Христ “бидний зөрчлүүдийн төлөө шархадсан, тэрээр бидний алдсуудын төлөө зодуулан хөх няц болсон; бидний амар амгалангийн төлөөс түүний дээр байсан; мөн түүний ташуурын ормоор бид эдгэрсэн” гэдэг нь үнэхээр үнэн үү?

Хураангуйлбал, Эцэгийн төлөвлөгөө Мормоны Номд заасанчлан үнэхээр нигүүлсэнгүй юү? гэж асууж болох юм. Тийм ээ, Мормоны Ном дахь амар тайвныг өгөгч, найдвар төрүүлэгч нигүүлслийн сургаал үнэн гэдгийг би гэрчилж байна.

Гэсэн хэдий ч зарим хүн итгэн уншиж, залбирсан ч Моронайн амласнаар Тэнгэрлэг Эцэг “үнэнийг Ариун Сүнсний хүчээр та нарт мэдүүлэх болно” гэх хариултаа аваагүй байж болох юм. Олон жилийн өмнө, Мормоны Номыг анх хоёр ч удаа уншаад, залбирахдаа тодорхой хариулт даруй аваагүй хүний хувьд энэ нь ямар байдгийг би мэднэ.

Хэрэв ийм асуудал байвал “Их Эзэн хүмүүсийн үрсэд хэчнээн нигүүлсэнгүй” болохыг Мормоны Номд ямар олон арга замаар заасан талаар тунгаан бодоорой хэмээх Моронайн зөвлөгөөг дагана уу хэмээн би та нарыг урьж байна. Туршлагаасаа үндэслэн хэлэхэд, хэрэв та уг зөвлөгөөг дагавал Ариун Сүнсний амар амгалан таны зүрх сэтгэлд нэвтэрч, Мормоны Ном, мөн үүний заадаг нигүүлслийн төлөвлөгөө үнэн гэдгийг мэдэж, итгэж, мэдэрч чадна гэж би найдаж байна.

Би Эцэгийн нигүүлслийн агуу төлөвлөгөөний төлөө мөн үүнийг хэрэгжүүлэхэд Аврагч бэлэн байсанд талархаж байгаагаа илэрхийлж байна. Хэрэв бид Түүнийг эрэлхийлбэл Тэрээр Өөрийн ариун сүмд болон бидний амьдралын бүхий л хүрээнд Өөрийгөө нигүүлслээр харуулах болно гэдгийг би мэднэ. Есүс Христийн нэрээр, амен.