Tokoni ʻo Fakafou ʻi he Ngaahi Faingamālie Kuo Molé

ʻI he māhina kuo ʻosí, naʻe fili au ke u ʻalu ʻi ha polokalama ako ki Siamane ʻi ha uike ʻe ua. Naʻá ku fiefia ʻaupito ʻi he faingamālié: Naʻá ku teuteu ʻeku ngaahi meʻa fakapepá mo e vitioó ke tohi kole ki ha sikolasipi, peá u talaange ki hoku fāmilí fekauʻaki mo e folaú. ʻI he maau ʻa e meʻa kotoa pē, naʻe fakahā ʻe he kouʻōtineita ʻo e polokalamá kuo liliu ʻa e taʻu siʻisiʻi taha ke kau ki aí, pea naʻe ʻikai ke u lava ʻo ʻalu.

Hili ha uike ʻe ua mei ai, ne maʻu ha faingamālie ke ako ʻi he ʻIunaiteti Siteití, ka naʻe fuʻu lahi ʻa e fakamolé, pea ʻikai ke ma lava ʻo totongi ia. Hili ha uike ʻe taha mei ai, naʻá ku maʻu ha faingamālie ke tohi kole ki ha polokalama ʻe taha, ka naʻe ʻikai ke ma lava ʻo totongi ia.

Naʻá ku ongoʻi ʻoku ʻikai haʻaku ʻaonga ʻi he ʻikai ke u lava ʻo kau ki ha taha ʻo e ngaahi polokalamá. Ko e taimi kotoa pē naʻe mole ai haʻaku faingamālie, ʻe hoko mai ha faingamālie ʻe taha, pea naʻá ne fakafonu au ʻaki ha ʻamanaki lelei ʻoku kei ʻi ai haku faingamālie foʻou. Ka ʻi he ikuʻangá, ʻe mole foki meiate au ʻa e faingamālie hoko ko iá.

Lolotonga e taimi ko iá, ne u ongoʻi mahalo naʻe ʻikai totonu ke u maʻu e ngaahi faingamālie ko iá pea ko e ʻuhinga ia naʻe ʻikai ola lelei aí.

Naʻe poupouʻi maʻu pē au ʻe heʻeku faʻeé ʻi he ngaahi momeniti ko iá. Naʻá ne fakalotolahiʻi maʻu pē au, neongo naʻá ne fepaki foki mo ha ngaahi faingataʻa. ʻOku ou houngaʻia moʻoni ʻi heʻene poupoú pea mo e melino naʻe foaki mai ʻe he Tamai Hēvaní kiate aú.

ʻOku ou ʻilo ʻe fai ʻe Sētane ʻa e meʻa kotoa te ne lavá ke taʻofi ʻetau fakalakalaká; ʻokú ne loto ke tau mamahi, ʻo hangē pē ko iá. Ka kuo pau ke tau tuʻu maʻu lolotonga hono ʻahiʻahiʻi ʻetau tuí. ʻI he taimi ʻoku tau fehangahangai ai mo ha ngaahi tūkunga faingataʻa, ʻe ʻi ai maʻu pē ʻa e Tamai Hēvaní mo Sīsū Kalaisi.