Id-Divinità u l-Pjan tas-Salvazzjoni
Peress li aħna għandna l-għarfien tal-verità dwar id-Divinità u r-relazzjoni tagħna Magħhom, aħna għandna l-aqwa mappa li jista’ jkollna għall-vjaġġ tagħna fil-mortalità.
I.
L- ewwel artiklu tal-fidi tagħna jiddikjara, “Aħna nemmnu f’ Alla, il-Missier Etern, u f’ Ibnu, Ġesù Kristu u fl-Ispirtu s-Santu.” Aħna ningħaqdu ma’ Kristjani oħra fit-twemmin tagħna fil-Missier, l-Iben u l-Ispirtu s-Santu, iżda dak li aħna nemmnu dwarhom huwa differenti minn kif jemmen ħaddieħor. Aħna ma nemmnux f’ dik li d-dinja Kristjana ssejħilha d-duttrina tat-Trinità Mqaddsa. Fl-Ewwel Viżjoni tiegħu, Joseph Smith ra żewġ personaġġi distinti, żewġ esseri, u dan wassal biex ġie ċċarat li t-twemmin li ħafna kienu jemmnu fih dak iż-żmien dwar Alla u d-Divinità ma kienx minnu.
B’ kuntrast għat-twemmin li Alla kien misteru inkomprensibbli li ma stajniex insiru nafuh aħna għandna l-verità li n-natura ta’ Alla u r-relazzjoni tagħna Miegħu hija xi ħaġa li nistgħu nkunu nafuha u hija l-muftieħ għal kull ħaġa oħra fid-duttrina tagħna. Fil-Bibbja nsibu t-Talba ta’ Interċessjoni meraviljuża ta’ Ġesù, fejn Huwa ddikjara li “Din hi l-ħajja ta’ dejjem, li jagħrfu lilek, Alla waħdek veru, u lil Ġesù Kristu, li inti bgħatt” (Ġwanni 17:3).
L-isforz biex aħna nsiru nafu lil Alla u l-ħidma Tiegħu beda qabel din il-ħajja mortali u mhux se jintemm hawn. Il-Profeta Joseph Smith għallem, “Se jgħaddi żmien mhux ħażin minn meta inti tkun għaddejt minn ġol-velu biex inti tkun tgħallimt … il-prinċipji kollha tal-eżaltazzjoni.” Aħna nkomplu nibnu fuq l-għarfien li aħna konna ksibna fid-dinja tal-ispirti primortali. Kien għalhekk, meta kien qed jipprova jgħallem lill-Iżraelin dwar in-natura ta’ Alla u r-relazzjoni Tiegħu ma’ wliedu, li l-profeta Isaija ddikjara, kif hemm miktub fil-Bibbja:
“Ma’ min se jxebbhu lil Alla, u liema xbiha se tqabblu miegħu? …
“Ma tafux? Ma smajtux jaqaw? Ma tħabbrilkomx sa mill-bidu? Ma fhimtux? Min waqqaf l-art? (Isaija 40:18, 21).
Aħna nafu li t-tlett membri tad-Divinità huma esseri separati u distinti. Aħna nafu dan mit-tagħlim mogħti mill-Profeta Joseph Smith: “Il-Missier għandu ġisem tad-demm u l-għadam, tanġibbli daqs tal-bniedem; l-Iben l-istess; iżda l-Ispirtu s-Santu m’għandux ġisem tad-demm u l-għadam, iżda huwa personaġġ ta’ Spirtu. Li kieku ma kienx hekk, l-Ispirtu s-Santu ma jistax jgħammar ġewwa fina” (D&C 130:22).
Rigward il-pożizzjoni suprema ta’ Alla l-Missier fid-Divinità, kif ukoll l-irwoli rispettivi li jwettaq kull personaġġ, il-Profeta Joseph spjega:
“Kull persuna li qatt rat is-smewwiet jinfetħu taf li hemm tliet personaġġi fis-smewwiet li jħaddnu l-imfietaħ tal-qawwa u li jippresedu fuq kulħadd. …
“… Dawn il-personaġġi … jissejħu Alla l-ewwel, il-Ħallieq; Alla it-tieni, il-Feddej; u Alla t-tielet, ix-Xhud jew it-Testatur.
“Huwa sewwasew id-dritt tal-Missier li jippresedi bħala l-Kap jew il-President, Ġesù bħala l-Medjatur u l-ispirtu s-Santu bħala t-Testatur jew ix-Xhud.”
II. Il-Pjan
Aħna nifhmu r-relazzjoni tagħna mal-membri tad-Divinità minn dak li hu żvelat lilna dwar il-pjan tas-salvazzjoni.
Mistoqsijiet bħal “Aħna minn fejn ġejjin?” “Għaliex qegħdin hawn?” u “Fejn sejrin?” huma mwieġba f’ dik li l-iskrittura ssejjaħlu “l-pjan tas-salvazzjoni,” “il-pjan kbir ta’ ferħ,” jew “il-pjan ta’ fidwa” (Alma 42:5, 8, 11). L-evanġelju ta’ Ġesù Kristu huwa fiċ-ċentru ta’ dan il-pjan.
Bħala wlied spirti ta’ Alla, f’ eżistenza li konna fiha qabel din il-ħajja mortali, aħna xtaqna li d-destin tagħna jkun il-ħajja eterna iżda ma stajniex navvanzaw aktar mingħajr ma ngħaddu minn din l-esperjenza tal-ħajja mortali mlibbsin ġisem fiżiku. Biex jipprovdilna dik l-opportunità, Missierna tas-Smewwiet ippresieda fuq il-Ħolqien ta’ din id-dinja, fejn, imċaħħdin milli niftakru dak li ġara qabel it-twelid mortali tagħna, aħna stajna nippruvaw ir-rieda tagħna li nżommu l-kmandamenti Tiegħu u niksbu l-esperjenza u nikbru permezz tal-isfidi l-oħra tal-ħajja mortali. Iżda waqt dik l-esperjenza mortali u b’ riżultat tal-Waqgħa tal-ewwel ġenituri tagħna, aħna jkollna nsofru l-mewt spiritwali billi ninqatgħu mill-preżenza ta’ Alla, nitħammġu bid-dnub u nsiru suġġett għall-mewt fiżika. Il-pjan tal-Missier antiċipa u pprovda modi kif aħna nistgħu negħlbu dan it-tfixkil.
III. Id-Divinità
Bl-għarfien tagħna tal-għan tal-pjan il-kbir ta’ Alla, ejjew issa nikkunsidraw l-irwoli rispettivi tat-tliet membri tad-Divinità f’ dak il-pjan.
Nibdew b’ tagħlima mill-Bibbja. Meta kien qed jikkonkludi t-tieni ittra tiegħu lill-Korintin, l-Appostlu Pawlu jagħmel din ir-referenza spontanja dwar id-Divinità tal-Missier, tal-Iben u tal-Ispirtu s-Santu: “Il-grazzja ta’ Sidna Ġesù Kristu, l-imħabba ta’ Alla u l-għaqda [jew is-sħubija] fl-Ispirtu s-Santu jkunu magħkom ilkoll” (2 Korintin 13:14).
Din l-iskrittura bibblika tirrappreżenta d-Divinità u tagħmel referenza għall-imħabba mill-aktar partikolari u mqanqla ta’ Alla l-Missier, il-missjoni ta’ salvazzjoni kollha ħniena ta’ Ġesù Kristu u s-sħubija tal-Ispirtu s-Santu.
Alla l-Missier
Kollox jibda b’ Alla l-Missier. Filwaqt li komparattivament aħna ftit nafu dwaru, dak li aħna nafu huwa deċiżiv biex aħna nifhmu l-pożizzjoni suprema Tiegħu, ir-relazzjoni tagħna Miegħu, u l-irwol Tiegħu li jidderiġi l-pjan tas-salvazzjoni, il-Ħolqien u kull ħaġa oħra li ġiet wara.
Kif kiteb il-Presbiteru Bruce R. McConkie ftit biss qabel ma miet: “Fl-aqwa u l-akbar sens tal-kelma, il-veru Alla ħaj huwa biss wieħed. Huwa l-Missier, l-Eloħim Setgħan, l-Esseru Suprem, il-Ħallieq u l-Mexxej tal-univers.” Huwa l-Alla u l-Missier ta’ Ġesù Kristu, kif ukoll tagħna lkoll. Il-President David O. McKay għallem li “l-ewwel verità fundamentali li ddefenda Ġesù Kristu kienet din, li jippresedi fuq kollox u fuq kulħadd hemm Alla l-Missier, Sid is-sema u l-art.”
Dak li aħna nafu dwar in-natura ta’ Alla l-Missier huwa fil-parti kbira minnu dak li nitgħallmu mill-ministeru u t-tagħlim tal-Iben Imnissel Waħdieni Tiegħu, Ġesù Kristu. Kif għallem il-Presbiteru Jeffrey R. Holland, waħda mill-għanijiet l-aktar importanti tal-ministeru ta’ Ġesù kien li jiżvela lill-bnedmin mortali “kif inhu Alla l-Missier Etern tagħna, … li jiżvela u jurina b’ mod personali l-vera natura ta’ Missieru, Missierna tas-Smewwiet.” Fil-Bibbja għandna xhieda appostolika li Ġesù kien “xbiha perfetta” tal-persuna ta’ Missieru (Lhud 1:3), li sempliċiment telabora t-tagħlim tal-istess Ġesù li “min ra lili ra lill-Missier” (Ġwanni 14:9).
Alla l-Missier hu Missier l-ispirtu tagħna. Aħna wliedu. Huwa jħobbna u dak kollu li jagħmel huwa għall-benefiċċju etern tagħna. Huwa l-awtur tal-pjan tas-salvazzjoni, u huwa permezz tal-qawwa Tiegħu li l-pjan Tiegħu jikseb l-għanijiet tiegħu għall-glorja eterna ta’ wliedu.
L-Iben
Għalina l-bnedmin mortali, l-aktar membru viżibbli tad-Divinità huwa Ġesù Kristu. Dikjarazzjoni duttrinali mill-aktar meraviljuża mogħtija mill-Ewwel Presidenza fl-1909 tiddikjara li Hu “l-ewwel wild fost l-ulied kollha ta’ Alla—l-ewwel wieħed li tnissel fl-ispirtu, u l-imnissel waħdieni fil-ġisem.” L-Iben, l-akbar fost kulħadd, ġie magħżul mill-Missier biex iġib fis-seħħ il-pjan tal-Missier—li jeżerċita l-qawwa tal-Missier biex joħloq dinjiet bla għadd (ara Moses 1:33) u jsalva l-ulied Alla mill-mewt permezz tal-Qawmien Tiegħu mill-Imwiet u mid-dnub permezz tal-Att tal-Fidwa Tiegħu. Dan is-sagrifiċċju divin jissejjaħ sewwasew “l-akbar avveniment fl-istorja kollha umana.”
F’ dawk l-okkażżjonijiet uniċi u sagri li fihom Alla l-Missier introduċa personalment lil Ibnu, Huwa qal, “Dan hu Ibni l-għażiż, lilu isimgħu” (Mark 9:7; Luqa 9:35; ara wkoll 3 Nephi 11:7; Joseph Smith—History 1:17). B’hekk, huwa Ġesù Kristu, Ġehova, il-Mulej Alla ta’ Iżrael, li jkellem lill-profeti u jitkellem permezz tal-profeti. Hekk ġara meta Ġesù deher lin-Nefiti wara l-Qawmien Tiegħu mill-Imwiet, Huwa introduċa lilu nnifsu bħala “l-Alla tad-dinja kollha” (3 Nephi 11:14). Huwa għalhekk li Ġesù ħafna drabi ikellem lill-profeti tal-Ktieb ta’ Mormon u lill-Qaddisin tal-Aħħar Jiem bħala “il-Missier u l-Iben,” titlu spjegat fl-espożizzjoni duttrinali ispirata tal-Ewwel Presidenza u l-Kworum tat-Tnax madwar 100 sena ilu.
L-Ispirtu s-Santu
It-tielet membru tad-Divinità huwa l-Ispirtu s-Santu, li nirreferu għalih ukoll bħala l-Ispirtu tal-Mulej u l-Farràġ. Huwa l-membru tad-Divinità li hu l-aġent tar-rivelazzjoni personali. Bħala personaġġ ta’ spirtu (ara D&C 130:22), Huwa jista’ jgħammar fina u jwettaq l-irwol essenzjali ta’ Dak li jikkomunika bejn il-Missier u l-Iben u l-ulied ta’ Alla fid-dinja. Ħafna passaġġi fl-iskrittura jgħallmu li l-missjoni Tiegħu hi li jixhed dwar il-Missier u l-Iben (ara Ġwanni 15:26; 3 Nephi 28:11; D&C 42:17). Is-Salvatur wiegħed li l-Farràġ jgħallimna kull ħaġa, ifakkarna kollox u jiggwidana lejn il-verità kollha (ara Ġwanni 14:26; 16:13). Għalhekk, l-Ispirtu s-Santu jgħinna nagħrfu bejn il-verità u l-gideb, jiggwidana fid-deċiżjonijiet importanti tagħna u jgħinna fl-isfidi tagħna fil-ħajja mortali. Huwa wkoll il-mezz li permezz tiegħu aħna nitqaddsu, jiġifieri li nitnaddfu u nissaffew mid-dnub (ara 2 Nephi 31:17; 3 Nephi 27:20; Moroni 6:4).
IV.
Għalhekk, kif tista’ tgħinna fl-isfidi tagħna llum li aħna nifhmu din id-duttrina żvelata b’ mod divin dwar id-Divinità u l-pjan tas-salvazzjoni?
Peress li aħna għandna l-għarfien tal-verità dwar id-Divinità u r-relazzjoni tagħna Magħhom, dwar l-għan tal-ħajja u n-natura tad-destin etern tagħna, aħna għandna l-aqwa mappa li jista’ jkollna għall-vjaġġ tagħna fil-mortalità. Aħna nafu lil min aħna nqimu u għalfejn aħna nqimu. Aħna nafu min aħna verament u x’ nistgħu nsiru (ara D&C 93:19). Aħna nafu min hu dak li jagħmel dan kollu possibbli, u nafu x’ għandna nagħmlu biex ingawdu l-barkiet eterni li nistgħu niksbu permezz tal-pjan tas-salvazzjoni ta’ Alla. Aħna kif nafu dan kollu? Nafu dan permezz tar-rivelazzjonijiet ta’ Alla lill-profeti Tiegħu u lil kull wieħed u waħda minna individwalment.
Biex aħna niksbu dak li l-Appostlu Pawlu ddeskriva bħala “il-milja ta’ Kristu” (Efesin 4:13) jeħtieġ minna li aħna jkollna ferm aktar milli sempliċiment għarfien. Lanqas hu biżżejjed għalina li nkunu konvinti mill-evanġelju; jeħtieġ li aħna naġixxu u naħsbu biex niġu kkonvertiti permezz ta’ dan. B’ kuntrast għall-istituzzjonijiet tad-dinja, li jgħallmuna li nsiru nafu xi ħaġa, il-pjan tas-salvazzjoni u l-evanġelju ta’ Ġesù Kristu jisfidana biex insiru dik ix-xi ħaġa.
Kif għallimna l-President Thomas S. Monson fl-aħħar konferenza ġenerali li kellna:
“Essenzjali għal dan il-pjan huwa s-Salvatur tagħna, Ġesù Kristu. Mingħajr is-sagrifiċċju tal-att tal-fidwa Tiegħu, kollox kien ikun għalxejn. Madankollu, mhux biżżejjed li aħna sempliċiment nemmnu fih u fil-missjoni Tiegħu. Jeħtieġ li naħdmu u nitgħallmu, infittxu u nitolbu, nindmu u nitjiebu. Jeħtieġ li nsiru nafu l-liġijiet ta’ Alla u ngħixuhom. Jeħtieġ li nirċievu l-ordinanzi tas-salvazzjoni Tiegħu. Huwa biss meta nagħmlu dan li aħna niksbu l-vera hena eterna. …
“Mill-qiegħ ta’ ruħi u bl-umiltà kollha,” iddikjara l-President Monson, “jiena nixhed dwar ir-rigal meraviljuż li huwa l-pjan tal-Missier għalina. Huwa l-uniku triq perfetta għall-paċi u l-hena kemm f’ din id-dinja kif ukoll fid-dinja li jmiss.”
Ningħaqad jien ukoll mat-testimonjanza tal-għażiż profeta u president tagħna. Jiena nixhed li aħna għandna Missierna tas-Smewwiet li tant iħobbna. Jiena nixhed li aħna għandna l-Ispirtu s-Santu li jiggwidana. U Jiena nixhed dwar Ġesù Kristu, is-Salvatur tagħna, li jagħmel kollox possibbli, f’ isem Ġesù Kristu, amen.