Negħlbu d-Dinja
Aħna ma negħlbux id-dinja f’ mument wieħed partikolari, iżda nagħmlu dan f’ bosta mumenti f’ ħajjitna li jispiċċaw biex jiddeterminaw l-eternità tagħna.
Bosta snin ilu, il-President David O. McKay irrakkonta esperjenza sabiħa li huwa kellu waqt li kien qed jivvjaġġa fuq dgħajsa fi triqtu lejn is-Samoa. Hekk kif kienet marret għajnu bih, hu qal “rajt f’ viżjoni xi ħaġa mill-aktar sublimi. Fil-bogħod,” huwa qal, “Jiena rajt belt bajda u sabiħa. …Siġar b’ frott delizjuż … u kull fejn tħares fjuri mill-isbaħ mimlijin ħajja. … Kien hemm grupp kbir ta’ nies resqin lejn il-belt. Kollha kemm huma kienu libsin mantar wiesa’ u abjad. … F’ daqqa waħda l-attenzjoni tiegħi … marret fuq il-mexxej tagħhom, u għalkemm jien stajt nara biss il-profil tiegħu … , mill-ewwel għaraftu li kien is-Salvatur tiegħi! Id- … dija ta’ fuq wiċċu kienet waħda mill-aktar glorjuża. … Il-paċi li kellu madwaru … kienet divina!”
Il-President McKay kompla, “Il-belt … kienet … il-Belt Eterna tiegħu; u n-nies li kienu mexjin warajh kienu se jmorru jgħammru hemmhekk fis-sliem u l-hena.”
Il-President McKay staqsa lilu nnifsu, “Min huma? Min huma dawn in-nies?”
Huwa spjega x’ ġara wara:
“Bħallikieku s-Salvatur qrali ħsibijieti, huwa weġibni billi wrieni b’ sebgħu kliem li kien hemm miktub f’ nofs ċirku li … deher fuq in-nies … miktub b’ ittri tad-deheb … :
“‘Dawn Huma Dawk Li Għelbu d-Dinja—
“Li Verament Reġgħu Twieldu mill-Ġdid!’”
Għal għexieren ta’ snin, jiena żammejt f’ moħħi l-kliem: “Dawn huma dawk li għelbu d-dinja.”
Il-barkiet li l-Mulej wiegħed lil dawk li għelbu d-dinja huma mill-aktar meraviljużi. Huma se jkunu “mlibbsin bl-abjad … u isimhom se jinkiteb fil-ktieb tal-ħajja.” Il-Mulej “se jistqarr isimhom quddiem il-Missier u quddiem l-anġli tiegħu.” Kollha kemm huma se jkunu jagħmlu “parti mill-ewwel resurrezzjoni,” jirċievu l-ħajja eterna, u “ma joħorġux iżjed” mill-preżenza ta’ Alla.
Huwa possibbli li aħna negħlbu d-dinja u nirċievu dawn il-barkiet? Iva, possibbli.
L-Imħabba għas-Salvatur
Dawk li jegħlbu d-dinja jiżviluppaw fihom imħabba assoluta għall-Mulej u għas-Salvatur tagħna, Ġesù Kristu.
It-twelid divin Tiegħu, il-ħajja perfetta Tiegħu, l-Att tal-Fidwa infinit Tiegħu fil-Ġetsemani u fuq il-Golgota, aċċerta l-Qawmien mill-Imwiet għal kull wieħed u waħda minna. Hu biss kapaċi, permezz tal-indiema sinċiera tagħna, inaddafna minn dnubietna, fejn jagħtina ċ-ċans li nerġgħu lura fil-preżenza ta’ Alla. “Aħna nħobbu, għax hu ħabbna l-ewwel.”
Ġesù qal, “Agħmlu l-qalb; jiena rbaħt lid-dinja.”
Aktar tard Huwa qal ukoll, “Jiena rrid li intom ukoll tegħlbu d-dinja.”
Aħna ma negħlbux id-dinja f’ mument wieħed partikolari, iżda nagħmlu dan f’ bosta mumenti f’ ħajjitna li finalment jispiċċaw biex jiddeterminaw l-eternità tagħna.
Dan jista’ jara l-bidu tiegħu f’ tifel ċkejken li jitgħallem jitlob u b’ mod riverenti jkanta, “Jien qed nipprova nsir nixbah lil Ġesù.” Dan ikompli hekk kif persuna tistudja l-ħajja tas-Salvatur fit-Testment il-Ġdid u tixtarr il-qawwa tal-Att tal-Fidwa tas-Salvatur fil-Ktieb ta’ Mormon.
Li aħna nitolbu, nindmu, nimxu wara s-Salvatur u nirċievu l-grazzja Tiegħu jwassalna biex nifhmu aħjar għalfejn aħna ninsabu hawnhekk u dak li għad nistgħu nsiru.
Alma ddeskriva dan b’ dan il-mod: “Seħħet bidla kbira f’ qalbhom, u huma ċekknu lilhom infushom u wrew il-fiduċja sħiħa tagħhom fil-veru Alla l-ħaj … U baqgħu fidili sat-tmiem.”
Dawk li jegħlbu d-dinja jafu li huma għad iridu jagħtu rendikont lil Missierhom tas-Smewwiet. Li aħna ninbidlu u nindmu b’ sinċerità minn dnubietna ma tibqax xi ħaġa li tirristrinġina iżda li tilliberana, għaliex “id-dnubiet bħall-iskarlatt … isiru bojod daqs is-silġ.”
Responsabbli lejn Alla
Dawk li jgħixu għad-dinja isibuha diffiċli li jħossuhom responsabbli quddiem Alla—bħal tifel li jieħu l-opportunità li jagħmel li jrid fid-dar tal-ġenituri tiegħu meta huma ma jkunux id-dar, fejn huwa ma joqgħodx jaħseb dwar il-konsegwenzi ta’ meta l-ġenituri jerġgħu lura d-dar 24 siegħa wara.
Id-dinja hi aktar interessata li tissodisfa l-bniedem naturali milli biex trażżnu.
Aħna ma negħlbux id-dinja permezz ta’ xi invażjoni globali iżda permezz tal-battalji privati u personali tagħna, fejn aħna jkollna nikkumbattu mat-taqbid u t-tentazzjoni li jkollna ġewwa fina.
Li negħlbu d-dinja jfisser li ngħożżu l-akbar kmandament: “Għandek tħobb lill-Mulej, Alla tiegħek, b’qalbek kollha, b’ruħek kollha, b’moħħok kollu, u bil-qawwa tiegħek kollha.”
Il-kittieb Kristjan C. S. Lewis iddeskriva dan b’ dan il-mod: “Kristu qal ‘Offru lilkom infuskom. Jiena ma rridx daqstant mill-ħin tagħkom jew mill-flus tagħkom jew mill-ħidma tagħkom: Jiena rrid lilkom.’”
Li negħlbu d-dinja ifisser li nżommu l-wegħdiet ta’ Alla—il-patti tagħna tal-magħmudija u tat-tempju u l-ġurament tagħna ta’ fedeltà sħiħa lejn is-sieħba eterna tagħna. Meta aħna nkunu qed nippruvaw negħlbu d-dinja aħna naslu biex kull ġimgħa b’ umiltà nieħdu sehem fis-sagrament, nitolbu għall-maħfra u nwiegħdu li “niftakru fih u nżommu l-kmandamenti tiegħu” sabiex “dejjem ikollna l-Ispirtu tiegħu magħna.”
L-imħabba tagħna għal jum is-Sabbath ma tintemmx meta noħorġu mill-kappella, iżda pjuttost hemmhekk tiftħilna l-bieb għal jum sabiħ ta’ mistrieħ u studju u għal jum li fih ngħinu lill-membri tal-familja tagħna u lil kull min ikollu bżonna. Minflok ma’ nieħdu n-nifs wara li jgħaddi l-ħin tal-knisja u b’ ġirja mmorru quddiem it-televiżjoni biex inkunu bil-lest għal meta tibda l-logħba, ħsibijietna għandhom jibqgħu fuq is-Salvatur u fil-jum imqaddes Tiegħu.
Id-dinja qiegħda tiġi kontinwament influwenzata minn vuċijiet attraenti u seduttivi.
Li negħlbu d-dinja jfisser li nafdaw f’ dak il-leħen li jwiddeb, ifarraġ, idawwal u jwassal il-paċi “mhux kif tagħtih id-dinja.”
Altruwiżmu
Li negħlbu d-dinja jfisser li naqdu lil ħaddieħor, billi niftakru t-tieni kmandament: “Il-kbir fostkom għandu jkun il-qaddej tagħkom.” L-hena tal-maħbuba tagħna hija aktar importanti mill-ħwejjeġ li nieħdu gost nagħmlu. L-akbar priorità tagħna għandha tkun li ngħinu lil uliedna jħobbu lil Alla u jżommu l-kmandamenti Tiegħu. Minn jeddna aħna naqsmu l-barkiet materjali tagħna permezz tad-dieċmi, tal-offerta tas-sawm, u billi naqsmu li għandna ma’ min hu fil-bżonn. Hekk kif aħna nżommu lilna nfusna ffukati fuq id-direzzjoni divina, il-Mulej jiggwidana lejn dawk li aħna nistgħu ngħinu.
Id-dinja tibni l-univers tagħha madwarha stess, u bi kburija tiddikjara: “Araw kemm jien għandi aktar mill-ġar tiegħi! Araw x’ għandi jien! Araw kemm jien importanti!”
Id-dinja malajr tirrita ruħha, titlef l-interess f’ ħaddieħor u titlob wisq mill-oħrajn kif ukoll tħobb li tikseb l-ammirazzjoni tal-oħrajn, filwaqt li meta aħna negħlbu d-dinja aħna nimtlew bl-umiltà, bl-empatija, bil-paċenzja u bil-kompassjoni għal min hu differenti minna.
Sigurtà fil-Profeti
Li negħlbu d-dinja jfisser dejjem li aħna se nemmnu f’ xi affarijiet li d-dinja se twaqqagħhom għaż-żuffjet. Is-Salvatur qal:
“Jekk id-dinja tobgħodkom, kunu afu li lili bagħditni qabel ma bagħdet lilkom.
“Kieku intom kontu tad-dinja, id-dinja kienet tħobbkom bħalma tħobb dak li hu tagħha.”
Dalgħodu il-President Russell M. Nelson qal, “Il-vera dixxipli ta’ Ġesù Kristu huma lesti li jkunu differenti min-nies l-oħra tad-dinja u ma jiddejqux jgħidu dak li jemmnu.”
Dixxiplu ta’ Kristu ma jallarmax ruħu jekk xi powst dwar it-twemmin tiegħu ma jirċevix xi 1,000 lajk jew xi ftit kummenti sbieħ.
Li negħlbu d-dinja jfisser li ninkwetaw anqas dwar il-kuntatti tagħna onlajn u aktar dwar il-kuntatt divin tagħna ma’ Alla.
Alla jgħinna nibqgħu ‘l bogħod mill-periklu hekk kif aħna nimxu wara l-gwida tal-profeti u appostli ħajjin Tiegħu.
Il-President Thomas S. Monson qal: “Id-dinja taf tkun … diffiċli. … Hekk kif imorru ġewwa t-tempju, … Aħna nkunu kapaċi nissaportu kull prova li ngħaddu minnha u negħlbu kull tentazzjoni. … Aħna niġġeddu u niffortifikaw ruħna.”
B’ akbar tentazzjoni, distrazzjoni u tagħwiġ tal-verità d-dinja tipprova dejjem tqarraq b’ dak il-bniedem li jkun qed jipprova jgħix fidil billi tħeġġu jinjora l-esperjenzi spiritwali mill-aktar sinifikattivi tal-passat u jibda jħares lejhom bħala sempliċiment bluha li wasslitu biex jiġi mqarraq.
Fil-mumenti li fihom aħna nħossuna b’ qalbna maqtugħa, li negħlbu d-dinja jfisser li niftakru f’ mumenti li fihom ħassejna l-imħabba u d-dawl tas-Salvatur. Il-Presbiteru Neal A. Maxwell spjega waħda minn dawn l-esperjenzi b’ dan il-mod: “Jiena ġejt imbierek, u jiena kont naf li Alla jaf li jiena naf li ġejt imbierek.” Għalkemm għal mument nafu nħossuna minsijin, aħna ma ninsewx.
Li negħlbu d-dinja ma jfissirx li aħna ngħixu ħajja magħluqin ġo globu, protetti mill-inġustizzji u d-diffikultajiet tal-ħajja mortali. Pjuttost, ifisser li jkollna għarfien akbar tal-fidi, li tressaqna viċin is-Salvatur u l-wegħdiet Tiegħu.
Filwaqt li l-perfezzjoni mhux se niksbuha f’ din il-ħajja, jekk aħna nippruvaw dejjem negħlbu d-dinja aħna nkunu qed insaħħu t-tama tagħna li xi darba se “nieqfu quddiem il-Feddej tagħna; u bi pjaċir kbir inkunu nistgħu naraw wiċċu,” u nisimgħu leħnu: “Ejjew, imberkin minn Missieri, ħudu b’wirt tagħkom is-Saltna li tħejjiet għalikom.”
L-Eżempju tal-Presbiteru Bruce D. Porter
Fit-28 ta’ Diċembru tas-sena l-oħra, il-ħabib għażiż u maħbub tagħna Elder Bruce D. Porter, li kien Awtorità Ġenerali, temm il-vjaġġ tiegħu fil-mortalità. Huwa kellu 64 sena.
Jiena ltqajt l-ewwel darba ma’ Bruce meta konna studenti flimkien fl-Università ta’ Brigham Young. Huwa kien wieħed mill-aqwa u l-aktar studenti bravi li kien hemm. Wara li huwa rċieva d-dottorat tiegħu mill-Università ta’ Harvard, fejn speċjalizza fuq l-Affarijiet Russi, il-ħsieb u l-kitba ta’ Bruce wassluh biex kiseb ċerta prominenza li setgħet tefgħatu fi triq ħażina, iżda l-ġid u t-tifħir tad-dinja qatt ma għamlu bih. Il-lealtà tiegħu kienet biss lejn is-Salvatur tiegħu, Ġesù Kristu; lejn is-sieħba eterna tiegħu, Susan; lejn uliedu u n-neputijiet tiegħu.
Bruce kien twieled b’ difett fil-kliewi. Saritlu operazzjoni, iżda maż-żmien il-kliewi tiegħu baqgħu sejrin lura.
Fl-1995, ftit wara li Bruce ġie msejjaħ bħala Awtorità Ġenerali, aħna u l-familji tagħna servejna flimkien fi Frankfurt, il-Ġermanja, fejn il-ħidma tiegħu kienet tiffoka fuq ir-Russja u l-Ewropa tal-Lvant.
Fl-1997 ħajjet Porter inbidlet drammatikament meta l-kliewi tiegħu u saħħtu bdew sejrin lura. Il-familja Porter kellhom jerġgħu lura fil-Belt ta’ Salt Lake.
Tul it-22 sena li kien ilu jservi bħala Sebgħin, Bruce ddaħħal l-isptar bosta drabu u kellu jagħmel 10 operazzjonijiet. F’ żewġ okkażżjonijiet it-tobba kienu qalu lil Susan li Bruce ma kienx se jirnexxilu jgħix sa filgħodu, iżda rnexxielu.
Għal aktar minn 12-il sena li fihom kien qed iservi bħala Awtorità Ġenerali, Bruce kien għaddej minn proċess kontinwu li permezz tiegħu kien jissaffa kontinwament id-demm tiegħu. Għal parti kbira minn dan iż-żmien, kien iqatta’ erba’ sigħat għal ħamest iljieli fil-ġimgħa għaddej minn dan it-trattament ħalli matul il-jum huwa kien ikun jista’ jservi fis-sejħa tiegħu u jkun jista’ jirnexxielu jaċċetta wkoll xi essajnments għal xi konferenzi fi tmiem il-ġimgħa. Meta minkejja diversi barkiet saċerdotali saħħtu baqgħet ma marritx għall-aħjar, Bruce beda jħossu jitħawwad, iżda huwa kien jaf f’ min kellu jafda.
Fis-sena 2010, Bruce rċieva kilwa mingħand ibnu David. Din id-darba, ġismu aċċeta dan it-trapjant. Kien miraklu, fejn huwa ħassu jikseb saħħtu mill-ġdid, u eventwalment hu u Susan ġew mogħtija ċ-ċans li jerġgħu lura fl-għażiża Russja tagħhom fejn huwa serva bħala parti mill-Presidenza Reġjonali.
Fis-26 ta’ Diċembru tas-sena l-oħra, wara li kienu ilu żmien mhux ħażin jiġġieled numru ta’ infezzjonijiet ġewwa sptar fil-Belt ta’ Salt Lake, huwa talab lit-tobba biex joħorġu mill-kamra. Bruce qal lil Susan “li permezz tal-Ispirtu hu kien jaf li ma kienx hemm aktar li t-tobba setgħu jagħmlu biex isalvawlu ħajtu. Huwa kien jaf … li Missierna tas-Smewwiet kien se jieħdu d-dar ħdejh. Huwa kien mimli paċi.”
Fit-28 ta’ Diċembru, Bruce mar lura fid-dar tal-familja tiegħu. Ftit sigħat wara, imdawwar bil-maħbubin tiegħu, huwa reġa’ lura fil-paċi lejn id-dar tiegħu fis-smewwiet.
Snin ilu Bruce Porter kiteb lil uliedu dal-kliem li ġej:
“It-testimonjanza li jien għandi dwar ir-realtà u l-imħabba ta’ Ġesù Kristu minn dejjem kienet għalija d-direzzjoni ta’ ħajti. … Hija x-xhieda pura tal-Ispirtu tbaqbaq ġewwa fija li Huwa jgħix, li Hu sewwasew il-Feddej u l-Ħabib tiegħi f’kull mument ta’ ħtieġa li nkun ninsab fih.”
L-isfida tagħna …hi li nsiru nafu lis-Salvatur … u permezz tal-fidi tagħna fih negħlbu l-isfidi u t-tentazzjonijiet ta’ din id-dinja.”
“Ejjew mela nkunu fidili u leali u nafdaw fih.”
Bruce Douglas Porter għeleb id-dinja.
Jalla aħna lkoll nagħmlu daqsxejn ta’ sforz akbar biex negħlbu d-dinja, ma niġġustifikawx ċerta nuqqasijiet serji u fl-istess ħin inżommu s-sabar hekk kif nippruvaw negħlbu ċerti żbalji u dgħjufijiet żgħar, nagħmlu li nistgħu biex navvanzaw spiritwalment, u b’ ġenerożità ngħinu lil ħaddieħor. Hekk kif intom tafdaw bi sħiħ fis-Salvatur, inwegħidkom li intom tiksbu barkiet ta’ paċi akbar f’ din il-ħajja u assigurazzjoni akbar tad-destin etern tagħkom, f’ isem Ġesù Kristu, amen.